LETSATSI LA SEHOPOTSO
Ha Letsatsi le se le Liketse
Labone, la 2 April
Lona mohlatsoana, le se ke la tšoha hobane Ntate oa lona o thabela ho le fa ’Muso.—Luka 12:32.
Nakong ea Lijo Tsa Shoalane Tsa Morena, Jesu o ile a fa baapostola ba hae bohobe bo se nang tomoso ’me a ba bolella hore bo emela ’mele oa hae. Hape o ile a ba fa veine ’me a re e emela “mali a selekane.” (Mar. 14:22-25; Luka 22:20; 1 Bakor. 11:24) O ile a se bitsa selekane se secha ’me selekane sena se pakeng tsa Jehova le “ba ntlo ea Iseraele” e leng batho ba tla busa le Jesu “’Musong oa Molimo.” (Baheb. 8:6, 10; 9:15) Lijong Tsa Shoalane Tsa Morena, Jesu o ne a bua le “mohlatsoana.” Baapostola ba neng ba e-na le eena moo, ke bona ba pele ba ho ba karolo ea sehlopha sena se senyenyane. Ke bona ba tla fumana sebaka leholimong le Jesu. w24.12 11 ¶9-10
’Malo oa Bibele oa Sehopotso: (Liketsahalo tsa la 13 Nisane) Matheu 26:17-19; Mareka 14:12-16; Luka 22:7-13 (Ha Letsatsi le se le Liketse ka la 14 Nisane) Johanne 13:1-5; 14:1-3
Labohlano, la 3 April
Molimo o ratile lefatše haholo hoo a ileng a fana ka Mora oa hae ea mong e le hore e mong le e mong ea bontšang hore o lumela ho eena a se ke a timetsoa empa a fumane bophelo bo sa feleng.—Joh. 3:16.
Jesu o ile a rekisoa, a tšoaroa, a rohakoa, a senngoa lebitso, a ahloleloa lefu a ba a hlokofatsoa ka sehloho. Masole a ile a mo isa moo a neng a tl’o bolaeloa teng a ba a mo khokhothela palong. Ha Jesu a ntse a etsahalloa ke lintho tsena tse bohloko, Jehova Molimo o ile a utloa bohloko bo fetang. Le hoja Jehova a ne a e-na le matla a ho pholosa Jesu, ha aa ka a etsa joalo. Hobane’ng? Hobane le rona oa re rata. Sehlabelo sa Jesu ke bopaki bo boholo ka ho fetisisa ba hore Jehova o u rata haholo. O ile a etsa ntho e ileng ea mo utloisa bohloko haholo, a fana ka Mora oa hae eo a mo ratang e le hore a u pholose sebeng le lefung. (1 Joh. 4:9, 10) Jehova o batla ho re thusa hore re mo sebeletse le hoja re le baetsalibe ebile o ikemiselitse ho felisa sebe nakong e tlang. w24.08 6 ¶13-14
’Malo oa Bibele oa Sehopotso: (Liketsahalo tsa la 14 Nisane) Johanne 19:1-42
Moqebelo, la 4 April
Kreste o ile a utloa bohloko bakeng sa lona.—1 Pet. 2:21.
Re ka utloisisa haholoanyane lerato leo Jehova a re ratang ka lona ha re nahana ka seo a ileng a se tela e le hore re lopolloe. Satane o re ha ho mohlanka oa Molimo ea tla lula a tšepahala tlas’a maemo a boima. Ho tiisa hore Satane o leshano, Jehova o ile a lumella Jesu hore a utloisoe bohloko pele a shoa. (Jobo 2:1-5) Jehova o ne a shebile ha Jesu a ntse a rohakoa ke batho, a otloa ke masole, a khokhotheloa palong a bile a shoa ka sehloho. (Mat. 27:28-31, 39) O ne a e-na le matla a ho thibela lintho tseo kaofela ho etsahala. (Mat. 27:42, 43) Empa ha a ne a ka mo pholosa, Jesu a ka be a sa fana ka bophelo ba hae e le tefo ea topollo ’me re ne re tla sala re se na tšepo. Kahoo, Jehova o ile a lumella Mora oa hae ho mamella bohloko boo ho fihlela a shoa. w25.01 22 ¶7
’Malo oa Bibele oa Sehopotso: (Liketsahalo tsa la 15 Nisane) Matheu 27:62-66 (Ha Letsatsi le se le Liketse ka la 16 Nisane) Johanne 20:1