Ho Keteka Lefu la Motho ea Phahameng ea Kileng a Phela Lefatšeng

“BONA, motho ke enoa.” Mantsoe ana ha a ka a buuoa tšimong ea Edene, ha ho no ho boptjoa motho ea phethahetseng Adama, nako e kaholimo ho lilemo tse 6 000 tse fetileng. A ile a buuoa lilemo tse ka bang 4 058 hamorao, ho motho ea neng a le boemong bo lekanang le ba Adama. Motho enoa o ile a tsoaloa ka mohlolo ke moroetsana oa mo-Jode, Maria morali oa Heli oa Bethlehema. Enoa, ea ileng a reoa Jesu, e ne e le Mor’a Molimo, eo bophelo ba hae bo ileng ba fetisetsoa lefatšeng ho tsoa leholimong ka matla a Molimo. Ho mo hlekela tsela ea ho khutlela leholimong, o ile a tlotsoa ka moea oa Ntat’ae oa leholimo. Hona ho etsahetse hang kamorao ho hore a kolobetsoe ke Johanne Mokolobetsi Nokeng ea Jordane, ka hoetla ea 29 C.E. Molimo o buile o le leholimong hore Jesu ea sa tsoa kolobetsoa e ne e le Mora oa hae. Johanne Mokolobetsi a pakela ’nete ena.—Joh. 1:29-36.

Lilemo tse tharo le sekheeqe hamorao, tsatsing la Paseka ea 33 C.E., a qosoa pel’a ’musisi oa Roma ea neng a busa naha ea Judea, Ponse Pilato. Lekhotla la Bajode la motse o moholo oa Jerusalema le ne le ile la mo qosa bosiung ba Paseka ’me ka hona la mo isa ho ’musisi oa Roma hore a tiise kahlolo ea bona ea lefu lebitsong la ’muso oa Roma. Ho phethahatsa boprofeta ba Bibele bo ho Pesaleme 41:9, e mong oa baapostola ba hae ba 12, Judase Iskariota, a mo eka ka ho mo lihela matsohong a lira tsa hae tsa Bajode. ’Musisi Pilato a fihlela Jesu a se molato oa liqoso tsa lekhotla le phahameng la Bajode. A bolella bongata ba Bajode bo neng bo bokane kantle ho ntlo ea ’musisi taba ena. Karabelo ea bona e mabifi e bile ena, “A thakhisoe! A thakhisoe!” Bahlabani ba Baroma ba roesa Jesu mofapahloho oa meutloa, ba mo apesa kobo e khubelu. Ho ea kamoo Jesu a neng a apere ka teng joale, a kentsoe mofapahloho le kobo e khubelu, ’Musisi Pilato a leka ho ipiletsa ho Bajode, bao ka nako e telele ba ileng ba haneloa ’muso oa bona, a re: “Bonang, morena oa lona ke eo!” Ka boikaketsi bo boholo, Bajode bao ba neng ba hlohleletsoa ke baprista ba baholo, ba arabela: “Ha re na morena, ha e se Cesare.”—Joh. 19:5-15.

Hamorao hona letsatsing leo Jesu a shoa le ho kenngoa lebitleng. O ile a shoa joaloka konyana ea Paseka e ileng ea jeoa ke baapostola ba hae bosiung bo ka pele ho bona, empa ha ho lesapo leha le le leng la ’mele oa hae le ileng la rojoa. (Ex. 12:46; Pes. 34:20) Baapostola ba tšepahalang ba neoa tlamo ea ho keteka lefu la hae selemo le selemo ka letsatsi la Paseka. Kamorao ho hore a phethe tlamo ea molao oa se-Jode ka ho ja sejo sa Paseka le baapostola ba hae, kapele kamor’a ketsahalo eo Jesu a hloma ntho eo ba neng ba tla e hopola ka lefu la hae. Sejo sa Morena, kapa Sejo sa Mantsiboea. Tlaleho e bululetsoeng ea ho hloma ha Jesu sejo se secha sa mantsiboea e baleha tjena:

“Ba re ba sa ja [sejo sa Paseka], Jesu a nka bohobe, ’me eitse hobane a boke, a bo ngoatha, a bo nea barutuoa ba hae, a re ho bona: Nkang, le je; hona ke ’mele oa ka. A nka le senoelo, a leboha, a ba nea sona, a re; Noelang ho sona bohle; hobane hona ke mali a ka a selekane se secha, a tšolleloang ba bangata tšoarelong ea Iibe. Empa ke re ho lona: Ho qala nakong eona ena, ha ke sa tla hlola ke e-noa se beoang ke morara, ho tla be ho fihle tsatsi leo ke tla se noa le lona se le secha, ’musong oa Ntate. Eitse hobane ba bine lithoko, ba ea thabeng ea Mehloare.”—Matt. 26:26-30.

Nakong ena ea sejo sa Paseka, Jesu o ne a se a lelekile Judase Iskariota, morutuoa oa moeki. Kahoo mantsoe a Jesu ho barutuoa ba 11 ba setseng ha a ka a sebetsa ho morutuoa eo ea sa tšepahaleng: “Ha ke sa tla hlola ke e-noa se beoang ke morara, ho tla be ho fihle tsatsi leo ke tla se noa le lona se le secha, ’musong oa Ntate.” (Matt. 26:29) Mantsoe ana a ne a sa bolele ka ho ba ha bona lefatšeng e le bafo ba nama ba ’Muso nakong ea puso ea lilemo tse 1 000 ea Messia Jesu. Hona ho ne ho tla bolela hore nakong eo ba ne ba tla be ba shoele khale ’me ba emetse ho tsosetsoa bophelong mona lefatšeng kamorao ho “ntoa ea letsatsi le leholo la Molimo o matla ’ohle” Harmagedone. (Tšen. 16:14-16) Empa leha ho le joalo, Jesu o ne a sa bue ka boemo bo joalo ho barutuoa ba hae ba tšepahalang, ba kang bana ba 11. O ne a bua ka ho ba ha bona ’musong oa leholimo le eena kamor’a hore ba tsosetsoe bophelong ba moea.

Selemong se ka pele ho sena (32 C.E.), o ile a bua mantsoe ana ho barutuoa ba hae: “Ntat’a lona o tseba hobane lea li hloka; le mpe le batle ’muso oa Molimo pele, ’me lintho tseo kaofela le tla li ekeletsoa. Mohlatsoana, se tšabe, hobane ho khahlile Ntat’a lona ho le fa ’muso.” (Luka 12:30-32) Ha Ntate oa leholimo a ba nea ’muso oa leholimo ho ne ho tla akareletsa ‘selekane sa ’Muso,’ ’me Morena Jesu o ne a lebisitse tabeng ena ha ne a bua le baapostola ba tšepahalang ba 11 ka ho hopola lefu la hae: “Ke lona ba tiiselitseng le ’na melekong ea ka. ‘Me ’na ke le nea ’muso, joale ka ha Ntate a ’neile oona, le tle le be ba jang le ba noang tafoleng ea ka ’musong oa ka; ’me le tle le lule literoneng, le ahlole meloko e leshome le metso e ’meli ea Iseraele.”—Luka 22:28-30.

Ho hlakile hore ba ileng ba kopanela Sejong sa Morena sa Mantsiboea moketeng oo oa pele ba ne ba le moleng oa ho amohela ’muso oa leholimo le Morena Jesu Kreste ea tlotlisitsoeng. Ka tsela e tšoanang, bao hamorao ba neng ba tla keteka Sejo sa Morena sa Mantsiboea e lokela ho ba ba nang le pitso ea leholimo le bao Jesu Kreste a ba kenyang ‘selekaneng sa ’Muso.’

Moapostola Pauluse o ile a ngolla Bakreste ba sehlopha sena, ho e ka bang lilemo tse 22 hamorao, (ho e ka bang ka 55 C.E.) moo a ileng a bua ka sejo sa Morena le tsoho ea bafu, ke hore, ‘tsoho ea pele.’ Mantsoe a hae ho bona e bile ana: “Ho tla ba joalo le tsohong ea bafu. ’Mele o jalloa ho boleng, o tla tsohela ho se bole; o jaloa e le ntho e nyatsuoang, o tla tsoha o khanya; o jaloa o fokotse, o tla tsoha o le matla; o jaloa e le ’mele oa nama, o tla tsoha e le ’mele oa moea. ’Mele oa nama o teng, le oa moea o teng. . . . ’Me kamoo oa leholimo a leng kateng, le ba leholimo ba joalo. ’Me joale ka ha re apere setšoantšo sa oa lefatše [Adama], re tla apara joalo setšoantšo sa oa leholimo.”—1 Ba-Kor. 15:42-49; Tšen. 20:5, 6.

Leha ho le joalo, pele a bua ka taba ea tsoho, moapostola Pauluse o ile a ngola ka ho ketekoa ha selemo le selemo ha Sejo sa Morena a re: “Hobane ’na ke amohetse ho Morena seo ke le neileng sona, ke hoba Morena Jesu, ka bosiu boo a ekiloeng ka bona, o na a nke bohobe; ’me hobane a lebohe, a bo ngoatha, a re: Nkang, le je; hobane ke ’mele oa ka o robeloang lona; le etse hoo, le tle le nkhopole ka hona. Ka mokhoa o joalo, a nka senoelo, hobane ho lalloe [ka bohobe], a re: Senoelo sena ke selekane se secha maling a ka; etsang hoo, ka mehla eohle ha le e-noa le tle le nkhopole ka hona. Efela ka mehla eohle, ha le e-ja bohobe boo, ’me le noela senoelong seo, etlaba le bolela lefu la Morena, a tle a be a fihle.”—1 Ba-Kor. 11:23-26.

‘Ho bolela ha bona lefu la Morena’ ho ne ho na le molemo oa moea, ho ne ho ba etsa ba fapaneng ho Bajode ba hlaho. Boemong ba hore ba keteke Paseka ea selemo le selemo le ho lopolloa ha bona naheng ea bahatelli ea Egepeta, ba ne ba tla keteka lefu la motho ea neng a tšoantšetsa konyana ea Paseka e ileng ea etsoa sehlabelo naheng ea Egepeta. Konyana ea boholo-holo e ile ea sebeletsa ho lopolla Baiseraele ba hlaho bohlankeng ba bona Egepeta, empa ha ea ka ea ba lokolla tsuong ea sebe. Ka lehlakoreng le leng, lefu la “Konyana ea Molimo e tlosang libe tsa lefatše” le lokolla barutuoa ba Jesu Kreste tsuong ea sebe le ho lokolloa ha bona ho ikarola tsamaisong ea lefatše ea lintho e tšoantšetsang Egepeta. Hape le hopotsa barutuoa ka motheo oa selekane se secha, e leng tokisetso ea Molimo ea ho ikhethela batho ba tla bitsoa ka lebitso la hae lefatšeng, hobane Jesu Kreste, Moshe e moholoanyane, ke ’muelli oa ‘selekane sena se secha.’ (Jer. 31:31-33) Hape ho ba hopotsa ka ‘selekane sa ’muso,’ seo ba kentsoeng ho sona. Ha ba lokela ho lebala hore ba bitsetsoa ’musong oa leholimo e le majalefa le Jesu Kreste, setloholo sa Morena Davida, “Morena oa marena le ’musi oa babusi.”—Tšen. 19:16.

BASHEBELLI BA KANG LINKU BA MOKETE

Kajeno lena, nako e haufi le timetso ea tsamaiso ena ea lintho, ke masala a barutuoa ba Kreste feela ao e tlang ho ba majalefa le eena ’musong oa leholimo. Empa mokete oa oona oa Sehopotso sa selemo le selemo o bohlokoa haholo ho bongata bo holang ba batho ba tsoang lichabeng tsohle. Bana ba thabela memo ea ho ba moketeng oa Sejo sa Morena sa Mantsiboea se ketekoang ke masala a Baiseraele ba moea, ba leng selekaneng se secha le selekaneng sa ’Muso. Bana ba ikarotse lefatšeng le laoloang ke Diabolose ’me ba tsamaisana le masala a Baiseraele ba moea ho leba Naheng ea Pallo, tsamaisong e ncha ea lintho e entsoeng ke Molimo, tlas’a ’muso oa Jesu Kreste le majalefa a hae a 144 000. Bana ba ile ba tšoantšetsoa ke bongata bo kopaneng boo e neng e se Baiseraele bo ileng ba tsoa naheng ea Egepeta ea bodemona bosiung ba Paseka, ba ikopanya le Baiseraele ba neng ba tsoa naheng ’me ba amohela borapeli ba Jehova Molimo. (Ex. 12:38) “Letšoele le kopakaneng” la feta Leoatleng le Lefubelu le Baiseraele ’me la fetoha lipaki tsa kamoo Jehova a ileng a lokolla batho ba hae ’me la kopanela lintho le bona. Sena se ile sa ba thabisa hakaakang!

“Letšoele le kopakaneng” la metsoalle ea Baiseraele ba moea kajeno le tšoantšetsoa ke “bongata bo boholo” boo ho seng motho ea ka tsebang ho bo bala bo ileng ba bonoa ke moapostola Johanne e le bo thabileng tempeleng ea moea ea Jehova. Hobane ba ikarotse lefatšeng lena la khale le silafetseng, ba ile ba tšoantšetsoa ba “apere liaparo tse telele tse tšoeu” ba tšoere “lipalema matsohong a bona.” Ho tšoana le masala a Baiseraele ba moea, ba ineetse kahohle ho Jehova Molimo lebitsong la Konyana ea hae, Jesu Kreste, ’me ba bontšitse boineelo bo joalo ba bona ka kolobetso ea metsi. Ba talimile pele ho pholoha ‘mahlomola a maholo’ a leng kapele ho timetso ea lefatše lena, kamorao ho ona ba tla tseba ho hoa ka thabo: “Poloko kea Molimo oa rona, o lutseng teroneng, le ea Konyana.” (Tšen. 7:9, 10) Kahoo, ka mabaka a maholo, ‘bongata bona bo boholo’ bo batla ho bokana le masala a moea bosiung boo ba ho hopola lefu la Konyana.

Ho tloha ka selemo sa 1936 ha ho ketekoa Sehopotso, litho tsa “bongata bo boholo” li ile tsa ikutloa li lokolohile hore li be teng ho hopola Sejo sa Morena sa Mantsiboea, le hoja bona ba sa je le ho noa bohobe le veine tsa tšoantšetsoa. Kamorao ho hore litho tsa bongata bo boholo bo ho Tšenolo 7:9-17 li khetholloe ka Motšeanong 31, 1935 kopanong ea Lipaki tsa Jehova Washington (D.C.), ba ile ba mengoa ka ho khethehileng ke masala a tlotsitsoeng hore ba be teng e le bashebelli Sejong sena. Ba ile ba etsa joalo ba susumetsoa ke kananelo e tsoang botebong ba pelo ka baka la sehlabelo sa topollo sa Morena Jesu Kreste. Ho se je ha bona litšoantšetso e ne e se taba ea boiketsitso, kapa lithibelo tse beiloeng ke batho ho bona, empa ba ne ba mamela se boleloang ke Lentsoe la Molimo.

Hobane’ng e le ’nete? Hobane Mothei oa mokete ona o boletse hore o tla hopoloa ke bao a entseng selekane sa ’muso oa leholimo le bona. Le hoja “bongata bo boholo” bo ineetse le ho kolobetsoa, boa hlokomela hore ha boa kenngoa selekaneng sa ’Muso. Ha se Baiseraele ba moea, hape ha ba ‘selekaneng se secha’ se ileng sa hlongoa le Baiseraele ba moea ka Mokena-lipakeng Jesu Kreste. Ha ba tlotsoa ka moea o halalelang o ileng oa qala ho tšolleloa ho barutuoa ba 120 koana Jerusalema tsatsing la Pentekonta ka 33 C.E. Ha re sebelisa puo ea tšoantšetso, ha ba ka ba ‘shoa le Kreste’ ka hore ba tele litebello tsohle tsa ho phela lefatšeng la Paradeise tlas’a ’muso oa Molimo. Ha ba lebella ho ‘patoa’ le Kreste, hore ba ‘tšoane le eena tsohong.’ Ka baka leo haeba ba ka kopanela ho ja le ho noa bohobe le veine tseo haholo-holo li tšoantšetsang ’mele le mali a Jesu Kreste, ba tla be ba fosa haeba ba re ha ba litokisetsong tse joalo le Jesu Kreste, Konyana ea Molimo. Ka baka la sena ha ba kopanele ho ja le ho noa litšoantšetso le masala a tlotsitsoeng. Leha ho le joalo, ho se je ha bona ha ho ba thibele ho fumana bophelo bo sa feleng, bo tlang ka ho lumela Jesu Kreste le tokisetso ea sehlabelo sa topollo.—Ba-Roma 6:4, 5; Ba-Kol. 2:12, 20; 1 Joh. 2:1, 2.

Le hoja e le litho tsa “linku tse ling,” ba bokeletsoe hammoho ke Molisa ea Molemo, Jesu Kreste, ’me e tla ba “mohlape o le mong” hammoho le linku tsa masala a moea tsa “lesaka lena” tseo Jesu a buileng ka tsona ho Johanne 10:16. Ba hlokomela hore ho lopolleloa ha bona bophelong bo sa feleng Paradeiseng ea lefatšeng e tšepisitsoeng ho tsoa ho Molimo ka Molisa ea Molemo, eo hona joale ba leng mohlapeng oa hae. Ka baka leo, ho ka tla joang hore ba se hlonephe Kreste ka hore ba se be teng le ho hopola sejo sa mantsiboea seo a ileng a se hloma hore ho hopoloe lefu la hae, leo poloko ena e mohau e tlang ka lona? Ka sebele ba ke ke ba hlōleha ho ba teng! Ha ba batle ho etsa joalo. Ha feela masala a majalefa a ’muso oa leholimo a tsoela pele ho etsa mokete ona lefatšeng, ba hlokomela hore ba tlameha ho ba teng Sejong sa Morena sa Mantsiboea e le bashebelli. Le hoja mohlomong libakeng tse ngata ho se teng e mong oa masala a kopanelang ho ja le ho noa litšoantšetso, Lipaki tsa Jehova li batla ho lokisetsa mokete ona hore o be sebopehong se hlonephehang ka baka la seo o se emelang ’me ba lokisetsa monyetla hore leha e le ofe ea teng ea ka ipakang e le e mong oa masala, a tsebe ho ka ja le ho noa litšoantšetso.

Monongoaha Sejo sa Morena sa Mantsiboea se tla etsoa ke Lipaki tsa Jehova kamorao ho shoalane ka ’Mesa 19, 1981. Batho bohle ba lakatsang ho ba teng Sehopotsong sena sa lefu la Konyana ea Molimo, Jesu Kreste, ba iteanye le phutheho ea Lipaki tsa Jehova e sebakeng sa bona. Batho ba hlonephehang ba sa tsebeng moo phutheho e leng teng sebakeng sa bona ba lokela ho ngolla Mokhatlo oa Watchtower ho fumana boitsebiso bo hlokahalang.

[Mongolo o botlaaseng ba leqephe]