Melao ea Molimo e Molemong oa Rōna
“Molao oa hao ke o rata hakaakang!”—PESALEME EA 119:97.
1. Ho tloaelehile boikutlo bofe mabapi le ho mamela melao ea Molimo?
BATHO kajeno ha ba rate ho mamela melao ea Molimo. Ba bangata ba nka hore ho ikokobeletsa molaoli ea phahameng ea sa bonahaleng ha ho na thuso. Re phela mehleng ea litekanyetso tse feto-fetohang tsa boitšoaro, ea ha ho sa hlaka hore na se nepahetseng le se fosahetseng ke sefe, le ea ha ho se bonolo ho hlalosa se nepahetseng kapa se fosahetseng. (Liproverbia 17:15; Esaia 5:20) Phuputso e entsoeng haufinyane tjena e bontša tsela e tloaelehileng eo batho ba bangata ba nang le moea oa lefatše ba nahanang ka eona, e re: “Maamerika a mangata a batla ho iketsetsa qeto ea se nepahetseng, se molemo le se utloahalang.” Ba khetha “Molimo ea khoehlisitseng marapo. Ba khetha hore ho se ke ha e-ba le melao e thata. Ha ba batle baokameli ba matla ba emelang se loketseng, e-bang ke boitšoarong kapa ka litsela tse ling.” Mohlahlobi e mong oa kahisano o ile a re kajeno “ho lebelletsoe hore batho ba iketsetse liqeto hore na ho phela bophelo bo khabane le bo hloekileng ke eng.” O ile a tsoela pele a re: “Balaoli ba mofuta ofe kapa ofe ba phahameng ba lokela ho etsa litaelo tse lumellanang le litlhoko tsa batho ba sebele.”
2. Ho boleloa ha molao ka lekhetlo la pele ka Bibeleng ho amana haufi joang le ho hlohonolofatsoa le ho amoheloa ke Molimo?
2 Kaha batho ba bangata ba belaella bohlokoa ba melao ea Jehova, ho hlokahala hore re ikholise ka matla hore litekanyetso tsa Molimo li molemong oa rōna. Hoa thahasellisa ho hlahloba tlaleho e bolelang molao ka lekhetlo la pele ka Bibeleng. Ho Genese 26:5, re bala mantsoe a Molimo a reng: “Abrahama o ile a . . . tsoela pele ho boloka tlamo ea hae ho ’na, litaelo tsa ka, litaelo tsa ka tse hlomamisitsoeng, le melao ea ka.” Mantsoe ana a ile a boleloa makholo a lilemo pele Jehova a fana ka Molao o tobileng ho bana ba Abrahama. Molimo o ile a putsa ho mamela ha Abrahama joang, ho akarelletsa ho mamela melao ea Hae? Jehova Molimo o ile a mo tšepisa, a re: “Ka sebele lichaba tsohle tsa lefatše li tla itlhohonolofatsa ka peō ea hao.” (Genese 22:18) Kahoo, ho mamela melao ea Molimo ho amana haufi le ho hlohonolofatsoa le ho amoheloa ke Molimo.
3. (a) Mopesaleme e mong o ile a bolela boikutlo bofe mabapi le molao oa Jehova? (b) Ke lipotso life tse hlokang tlhokomelo ea rōna?
3 Mopesaleme e mong—eo mohlomong e neng e le khosana ea Juda e bile e tla ba morena—o ile a bolela maikutlo ao ho sa tloaelehang hore a amahanngoe le molao. O ile a bua ntho e tsotehang ho Molimo a re: “Molao oa hao ke o rata hakaakang!” (Pesaleme ea 119:97) O ne a sa phasolohe feela ka lebaka la ho nkeha maikutlo. E ne e le polelo e bontšang ho rata thato ea Molimo joalokaha e ngotsoe molaong oa hae. Jesu Kreste, Mora ea phethahetseng oa Molimo, o ne a ikutloa ka tsela e tšoanang. Jesu o ile a hlalosoa ka boprofeta a re: “Ke thabetse ho etsa thato ea hao, Molimo oa ka, Molao oa hao o ka har’a litho tsa ka tse ka hare.” (Pesaleme ea 40:8; Baheberu 10:9) Ho thoe’ng ka rōna? Na re thabela ho etsa thato ea Molimo? Na re kholisehile hore melao ea Molimo ea thusa hape e molemo? Ho mamela melao ea Molimo ho na le thuso efe borapeling ba rōna, bophelong ba rōna ba letsatsi le letsatsi, ho etseng ha rōna liqeto le likamanong tsa rōna le ba bang? E le hore re rate molao oa Molimo, re lokela ho utloisisa hore na ke hobane’ng ha Molimo a e-na le tokelo ea ho etsa melao le ho bona hore ea sebetsa.
Jehova ke Monehi-molao ea Nepahetseng
4. Ke hobane’ng ha Jehova e le Monehi-molao ea phahameng le ea nepahetseng?
4 Kaha Jehova ke ’Mōpi, ke Monehi-molao ea phahameng le ea nepahetseng bokahohleng. (Tšenolo 4:11) Moprofeta Esaia o ile a re: “Jehova ke Mofani oa rōna oa taelo e hlomamisitsoeng.” (Esaia 33:22) O behile melao ea tlhaho e laolang lintho tse phelang le tse sa pheleng. (Jobo 38:4-38; 39:1-12; Pesaleme ea 104:5-19) Kaha motho o bōpiloe ke Molimo, o tlangoa ke melao ea Jehova ea tlhaho. Hape, le hoja motho a ikhethela ho etsa eng kapa eng ka bolokolohi, a tseba ho ipehela mabaka, o thaba feela ha a ikokobeletsa melao ea Molimo ea boitšoaro le ea borapeli.—Baroma 12:1; 1 Bakorinthe 2:14-16.
5. Molao-motheo o ho Bagalata 6:7 o bontša joang hore melao ea Molimo ke ’nete?
5 Joalokaha re tseba, melao ea Jehova ea tlhaho e ke ke ea tlōloa. (Jeremia 33:20, 21) Haeba motho a etsa lintho tse khahlanong le melao ea tlhaho, e kang molao oa khoheli, o kotula litholoana tsa teng. Ka tsela e tšoanang, melao ea Molimo ea boitšoaro ha e fetoloe ’me motho a ke ke a e tsoa tlaase kapa a e tlōla ho se seo a se kotulang. E phethahatsoa ka tieo joaloka melao ea hae ea tlholeho, le hoja phello e ka ’na ea lieha. “Molimo a ke ke a songoa. Etsoe leha e le sefe seo motho a se jalang, o tla boela a se kotule.”—Bagalata 6:7; 1 Timothea 5:24.
Se Akaretsoang ke Molao oa Jehova
6. Melao ea Molimo e akaretsa lintho life?
6 Molao oa Moshe e ne e le pontšo e hlahelletseng ea molao oa Molimo. (Baroma 7:12) Ka mor’a nako, Jehova Molimo o ile a beha “molao oa Kreste”a sebakeng sa Molao oa Moshe. (Bagalata 6:2; 1 Bakorinthe 9:21) Re le Bakreste ba tlas’a ‘molao o phethahetseng oa tokoloho,’ re ananela hore litaelo tsa Molimo ha li sebetse feela litšobotsing tse itseng tsa bophelo ba rōna, tse kang litumelo tse rutoang kapa mekhoa ea tšebeletso. Litekanyetso tsa hae li akaretsa maemo ’ohle a bophelo, ho akarelletsa litaba tsa lelapa, litšebelisano tsa khoebo, boitšoaro pakeng tsa ba batona le ba batšehali, boikutlo mabapi le Bakreste ba bang le ho kopanela borapeling ba ’nete.—Jakobo 1:25, 27.
7. Fana ka mehlala ea melao ea bohlokoa ea Molimo.
7 Ka mohlala, Bibele e re: “Leha e le lihlola, kapa barapeli ba litšoantšo, kapa bafebi, kapa banna ba boloketsoeng merero eo e seng ea tlhaho, kapa banna ba robalang le banna, kapa masholu, kapa batho ba meharo, kapa matahoa, kapa ba litlhapa, kapa bahanyapetsi ba ke ke ba rua ’muso oa Molimo.” (1 Bakorinthe 6:9, 10) Ke ’nete hore bofebe le bohlola hase feela “ho ratana.” Bosodoma hase feela “mokhoa o mong hape oa bophelo.” Lintho tsena ke tlōlo ea molao oa Jehova. Ho joalo le ka lintho tse kang ho utsoa, ho qala leshano le ho etselletsa. (Pesaleme ea 101:5; Bakolose 3:9; 1 Petrose 4:15) Jakobo o ile a nyatsa ho ikhopola ho tlōla, athe Pauluse eena o re elelitse hore re qobe lipuo tsa booatla le mesoaso e nyonyehang. (Baefese 5:4; Jakobo 4:16) Ho Bakreste melao ena eohle ea boitšoaro ke karolo ea molao o phethahetseng oa Molimo.—Pesaleme ea 19:7.
8. (a) Molao oa Jehova ke oa mofuta ofe? (b) Moelelo o ka sehloohong oa lentsoe la Seheberu bakeng sa “molao” ke ofe?
8 Litaelo tseo tsa motheo tse ka Lentsoeng la Jehova li senola hore molao oa hae hase feela letoto la litaelo tse sa nahaneleng le tse thata-thata. Ke motheo oa bophelo bo leka-lekaneng le bo nang le litholoana, bo molemo litšobotsing tsohle tsa boitšoaro. Molao oa Molimo oa matlafatsa, o lokile, ’me oa laea. (Pesaleme ea 119:72) Lentsoe “molao” joalokaha le sebelisitsoe ke mopesaleme le fetoletsoe lentsoeng la Seheberu toh·rahʹ. Setsebi se seng sa Bibele se re: “Lentsoe lena le bōpiloe ka ketso e bolelang ho tsamaisa, ho tataisa, ho korola, ho betsetsa pele. Ha ho le joalo, moelelo oa lona e ka ba molao oa boitšoaro.” Mopesaleme o ne a nka molao e le mpho e tsoang ho Molimo. Na ha rea lokela ho o nka ka tsela e tšoanang, re o lumella hore o susumetse tsela eo re phelang ka eona?
9, 10. (a) Ke hobane’ng ha re hloka tataiso e tšepahalang? (b) Re ka phela ka thabo le katleho ka ho etsa eng feela?
9 Libōpuoa tsohle li hloka tataiso e tšepahalang le eo ho ka itšetlehoang ka eona. Jesu le mangeloi a mang le bona baa e hloka, le hoja e le libōpuoa tse phahameng ho feta motho. (Pesaleme ea 8:5; Johanne 5:30; 6:38; Baheberu 2:7; Tšenolo 22:8, 9) Haeba libōpuoa tsena tse phethahetseng li ka rua molemo tataisong ea Molimo, batho ba sa phethahalang ba ka o rua haholo hakaakang! Liketsahalo tsa histori le phihlelo ea rōna li bontšitse bonnete ba se boletsoeng ke moprofeta Jeremia ha a re: “Ke tseba hantle, Jehova, hore tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.”—Jeremia 10:23.
10 Haeba re batla ho phela ka thabo le katleho, re lokela ho batla tataiso ho Molimo. Morena Solomone o ile a hlokomela kotsi ea ho phela ka litekanyetso tseo motho a iketselitseng tsona, ntle ho tataiso ea Molimo, a re: “Ho na le tsela e lokileng ka pel’a motho, empa qetello ea eona hamorao ke litsela tsa lefu.”—Liproverbia 14:12.
Mabaka a ho Rata Molao oa Jehova
11. Ke hobane’ng ha re lokela ho lakatsa ho utloisisa molao oa Molimo?
11 Ho loketse hore re hōlise takatso e tebileng ea ho utloisisa molao oa Jehova. Mopesaleme o ile a bontša takatso eo ha a ne a re: “Tutubolla mahlo a ka, e le hore nka talima lintho tse hlollang tse tsoang molaong oa hao.” (Pesaleme ea 119:18) Ha re ntse re hōla tsebong ea Molimo le litseleng tsa hae, kananelo ea rōna bakeng sa mantsoe a Esaia e tla teba haholoanyane, o re: “’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona. Hoja u ka ela litaelo tsa ka hloko!” (Esaia 48:17, 18) Ke takatso e tebileng ea Jehova hore batho ba hae ba qobe tlokotsi ’me ba thabele bophelo ka ho ela litaelo tsa hae hloko. A re hlahlobeng mabaka a mang a ka sehloohong a hore na ke hobane’ng ha re lokela ho rata molao oa Molimo.
12. Ho re tseba ha Jehova ho mo etsa Monehi-molao ea molemo ka ho fetisisa joang?
12 Molao oa Molimo o tsoa ho Ea re tsebang hamolemo ka ho fetisisa. Kaha Jehova ke ’Mōpi oa rōna, hoa utloahala hore o ne a tla re tseba ka ntle le ka hare. (Pesaleme ea 139:1, 2; Liketso 17:24-28) Metsoalle e haufi, beng ka rōna, esita le batsoali ba ke ke ba re tseba hantle joaloka Jehova. Molimo o re tseba ho feta kamoo re itsebang kateng! Moetsi oa rōna o utloisisa litlhoko tsa rōna tsa moea, tsa maikutlo, tsa kelello le tsa nama ho feta mang kapa mang. Ha a lebisa tlhokomelo ea hae ho rōna, o bontša kutloisiso e tebileng ea sebōpeho sa rōna, litakatso tsa rōna le litabatabelo tsa rōna. Jehova o utloisisa bofokoli ba rōna, empa hape o tseba matla a rōna a ho etsa se setle. Mopesaleme o re: “O tseba sebōpeho sa rōna hantle, oa hopola hore re lerōle.” (Pesaleme ea 103:14) Kahoo, re ka ikutloa re sireletsehile moeeng ha re ntse re batla ho tsamaea ka melao ea hae, le ha re ntse re ithaopela ho ikokobeletsa tataiso ea Molimo.—Liproverbia 3:19-26.
13. Ke hobane’ng ha re ka kholiseha hore Jehova o hlile o re batlela se molemohali?
13 Molao oa Molimo o tsoa ho Ea re ratang. Molimo o amehile ka botebo hore re iketle ka ho sa feleng. O ile a tela sohle ha a fana ka Mora oa hae hore e be “thekollo e le phapanyetsano bakeng sa ba bangata.” (Matheu 20:28) Jehova o tšepisitse hore ‘a ke ke a re tlohela hore re lekoe ho feta seo re ka se jarang.’ (1 Bakorinthe 10:13) Bibele e re tiisetsa hore ‘oa re tsotella.’ (1 Petrose 5:7) Ha ho motho le ea mong ea fetang Jehova ka thahasello e lerato ea ho tataisa batho ka tsela e molemo. O tseba se molemo bakeng sa rōna le moeli oa se ka re thabisang le se ka re soabisang. Le hoja re sa phethahala ebile re etsa liphoso, ha re phehella ho loka, o bontša hore o re rata ka litsela tse tla fella ka bophelo le litlhohonolofatso.—Ezekiele 33:11.
14. Molao oa Molimo o fapana le likhopolo tsa batho ka litsela life tsa bohlokoa?
14 Tsela eo molao oa Molimo o sa fetoheng ka eona ea khothatsa. Linakong tse mahlonoko tseo re phelang ho tsona, Jehova ke tšiea e tiileng, o teng kamehla. (Pesaleme ea 90:2) O ipoletse tjena: “Ke ’na Jehova; ha kea fetoha.” (Malakia 3:6) Litekanyetso tsa Molimo, joalokaha li ngotsoe ka Bibeleng, li tšepahala ka ho feletseng, ha li tšoane le likhopolo tse feto-fetohang tsa batho. (Jakobo 1:17) Ka mohlala, ka lilemo tse telele litsebi tsa kelello li ile tsa buella ho bokotsoa ha bana, empa hamorao tse ling li ile tsa fetoha ’me tsa lumela hore keletso ea tsona e ne e fosahetse. Tabeng ena, litekanyetso le litataiso tsa lefatše li ea koana le koana joalokaha eka li fefoloa ke moea. Leha ho le joalo, Lentsoe la Jehova ha le fetohe. Ka makholo a lilemo Bibele e fane ka keletso ea kamoo bana ba ka hōlisoang ka lerato kateng. Moapostola Pauluse o ile a ngola, a re: “Bo-ntate, le se ke la halefisa bana ba lōna, empa le tsoele pele ho ba hōlisa ka taeo le kelello e laoloang ke Jehova.” (Baefese 6:4) Ho khothatsa hakaakang ho tseba hore re ka itšetleha ka litekanyetso tsa Jehova; li ke ke tsa fetoha!
Litlhohonolofatso Tsa ba Mamelang Melao ea Molimo
15, 16. (a) Phello e tla ba efe ha re sebelisa litekanyetso tsa Jehova? (b) Melao ea Molimo e ka tataisa lenyalo ka tsela e utloahalang joang?
15 Molimo o ile a bua ka moprofeta oa hae Esaia, a re: “Lentsoe la ka le tsoang molomong oa ka . . . le tla atleha.” (Esaia 55:11) Ke ’nete hore ha re loana ka tieo hore re latele litekanyetso tse ka Lentsoeng la hae, re tla atleha, re finyelle lintho tse molemo, ’me re fumane thabo.
16 Nahana kamoo melao ea Molimo e tataisetsang lenyalong le atlehileng kateng. Pauluse o ile a ngola, a re: “Lenyalo le ke le hlomphehe har’a bohle, le liphate tsa lenyalo li hloke litšila, kaha Molimo o tla ahlola lihlola le bafebi.” (Baheberu 13:4) Banyalani ba lokela ho hlomphana le ho ratana: “E mong le e mong oa lōna ka bomong a ke a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae.” (Baefese 5:33) Lerato le hlokahalang le hlalosoa ho 1 Bakorinthe 13:4-8: “Lerato lea tiisetsa ’me le mosa. Lerato ha le boulele, ha le ithorise, ha le ikhohomose, ha le itšoare ka mokhoa o sa hlompheheng, ha le batle lithahasello tsa lona, ha le halefe. Ha le boloke tlaleho ea bobe. Ha le thabele ho se loke, empa le thabela ’nete. Le jara lintho tsohle, le lumela lintho tsohle, le tšepa lintho tsohle, le mamella lintho tsohle. Lerato ha le fele le ka mohla.” Lenyalo le tsamaisoang ka lerato la mofuta ona le ke ke la fela.
17. Ho na le melemo efe ha ho sebelisoa litekanyetso tsa Jehova tšebelisong ea joala?
17 Bopaki bo bong ba hore litekanyetso tsa Jehova li molemo, ke hore o nyatsa botahoa. O bile o hana ha motho a “inehella veine e ngata.” (1 Timothea 3:3, 8; Baroma 13:13) Ba bangata ba hlokomolohang litekanyetso tsa Molimo tabeng ena ba tšoaroa ke maloetse a bakoang kapa a feteletsoang ke ho noa ho tlōla. Ba bang ba ile ba hlokomoloha keletso ea Bibele tabeng ea ho lekanyetsa, ’me ba “itebatsa litsietsi” ka ho noa ho tlōla. Mathata a ho noa ho tlōla a mangata, a akarelletsa ho lahleheloa ke seriti, ho hloka kutloano ka lapeng kapa ho qhalana ha lelapa, meputso e hafakoang le ho senyeheloa ke mosebetsi. (Liproverbia 23:19-21, 29-35) Litekanyetso tsa Jehova mabapi le tšebeliso ea joala lia sireletsa.
18. Na melao ea Molimo ea thusa litabeng tsa lichelete? Hlalosa.
18 Hape, litekanyetso tsa Molimo li thusitse litabeng tsa lichelete. Bibele e phehella Bakreste hore e be ba tšepahalang le ba khothetseng. (Luka 16:10; Baefese 4:28; Bakolose 3:23) Kaha Bakreste ba bangata ba latela keletso ena, ba ’nile ba phahamisoa mesebetsing kapa ba lula mesebetsing ha ba bang ba lelekoa. Motho o boetse o rua molemo licheleteng ha a qoba mekhoa le lintho tse lemalloang tse haneloang ke Mangolo tse kang ho becha, ho tsuba le tšebeliso e mpe ea lithethefatsi. Ha ho pelaelo hore u ka nahana ka mehlala e meng ea kamoo litekanyetso tsa Molimo li thusang kateng maemong a lichelete.
19, 20. Ke hobane’ng ha e le bohlale ho amohela le ho khomarela melao ea Molimo?
19 Ho bonolo hore batho ba sa phethahalang ba khelohe melao ea Molimo le litekanyetso tsa hae. Nahana ka Baiseraele Thabeng ea Sinai. Molimo o ile a re ho bona: “Haeba le tla mamela lentsoe la ka ka tieo ’me ruri le boloke selekane sa ka, joale ka sebele le tla fetoha thepa ea ka e khethehileng har’a lichaba tse ling tsohle.” Ba araba ba re: “Sohle seo Jehova a se buileng re ikemiselitse ho se etsa.” Leha ho le joalo, ba ile ba khetha ho tsamaea ka tsela e fapaneng le eo hakaakang! (Exoda 19:5, 8; Pesaleme ea 106:12-43) Ho fapana le bona, a re amoheleng re be re khomareleng litekanyetso tsa Molimo.
20 Ke ntho e bohlale le e thabisang hore re khomarele melao e ikhethang eo Jehova a faneng ka eona ho re thusa ho tsamaisa bophelo ba rōna. (Pesaleme ea 19:7-11) E le hore re etse sena ka katleho, ntho e ’ngoe e hlokahalang ke hore re ananele bohlokoa ba melao-motheo ea Molimo. Taba ena e tla tšohloa sehloohong se latelang.
[Mongolo o botlaaseng ba leqephe]
a Bakeng sa puisano e pharaletseng ea “molao oa Kreste,” bona Molula-Qhooa, September 1, 1996, leqepheng la 14-24.
Na Ua Hopola?
• Ke hobane’ng ha re ka tšepa hore melao ea Molimo e molemong oa rōna?
• Re lokela ho rata melao ea Jehova ka mabaka afe?
• Melao ea Molimo e molemo ka litsela life?
[Setšoantšo se leqepheng la 13]
Abrahama o ile a hlohonolofatsoa haholo ka lebaka la ho mamela molao oa Jehova
[Setšoantšo se leqepheng la 15]
Matšoenyeho a bophelo bo phathahaneng ba kajeno a khelosa ba bangata molaong oa Molimo
[Setšoantšo se leqepheng la 17]
Molao oa Molimo o tsitsitse ebile ha o fetohe joaloka ntlo e lefikeng e fanang ka khanya bakeng sa basesisi ba likepe