“Mohlahlobi” ha a Talimile Harmagedone

1. Ho tla etsahala joang ka Harmagedone e talimiloeng ke sehlopha sa “mohlahlobi.” ’me “mohlahlobi” enoa o hlile a tšoantšetsoa ke mang mehleng ea Morena Ezekiase Jerusalema?

HARMAGEDONE ke lebitso la Seheberu la sebaka seo ‘ntoa ea letsatsi le leholo la Molimo o matla ’ohle’ e tla tloha e loaneloa. Masala a sehlopha sa “mohlahlobi” hona joale a talimane le ‘ntoa’ eo ka eona tsamaiso ea lintho ea lefatše e tla felisoa ka ho sa feleng. Kahoo sehlopha sa “mohlahlobi” se lula se falimehile moeeng ho bona kamoo ho khutla ha morena, Jesu Kreste ea tlotlisitsoeng, ho tlang ho timetsa lira tse bonahalang tsa ’Muso oo li o rapellang ho Jehova Molimo: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Matt. 6:9, 10; Tšen. 16:14-16) Boemo bona ba lefatšeng lohle ba litaba bo ile ba tšoantšetsoa kapa ba hla ba boleloa ke se ileng sa etsahala bohlahlobing ba Morena Ezekiase oa Jerusalema ka eo a neng a mo entse mohlahlobi oa borena nakong e mahlonoko haholo.

2. Mojode eo e ne e le mang, ’me o ne a nkile sebaka sa mang bohlahlobing ba borena, ho ea ka Esaia 22:15-25?

² “Mohlahlobi” e ne e le Mojode ea neng a bitsoa Eliakime mora oa Hilkia. Ka makhetlo a mararo o boleloa e le monna eo e neng e le “molotolotsi oa ntlo” ea Morena Ezekiase. (Esa. 36:3, 22; 37:2) O ne a nkile sebaka sa monna ea neng a bitsoa Shebna setulong sena sa borena. Taelo ea Molimo ka Eliakime le Shebna e tlalehiloe ho Esaia 22:15-25. Moo rea bala:

“Morena, Jehova oa makhotla, o boletse, a re: Tloha, u ee ho ’moloki oa leruo, ho Shebna, qhoku ea ntlo ea borena, u re ho eena: U etsa’ng mona? U na le mang mona, ha u ipetletse lebitla mona? U betlile lebitla phahameng, u icheketse moaho lefikeng. Bona, Jehova o tla u tšoara, a u lahlele hole ka matla; a u phikolose, u phikolohe joale ka pilikoane lebaleng la lefatše le batsi, le ahlameng; u tla shoela teng, ’me makoloi a khanya ea hao a tla fella teng, uena, lihlong tsa ntlo ea mong a hao. Ke tla be ke u lelekise kabelong ea hao, u tlosoe tulong tsa hao.a

“Ka letsatsi leo, ke tla bitsa mohlanka oa ka Eliakime, mora oa Hilkia; ke tla mo apea kobo ea hao, ke mo tlame ka senyepa sa hao, ke bee puso ea hao letsohong la hae; e tla ba ntat’a ba ahileng Jerusalema le oa ntlo ea Juda. Ke tla bea senotlolo sa ntlo ea Davida lehetleng la hae; o tla bula, ’me ha ho ea tla koala; o tla koala, ’me ha ho ea tla bula. Ke tla mo hloma joale ka thakhisa moo ho tiileng, e be setulo se khanyang tlung ea ntat’ae. E tla ba eena tšiea ea khanya eohle ea ntlo ea ntat’ae, ea mahlomela le ea makala, le ea lipitsana, ho qala ka lipitsa tsa mehope ho isa ho lijana kaofela.

“Tsatsing leo, ha ho bolela Jehova oa makhotla, thakhisa e hlomiloeng moo ho tiileng e tla tlosoa, e lahloe, e oe, ’me ntho tsohle tseo e neng e li jere, li tla oela fatše, hobane Jehova o boletse.”

3. (a) Lebitso la Eliakime le bolela eng, ’me se boleloang ke lona se ile sa bonoa joang tabeng ea ea neng a bitsoa ka lona (b) Ho ile ha rōmeloa bo-mang ho ea mamela puo ea bonyefoli ka pel’a marako a Jerusalema, ’me boipiletso ba thuso ba qetella bo lebisitsoe ho mang?

³ Bonneteng ba tlhaloso ea lebitso la hae, “Molimo oa tsosa,” Jehova a phahamisa Eliakime ho hloella bohlahlobing ba ntlo ea borena ea Morena Ezekiase. Hona ho etsahetse pele morena oa Assyria, Sankeribe, a futuhela naha ea Juda ka 732 B.C.E. Sankeribe a bea mabotho a hae thokonyana ho Jerusalema eaba o rōmela ’mueli oa hae, Rabshake, hammoho le balebeli, ho ema ka pel’a Jerusalema ’me ba laele hore e ineele. Ha a santsane a etsa joalo, Rabshake a nyelisa Jehova Molimo ’me a phahamisa Assyria le morena oa eona. Morena oa Jerusalema, Ezekiase, a rōmela baemeli ba hae ho ea mamela puo ena e nyefolang Molimo, ba akarelletsa Eliakime, eo joale e neng e le mohlahlobi, hammoho le Shebna, ea neng a theoletsoe hore e be mongoli, le Joah, ’moloki oa mangolo a borena. Ba hlomohile haholo ka baka la seo ba se utloileng, ba tlalehela Morena Ezekiase. A ikutloa ho hang a feletsoe ke thuso, morena a ipiletsa ho moprofeta Esaia, moemeli oa Jehova.—Esa. 36:1-37:7.

4. Phethahatsong ea hona joale ea tšoantšetso eo ea boholo-holo, Sankeribe o ne a tšoantšetsa mang, Ezekiase o tšoantša mang, Eliakime eena?

⁴ Moo re bona litšobotsi tse tšoanang tse kenang boemong bo thata ba kajeno. Ka ho lumellanang Sankeribe morena oa Assyria o ne a tšoantšetsa sera sa ’muso oa Molimo, e leng Satane Diabolose,b ea batlang hore batho ba ineetseng ba Molimo ba ineele ka kotlo ea bokhoba kapa timetso. Morena ea tlotsitsoeng Ezekiase, eo lebitso la hae le bolelang “Jah o tiisitse,” o tšoantšetsa eo hajoale e leng Morena ea busang, Jesu Kreste, ea utloang ka matla mahlomola a barutuoa ba hae ba tšepahalang ba lefatšeng ha bana ba rohakoa le ho talimana le tšokelo ea ho timetsoa matsohong a phutheho ea Diabolose. Eliakime, “mohlahlobi” oa ntlo ea Morena Ezekiase, o tšoantšetsa masala a sehlopha sa “mohlahlobi” a sa ntsaneng a le lefatšeng ‘bofelong bona ba tsamaiso ea lintho’ ho tloha ka 1914 C.E. Joalokaha mohlahlobi oa tšoantšetso Eliakime e ne e le Mojode kapa Moiseraele, masala a kajeno a entsoe ka Baiseraele ba moea tlas’a Morena ea busang Jesu Kreste.

5. Ka ho ’na ba tsamaisa makasine ea Molula-Qhooa lefatšeng ka bophara, ba masala a tlotsitsoeng ba ikopanya le mang, hona ke neng ba ileng ba lahla mabitso ’ohle a bonyefoli ao ba neng ba bitsoa ka oona?

⁵ Nakong ena e seng e ile litho tse ntseng li fokotseha tsa masala a tlotsitsoeng li sa ntsane li tsamaisa lefatšeng ka bophara, le ka lipuo tse ngata, makasine ea Molula-Qhooa o Tsebahatsa ’Muso oa Jehova. Ho itsebahatsa hona ho hongata ha oona le Jehova Molimo ke phello e utloahalang ea ho tsamaea ha lekholong la lilemo la mashome a mabeli ha liketsahalo tsa puso ea leholimo. E, hobane ka selemo se hopolehang sa 1931 likete tse ngata tsa masala a tlotsitsoeng li ile tsa kopana kopanong e akaretsang Columbus, Ohio, ’me moo, ka la 26 Phupu, ka lentsoe le le leng a amohela qeto eo ka eona a ileng a nka lebitso le lumelloang ke Bibele “lipaki tsa Jehova.” Kahoo a latola mabitso ’ohle a thohako ao litsamaiso tsa bolumeli tsa Bojakane li neng li a reile liithuti tsena tsa Bibele tse kopaneng lichabeng tsohle. Ka tatelano e khutšoanyane liphutheho tsohle tsa Baiseraele ba moea ho pota lefatše lohle ka ho lumellana tsa amohela lebitso.

6. Ka ho itjarisa lebitso la Molimo joalo, ba nka eng ka boithatelo?

⁶ Kahoo tsa nka boikarabelo bo fanoeng ka mantsoe a neng a tobisitsoe ho Baiseraele ba mehleng ea moprofeta Esaia:

“Ke lōna lipaki tsa ka, ho bolela Jehova, le eena mohlanka oa ka eo ke mo khethileng, hore le tle le tsebisise, ’me le ntumele, ’me le ikutloele hobane ke ’na. . . . ka baka leo, le lipaki tsa ka, ho bolela Jehova.”—Esa. 43:10-12.

BOIKARABELO BA BOHLAHLOBI

7. (a) Ke joang boipolelo ba bolumeli ba bohlahlobi pele ho lala Ntoa ea I ea Lefatše ka 1918 bo neng bo shanofatsa boipolelo ba bona? (b) Baruti ba Bojakane ba ipakile ba tšoana le Shebna joang?

⁷ Ho tšoana le Shebna ’musong oa Morena Ezekiase mehleng ea Esaia, ho teng baruti ba bolumeli ba Bojakane ba ipolelang hore ba na le tokelo e khethehileng ea bohlahlobi ba lefatšeng tlas’a Ezekiase e Moholoanyane, Jesu Kreste. Empa ho fapana le baruti, litho tse tšepahalang tsa masala a tlotsitsoeng a Lipaki tsa Jehova li loanne ka tieo ho phethahatsa ka bonnete bohlahlobi ba ’Muso. Hona e bile ’nete ka ho totobetseng ho tloha ho laleng ha ntoa ea pele ea lefatše e ileng ea qala Bojakaneng. Ka nako eo baruti ba lapetseng ntoa ba Bojakane ka ho ke keng ha hlakoloa ba ne ba iketselitse tlaleho ea bona mabapi le bohlahlobi boo ba neng ba ipolela hore ba bo amohetse ho Morena, Jesu Kreste. Le ka nako eo bopaki bo ne bo phaellane hore “mehla ea lichaba” kapa “mehla e beetsoeng Balichaba” e ne e feletse hoetla ka 1914. E, hape, hore Jesu Kreste ea tlotlisitsoeng o ne a qalile ho rena a le maholimong e le Ezekiase e Moholoanyane. (Ezek. 21:25-27; Luka 21:24) Empa na baruti ba Bojakane ba ile ba tsoa ho tla tšehetsa ’muso o hlomiloeng oa Jehova ka Kreste? Che!

8. Hoba Selekane se hlōlehe, baruti ba Bojakane ba nka bohato bofe ha bo bapisoa le ba masala a Baiseraele ba moea?

⁸ Ka 1919 baruti ba Bojakane ba fana ho sebeletsa e le bahlahlobi ba ho neng ho reroa ho etsoa—Selekane sa Lichaba. Empa Selekane seo sa hlōleha ka ho feletseng ka 1939. Hona joale se nketsoe sebaka ke boemeli bo bolokang khotso bo entsoeng bocha, Machaba a Kopaneng. Ka ho se tšoane ho feletseng le baruti bao, masala a Baiseraele ba moea a tsoela pele ho tšehetsa ’muso o hlomiloeng oa Molimo ka Kreste.

9. Ho latela linnete tsa pale, karabelo ea kajeno potsong ea Jesu ke efe, ho Luka 12:42?

⁹ Kahoo, ho tloha qalehong ea kahlolo ea bomolimo ka 1918. ke bafe ba neng ba neiloe tlotla e le mohlahlobi kapa ba tiisoa ho bona? Linnete tsa pale ho tloha ka 1918, tse ipuellang, lia arabela: Masala a tlotsitsoeng a Baiseraele ba moea. Ona e le sehlopha ke karabelo potsong ea Jesu, “Mohlahlobi ke ofe ea khabane, ea bohlale, eo mong a hae a ’meileng moalosi oa bahlanka ba hae, ho ba nea lijo tsa bona ka nako e tšoanelang?” (Luka 12:42) Ke bona bao e leng Eliakime e Moholoanyane oa kajeno. Ke hore, ke sehlopha sa “mohlahlobi” se neng se tšoantšetsoa ke Eliakime ea khabane ea bohlale nakong ea puso ea Morena Ezekiase (745-716 B.C.E), nakong ea phutuho ea Baassyria ha ba kena naheng ea Juda.

10. Ho ea ka boprofeta ba Jesu ho Luka 12:43, 44, mohlanka oa “mohlahlobi” joalokaha a emeloa ke Baiseraele ba moea, o ne a tla ba “lehlohonolo” joang?

¹⁰ Ho sa tsotellehe malimabe holim’a Bojakane le lefatše lohle la batho ka kakaretso, masala a “mohlahlobi” ea tšepahalang ha e le hantle, a “thabile,” joalokaha Jesu ka boeena a hlile a bolela, a re: “Ho lehlohonolo [ho thabile] mohlanka eo, etlareng morena oa hae ha a e-tla, a mo fumane a ntse a etsa joalo.” Hobane’ng? Ka baka la ’nete ea hore, joalokaha Jesu a ile a bolela ho ea pele a re, “Ka ’nete ke re ho lōna: O tla ’mea moalosi oa mesebetsi ea hae kaofela.”—Luka 12:43, 44.

11. Ho ea ka Esaia 22:20, 21. Jehova a re o tla nkela Shebna sebaka joang?

¹¹ Ka tsela ea moea ho etsahalletse masala a tšepahalang a Baiseraele ba moea joalokaha ho ile ha etsahalla Eliakime mora oa Hilkia, ea ileng a nka sebaka sa Shebna ea neng a ikhalalelitse e le “mohlahlobi” tlung ea Morena Ezekiase. Joalokaha Jehova a itse ho moprofeta oa hae Esaia: “Ka letsatsi leo [mohla Jehova a qhelang Shebna setulong sa hae], ke tla bitsa mohlanka oa ka Eliakime, mora oa Hilkia, ke tla mo apesa kobo ea hao, [Shebna], ke mo tlame ka senyepa sa hao, ke bee puso ea hao letsohong la hae; e tla ba ntat’a ba ahileng Jerusalema le oa ntlo ea Juda.”—Esa. 22:20, 21.

12. Hoo ho ile ha lumellana le ketso efe ea Jesu Kreste ho tloha selemo ka 1919?

¹² Hona ho lumellana le ho khetha ha Jesu sehlopha sa “mohlahlobi” ea khabane le ea tšepahalang ho alosa mesebetsi eohle ea hae ea ’Muso. Haholo-holo ho tloha selemo selemong sa kamorao ho ntoa sa 1919 ho ileng ha phetloa khaolo e ncha paleng ea bolumeli. Ka nako eo, joaloka Eliakime, masala a sehlopha sa “mohlahlobi” ea tšepahalang, ea bohlale sa apesoa ka tlotla ea ho ba manqosa a ’muso o hlomiloeng oa Jehova Molimo ka Kreste. (2 Ba-Kor. 5:20) Boemong bona se tsebahalitse ’muso o hlomiloeng ‘lefatšeng lohle leo ho ahiloeng ho lona e le bopaki ho lichaba tsohle.’ (Matt. 24:14; Mar. 13:10) Ha ho boleloa ka tšoantšetso, Molimo o matla ’Ohle o tlamile matheka a bona bakeng sa ho phethahatsa tšebeletso ena e boima ka ho tlama matheka a bona ka ‘seaparo’ sa mohlahlobi kapa bolaoli (so·khenʹ, ka Seheberu; oikonómos, ka Segerike sa Septuagint)—bapisa Zakaria 3:1-7.

13. Ke neng ba etsang sehlopha se entsoeng ka litho tse ngata tsa “mohlahlobi” ba tsoileng Babylona e Moholo, ’me ‘puso’ ea “mohlahlobi” enoa e atoloselitsoe ho bo-mang?

¹³ Ka ho hlokomelehang ho tloha ka 1919, Jehova Molimo o ntšitse pitso ena ea hore batho bohle ba hae ba ineetseng ba tsoe “Babylona e moholo,” ’muso oa lefatše oa bolumeli ba bohata. (Tšen. 18:2, 4) Bao ba etsang sehlopha sa “mohlahlobi” ka kutlo ba fela ba tsoa, ’me Morena oa bona oa leholimo, Morena Jesu Kreste ea teng ka ho se bonahale, o ba sebelisitse e le sehlopha ho nea bohle ba moleng oa ’Muso oa leholimo “ho ba nea lijo tsa bona ka nako e tšoanelang.” Ntlheng ena, sehlopha sa Eliakime se tšoana le “ntate” ea lokisetsang bohle ba neng ba tšoantšetsoa ka ‘ba ahileng Jerusalema . . . le ntlo ea Juda.’ “Puso” e kang eo Jehova ka Kreste a e neileng letsohong la sehlopha sa “mohlahlobi,” ’me “mohlahlobi” enoa ea entsoeng ka litho tse ngata ka bokhabane le ka bohlale o sebelisitse borena bona ho tla fihlela joale. Haholo ho tloha ka 1935 “bongata bo boholo” ba “linku tse ling” tsa Kreste bo fumaneng molemo ka tlhokomelo e joalo e kang ea ntate, ho tšoana le “molichaba ea neng a le” ka hare ho menyako ea Jerusalema ea boholo-holo.—Ex. 20:10; Joh. 10:16; Tšen. 7:9-17.

14. “Mohlahlobi” o phethile boikarabelo ba hae joalokaha bo tšoantšelitsoe ke ho jara ha Eliakime “senotlolo sa ntlo ea Davida joang”?

¹⁴ Ho beiloe boikarabelo bo boima holim’a sehlopha sa Eliakime sa kajeno ho tšoana le se hlalositsoeng ka mantsoe a Jehova mabapi le Eliakime oa mehleng ea Morena Ezekiase: “Ke tla bea senotlolo sa ntlo ea Davida lehetleng la hae; o tla bula, ’me ha ho ea tla koala; o tla koala, ’me ha ho ea tla bula.” (Esa. 22:22) Sehlopha sa “mohlahlobi” se entsoeng ka batho ba bangata se iponahalitse se tšoaneloa ke ho jara “senotlolo sa ntlo ea Davida” sa borena. Se lutse se falimehile ho sireletsa lithahasello tsa lefatšeng tsa ’muso oa Molimo oa Messia joalokaha li tšoantšetsoa ke “ntlo ea Davida.” Sa amohela bao Morena a ba khethileng ho etsa litho tsa ho qetela tsa masala a majalefa a ’Muso. Ka 1935 sa qala ho amohela “linku tse ling” tseo Molisa ea Molemo a neng a khahliloe ho li bokella ho thea ‘mohlape o le mong’ le masala a tlotsitsoeng. Sa koala monyako bakeng sa bakoenehi bohle ba lelekiloeng le ba lekang ho khukhunela ho silafatsa Lipaki tsa Jehova.—Bapisa Tšenolo 3:7.

15. Jehova a rera ho khokhothela Eliakime joaloka eng sebakeng se tiileng, ’me ke lintho life tse neng li tla leketla ho eena?

¹⁵ A profeta ho ea pele mabapi le sehlopha sa kajeno sa Eliakime, Jehova a re: “Ke tla mo hloma joale ka thakhisa moo ho tiileng, e be setulo se khanyang tlung ea ntat’ae. E tla ba eena tšiea ea khanya eohle ea ntlo ea ntat’ae, ea mahlomela le ea makala, le ea lipitsana, ho qala ka lipitsa tsa mehope ho isa ho lijana kaofela.”—Esa. 22:23, 24.

16. Eliakime a nka sebaka sa mang, ’me Eliakime oa sebele e khetheloa tšebeletso efe lebitsong la “bahlanka”?

¹⁶ “Thakhisa” e hlongoeng moo ho tiileng eo lipitsana tsa ntlo li neng li tla fanyehoa e ne e tšoantšetsa Eliakime, mohlahlobi e mocha ea ileng a nka sebaka sa Shebna. Ka mokhoa oa teng a beoa ho ikarabella ho fana ka lijo le lino lithong tsa ntlo ea borena. Ho khethoa ha Eliakime hore a sebeletse sebakeng seo ho ne ho tšoantšetsa hore Ezekiase e Moholoanyane, Jesu Kreste, ha a tla ka khanya ea hae, o tla amohela sehlopha sa “mohlahlobi ea khabane” ho okamela masala a majalefa hammoho le eena a sa ntsaneng a le lefatšeng ho nea “bahlanka” bana ‘lijo ka nako e tšoanelang’ kamoo li hlokahalang, le haeba ke ka tekanyo e khōlō kapa ka tekanyo e nyenyane, hona ho itšetlehile ka mofuta oa lijo tse thata kapa lino. Koana, “lijo” tse joalo li ne li tla tsoa ka Lentsoeng la Molimo. Leha ho le joalo, ponong e ’ngoe ea Bibele, “lipitsa” tseo li tšoantšetsa bahlanka ba Molimo ka bobona, ba nang le matla a sa tšoaneng a tšebeletso.—2 Tim. 2:20-22.

17. Ke ka tsela efe Eliakime e neng e tla ba “tšiea ea khanya” tlung ea ntat’ae, ’me “mahlomela le makala” a ntat’ae a ne a tla fumana molemo joang ka see?

¹⁷ Eliakime o ne a tlameha ho fetoha “tšiea ea khanya” tlung ea ntat’ae, Hilkia. Hona ho bolela hore o ne a ke ke a tlontlolla ntlo ea ntat’ae kapa botumo ba eona ha ho bapisoa le eo e neng e le mohlahlobi pele, Shebna. o ne a tla phahamisetsoa holimonyana tšebeletsong ea borena ba Morena Ezekiase. Hore a tšoane le “tšiea ea khanya” ho ne ho tšoantšetsa sena sohle. O ne a ke ke a ipea joaloka morena ea tla sebeletsoa, empa, joaloka mohlanka oa morena, o ne a tla ba le matla le ‘puso’ sebakeng sena seo a se abetsoeng bocha. Ho isa tekanyong eitseng o ne a tla emela le ho bua lebitsong la morena oa Jerusalema. Ha ho tlontlollo e neng e tla tlela “ntlo ea ntat’ae empa, ho e-na le hoo, “khanya” e ne e tla tlela ntlo ea ntat’ae, ’me e ne e tla tiisoa joalokaha eka ke ka thakhisa e ke keng ea sisinngoa. ‘Mahlomela le makala’ a ntlo ea ntat’ae a ne a ke ke a tlontlolloa ka baka la ho tšepa Eliakime bakeng sa puello. Bohle beng ka Eliakime ba joalo ba ne ba ka mo tšepa hore o tla ba emela ka hlompheho, ka tlotleho. Bohle beng ka eena ba ne ba ka mo tšepa hore o tla ba emela ka bokhabane setulong sa hae se phahameng. Ke kahoo beng ka eena ba itšetlehileng [ka eena] joalo ba ne ba tla khothalletsoa ho sebeletsa e le ‘lipitsa’ tšebeletsong ea borena ka baka la ho ba le setšehetso se matla.

18. (a) Ke ho mang kajeno boikarabelo bo khethehileng bo beiloeng ’me ke joang e leng boikarabelo ba borena? (b) “Mahlomela le makala” ke afe kajeno, ’me ba tšoantšoa le lipitsa life?

¹⁸ Ka ho tšoanang, le kajeno, boikarabelo bo boima bo beiloe ho sehlopha sa “mohlahlobi ea khabane.” Ke boikarabelo ba borena, bo tlotlisang, hobane bo hlōmela tšebeletsong ea Morena ea beiloeng hajoale oa Jehova, Jesu Kreste. Ke boikarabelo ba moea ho bohle ba amanang le sehlopha sa Eliakime tšepong ea ’Muso, ho tšoana le ‘mahlomela le makala’ a Ntate oa oona oa moea. A itšetlehile kapa a leketlile sehlopheng sa “mohlahlobi” se kang thakhisa ’me bona ka bobona ba tšoana le “lipitsa” tse bohlale le tse phelang ho jara lijo ka litšoaneleho tse sa tšoaneng ho ea ho litho tse ling tsa kamano ea bona ea moea.—2 Tim. 2:20, 21; 2 Ba-Kor. 4:7.

19. (a) Ke ka nako efe e thata Eliakime a ileng a phahamisetsoa bohlahlobing ba borena? (b) Morena oa Juda o ile a leba ka tsela efe bakeng sa thuso tlas’a maemo a tšosang?

¹⁹ Mehleng ea boholo-holo, lekholong la borobeli la lilemo pele ho Mehla e Tloaelehileng ea rōna, Eliakime o ile a phahamisetsoa bohlahlobing ba borena ka nako e thata ea ’muso o neng o tšoantšetsa oa Jehova Jerusalema. A utloa ka ho toba litšokelo tse tšabisang tse neng li boleloa ke lenqosa la ’muso o hlaselang oa morena oa Assyria, Sankeribe. Eliakime a li phetela mong a hae, Morena Ezekiase. Bakeng sa hoo, Morena Ezekiase ha a ka a batla thuso ea sesole Egepeta empa ho Molimo oa hae, Jehova. Ha a arabela, Jehova a fana ka karabelo e matlafatsang haholo ka moprofeta oa hae Esaia. Joale ha etsahala eng phethahatsong ea molaetsa o nyefolang oa Jehova? Rea bala:

20. Jehova joale a etsa’ng phethahatsong ea molaetsa oa Hae o nyefolang ka moprofeta Esaia?

²⁰ “’Me lengeloi la Jehova la tsoa, la bolaea batho ba likete tse lekholo le nang le mashome a robileng meno e le ’meli a metso e mehlano liahelong tsa ba-Assyria. Eare ha ho tsohuoa hosasane, ea be e se e le litopo feela tse sa utloeng. Eaba Sankeribe, morena oa Assyria, o tloha, a ikela, a khutlela hae, a ea lula Ninive. ’Me eare ha a sa khumamile tempeleng ea Nisroke, molimo oa hae, Adrammeleke le Sharetsere, bara ba hae, ba ’molaea ka lerumo.”—Esa. 37:36-38; 2 Mar. 19:35-37.

21. (a) Moo bohato ba Jehova ba ntoa ba tšoantšetsa eng? (b) Sehlopha sa kajeno sa “mohlahlobi” se talimane le eng, hona ke ho tloha neng le ho bo-mang sehlopha sena se utloahalitseng temoso?

²¹ Morao koo bohato ba ntoa ka lehlakoreng la Jehova lebitsong la ’muso oa hae Jerusalema bo ne bo tšoantšetsa bohato ba hae bo boholoanyane “ntoeng ea letsatsi le leholo la Molimo o matla ’ohle” ka Harmagedone. Moo lengeloi la hae le timetsang e tla be e le lengeloi le leholo, Morena ea beiloeng teroneng, Jesu Kreste, taolong ea mangeloi ’ohle a leholimo. (Tšen. 16:14-16; 19:11-21) Masala a sehlopha sa “mohlahlobi” a talimane le ntoa ena ea lintoa, e ke keng ea phetoa. Sehlopha sa “mohlahlobi,” se ikarabella ka “lijo” tse tsoang ka Lentsoeng la Molimo, se sebelisitsoe haholo ho tloha ka 1919, ho utloahatsa temoso ea ‘ntoa’ ena e tlang ho se bitsoang Harmagedone. Joaloka tabeng ea Eliakime mehleng ea Morena Ezekiase, ba talimane le tlhaselo e atamelang ea “Moassyria” e Moholoanyane, Satane Diabolose, le mabotho a hae. (Mik. 5:5, 6) Ba phehella ho lemosa litho tsohle tsa ntlo ea Morena oa bona oa leholimo le batho bohle.

22. Ke bo-mang ba nkileng bohato ka temoso eo, hona ke hobane’ng ha ba khothatsoa ke se etsahalletseng Eliakime le baahi ba bang ba Jerusalema le bohlokoa ba see?

²² “Bongata bo boholo” ba lichaba tsohle bo arabetse temoso ’me ba utloisa ba bang hape. (Tšen. 7:9-17) Ba khothatsoa ke se etsahetseng ho Eliakime, mohlahlobi oa Morena Ezekiase, le baahi ba bang ba Jerusalema, hobane bana ba ile ba phonyoha ho ba babolauoa ba ntoa ka timetso e akaretsang ea bafutuheli ba Assyria. Ka ho tšoanang sehlopha sa “mohlahlobi” ‘mehleng ena ea qetello,’ hammoho le “bongata bo boholo” ba “linku tse ling” tsa Kreste, bo tla bolokoa hore bo ka senngoa le tsamaiso ea lintho ea lefatše “ntoeng ea letsatsi le leholo la Molimo o matla ’ohle” ka Harmagedone. (Dan. 12:4) Hoba Jehova a hlōle moo, Sankeribe e Moholoanyane, Satane Diabolose, le mangeloi ’ohle a hae a bademona ba tla akheloa sekoting ka lilemo tse 1 000 tsa puso ea Ezekiase e Moholoanyane, Jesu Kreste.

23. Ke neng ho ke keng ha e-ba le pelaelo ka karabelo e nepahetseng potsong e botsitsoeng ke Jesu ho Luka 12:42?

²³ Ha feela Morena oa bona ea busang, Jesu Kreste a ntse a khahloa ke ho ba sebelisa lefatšeng, masala a sehlopha sa “mohlahlobi ea khabane” a tla fana ka “lijo” ho ba pholohileng le bona ba “bongata bo boholo” ba “linku tse ling” tsa Morena oa bona. Ho isa ho boneng ha bona tebello eo e thabisang, batho bohle ba kang linku ba ke ba ikalose ‘ho khaoloeng’ ka Harmagedone joaloka ba leketlileng ka bolokolohi ‘thakhiseng’ e sa tšoaneleheng, sehlopha sa Shebna sa Bojakane. (Esa. 22:17-19, 25) Ruri ho thabile ba tiisitseng le ho tšoarella karabelong e nepahetseng potsong ea Jesu: “Mohlahlobi ke ofe ea khabane, ea bohlale?” Ho tšepahaleng bohlahlobing ba hae, ba ke ba tsoele pele ho amohela ka nako ena e tšoanelang “lijo” tse hlokahalang matsohong a ‘mohlahlobi ea khabane,’ Eliakime e Moholoanyane. “Thakhisa” eo ea tšoantšetso, ho ea ka tsebo e tlang pele ea Molimo e khokhothetsoe moo ho tiileng hore e lule, ka thuso ea Molimo. Kahoo tšoarellang ho eona ka tšepo, ka botšepehi bohle.

[Mongolo o botlaaseng ba leqephe]

Na u ka arabela lipotso tsee tlhahlobong?

◼ Eliakime le Shebna e ne e le bo-mang?

◼ Mehleng ea rōna, Eliakime le Shebna ba emela mang?

◼ Morena Sankeribe le Morena Ezekiase ba ne ba tšoantšetsa bo-mang kajeno?

◼ Sehlopha sa Eliakime se tšehetsa eng, ha ho bapisoa le seo sehlopha sa Shebna se se tšehelitseng?

◼ Ke bo-mang ba tšoantšetsoang ke “ba ahileng Jerusalema. . . le ntlo ea Juda”?

◼ Ke bafe hape ntle ho ‘baahi ba Jerusalema le Bajuda’ ba amohelang tlhokomelo e kang ea ntate ea sehlopha sa Eliakime?

◼ Ke eng se emeloang ke “ntlo ea Davida”?

◼ “Thakhisa” ea boprofeta ba Esaia ke mang, hona e emela mang?

◼ Ke eng se tšoantšetsoang ke ’nete ea hore “thakhisa” ena e fetoha “tšiea ea khanya”?

[Setšoantšo se leqepheng la 25]

Masala a tlotsitsoeng le ba sebetsang le oona ba tsamaisa MOLULA-QHOOA lefatšeng lohle ka lipuo tse ngata