Tseko ea ’Muso e Itlhomme Pele!

“Binelang Jehova sefela se secha; . . . E-reng har’a lichaba; Jehova oa busa!”—PESALEME EA 96:1, 10.

1. (a) Ke pina efe e neng e ka binoa ka nepo ka lekhetlo la pele ka 1914, hona hobane’ng? (b) Jesu o ne a bua ka ho hatakeloa hofe ho Luka 21:24?

HA E-EA ba ho fihlela ka selemo sa 1914 moo mantsoe a pina a neng a ka binoa ka lekhetlo la pele ka nepo le ho sebelisoa, “‘Mehla ea Lichaba’ e felile, hobane marena a tsona a busitse.”a Ka la 1 Mphalane, 1914 Ntoa ea I ea Lefatše e ne e le likhoeli tse peli e qhanqhana. Mantsoe ao a buang ka Mehla ea Lichaba a ne a nkiloe boprofeteng ba Jesu Kreste ba hore na Jerusalema ea lekholong la pele la lilemo le tempele ea eona li ne li tla senngoa neng. Tšenyeho e etsahetse ka 70 C.E. Ho Luka 21:24 ho boleloa Jesu a ile a re: “[Bajode] ba tla oa ka bohale ba sabole, ba isoe kholehong lichabeng tsohle; ’me Jerusalema o tla hatakeloa ke lichaba, ho be ho phethoe mehla ea lichaba.” Khale mehleng ea Morena Davida oa Iseraele, motse oa Jerusalema o ile oa etsoa ’muso oa sebele oa Molimo. Kahoo Jerusalema ea fetoha tšoantšetso ea ’muso oa sebele oa Jehova Molimo ka morena oa hae ea tlotsitsoeng holim’a sechaba se ipusang sa Iseraele. Kahoo, tumellanong le sena, mantsoe a Jesu a ho Luka 21:24 a bua ka ho hatikeloa ha ’muso oa tšoantšetso oa Molimo.

2. (a) Ho hatakeloa ho qalile neng, hona joang? (b) Ke hobane’ng ha ’muso oa Messia o sa ka oa emisoa kamor’a ho senngoa ha Jerusalema ka 70 C.E.?

² O qalile ho hatakeloa neng? E seng ka selemo sa 70 C.E., lilemo tse 37 hoba Jesu a fane ka boprofeta ba hae. Ka selemo seo ho ile ha senngoa motse oa Jerusalema o neng o tsosolositsoe, ka lekhetlo lena o senngoa ke makhotla a Baroma. Empa ho hatakeloa hoo Jesu a profetileng ka hona e ne e le ho tsoela pele ha ho hatakeloa ho neng ho qalile ka ho senngoa ha Jerusalema ka lekhetlo la pele ke Bababylona ka 607 pele ho Mehla e Tloaelehileng ea rōna. Makholo a lilemo hamorao ha Baroma ba senya Jerusalema e tsosolositsoeng ka 70 C.E., “mehla ea lichaba” e ne e s’o felelle hantle. Hoo Jesu o ho tsebile pele, ’me kahoo ha a ka a bolela hore ho senngoa ho neng ho tlela Jerusalema e tsosolositsoeng matsohong a Baroma ho ne ho tla lateloa hang-hang ke ho hlongoa ha ’Muso oa sebele oa Molimo matsohong a Messia, Kreste. Ho e-na le hoo, ’muso oa sebele oa Molimo joalokaha o emeloa ke Jerusalema ea mehleng ea hae o ne o tla ’ne o hatakeloe ke lichaba tse sa bollang ho fihlela ‘mehla e khethetsoeng lichaba’ e fela ho latela nako re beiloeng ke Molimo.

3. (a) Re ka sebetsa lipalo tsa bolelele le ho fela ha Mehla ea Lichaba joang? (b) Ke tseko efe ea bohlokoa bo phahameng e ileng ea itlhoma pele ka 1914?

³ Mona re retelehela boprofeteng ba Daniele, khaolo ea 4, ’me re fumana hore palo ea “mehla” e ne e tla supa. Nako e ’ngoe le e ’ngoe ea mehla eo e ne e tla ba palo ea matsatsi a selemo sa boprofeta se baloang ka khoeli e holimo, e leng matsatsi a 360. Letsatsi ka leng le ne le tla emela selemo, ho latela tsela eo lichaba tsa Balichaba li balang nako. Ha e sebetsoa ka tsela eo, ‘mehla e baloang hasupa’ e ne e tla finyella kakaretso ea lilemo tse 2 520. (Bapisa Daniele 4:16, 23, 25, 32.) Kaha e qalile ha Bababylona ba liha ’muso oa tšoantšetso oa Molimo Jerusalema ka 607 B.C.E., bohareng ba likhoeli tse tšeletseng tse qetellang selemo seo, e ne e tla felella ka selemo sa 1914 sa mehla e Tloaelehileng ea rōna, halofong ea ho qetela ea likhoeli tse tšeletseng tse qetellang selemo seo. Nakong eo e tšoailoeng Ntoa ea I ea Lefatše ea qhoma. Le hoja hoo ho thahasellisa haholo, tlhaloso ea bohlokoa e ka hokelloang ho feleng ha “mehla ea lichaba,” ka selemo seo se hlasetsoeng ke ntoa ke ena: ’Muso oa sebele oa moea oa Molimo matsohong a Mora ea tlotsitsoeng oa oona, Jesu Kreste, o ile oa qala mane maholimong. ’Nete ea hore hona ho hanyetsoa ke baeta-pele ba bolumeli ba Bojakane le ba bang e ho etsa “tseko” e phahameng haholo ka bohlokoa. ’Me re tlameha ho tobana le eona!

Ho Phahamisoa Tsekong

4. Ke bafe ba paketsoeng ke liketsahalo tsa lefatše?

⁴ Joale, pele ho tsohle, rea botsa: Ke bafe bao lilemo e sa le pele, ba ileng ba supisa lefatše lohle hore “mehla ea lichaba” e tla fela karolong e qetellang ea likhoeli tse qetellang tsa 1914? Ke Liithuti tsa machaba tsa Bibele, li sebelisa likarolo tsa makasine ea Watch Tower le libuka tse ling tsa Watch Tower Bible and Tract Society. Kajeno li tsejoa lefatšeng lohle e le Lipaki tsa Jehova. Na liketsahalo tsa lefatše li li paketse? E!

5. (a) Ke karabelo efe e fanoeng ho ba hanyetsang ho hlongoa ha ’Muso oa Molimo? (b) Ho phethahatsoa ha Luka 21:25-27 ho tšehelitse joang ka pale ho fela ha Mehla ea Lichaba ka 1914?

⁵ Kaha boholo ba batho kajeno ha bo re letho ka tsela eo eo Molimo o balang nako ka eona, hape kaha Bojakane ka lihlopha tsa bona tse baloang ka makholo bo hanyetsa ho nepahala ha eona, na bahanyetsi bao ba bangata haholo ho feta Lipaki tsa Jehova ba hlōtse khang e matla e mabapi le ho hlongoa ha ’Muso oa Molimo ka Kreste maholimong ka 1914 C.E.? Ho phethahala ha boprofeta ba Jesu ka se neng se tla tšoaea “ho fela ha lefatše,” kapa “ho fela ha tsamaiso ea lintho” (NW), ho re tlisetsa karabelo e reng Che! Lilemo tse mashome a tšeletseng a metso e robeli kamorao ho 1914 re bona ho le teng boemo ba litaba bo hlileng ba boleloa ke Jesu ho Luka 21:25-27, ka mantsoe a latelang: “Le lefatšeng lichaba li tla tsieleha, li be le matsoalo, leoatle le ntse le luma le maqhubu a lona. Batho ba tla neela moea ke tšabo le ke tebello ea tse tla tla lefatšeng; hobane tse matla tsa leholimo li tla sisinyeha. Ke moo ba tla bona Mor’a motho a e-tla ka leru, ka matla le ka khanya e kholo.” Ka nepo, he, ho fela ha Mehla ea Lichaba bohareng ba likhoeli tse qetellang tse tšeletseng tsa 1914 ho ntse ho eme e le motheo oa pale joaloka e ’ngoe ea linnete tsa bohlokoa tsa ’Muso tseo re lokelang ho itšoarella ka tsona kajeno.

6. Ke hobane’ng ha barutuoa ba Jesu ba kajeno ba nyakalla ho e-na le ho kopanela tsielehong ea lichaba?

⁶ Na ke e mong le e mong ea lokelang ho ikutloa a le matsoalong ka lebaka la lintho tse tlelang lefatše? Na Jesu ka boeena o itse ke e mong le e mong ea tla ikutloa joalo ka hona? Le hanyenyane! Hobane Jesu ka boeena o ile a khetholla barutuoa ba tšepahalang ba hae, a re ho bona kamorao ho moo: “Etlare ha tseo li qala ho hlaha, emisang lihlooho, ’me le lelale holimo, hobane topollo ea lōna e tla be e atametse.” (Luka 21:28) Ho ea ka Mattheu 24:32, 33, Jesu o boetse a re: “Ithuteng ho lekanya litaba ka sefate sa feiga. Lekala la sona ha le se le le bonolo, ’me le se le hlahisa mahlaku, le tseba ka hoo hobane lehlabula le haufi. Le lōna, etlare ha le bona tseo tsohle, le tsebe hoba Mor’a motho o haufi, o monyako.” (Bona hape Mareka 13:28, 29.) Kaha ba na le bopaki bo totobetseng maemong a lefatše le liketsahalong hore topollo ea bona e haufi, kamoo ho leng ka teng, ho tšoana leha ba thabile ’me ba sa kopane le tsielehong ea lichaba tsa Balichaba.

Batšehetsi ba Tšepahalang ba ’Muso

7, 8. (a) “Baena” ba moea ba Kreste ba eme hokae, hona hobane’ng? (b) Baa ba jere tlameho efe?

⁷ Baa ba eme kae tsekong ea ’Muso ka jeno? Masala a kajeno a barutuoa ba Kreste, bao a ba bitsang ‘baena’ ba hae ba moea le ba nang le tšepo ea ho kopanela le eena ’Musong oa hae oa leholimo, ba eme ba tšehelitse ’Muso oa Jehova ka Kreste ka botšepehi. (Mattheu 25:40) Ba utloisisa se boleloang ke lipontšo tsa mehla, hoo ba utloisisang hore ’Muso oo e leng khale o rapelloa o ile oa hlongoa le ho qala ho sebetsa bofelong ba Mehla ea Lichaba ka 1914. Ba hlokomela hore ho fihlile nako ea hore ba bolelle e mong le e mong hore ho tloha ka 1914 puso ea ’muso o phahametseng motho oa leholimo e-ea busa le hore o tla felisa tsamaiso ena ea lefatše lohle ea lintho ’me kahoo o phethe ho phahamisoa ho khanyang ha borena ba bokahohleng ba Molimo o Holimo-limo. Ho bona ho oela tlamo ea ho phethahatsa boprofeta ba Jesu:

⁸ “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.”—Mattheu 24:14; Mareka 13:10.

Moo “Linku” li Ipeang

9. “Baena” ba Kreste ba phethahalitse taelo ea boprofeta joang, hona ka phello efe?

⁹ Boprofeta boo ba Jesu bo sebetsa e le taelo ho barutuoa ba tlotsitsoeng ka moea ba Morena oa marena, Jesu Kreste, ea busang hona joale. Ka kutlo ba se ba sutulitse ho boleloa ha molaetsa oa ’Muso ho kena linaheng tse 205 le lihleke-hleke tsa maoatle. Hape, molaetsa o khanyang o neeloa batho ka lipuo tse 174, ho sa balelloe lipuo tsa matšoao. Ntle ho pelaelo, baahi ba bang ba bangata ba lefatše ke hona ho tla fihloa ho bona ka mekhoa eohle ea kajeno ea puisano, e le hore pele ho “bofelo” ‘lefatše lohle leo ho ahiloeng ho lona’ le hle le fumane “bopaki.”

10, 11. (a) Ho bolela ka ’Muso ho hlomme tseko pele joang? (b) Jesu o re’ng ha a kenyelletsa tšobotsi e qetellang ea “pontšo”?

¹⁰ Leha ho le joalo, ho se ho arabetsoe joang boboleling ba ’Muso lefatšeng ka bophara—e, ho sa tsotellehe khanyetso eohle le mahloriso tseo Jesu a itseng li tla etsahala e le karolo ea “pontšo” ea ‘hore o teng’ ’Musong oa leholimo le hore ‘lefatše lea fela’? Baahi ba lefatše ba arotsoe ka ho totobetseng e le ba emelang ’Muso kapa ba o loantšang. Jesu o hlile a bolela karolo ena boprofeteng ba hae ka “pontšo,” ’me ke tšobotsi e phahameng ea boprofeta bona joalokaha bo tlalehiloe ke moapostola Mattheu. Jesu o kenyellelitse setšoantšo sa ho qetela sa boprofeta ba hae ka ho re:

¹¹ “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali. Ke moo Morena a tla bolella ba ka letsohong la hae le letona, a re: Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.”—Mattheu 25:31-34.

12. Jesu o kalimile mantsoe “Mor’a motho” boprofeteng bofe, ’me hona ho re bolella eng ka ’Muso?

¹² Re hlokomela hore, ha a ne a kenyelletsa setšoantšo seo sa boprofeta, Jesu o kalimile mantsoe “Mor’a motho” ho Daniele 7:13, 14, moo re balang: “Bonang, e mong ea kang mor’a motho a hlaha ka maru a leholimo, a fihla ho Moholo oa matsatsi, a atametsoa ho eena, a neoa ’muso, le hlompho, le borena, hore ba mefuta eohle, le ba lichaba tsohle, le ba lipuo tsohle, ba tle ba mo sebeletse; ’muso oa hae ke ’muso o sa feleng, o ke keng oa feta, borena ba hae bo ke ke ba felisoa.”

13. (a) A le sebakeng sa hae se phahameng maholimong, Morena o hlahloba lefatše la rona eng? (b) Ke eng e pakang hore Selekane sa Lichaba e ne e se pontšo ea ’Muso oa Molimo?

¹³ Batho le lichaba ba ’nile ba bokelloa ka pel’a Morena enoa ea busang ho tloha bofelong ba Mehla ea Lichaba ka 1914. A le boemong ba hae bo phahameng ba leholimo Morena a ka ba hlahloba kaofela ha bona ha lefatše la rōna le ntse le pitika litšieeng tsa lona. O-oa tseba hore Ntoa ea I ea Lefatše ha e-ea loanoa lebitsong la puso ea ’Muso oa hae. Che! Hobane kamor’a hore ntoa eo e tšabehang e fete ho ile ha theoa Selekane sa Lichaba The Hague Holland, ’me Lekhotla le Kopaneng le Likereke tsa Kreste la Amerika la bua ka sona e le “pontšo ea bopolotiki ea ’Muso oa Molimo lefatšeng.” Empa haeba ho ne ho le joalo, ke hobane’ng ha Selekane sa Lichaba se ile sa ketoloa thomong ea sona ke Ntoa ea II ea Lefatše, hona ke hobane’ng ha se hlahlamiloe ke Machaba a Kopaneng?

14. (a) Ke potso efe ea botho eo joale e talimaneng le e mong le e mong ho rōna? (b) Motho a ka fumana mohau oa Morena joang? (c) Ke ka litsela life tse sebetsang “linku” li tšehetsang “baena” ba Morena?

¹⁴ Ke kamoo lichaba joaloka boleng ba lipolotiki li bontšitseng hore na li eme kae tsekong ea ’Muso, eo li talimaneng le eona ho tloha ka 1914. Empa potso ea botho e talimaneng le e mong le e mong ho rōna ke ena, ‘Ke eme hokae, ’na ka bonna, tsekong ea ’Muso?’ Na boemo ba hao bo tšoana le ba “linku” tsa tšoantšetso tse bokaneng ka letsohong le letona la Morena ea busang, Jesu Kreste? Morena enoa oa molisa o re bolella kamoo motho a ka baloang a lokeloa ke ho aroleloa ka lehlakoreng la mohau oa Molimo ha a bapisoa le batho ba kang lipoli. Ke ka ho etsa hantle “baena” ba moea ba sa ntsaneng ba saletse lefatšeng ba Morena ea busang, ba moleng oa ho fumana setulo le eena teroneng ea hae ea leholimo. Ho etsoa ha lintho tse molemo joalo ho bolela hore ba ananela bopaki ba ’Muso bo etsoang ke “baena” ba moea ba Morena. Ba o tšehetsa ka litsela tsohle tseo ba ka li khonang, ba se lihlong ka baboleli bana ba litaba tse molemo tsa ’Muso leha ba se ba le litlamong, empa ba leka ho ba thusa hore ba tsoe litlamong tse joalo, joalokaha ho bile joalo morao koana selemong sa kamorao ho ntoa sa 1919. Ho sebetsang hamolemo ho feta moo, ka ho toba ba kopanela le masala a tlotsitsoeng ho boleleng “Evangeli ena ea ’muso,” joalokaha Jesu a hlile a bolela ho Mattheu 24:14. Hona ba ho etsa pontšeng le ka ntlo le ntlo.

15. (a) Moputso oa “linku” o fapana joang le oa “baena” ba Jesu? (b) Hona ho kenella joang morerong oa mantlha oa Molimo? (c) Ke hobane’ng ha ho hlokahala ’Muso o phahameng haholo hore o phethe morero oo?

¹⁵ Batho bao ba kang linku ba tla putsoa ka hore Morena a ba memele hore ba ‘amohele ’muso oo ba o lokiselitsoeng ha e sa le lefatše le theoa.’ (Mattheu 25:34) Hona ha ho bolele hore ba tla shoa le ho tsohela bophelong leholimong le ‘baena’ ba moea ba Morena. Ha a ba bitse “baena” ba hae. Ke batho ba arotsoeng ho lichaba tse neng li bokelletsoe ka pel’a terone ea hae. Ba lebelletse ho hlohonolofatsoa ke ’Muso oa Jesu Kreste le “baena” ba hae ba moea. Kahoo hoo ba ho amohelang ke sebaka sa lefatšeng sa ’Muso, moo Paradeise e tla khutlisetsoa lefatšeng lohle. Ha Jehova Molimo a etsa lefatše la rōna o ne a rerile hore le fetohe paradeise hohle, ’me a bea monna le mosali lefatšeng hore ba le etse joalo, ba qala ka tšimo ea Edene, kapa Paradeise ea Thabo. Ho oela ha Adama le Eva sebeng le lefung ha hoa ka ha hlōlisa morero oa Molimo. (Esaia 55:11) Hang feela oa hla oa lokisetsa ho tlisa Paradeise ea lefatše lohle ka ’Muso oa leholimo, oo ho oona Mora oa oona ea tšepahalang a neng a tla ba ’Musi, kapa Morena. E ne e lokela hore e be ’muso o phahameng haeba ke hona o tla robaka hore o felise moqapi oa sebe le thetso, Satane Diabolose, sebopuoa se matla sa moea.—Genese 3:15.

16. (a) Ke ka tsela efe ba kang linku ba tlang ho hauheloa ka ho khethehileng? (b) Ke neng “lipōli” li eang “bohlokong bo sa feleng”?

¹⁶ Ba kang linku ba tla rua sebaka sa Paradeise sa ’Muso oa leholimo. “Bongata bo boholo” ba bona bo tla etsa joalo ntle ho ho shoa holim’a lefatše bo hloka tsoho bafung hore bo khutlele bophelong lefatšeng. (Tšenolo 7:9; 21:4) Ke tsela e babatsehang hakaakang ho bona ho kenngoa e le “ba lokileng” “bophelong bo sa feleng”! Ba tla bona ka mahlo ha ba kang lipōli ba lefatše ba bolleloa hore ba ee “bohlokong bo sa feleng.” (Mattheu 25:41-46) Hona ho tla etsahala “mahlomoleng a maholo” a tla fihla tlhorong ea oona ea bohloko “ntoeng ea letsatsi le leholo la Molimo o matla ’ohle” lebaleng la ntoa la Harmagedone. (Tšenolo 7:14; 16:14-16) Moo ba ho qetela ba “lipōli” ba tla tlosoa bophelong ba lefatšeng ka ho sa feleng.

17. (a) Joale u talimane le potso efe e potlakileng? (b) Ho tšehetsa ha hao ’Muso ka pelo eohle ho tla bolela ho kopanela ha hao litokelong life?

¹⁷ Ka boikhethelo bo joalo bo beiloe ka pel’a baahi ba lefatše, potso ke e potlakileng haholo, ‘U eme kae tsekong ea ’Muso?’ U batla ho beoa sehlopheng se le seng le bafe—sa “linku” tse amohelehang kapa sa “lipōli” tse rohakiloeng? Bao ntle ho eng kapa eng ba emelang ho tšehetsa ’Muso ba ke ke ba amohela Paradeise ea oona ea lefatšeng feela empa ba na le karolo e thabisang haholo ho phahamisa borena bo phahameng ba bokahohleng ba Jehova, Molimo oa melimo le Morena oa marena.—Pesaleme ea 136:2; Daniele 2:47.

[Mongolo o botlaaseng ba leqephe]

Mabapi le Tseko ea ’Muso, u ka arabela se latelang joang:

◻ Mehla ea Lichaba ea Luka 21:24 e nka nako efe?

◻ Ho ea ka Luka 21:25-27, ke liketsahalo life tse tšoaeang bofelo ba Mehla ea Lichaba?

◻ Tumellanong le Luka 21:28, Lipaki tsa Jehova Ii ile tsa itšoara joang ka tlokotsi ea hona joale ea lefatše?

◻ “Mor’a motho” o hlalosoa ntlheng efe boprofeteng, ’me ke bohato bofe bo tiileng bo hlokoang ho fihleng ha hae?

[Setšoantšo se leqepheng la 10]

Mantsoe ana a Hymns of the Millennial Dawn a sebelitse ho tloha ka 1914