‘U Phethisise Tšebeletso ea Hao’

“Ke u laela ke hona haholo pel’a Molimo, le pel’a Morena Jesu Kreste, ea tlang ho ahlola ba phelang le ba shoeleng . . . u phethisise tšebetso [“tšebeletso,” NW] ea hao.”—2 TIMOTHEA 4:1, 5.

1. Kamano e ne e le efe pakeng tsa Pauluse le Timothea?

HA MOAPOSTOLA Pauluse a ngolla Timothea lengolo la hae la bobeli, Pauluse o ne a ntse a phehella sepheo sa hae e le mosebeletsi oa Molimo ka lilemo tse ka bang 30. O ne a amohetse mahlohonolo a mangata ho Jehova. (2 Timothea 1:2) Pauluse a khetha Timothea hore a sebetse le eena haufi-ufi mosebetsing oa ho tsamaea, ba sebeletsa liphutheho. Ba thabela hammoho lilemo tsa liphihlelo tse beang.—Liketso 16:1-5.

2. Bohlokoa ba mantsoe a Pauluse ho 2 Timothea 4:6-8 ke bofe?

² Joale nako e ne e atametse ea hore tšebeletso ea Pauluse e fele. A ngola: “Hobane, ha e le ’na, ke se ke tla etsoa sehlabelo, ’me nako ea ho falla ha ka e se e le haufi. Ke loanne ntoa e molemo, ke titimile ka qeta sebaka, ke bolokile tumelo. Ho setseng e se e le ho amohela moqhaka oa ho loka oo ke o behetsoeng, oo Morena, moahloli ea lokileng, a tlang ho ’nea oona ka letsatsi lela, e seng ’na feela, le bohle ba ratileng ho tla ha hae.” (2 Timothea 4:6-8) Hona ho ne ho bolela hore lefu la Pauluse le ne le le haufi. Ho utloisisoa hore Pauluse o utloile bohloko ba lefu tlas’a tlhoriso ea Nero ka 66 C.E. Ha Pauluse a tobane le lefu, ho ne ho tla phalla mehopolo efe kelellong ea hae? Mohlomong ho ne ho tla phalla mehopolo ena: Na ke entse tšebeletso ea ka hantle? Na ke phethile tšebeletso ea ka ka katleho? E, Pauluse o ne a ka bolela kholiseho ea hae ea hore o entse joalo! Tumelo ea hae e ne e le matla haholo, ’me o ne a tšepa hore o tla fumana moputso oa pitso ea holimo. O tlameha hore e be o ne a khotsofetse hakaakang hobane ha ho mohla a kileng a kheloha kabelo ea hae!

3. Ke ntho efe e molemo eo Pauluse a neng a ka e etsetsa Timothea pele ho lefu la hae?

³ Pauluse o ne a ntse a saletsoe ke nako e fokolang ea hore a etse ntho e ’ngoe e molemo. Pele a robala lefung, Pauluse o ne a ka etsetsa Timothea eng e molemo? Tlas’a pululelo a fana ka keletso ea bohlokoa. Re bala mehopolo ea hae le mantsoe a hae bukeng ea Timothea oa Bobeli. Ana ke mangolo a hae a ho qetela Mangolong le molemong oa rōna.

4. Ke khothatso efe eo Pauluse a e fileng Timothea?

⁴ Timothea o ne a e-so ho qete kabelo ea hae tšebeletsong, kahoo Pauluse a ngola: “Ke u laela ke hona haholo pel’a Molimo, le pel’a Morena Jesu Kreste, ea tlang ho ahlola ba phelang le ba shoeleng mohla a hlahang ka ’muso oa hae, ke re: U bolele lentsoe, u phehelle nako ha e tšoaneleha, leha e sa tšoanelehe; u laee, u khalemele, u khothatse ka mamello eohle le ka ho ruta. Hobane nako e tla ba teng eo ba ke keng ba mamella thuto ea pholoho, empa ka baka la ho hlohlona ha litsebe tsa bona, ba tla ipokellela baruti ba lumellanang le litakatso tsa bona; ’me ba tla khelosa litsebe tsa bona ’neteng, ho li isa litšomong. Empa ha e le uena, falimeha nthong tsohle, u mamelle bohloko, u etse mosebetsi oa ’moleli oa Evangeli, u phethisise tšebetso [“tšebeletso,” NW] ea hao.”—2 Timothea 4:1-5.

5. Ke hobane’ng ha keletso ea Pauluse e le ea bohlokoa bo khethehileng ho rōna?

⁵ Keletso eo e molemo e tlameha e be e ile ea tsoela Timothea molemo haholo, empa na le rōna re tla rua molemo ho eona? Re phela “mehleng ea qetello” eo Pauluse a ngotseng ka eona. Batho ba bangata kajeno ba na le “sebopeho sa borapeli, empa e le ba latotseng matla a jona.” (2 Timothea 3:1-5) Batho ba joalo ba sekametse feela ho mamela “baruti” ba tla thabisa litsebe tsa bona. Empa, ho phaella ho boleleng lentsoe ka tokisetso ea phutheho, Bakreste ba ’nete ba tlameha ho bolella bohle phatlalatsa, ba batla ba tla arabela “lentsoe.” Kahoo keletso ena e tšoanela Lipaki tsa Jehova tsa Bakreste tsa kajeno.

Mokhoa oa ho Phetha Tšebeletso ka Botlalo

6. (a) Ke hobane’ng ha re lokela ho ‘bolela lentsoe’? (b) Ke melemo efe e tlisoang ke hore na re ela hloko kamoo re etsang tšebeletso ea rōna?

⁶ Tšebeletso e na le litšobotsi tse sa tšoaneng; ho na le lintho tse ngata tseo mosebeletsi a lokelang ho li etsa. Ea pele, Pauluse o boletse, “u bolele lentsoe.” Lentsoe lena ke leo Jehova a khethileng ho le senolela bahlanka ba hae. Ke lentsoe la ’nete leo Jesu a buileng ka Iona. Ka nako e fanoeng, Jehova o etsa hore ho tsejoe hore na molaetsa oa hae ke ofe bakeng sa batho, ka ho ba le lipaki tsa hae lefatšeng tse bolelang lehlakore la hae tsekong. Tsela ea Jehova ke ho fana ka molaetsa oa temoso pele a nka bohato. (2 Likronike 36:15, 16; Esaia 42:9; 43:12; Jonase 3:2-4) Molaetsa oa hae o tla tsoela ba o mamelang molemo; ba ka fumana sebaka sa pholoho. Ba sa kang ba mamela ba tlameha ho kotula litholoana ha Jehova a nka bohato ba ho liha kahlolo ea hae. Ba tlameha ho itjarela boikarabelo ba bona. (Liketso 20:20, 21, 26, 27) Empa tsela ea bohlale bakeng sa mosebeletsi oa Molimo ke ena: “U ke u itebele, u lebele le eona thuto; ’me u tiee teng; hobane, ha u etsa joalo, u tla ipholosa, u pholose le ba u utloang.”—1 Timothea 4:16.

7. Ke hobane’ng ha mosebetsi o potlakile leha maemo a bonahala a se matle?

⁷ Mosebetsi oa ho bolela o etsoa tlas’a maemo a sa tšoaneng, empa o tlameha ho tsoela pele. Pauluse o ngotse: “U phehelle nako ha e tšoanehela, leha e sa tšoanelehe.” Molaetsa o ka bolela bophelo ho batho. Kahoo, tlas’a maemo ao mosebeletsi ea khabane a iphumanang a le ho oona, o talima molaetsa e le o potlakileng ’me o fumana litsela tsa hore le utloahale, esita le haeba khanyetso e hlaha mosebetsing oa ho bolela. Re ka bona hona ka ho hlaka ka mohlala oa Jesu le tlaleho e bukeng ea Bibele ea Liketso.

8. (a) Ke’ng se ka thusang mosebeletsi ho bolela lentsoe? (b) Ke hobane’ng ha ho khalemela e ka ’na ea e-ba karolo ea tšebeletso?

⁸ Hore mosebeletsi a tle a bolele lentsoe, e bang ke kahare kapa ke kantle ho phutheho, o tlameha ho tloaelana le Lentsoe la Molimo, kaha e le seithuti sa Iona. O tlameha ho ipha nako ea ho ithuta, a hopole ’me a thuise, a batle ho le utloisisa hantle. Ho bolela ho tlameha ho etsoe motheong oa ho tloaelana le lithuto tsa ’nete. Pauluse o boleletse Tite hore molebeli e tlameha hore e be “ea tieang thutong ea ’nete joale ka ha e rutiloe, a tle a lokele le ho khothatsa ka thuto ea pholoho, le ho hlōla bahanyetsi.” (Tite 1:9) Lentsoe la Molimo le sebeletsa e le mokhoa oa ho khalemela ba hananang le seo Jehova a se hlokang, ho lokisa mofosi molemong oa hae. Hona hohle ke karolo ea ho phethisisa tšebeletso.

Khothatso E-ea Hlokahala

9. Ke hobane’ng ha khothatso ea Bokreste e hlokahala?

⁹ Ka linako tse ling likhopotso lia hlokahala bakeng sa bao e ka ’nang eaba ha ba etse ntho e ’ngoe le e ’ngoe eo ba lokelang ho e etsa kapa ba fokolloang ke kananelo le cheseho borapeling ba Jehova. Khothatso ea Bokreste e ananeloa haholo ke ba ratang Jehova. Ba thabela ho utloa seo Jehova a se buang ’me ba se nka e le lijo tsa moea tse enneng. (Esaia 55:3; Ba-Heberu 12:5, 6) Kahoo ke tšebeletso e molemo ho basebetsi ’moho le rōna—hape le ho batho ba sekametseng ho rapeleng Jehova—ho ba khothatsa ka lentsoe la Molimo. Pauluse ka boeena o khothalitse haholo.—Ba-Roma 15:30; 16:17; 1 Ba-Korinthe 1:10, 11; 1 Timothea 4:13; 6:11, 12; Ba-Heberu 10:24.

10. Ke hobane’ng ha mamello e hlokahala mabapi le ho fana ka khothatso?

¹⁰ Hape mosebeletsi ea inehetseng o tlameha ho tseba mokhoa oa ho hlaolela tholoana ea moea oa Molimo. Ho ka ’na ha hloka ho tiisetsa le ho mamella haholo ho leka ho khothatsa ba sa arabeleng ha bonolo. Ba bang ba ka ’na ba bontša ho haelloa ke kananelo boitekong bo entsoeng ba ho fana ka keletso le khothatso. Ho sa tsotellehe hoo, keletso le khothatso li lokela ho fanoa, haholo-holo ke baholo bohle ba Bakreste. Bohlale ba ho ruta bo kena tabeng. Ha motho a sebelisa Lentsoe la Jehova haholo, o tloaela ho le sebelisa haholoanyane. Ha tichere e tseba seithuti, e lokela ho nolofalloa ho fetisetsa boitsebiso ho sona. Pauluse o hlalosa hantle mokhoa o loketseng ho 1 Ba-Thessalonika 5:14: “Banab’eso, rea le rapela, hore le ke le lokise ba sa eeng ka molao, le tšelise ba pelo li tepeletseng, le tiise ba fokolang, ’me le be le mamello ho bohle.”

Furalla Bakoenehi

11. Re lokela ho etsa’ng ka bokoenehi?

¹¹ Pauluse o ne a rata hore Timothea a khone ho boloka ho leka-lekana ha hae, kapa ho boloka botsitso linthong tsohle. A se ke a itesella ho tšoana le ba sa khemeng le thuto e phelang ’me ba furallisa litsebe tsa bona ’nete. Mosebeletsi oa ’nete oa Molimo kajeno ha e be ea belaelang ka ho feteletseng le ho tšoenyeha litšebeletsong tsa hae ha a fumana hore ba bang ba furalla Lentsoe la Molimo le thuto ea Iona e phelang. Re lemositsoe esale pele hore ho tla ba le bakoenehi le batho ba tla rata feela hore litsebe tsa bona li thabisoe. Keletso e kang e ho 2 Johanne 9-11; 1 Ba-Korinthe 5:11-13 le 2 Timothea 3:5 ha e fane ka sebaka sa ho tloaelana le ba furallang ’nete. Hape, ha re reke lingoloa tsa bona kapa ho li bala. Ho na le ba bang ba bangata ba ratang ho utloa ’nete, ’me re ba le botsoalle ba Bokreste le bona.—1 Timothea 6:20, 21.

12. Ke hobane’ng ha mosebeletsi oa Mokreste a nka boemo boo bo tiileng?

¹² Pauluse o elelitse: “Batho ba lonya, ba thetsang, ba ea ’ne ba tsoele pele tšenyong, ba ntse ba thetsa, ba ntse ba thetsoa.” (2 Timothea 3:13) Leseling la temoso eo e tlang esale pele, mosebeletsi oa Mokreste ha a tsamaee le ba joalo. O mamela keletso e ntle ea moapostola: ‘Empa ha e le uena, u eme ho tseo u ithutileng tsona, tseo u li tiiselitsoeng, u ntse u tseba eo u ithutileng tsona ho eena; etsoe le bonyenyaneng ba hao u hlile ua tseba Mangolo a Halalelang, a lokelang ho u hlalefisetsa ho bolokeha, ka ho lumela ho Jesu Kreste. Lengolo lohle le bulutsoeng ke Moea oa Molimo, le na le molemo oa ho ruta, oa ho kholisa, oa ho laea, le oa ho holisa ka khōlo ea ho loka; motho oa Molimo a tle a phethehe, ’me a rutehele ruri mesebetsing eohle e molemo.’ (2 Timothea 3:14-17) Ho ithuta Lentsoe la Molimo kamehla ke molemo ho ba batlang ho phetha tšebeletso ea bona.

Mahlohonolo a Tsoang Litloaelanong tsa Bokreste

13. Ho sebetsa tšebeletsong le Pauluse e bile molemo joang ho Timothea, hona re ka rua molemo joang?

¹³ E bile lehlohonolo la sebele ho Timothea ho tloaelana le Pauluse ka lilemo, a khona ho bona kamoo mosebeletsi oa Molimo ea khabane, ea hōlileng tsebong a itšoarang kateng. Pauluse a sebelisa liphihlelo tsa bona e le khopotso e ntle ho Timothea: “Empa ha e le uena, u rutehile thuto ea ka ruri, le ho etsa ha ka, le phehello ea ka, le tumelo ea ka, le mamello ea ka, le lerato la ka, le sebete sa ka; le lihloriso le tse bohloko tse kileng tsa ntlhahela Antioke, le Ikone, le Lystra, le lihloriso life le life tseo ke li mameletseng; empa Morena o ntoetse ho tsona kaofela. Bohle ba ratang ho phela ka borapeli bo ho Jesu Kreste, ba tla hlorisoa joalo.” (2 Timothea 3:10-12) Le hoja rōna kajeno re sa kopane ka ho toba le Pauluse, tlaleho e khōlō ea litsela tsa hae tse fumanoang ka Bibeleng e ka re thusa le rōna.

14. Ke hobane’ng ha re tlameha ho itokiselletsa ho utloa bohloko?

¹⁴ Pauluse o boletse mahloriso a hae le ho utloa bohloko ha hae, ’me keletso ea hae ho mosebeletsi oa Mokreste ke hore e be ea ratang ho utloa bohloko. (2 Timothea 4:5) Hangata hoa hlokahala ho feta har’a tlhoriso hore re phethe tšebeletso ea rōna ka botlalo. Ke tokelo ho tšepahala tlas’a teko le ho thabisa pelo ea Jehova. (Liproverbia 27:11) Ho ka fella ka bopaki bo rorisang Jehova!

Mosebetsi oa Moevangeli

15. Ke hobane’ng ha re lokela ho abelana le ba bang evangeli ha re phethisisa tšebeletso ea rōna?

¹⁵ Ho bolela evangeli ho nka karolo e ntle ea nako ea mosebeletsi ea khabane oa Mokreste. Jesu o itse: “E ka khona Evangeli e bolelloe lichaba tsohle pele.” (Mareka 13:10) A hlakisa hore bofelo bo ke ke ba fihla ho fihlela litaba tse molemo li boletsoe ka ho lekaneng. Pauluse o ile a fuoa tokelo ea ho arolelana litaba tse molemo le balumeli ba bangata ho pholletsa le ’Muso oa Roma. Hona ha fella ka ho hlongoa ha liphutheho tse ncha le ho khethoa ha balebeli. Le bona, ba kopanela le baena ba bona ba Bakreste le bo-khaitseli mosebetsing oa ho bolela evangeli ’me kahoo ba atolosetsa mosebetsi oa ho bolela hōle le ka bophara. Mosebetsi o mongata o etsoa joalokaha Pauluse a hlalosa, ‘ka ho ruta pontšeng le ka ntlo le ntlo.’ (Liketso 20:20) Ho bile le liphello tse molemo ka nako eo, ’me ho na le liphello tse babatsehang kajeno ha ho bolela ha Bokreste ho etsoa lefatšeng ka bophara.—Johanne 14:12.

16. Ke bopaki bofe bo bontšang hore ba bangata ba sebelisa keletso ea Pauluse e ho 2 Timothea 4:5?

¹⁶ Ka tumelo, ba bangata ba nka menyetla ea ho atolosa litšebeletso tsa bona mosebetsing oa ho bolela evangeli. Likete li kenetse tšimo ea boromuoa, ’me ba liketekete ba kopanela likarolong tsa tšebeletso ea bopula-maliboho. Hona joale linaheng tse 205 ho na le ba fetang 2 650 000 ba sebeletsang e le baboleli ba evangeli liphuthehong tse fetang 46 000, ’me lipalo lia eketseha. Lintho tsena tse babatsehang ke bopaki ba hore bahlanka ba inehetseng ba Jehova ba tebisa pelong taelo ea Molimo ho bona ’me ba ‘phethisisa’ tšebeletso ea bona.

Ho Phetha Mosebetsi

17. Jehova o lakatsa ho bona bahlanka ba hae ba etsa eng mabapi le mosebetsi oo ba o abetsoeng kajeno?

¹⁷ Jehova o abetse batlotsuoa ba hae tšebeletso, ’me “bongata bo boholo” bo sebetsa hammoho le bona. Ka boprofeta, ho Ezekiele khaolo ea 9, mosebetsi o tšoantšoa le ho tšoaea ba feheloang le ba bobolang liphatleng. Re tseba ka boprofeta boo hore nako e ea tla eo monna ea nang le lenaka la mongoli a tla re: “Ke entse kamoo u ntaetseng kateng.” Jehova o thabisoa ke ha bahlanka ba hae ba etsa kamoo a ba laetseng kateng.—Ezekiele 9:4, 11; Genese 6:22; 1 Ba-Korinthe 4:2.

18, 19. Litsela tse ling tseo u ka sebelisang khothatso ea Pauluse ho 2 Timothea 4:1-5 ke life?

¹⁸ Ha re talima maemo a lefatše a ntseng a hlaha tumellanong le boprofeta bo mabapi le matsatsi ana a qetello, ha ho seo re ka se etsang ha e se ho utloa ho potlaka ha mosebetsi oa ho bolela oo re o abetsoeng. Bophelo boa ameha. Hoa bokelloa ’me Jehova o ho potlakisa ka nako ea teng. (Esaia 60:22) Kahoo, ho sa tsotellehe boikarabelo ba hao u le mohlanka ea inehetseng oa Jehova, u bo etse ho mo thabisa ka botlalo. (Ba-Kolosse 1:10; 3:23, 24) Hopola mosebetsi oo u o filoeng ’me u leke ho o phetha ka botlalo. Haeba u hlokomela mesebetsei e meng Holong ea ’Muso, etsa mosebetsi hantle. Haeba u abetsoe mesebetsi le sehlopha sa Thuto ea Buka ea Phutheho, sebelisanang haufi ’me le khothatsane. Haeba u pula-maliboho kapa moromuoa, tiisa hore u sebetsa ka matla ho finyella lipakane tsa tšebeletso ea hao.—Ba-Roma 12:6-9.

¹⁹ U ka boetse ua ipotsa, Na nka be ke etsa ho hong ho eketsehileng ho thusa Bakreste ba bang, haholo-holo ba bacha phuthehong, ho ba haha? Haeba karolo ea tšebeletso ea hao ke ho ba moholo ka phuthehong, tseba chebahalo ea “mohlape” ’me u hlokomele hantle bohle ba kopanelang. Ela hloko hore ho se be le ba khathalang kapa ba sa beeng tsebong e nepahetseng ea Morena oa rōna Jesu Kreste. (2 Petrose 1:5-8) Ho feta tsohle, falimehela seo u se etsang mosebetsing oa ho bolela evangeli ho fihlela moo ‘u phethisisang tšebeletso ea hao.’

Na U sa Hopola?

◻ Boemo ba Pauluse e ne e le bofe ha a ngola Timothea oa Bobeli?

◻ Ke hobane’ng ha e le habohlokoa ho bolela lentsoe?

◻ Ke hobane’ng ha khothatso e le ea bohlokoa?

◻ Baruti ba bohata ba lokela ho tšoaroa joang?

◻ Ke hobane’ng ha ho bolela evangeli e le habohlokoa hakaale kajeno?

[Setšoantšo se leqepheng la 16, 17]

Lengolo la bobeli la Pauluse le ngoletsoeng Timothea le mo thusitse ‘ho phethisisa tšebeletso ea hae’