Hanang Bokoenehi, le Khomarele ʼNete!
“Mang le mang ea khelohang, ea sa tiisetseng thutong ea Kreste, ha a na Molimo; ea tiisetsang thutong ea Kreste, eena o na le Ntate le Mora.”—2 JOHANNE 9.
1, 2. (a) Ke joang ka linako tse ling Satane a lekileng ho tima leseli la ʼnete har’a batho ba Jehova? (b) Ke ka baka la’ng ha e le habohlokoa hore Lipaki tsa Jehova li hane bokoenehi?
JEHOVA MOLIMO ke Mohloli oa ʼnete ea moea. Ka baka leo, mopesaleme ka ho loketseng o ile a rapela; “Romela leseli la hao le ʼnete ea hao.” (Pesaleme 43:3) Ka hoo, ʼnete ke letšoao le khethollang barapeli ba Jehova.—Johanne 8:31, 32; 17:17.
2 Boitekong ba bona ba ho tima lebone la ʼnete har’a batho ba Jehova, Satane Diabolose ka linako tse ling o ile a batla ho bōlisa phutheho ea Bokreste ka lithuto tsa bokoenehi. (2 Ba-Korinthe 4:1-6; Juda 3, 4) Empa o hlōlehile maitekong ana hobane Lipaki tse tšepahalang tsa Jehova li hana bokoenehi ʼme li khomarela ʼneteng ea moea. Ha e le hantle, ho hlokahala hore re etse joalo, haeba re batla ho boloka kamano e haufi le Jehova Molimo le Jesu Kreste, hobane moapostola oa Mokreste Johanne o ile a susumetsoa ke Molimo ho ngola: “Mang le mang ea khelohang, ea sa tiisetseng thutong ea Kreste, ha a na Molimo; ea tiisetsang thutong ea Kreste, eena o na le Ntate le Mora.”—2 Johanne 9.
3. Ke lipotso life tse tla arajoa ha re hlahloba Johanne oa Bobeli le oa Boraro?
3 Empa Lipaki tsa Jehova li lokela ho etsa eng ho hanela bokoenehi? ʼMe ke joang ba ka ntšetsang pele likhahleho tsa Bokreste joalo ka ba ‘sebelisanang le ʼnete’? (3 Johanne 8) Hore re fumane likarabo tsa lipotso tsena, re tla hlahloba mangolo a boluletsoeng a Johanne oa bobeli le oa boraro a moapostola, a ngoletsoeng Efese, kapa haufi le moo Asia Minor hoo e ka bang ka 98 C.E.
ʼNete le Lerato ke tsa Bohlokoa
4, 5. (a) Ke ka lebaka lefe le utloahalang Johanne a neng a ka ipitsa “moholo”? (b) “Mofumahali oa mokhethoa” le “bana” ba hae e ne e le mang?
4 Johanne o qala lengolo la hae la bobeli ka mantsoe ana:
“ʼNa, moholo, ke ngolla mofumahali oa mokhethoa le bana ba hae, bao ke ba ratang ʼneteng ʼme ha se ʼna feela, empa ba ratoa le ke bohle ba tsebileng ʼnete ka baka la ʼnete e lutseng ho rona, ʼme e ea ʼne e be ho rona ka ho sa feleng.”—2 Johanne 1, 2.
5 Ho ea bofelong ba lekholo la pele la lilemo C.E. moapostola Johanne ka sebele e ne e le “moholo,” a batla a le lilemo tse 100 ʼme hape e le moholo ea hōlileng moeeng le lilemong. (Bapisa Ba-Galata 2:9.) Ha a ngolla “mofumahali oa mokhethoa,” mohlomong o ne a lebisitse ho phutheho e ʼngoe e itseng sebakeng se sa boleloang, ʼme mohlomong ho ile ha sebelisoa mantsoe ana ho ferekanya bahlorisi. Tabeng eo, “bana” ba hae e ne e le bana ba moea, litho tsa phutheho eo le Bakreste ba tsoetsoeng ka moea ba “khethuoeng” ke Molimo ho ea pitsong ea leholimo. (Ba-Roma 8:16, 17; Ba-Filippi 3:12-14) Ka lehlakoreng le leng, Kyria (e bolelang “Mofumahali” ka Segerike) mohlomong e ne e le lebitso la mosali ea itseng oa Mokreste.
6. (a) Ke “ʼnete” efe eo Johanne a buang ka eona? (b) Ke joang “ʼnete” e lutseng ho Bakreste ba ʼnete le ho lula ho bona ka “ho sa feleng”?
6 Leha ho le joalo, ‘mosali enoa ea khethuoeng le bana ba hae’ ba ne ba ratoa ke Johanne le Lipaki tse ling tsohle tsa Jehova tse tsebileng “ʼnete.” “ʼNete” eo e ne e le lithuto tsohle tsa ʼnete tse buang ka Jesu Kreste. Ho li khomarela ka matla ho ne ho hlokahala bakeng sa pholoho. (Johanne 4:24; Ba-Efese 1:13, 14; 1 Johanne 3:23) Lebaka le leng le leholo leo Lipaki tsa nako e fetileng le tsa mehleng ena li ratanang ke hobane li rata “ʼnete” ka mokhoa o tšoanang. E “lutse” ho bona ka kelello ea hore e lula e lutse lipelong tsa bona. ʼNete ena e tla lula ho Bakreste bana ba sebele “ka ho sa feleng,” joaloka motsoalle oa bona oa ka mehla. Ka sebele, ʼnete ena, ke letlotlo la bohlokoa la Lipaki tsa Jehova kajeno, ʼme li leboha Ntate oa bona oa leholimo ka eona.
7. Ke joang mohau, lereko le khotso li tsoang ho Molimo le ho Jesu?
7 Bao ba khomarelang “ʼnete” ka botšepehi ba tšepisoa mahlohonolo a tsoang ho Molimo. A supa sena, moapostola a eketsa:
“Mohau, lereko, le khotso, li be ho lona, le li fuoa ke Molimo Ntate le ke Morena Jesu Kreste, Mora oa Ntate, ‘neteng le leratong.” (2 Johanne 3)
Mohau o hlaha ho Jehova le ho Jesu hobane batho ba baetsalibe ba “beoa ba lokileng ke mohau oa oona [Molimo] feela, ka topollo e leng ho Jesu Kreste.” (Ba-Roma 3:23, 24) Ka ho tšoanang, Ntate oa leholimo ke mohloli oa lereko, empa le fetisetsoa ho batho ba sa phethahalang ka Kreste. (Ba-Heberu 4:14-16; Juda 20, 21) Ho phaella moo, hore baetsalibe ba be le khotso le Jehova, ba lokela ho etsetsoa sehlabelo bakeng sa libe tsa bona, sena se ile sa etsoa ka lefu la Jesu la sehlabelo sa topollo.—Ba-Kolosse 1:18-20.
8. Ho 2 Johanne 3, mantsoe “‘neteng le leratong” a ne a bolela eng?
8 Johanne o eketsa ka mantsoe “ʼneteng le leratong.” Mohlomong o ne a bolela hore Bakreste ba ʼnete ba ne ba tla fumana mohau, lereko le khotso ‘hammoho le lerato.’ Kapa e ka ʼna eaba Johanne o ne a bolela hore bahlanka ba Jehova ba tla fumana mahlohonolo ana haeba ba lula ʼneteng ʼme ba tsoela pele ho bontša lerato.
‘Ho Tsamaea ʼNeteng le Leratong’
9, 10. (a) Ke ka baka la’ng ha Johanne a ne a e-na le lebaka la ho “thaba” haholo? (b) Mabapi le ʼnete, ke eng seo “ba bang” ba neng ba se etsa?
9 Moapostola o bolela lebaka la thabo ʼme hape o fana ka keletso e utloahalang ha a re:
“Ke thabile haholo ha ke fihletse bana ba bang ba hao ba tsamaea ʼneteng, joale ka ha re laetsoe ke Ntate. ʼMe joale, uena mofumahali, kea u rapela, e seng ka hore, ke u ngolla taelo e ncha, empa e le eo re bileng le eona e sa le ho qaleng, e reng, re ratane.”—2 Johanne 4, 5.
10 Johanne o ne a e-na le lebaka le leholo la ho thaba hobane “ba bang” ba ne ba “tsamaea ʼneteng.” Ba ne ba lumela ho Jesu Kreste, ba ratana ʼme ba ne ba leka ho iphaphatha le mohlala o siiloeng ke Mora oa Molimo. (Ba-Heberu 12:1-3; 1 Johanne 3:23) Haeba Johanne o ne a ngolla mosali e mong ea bitsoang Kyria, ho totobetse hore ba bang ba bana ba hae ba nama ba ne ba le ʼneteng. Empa haeba o ne a sebelisa “bana” le “mofumahali oa mokhethoa” ka tšoantšetso, o ne a ka thaba hobane ba bang ba litho tseo tsa phutheho eo ho sa boleloang sebaka sa eona ba ile ba hana bokoenehi ʼme ba ne ba khomaretse ʼneteng ʼme ba phela ka botšepehi pel’a Jehova. Ka sebele, Lipaki tse tšepahalang tsa Jehova ka mehla li ile tsa ʼna tsa nka ho khomarela ʼneteng, kapa ho “tsamaea” ho eona, e le tlamo ea tsona. Ho bona, sena ke molao oa Ntate oa bona oa leholimo, oo ba sa o nkeng e le moroalo.—Bapisa 1 Johanne 5:3.
11. (a) Ho boloka molao “ratanang” ho hloka eng? (b) Ke ka baka la’ng ha Johanne a neng a ka re ona ha se “molao o mocha”?
11 Moapostola o kopile “mofumahali” ho boloka molao oa hore “re ratane.” (Bapisa 1 Johanne 3:11.) A bolela thato ea Ntat’ae bakeng sa batho ba tsebang Molimo, Jesu o ile a laela barutuoa ba hae ho ‘ratana, joalo ka ha a ba ratile.’ Molao oo o ne o sa bolele ho rata moahelani feela empa le lerato la ho iketsa sehlabelo, ho isa boholeng ba ho tella ba bang bophelo ba hao. (Levitike 19:18; Mattheu 22:39; Johanne 10:14, 15; 13:34; 15:13) ʼNete ea tlama balateli ba Kreste ho “tloha ho qaleng” ha kamano ea boineelo ba bona ho Molimo—ha e le hantle, ho tloha ha Jesu a qala ho fana ka oona ho tloha ha phutheho ea Bokreste e theoa ka 33 C.E. Ka baka leo, ho ea ka kutloisiso eo, e ne e se “molao o mocha,” joaloka ha Johanne a bolela.
12. Johanne o ne a bolela’ng ha a re: “ʼMe ke ena taelo . . . hore le tsamaee ho eona”?
12 Ha a bua ka lerato, Johanne o oa eketsa:
“ʼMe see e leng lerato, ke hoba re tsamaee ka taelo tsa hae; ʼme ke ena taelo, kamoo le e utloileng e sa le ho qaleng, hore le tsamaee ho eona.” (2 Johanne 6)
Barapeli ba ʼnete ba utloa Jehova ka thabo hobane ba mo rata ka lipelo tsa bona tsohle, moea, matla le kelello. (Luka 10:27) “Ho qaleng,” ke hore, ho tloha nakong ea boboleli ba Jesu kapa ho tloha boineelong ba bona ho Molimo, “batho” bao Johanne a neng a ba ngolla ba ne ba se ntse ba e-na le molao oa lerato. Empa moapostola o ne a bolela eng ha a re, “ʼMe ke ena taelo . . . hore le tsamaee ho eona”? Le hoja lentsoe “eona” le ka ʼna la supa “taelo” ea lerato, taba-taba ke “lerato” ka bolona. Ho sa tsotellehe hore e utloisisoa joang, polelo ho “tsamaea ho eona” e bolela ho tsoela pele re ratana.—1 Johanne 3:18; bapisa Ba-Roma 13:8-10.
Hlokomelang Bakoenehi
13. (a) Ke har’a bo-mang “bathetsi” ba neng ba leka ho ikhulela balateli? (b) Ke thuto efe ea bohata e neng e hasoa ke “bathetsi”?
13 Ho tla hlokahala hore re lule re tsamaea leratong le ʼneteng. Ha a hlalosa lebaka, Johanne o-oa ngola:
“Hobane bathetsi ba bangata ba kene lefatšeng, ba sa boleleng Jesu Kreste ea tlileng nameng. Ea joalo ke mothetsi le antikreste.” (2 Johanne 7)
Kamoo ho bonahalang, baruti ba bang ba bohata ba ne ba ntse ba tsamaea ba leka ho ikhulela barutuoa ka har’a Bakreste ba ʼnete. (Bapisa Liketso 20:30.) Le hoja ba ne ba ipolela hore ke Bakreste, “bathetsi” bana ba khelosang ba ne ba sa lumele hore Jesu Kreste o tlile nameng joaloka motho. Lithuto tse joalo tsa bohata li ne li nyenyefatsa mosebetsi oa Jesu joaloka Messia le molopolli, ho kopanyeletsa le boemo ba hae bo phahamisitsoeng leholimong.—Mareka 1:9-11; Johanne 1:1, 14; Ba-Filippi 2:5-11.
14. Ke ka baka la’ng ha Johanne a ile a bitsa bakoenehi “mothetsi le antikreste”?
14 Johanne o bitsitse bakoenehi bana “bathetsi le antikreste” hobane thuto tsa bona e ne e le tsa bohata ʼme bona ka bobona ba ne ba hanyetsa Kreste. Polelo ea moapostola ka “boantikreste ba bangata” e bontša hore ho ne ho le teng ba bangata bao e neng e le lira tsa Kreste, le hoja kaofela ha bona ba ne ba tla etsa sehlopha se le seng se bitsoang “antikreste.” (1 Johanne 2:18) Ho hana Jesu joaloka Messia le joaloka Mora oa Molimo ho kopanyeletsa ho hana ntho e ʼngoe le e ʼngoe kapa lithuto tsa Mangolo tse buang ka eena. Lipaki tse tšepahalang tsa Jehova li hana ka ho feletseng maikutlo a joalo a baruti ba bohata.
15. (a) Ka hore ba ‘iponele’ ke ‘moputso ofe o tletseng’ oo Bakreste ba tlotsitsoeng ba neng ba tla o fumana? (b) Ke ka baka la’ng ha Paki e ʼngoe le e ʼngoe ea Jehova e lokela ho itebela khahlanong le thuto ea bokoenehi?
15 Kaha ho ne ho le teng kotsi ea ho khelosoa ʼneteng ho ea bokoenehing, Johanne oa eletsa:
“Iponeleng, hore re se ke ra timelloa ke tseo re li sebelitseng, re mpe re fuoe moputso o tletseng. Mang le mang ea khelohang, ea sa tiisetseng thutong ea Kreste, ha a na Molimo; ea tiisetsang thutong ea Kreste, eena o na le Ntate le Mora.” (2 Johanne 8, 9)
Ka mesebetsi e joalo ea ho bolela “litaba tse molemo,” Johanne le ba bang ba ‘hlahisitse’ litholoana tse ileng tsa etsa hore batho ba pele ba li amohetseng ba sokolohe. Empa e ne e le feela ka ho ‘iponela’ moeeng ba neng ba ke ke ba “timelloa” ke mohau, lereko le khotso tse tsoang ho Jehova le Mora oa hae, haesita le botsoalle bo sa feleng le ba tlanngoeng hammoho leratong le ʼneteng. Ka botšepehi, balumeli ʼmoho le Johanne ba tsoetsoeng ka moea ba tla ʼne ba thabele tšebeletso e putsang ea Jehova. Ha a bua ka “moputso o tletseng,” kamoo ho bonahalang Johanne o ne a akarelletsa le “moqhaka” oa leholimo o tla fumanoa ke Bakreste ba tlotsitsoeng ba tšepahalang. (Tšenolo 2:10; 1 Ba-Korinthe 9:24-27; 2 Timothea 4:7, 8; Jakobo 1:12) Koana, paki e ʼngoe le e ʼngoe ea Jehova e lokela ho hana thuto ea bokoenehi hobane e ka mo amoha bophelo bo sa feleng lefatšeng kapa leholimong.
16. (a) Ke joang bakoenehi ba neng ba ‘kheloha’? (b) Ke ka tsela efe Lipaki tse tšepahalang tsa Jehova li nang le “Ntate le Mora”?
16 “Bathetsi” ba bakoenehi ba ne ba ‘kheloha’ ʼme ha ba ka ba ‘tiisetsa thutong ea Kreste’ hobane ha ba ka ba tiisetsa ʼneteng eo ba e rutiloeng ke Jesu le baapostola ba hae ba tšepahalang. Ka baka leo, bakoenehi ba ne ba se na “Molimo,” hobane ba ne ba se kutloanong le Jehova ʼme ba ne ba se na kamano le eena. (1 Johanne 1:5, 6; 2:22-25) Leha ho le joalo, Lipaki tse tšepahalang tsa Jehova ‘li bolela Jesu Kreste ea tlileng nameng,’ hobane li bontša tumelo sehlabelong sa hae sa topollo ʼme li khomarela seo eena le baapostola ba hae ba tšepahalang ba se rutileng. (Mattheu 20:28; 1 Timothea 2:5, 6; 2 Johanne 7) Lipaki tsena tsa ʼnete li khomarela ʼneteng ʼme ka baka leo li na le “Ntate le Mora” hobane lia ba tseba, li ananela litšoaneleho tsa bona ʼme li tsoela pele li thabela kamano e haufi le bona.
Boikutlo ba Rona ka Bakoenehi
17. Ho ea ka 2 Johanne 10, 11, Lipaki tse tšepahalang li ne li lokela ho tšoara “bathetsi” ka tsela efe?
17 Bakreste ba lokela ho amohela baeti, empa e seng ba koenehetseng tumelo ea ʼnete. (1 Petrose 4:9) Johanne o hlakisitse sena ha a re:
“Ekare ha e mong a e-tla ho lona, ʼme a sa tlise thuto eo, le se ke la mo amohela matlung a lona, ʼme le se ke la mo lumelisa! Hobane ea mo lumelisang o kopana le eena ketsong tsa hae tse mpe.” (2 Johanne 10, 11)
“Bathetsi” ba ne ba tsamaea hohle ʼme ba ne ba hasa thuto ea bohata ka matla. Koana, e ne e tla ba phoso hore Mokreste leha e ofe ea ineetseng a bontše botsoalle ho bona ka ho lumella baruti bana ba bohata ho tla tlung ea hae. Hape e tla ba phoso ho lumelisa bakoenehi ka tumeliso leha e le efe, ho sa tsotellehe hore ke ho ba amohela ha ba fihla kapa ha ba tsamaea re re “Molimo o be le lona.” Ha ho Mokreste ea tšepahalang ea tla lakaletsa motho eo ka boomo a ntšetsang pele thuto ea bohata katleho mosebetsing oa hae. Ka sebele, ha ho paki ea Jehova e tšepahalang e lokelang ho ba le setsoalle le motho ea joalo.—1 Ba-Korinthe 5:11-13.
18. Ke ka baka la’ng ha ho se Paki e tšepahalang ea Jehova e ka lumelisang mokoenehi?
18 Ho feta moo, haeba mohlanka ea ineetseng oa Jehova a ne a ka amohela moruti ea joalo oa bohata lapeng la hae, o ne a tla fetoha ‘motlatsi’ oa ‘ketso tse mpe’ tsa motho eo. (The New English Bible) Ka baka leo, ha ho Paki ea Jehova e tšepahalang kajeno e tla lumelisa motho ea khaotsoeng kapa mokoenehi ea ikarotseng kapa e lumelle motho eo ho sebelisa ntlo ea Mokrete joalo ka sebaka se sebelisetsoang ho hasa lithuto tsa bohata. Ka sebele, e ba molato o moholo pel’a Molimo haeba molumeli a ka amohela mokoenehi lapeng la hae ʼme kamohelo ea qetella e bolaile morapeli ʼmoho le eena oa Jehova moeeng.—Bapisa Ba-Roma 16:17, 18; 2 Timothea 3:6, 7.
19. Ke boemo bofe boo Lipaki tse tšepahalang tsa Jehova li bo nkang mabapi le bakoenehi ba kajeno?
19 Ba bang bao nako e fetileng ba neng ba sebeletsa joaloka Lipaki tsa Jehova ba hanne lithuto tse ling tsa Mangolo tse theiloeng lithutong tsa Jesu Kreste le baapostola ba hae. Ka mohlala, ba hatella hore ha re phele “mehleng ea bofelo,” ho sa tsotellehe bopaki bo ke keng ba hanyetsoa bo bontšang joalo. (2 Timothea 3:1-5) Bakoenehi bana ‘ba tsoile ho rona hobane e ne e se mofuta oa rona.’ (1 Johanne 2:18, 19) Ka baka leo, ha ba sa na botsoalle le Lipaki tsa Jehova tse tšepahalang tse tlotsitsoeng le metsoalle ea tsona, ʼme ka baka leo bakoenehi bana ba baithati ha ba sa na “kabelo” ho Ntate le Mora, ho sa tsotellehe hore ba ka ithorisa hakae ka hore ba na le botsoalle le Molimo le Kreste. Ho e-na le hoo, ba lefifing la moea. (1 Johanne 1:3, 6) Barati ba leseli le ʼnete ba lokela ho tiea khahlanong le batho bana ba ntšetsang pele thuto ea bohata. Ka tsela leha e le efe Lipaki tse tšepahalang tsa Jehova ha li rate ho ba batlatsi “liketsong tse mpe” tsa batho ba joalo ba sa tšepahaleng ka ho ba tlatsa lipolelong tsa bona tse se nang bomolimo le liketsong tsa bona ka mokhoa leha e le ofe. Ho e-na le hoo, e se eka re ka “loanela tumelo eo bahalaleli ba ileng ba e fuoa ka nako e le ʼngoe.”—Juda 3, 4, 19.
Khomarelang ʼNete
20. Ho e-na le hore a ngole ho ea pele, Johanne o ne a tšepile ho etsa eng?
20 Hoba a khothatse balumeli ʼmoho le eena hore ba hane bokoenehi ʼme ba khomarele ʼnete, Johanne a qetella lengolo la hae la bobeli le bululetsoeng ka mantsoe ana:
“Ke sa na le litaba tse ngata, empa ha ke rate ho le ngolla tsona ka pampiri le ka enke; empa ke tšepile ho le etela, le ho buisana le lona ka molomo, thabo ea lona e tle e phethehe. Bana ba ngoan’eno oa mokhethoa ba u lumelisa.” (2 Johanne 12, 13)
Seo moapostola a neng a se hopotse pelong ea hae o ile a rera hore a se ke a se ngola. Ka hona o ile a beella ka thoko pampiri e ngolang, pene ea hae ea lehlaka le enke (mohlomong, motsoako o motšo oa boka le metsi). Ho sa tsotellehe ho hola ha hae lilemong o ne a tšepile ho ba etela le ho buisana le bona ‘ba shebane lifahleho’ kapa ‘molomo ka molomo’ hore a thabele puisano ea botsoalle. (Kingdom Interlinear Translation; bapisa Numere 12:6-8.) Ka sebele leeto la moapostola ea tsofetseng le ne le tla fella ka ho khothatsana moeeng ho putsang, hammoho le nyakallo e kholo.—Bapisa Ba-Roma 1:11, 12.
21. Ke’ng se neng se bonahala mantsoeng a qetellang lengolong la Johanne oa Bobeli?
21 Lerato la Bokreste le kopanyang barapeli ba Jehova hammoho le bonahetse litumelisong tseo Johanne a li rometseng. Haeba o ne a ngolla motho ea bitsoang Kyria, ka moo ho bonahalang, o ne a e-na le khaitseli oa hae oa nama eo bana ba hae ba sebele ba mo romelang litumeliso tse mofuthu. Empa haeba moapostola o ne a bua ka phutheho e ʼngoe ka mokhoa o sa tobang (mohlomong ea Efese), “khaitseli” eo a buang ka eena e ne e le phutheho eo kaofela ha eona le “bana” e neng e le litho tsa eona.
22. (a) Lengolo la bobeli la Johanne le bululetsoeng le thusa Lipaki tsa Jehova ho etsa eng? (b) Ke taba efe e sa ntseng e lokeloa ho tšohloa?
22 Lengolong la hae la bobeli le bululetsoeng, Johanne o ile a toba litaba ha a fana ka keletso e lerato e neng e tla thusa barapeli ʼmoho le eena ho hana bokoenehi le ho khomarela ʼneteng. Ka thuso ea Molimo, seo ke sona seo Lipaki tsa Jehova tsa kajeno li ikemiselitseng ho se etsa. Empa le rona re lokela ho ntšetsa pele lithahasello tsa Bokreste joaloka “basebetsi ʼmoho ʼneteng ba tšoarisaneng.” (3 Johanne 8) Hona ho ka etsahala joang?
Na U ka Araba?
◻ Ho bolela eng ho ‘tsamaea ʼneteng’?
◻ “Bathetsi” ba ne ba hasa thuto efe ea bohata?
◻ Ho ea ka 2 Johanne 10, 11, Lipaki tsa Jehova li lokela ho talima bakoenehi joang?
[Setšoantšo se leqepheng la 19]
Lipaki tse tšepahalang tsa Jehova kamehla li ʼnile tsa hana bokoenehi