Ho Rarolla Mathata a Bacha
Ho latelang ke karolo ea lengolo le ileng la amoheloa le tsoa ofising ea lekala ea Lipaki tsa Jehova ea São Paulo, Brazil. Le ngotsoe ke ’mè ea nang le bana ba bane le monna ea sa lumelang. Ka morali oa hae ea lilemo li 13 a ngola:
“Ke tlameha ho ipolela hore ha nka ka mo hlokomela ka ho lekaneng . . .
“Ka qala ho hlokomela hore morali oa ka o-oa tapa mabapi le ho ba teng libokeng, lipuisanong tsa lelapa tsa Bibele le tšebeletsong ea tšimo. Ha ke mo botsa hore na molato ke eng, a arabela ka hore, ‘Ha ho letho.’ Joale ka letsatsi le leng a mpolella hore o kopanela mehatong ena ea Bokreste hobane a tlamehile, e seng hobane a ho rata. A bolela hore ha a batle ho tšoana le moholoane oa hae, a ratane le e mong oa Lipaki tsa Jehova e be o nyaloa ‘’neteng.’ O ne a batla ho phela joaloka mang le mang. Ka sitoa ho lumela seo ke se utloang, kaha re e-ba le boithabiso joaloka lelapa.
“Ha ke mo botsa ka matla, a bolela hore ha a qoqa le metsoalle ea hae sekolong o eona hore na lefatše le fana ka ho hongata hakaakang. ’Me, ka bona, ke ’mè ea khohlahetseng le ea thata haholo. Eaba o nkopa likhoeli tse hlano a sa ee tšebeletsong ea Bokreste ea mofuta ofe kapa ofe e le hore a ka rera hore na ke eng eo a e batlang bophelong.
“Hoba ke inahane ka nakoana, ka etsa tlhahiso ea hore: Ho e-na le hore ke mo nee likhoeli tse hlano a sa kopanele tšebeletsong ea Bokreste, o lokela ho ’nea likhoeli tse hlano ke atamella haufi haholoanyane le eena. Ke ne ke tla ea sekolong le eena le ho khutla ’me a ee le ’na lithutong tsa ka tsa Bibele le maetong a ho boela. Ka mantsoe a mang, o ne a tla kopanela haholoanyane le ’na tšebeletsong ea ka ea Bokreste.
“A lumela, ’me hona joale ho fetile likhoeli tse peli ’me liphello li ntle. Eena ka boeena o lumela hore boikutlo ba hae e ne e le ba bongoana feela. Hang hape ke bona letsoho la Jehova holim’a bana bohle ba ka ba bane. Ruri ke filoe tokelo. Lithapelong tsa ka ke ’nile ka neela bana ba ka ho Jehova, empa ke ’na ea amohelang limpho.”
Likhoeli tse ’ne hamorao moroetsana enoa o ne a boetse a kopanela ka botlalo le ka boithatelo tšebeletsong eohle ea Bokreste, ’me ’mè o ne a le bohlale haholoanyane a bile a ananela haholoanyane. Mohlomong litlhahiso tsa hae li ka thusa ho rarolla mathata a ba bang ba hōlisang bana ba bona.