Lentsoe la Molimo Lea Phela
Bophelo bo sa Feleng—Ba Tla bo Fumana Hokae?
Mona Jesu o bolella barutuoa ba hae hore: “Meaho e mengata ka tlung ea Ntate; . . . ke ea ho le lokisetsa bolulo. ʼMe etlare ha ke se ke ile, ke le lokiselitse bolulo, ke tla boela ke boee, ke le nkele ho ’na, hore moo ’na ke leng teng, le lona le be teng.”—Johanne 14:2, 3.
Hahabo Jesu e ne e le leholimong. Molimo o ne o mo romile lefatšeng a e-tsoa hona teng. Joale Jesu o ne a tšepisa baapostola ba hae hore ba tla nkeloa lapeng ho ea phela le eena leholimong. Empa Jesu le barutuoa ba hae ba tla etsa joang leholimong?
Rea tseba hore Molimo o khethetse Jesu hore e be Morena ’Musong oa Oona. Empa ba bang ba tla busa le Kreste ʼmusong oa leholimo. Jesu a re ho baapostola ba hae, ‘ ʼMe ’na ke etsa selekane le lōna, joalokaha Ntate a entse selekane le ’na bakeng sa ’muso.’ (Luka 22:29, NW] Pauluse le Timothea ba ne ba tla ba teng har’a babusi bao ba busang le Kreste. Ka lebaka leo, Pauluse a ngolla Timothea: “Ha re mamella bohloko le eena, re tla busa le eena.”—2 Timothea 2:12.
Empa ke bo-mang bao e tla ba bafo ba lefatšeng ba ʼMuso oa Molimo? Monna ea kolobetsang Jesu ke motsoala’e, Johanne Mokolobetsi. Jesu a re ka eena: “Har’a ba tsoetsoeng ke basali, ha ho e moholo ho Johanne Mokolobetsi.” Ka ho lokisetsa Kreste tsela ka bokhabane, a bile a bokella bao hamorao e neng e tla ba barutuoa ba Jesu ba pele, ruri Johanne o ipakile a le moholo. Empa leha ho le joalo Jesu a re ka eena: “E monyenyane ʼmusong oa maholimo o moholo ho eena.” (Mattheu 11:11) Kahoo Johanne a ke ke a ba har’a ba eang leholimong ho ea busa le Kreste. O tla balelloa har’a bafo ba bangata ba lefatšeng ba ʼMuso.
Bibele e bontša hore ke palo ea batho ba lekanyelitsoeng feela, “mohlatsoana,” e tla ea leholimong ho ba marena le Jesu Kreste. Bibele e fana ka palo e feletseng ea bona e le ba 144 000. Batho ba bang bohle ba khabane ba tla phela e le bafo ba babusi bana lefatšeng.—Luka 12:32; Tšenolo 14:1, 3.
Tlas’a puso e lokileng ea ʼMuso oa Molimo, lefatše le tla fetoha Paradeise, joalokaha Molimo o ne o rerile hore ho be joalo ha o bea Adama le Eva Paradeiseng ea Edene. Ke moo tšepiso ea Bibele e tla phethahatsoa: “Ba lokileng ba tla ja lefa la lefatše, ʼme ba tla hlola ho lona ka ho sa feleng.”—Pesaleme ea 37:29.