April

Re lokela ho ba le tumelo sehlabelong sa Jesu seo e leng tefo ea topollo, e le hore re fumane bophelo bo sa feleng. (Baef. 1:7) Batho bao Jesu a ileng a re ke “linku tse ling” ha baa lokela ho ja bohobe kapa ho noa veine Lijong Tsa Shoalane Tsa Morena. (Joh. 10:16) Leha ho le joalo, nama le mali a Jesu Kreste a ntse a ba tsoela molemo hobane ba bontša tumelo sehlabelong sa Jesu le litlhohonolofatsong tse tlisoang ke sona. (Joh. 6:53) Empa batho ba jang ba bontša hore ba tlas’a selekane se secha ebile ba na le tšepo ea ho busa ’Musong oa leholimo. Kahoo, ho sa tsotellehe hore na re batlotsuoa kapa re ba linku tse ling, re lokela ho ba le tumelo e matla e le hore re fumane bophelo bo sa feleng. w24.12 13 ¶14, 16

Nakong ea Lijo Tsa Shoalane Tsa Morena, Jesu o ile a fa baapostola ba hae bohobe bo se nang tomoso ’me a ba bolella hore bo emela ’mele oa hae. Hape o ile a ba fa veine ’me a re e emela “mali a selekane.” (Mar. 14:​22-25; Luka 22:20; 1 Bakor. 11:24) O ile a se bitsa selekane se secha ’me selekane sena se pakeng tsa Jehova le “ba ntlo ea Iseraele” e leng batho ba tla busa le Jesu “’Musong oa Molimo.” (Baheb. 8:​6, 10; 9:15) Lijong Tsa Shoalane Tsa Morena, Jesu o ne a bua le “mohlatsoana.” Baapostola ba neng ba e-na le eena moo, ke bona ba pele ba ho ba karolo ea sehlopha sena se senyenyane. Ke bona ba tla fumana sebaka leholimong le Jesu. w24.12 11 ¶9-10

Jesu o ile a rekisoa, a tšoaroa, a rohakoa, a senngoa lebitso, a ahloleloa lefu a ba a hlokofatsoa ka sehloho. Masole a ile a mo isa moo a neng a tl’o bolaeloa teng a ba a mo khokhothela palong. Ha Jesu a ntse a etsahalloa ke lintho tsena tse bohloko, Jehova Molimo o ile a utloa bohloko bo fetang. Le hoja Jehova a ne a e-na le matla a ho pholosa Jesu, ha aa ka a etsa joalo. Hobane’ng? Hobane le rona oa re rata. Sehlabelo sa Jesu ke bopaki bo boholo ka ho fetisisa ba hore Jehova o u rata haholo. O ile a etsa ntho e ileng ea mo utloisa bohloko haholo, a fana ka Mora oa hae eo a mo ratang e le hore a u pholose sebeng le lefung. (1 Joh. 4:​9, 10) Jehova o batla ho re thusa hore re mo sebeletse le hoja re le baetsalibe ebile o ikemiselitse ho felisa sebe nakong e tlang. w24.08 6 ¶13-14

Re ka utloisisa haholoanyane lerato leo Jehova a re ratang ka lona ha re nahana ka seo a ileng a se tela e le hore re lopolloe. Satane o re ha ho mohlanka oa Molimo ea tla lula a tšepahala tlas’a maemo a boima. Ho tiisa hore Satane o leshano, Jehova o ile a lumella Jesu hore a utloisoe bohloko pele a shoa. (Jobo 2:​1-5) Jehova o ne a shebile ha Jesu a ntse a rohakoa ke batho, a otloa ke masole, a khokhotheloa palong a bile a shoa ka sehloho. (Mat. 27:​28-31, 39) O ne a e-na le matla a ho thibela lintho tseo kaofela ho etsahala. (Mat. 27:​42, 43) Empa ha a ne a ka mo pholosa, Jesu a ka be a sa fana ka bophelo ba hae e le tefo ea topollo ’me re ne re tla sala re se na tšepo. Kahoo, Jehova o ile a lumella Mora oa hae ho mamella bohloko boo ho fihlela a shoa. w25.01 22 ¶7

Letsatsi ke la 16 Nisane selemong sa 33, barutuoa ba Jesu ba utloile bohloko bo otlang pelong ba bile ba tšohile haholo. Ba babeli ba tloha Jerusalema ba ea Emmause. Ha ba ntse ba le tseleng ho hlaha monna eo ba sa mo tsebeng ’me o tsamaea le bona. Baa mo qoqela hore na ho etsahetse’ng ka Jesu. Monna enoa o ba bolella litaba tse tl’o fetola bophelo ba bona. O ile a ba bolella hore na ke hobane’ng ha Mesia a ile a lokela hore a utloisoe bohloko le ho bolaoa “a qala ka mangolo a ngotsoeng ke Moshe le a Baprofeta kaofela.” Barutuoa bana ha ba fihla Emmause ke hona ba hlokomelang hore monna enoa eo ba ntseng ba tsamaea le eena ke Jesu ea tsositsoeng bafung. (Luka 24:​13-35) Jesu o ile a qeta matsatsi a 40 a le lefatšeng pele a khutlela leholimong. Nakong eo, o ile a hlaha ka makhetlo ho barutuoa ba hae. Ka nako ena, Jesu o ile a khothatsa barutuoa ba hae ba neng ba tšohile ba bile ba utloile bohloko. Ba ile ba thaba haholo ’me ba ba le sebete sa ho bolela le ho ruta litaba tse monate tsa ’Muso. w24.10 12 ¶1-3

Ngoana oa hola ha nako e ntse e ea empa ha ho motho eo kamano ea hae le Jehova e ka holang ho se letho leo a le etsang. Ka mohlala, Bakreste ba Korinthe ba ile ba amohela litaba tse monate, ba kolobetsoa, ba amohela moea o halalelang ba ba ba ithuta linthong tseo moapostola Pauluse a neng a ba ruta tsona. (Lik. 18:​8-11) Ho ntse ho le joalo, bongata ba bona e ne e ntse e le Bakreste ba sa holang ka mor’a lilemo tse ngata ba kolobelitsoe. (1 Bakor. 3:2) E le hore re be Bakreste ba holileng, re tlameha ho batla ho hola. Batho ba ‘ratang ho hloka tsebo’ e leng batho ba ratang ho lula e le Bakreste ba sa holang, ba tla lula ba le joalo. (Liprov. 1:22) Ha re batle ho tšoana le motho e moholo ea sa batleng ho nka boikarabelo ebile a batla hore batsoali ba hae ba mo etsetse liqeto. Ho e-na le hoo, re batla ho nka boikarabelo le ho etsa bonnete ba hore re ba Bakreste ba holileng. Haeba u ntse u sebeletsa ho ba Mokreste ea holileng, rapela Jehova hore a u fe ‘tabatabelo le matla a hore u etse lintho tse mo khahlisang.’—Bafil. 2:13. w24.04 4 ¶9-10

Jehova oa re bolella hore na o ikutloa joang ka taba ea ho ahlola batho. (Ezek. 33:11) Jehova ha a potlakele ho timetsa batho ka ho sa feleng ntle leha a e-na le lebaka le utloahalang la ho etsa joalo. O mohau haholo ’me o o bontša ka linako tsohle ha ho khoneha. Ke eng eo re e tsebang ka batho ba sa tl’o tsosoa? Bibele e bua ka mehlala e seng mekae feela. Jesu o ile a bontša hore Judase Iskariota a ke ke a tsosoa. (Mar. 14:21; sheba le Johanne 17:12.) Judase o ne a tseba hore ntho eo a e entseng e ne e le khahlanong le Jehova le Mora oa hae empa o ile a e etsa ho ntse ho le joalo. (Sheba Mareka 3:29 le w07/15 leq. 18.) Ka tsela e tšoanang, Jesu o ile a re ba bang ba baeta-pele ba bolumeli ba neng ba mo hanyetsa ba ne ba tla shoa ba se na tšepo ea tsoho. (Mat. 23:33) Le moapostola Pauluse o ile a re bakoenehi ba sa bakeng ba ke ke ba tsosoa.—Baheb. 6:​4-8; 10:29. w24.05 4 ¶10-11

Ha re lula re le metsoalle e haufi ea Jehova, ha ho letho leo Satane a ka le etsang le ka re lematsang ka ho sa feleng. (1 Joh. 3:8) Lefatšeng le lecha Jehova o tla tsoela pele a sireletsa metsoalle ea hae e tšepahalang linthong tse ka senyang kamano ea bona le eena. O tla boela a ba sireletse e le hore ba se ke ba shoa. (Tšen. 21:4) Ke tlotla e kholo ho ba moeti tenteng ea Jehova le ho ba le kamano e ntle le eena e ka lulang e le teng ka ho sa feleng. (Ezek. 37:27) Re lokela ho itšoara joang haeba re batla ho tsoela pele re le baeti ba Jehova? Haeba u ne u ka memeloa ha motho e mong, u ne u ka batla ho tseba hore na o lebeletse hore u etse’ng. Ka ho tšoanang, re batla ho tseba hore na Jehova o lebeletse’ng ho batho ba batlang ho tsoela pele e le baeti. Lerato la rona ho Jehova le re susumeletsa ho etsa sohle seo re ka se khonang ho mo thabisa. (Bakol. 1:10) Re lokela ho lula re mo hlompha re sa lebale hore na ke mang ’me tlhompho e joalo e tla re thusa hore re qobe ho itšoara ka tsela e ke keng ea mo thabisa. Kannete re batla ho ‘tsamaea le Molimo oa rona re ikokobelitse.’—Mik. 6:8. w24.06 4 ¶8-9

Jehova o ile a kopa Abrahama hore a etse sehlabelo ka mora oa hae Isaka. E tlameha ebe Abrahama o ile a utloa ho etsa joalo e le ntho e bohloko ka ho fetisisa eo a neng a ka e nahana. Empa o ne a ikemiselitse ho mamela Jehova. Leha ho le joalo, Molimo o ile a mo thiba ha a ne a re o bolaea Isaka. Mohlala oo oa Abrahama o ruta batho bohle ba nang le tumelo ho Jehova thuto ea bohlokoa ka ho fetisisa, ea hore o ne a tla ikemisetsa ho fana ka Mora oa hae eo a mo ratang e le sehlabelo. Na rea bona hore na Jehova o re rata hakaakang? (Gen. 22:​1-18) Lilemo hamorao, Molimo o ile a fa Baiseraele Molao o neng o re ba lokela ho etsa mahlabelo ka liphoofolo e le hore ba tšoareloe libe. (Lev. 4:​27-29; 17:11) Mahlabelo ao a ne a bontša hore Jehova o ne a tla fana ka sehlabelo se molemo le ho feta, se neng se tla lokolla batho ba bangata sebeng ka ho feletseng. Molimo o ile a susumeletsa baprofeta ba hae hore ba ngole ka ngoana ea neng a tla tla. Ba ile ba re ngoana eo, e leng Mora oa Molimo, o ne a tla utloisoa bohloko a be a bolaoe e le hore a pholose batho bohle sebeng le lefung ho akareletsa le uena.—Esa. 53:​1-12. w24.08 4 ¶7-8

Ha u bala Bibele, etsa bonnete ba hore u sebelisa lintho tseo u ithutileng tsona. Ha u ntse u bala litemana tse itseng, u ka ipotsa, ‘Nka sebelisa seo ke ithutang sona joang kajeno kapa nakong e tlang?’ Ka mohlala, a re re u ntse u bala 1 Bathesalonika 5:​17, 18. Ka mor’a hore u bale litemana tsena tse peli, u ka ema hanyane ’me oa ipotsa: ‘Thapelo ea ka e tebile hakae, hona ke rapela hakae ka letsatsi?’ U ka boela oa nahana ka lintho tseo u ka lebohang Jehova ka tsona. Mohlomong u ka leboha Jehova ka lintho tse tharo tseo a u etselitseng tsona bophelong. Leha u ka nka metsotso e ’maloa feela u nahanisisa ka seo u se balileng ka Bibeleng, seo se ka u thusa hore u be motho ea etsang seo Lentsoe la Molimo le se buang. Nahana feela hore na u tla rua molemo hakae ha u etsa lintho tsena letsatsi le letsatsi ha u bala Bibele. Kannete u tla phetha seo Lentsoe la Molimo le se buang. w24.09 4-5 ¶9-10

Jehova o re bopile re e-na le bokhoni bo ikhethang. O re bopile ka tsela e tla etsa hore re thabe ha re fana ho feta ha re fuoa. Rea thaba ha re khona ho thusa Bakreste-’moho le rona. Re boetse rea thaba ha ba bontša kananelo. Ebang motho eo re mo etsetsang ntho e itseng o bontša kananelo kapa che, re thabisoa ke hore re entse se nepahetseng. Ho sa tsotellehe hore na ke eng eo u fanang ka eona, Jehova a ka u fa se sengata ho feta seo. (2 Likron. 25:9) Jehova o tla lula a fana ka lintho tse ngata ho feta tseo re fanang ka tsona! Ha ho na ntho e thabisang ho feta ho putsoa ke Jehova. Kahoo, a re ikemisetseng ho etsisa Ntate oa rona ea fanang ka seatla se bulehileng. w24.09 30 ¶20-21

Jehova o mohau ebile o re utloela bohloko. (Pes. 103:13; Esa. 49:15) Ha re utloa bohloko le eena o utloa bohloko. (Zak. 2:8) O re thusa hore re mo tsebe le hore re be metsoalle ea hae. (Pes. 25:14; Lik. 17:27) Hape o ikokobelitse hobane “o inamela tlase hore a shebe leholimo le lefatše. O phahamisa ea tlase leroleng.” (Pes. 113:​6, 7) Ke mang ea ke keng a batla ho rorisa Molimo ea moholo hakaalo? Re rorisa Jehova hobane re batla hore ba bang ba mo tsebe. Batho ba bangata ha ba tsebe ’nete ka Jehova. Hobane’ng? Hobane Satane o foufalitse likelello tsa bona ka ho hasa mashano ka Jehova. (2 Bakor. 4:4) Satane o entse hore batho ba lumele hore Jehova o khopo, ha a re tsotelle ebile ke eena ea re bakelang mathata. Empa re tseba ’nete ka Molimo oa rona. Re na le monyetla oa ho bolella batho ba bang ’nete ka Molimo e le hore le bona ba mo rorise.—Esa. 43:10. w25.01 3 ¶6-7

Le hoja Jesu Mora oa Molimo a ne a phethahetse ebile a etsa mehlolo, Satane o ile a sebelisa batho ba bang hore ba jale mashano ka eena. Ka mohlala, baeta-pele ba bolumeli ba ile ba bolella batho hore Jesu o fuoe matla a ho leleka bademona ke “’musi oa bademona.” (Mar. 3:22) Ha Jesu a ne a le nyeoeng, baeta-pele ba bolumeli ba ile ba mo qosa ka hore o rohakile Molimo eaba ba susumeletsa batho hore ba kope hore Jesu a ahloleloe lefu. (Mat. 27:20) Hamorao ha balateli ba Kreste ba bolela litaba tse monate, bahanyetsi ba bona ba ile ba “hlohlelletsa batho” hore ba hlorise Bakreste. (Lik. 14:​2, 19) Ha Molula-Qhooa oa December 1, 1998 o bua ka Liketso 14:​2, o ile oa re: “Ba sa khotsofalla ho hana ha bona molaetsa, bahanyetsi ba Bajuda ba ile ba qala ho etsa letšolo la liqoso tse se nang bopaki, ba leka ho hlohlelletsa Balichaba ho hloea Bakreste.” Le kajeno, Satane o ntse a ‘khelosa lefatše lohle.’ w24.04 11 ¶15-16

Hore na motho o tla phela ka ho sa feleng kapa che ha hoa itšetleha ka hore na o tla shoa neng. Jehova ke Moahloli ea phethahetseng ’me liqeto tsa hae li lokile ebile li nepahetse. (Pes. 33:​4, 5) Re ka kholiseha hore “Moahloli oa lefatše lohle” o tla etsa se nepahetseng.Hape ke ho utloahalang ho etsa qeto ea hore taba ea hore na motho o tla phela ka ho sa feleng kapa che ha ea itšetleha ka hore na o phela hokae. Le ka mohla Jehova a ke ke a ahlola batho ba limilione ka hore ke “lipoli” hobane feela ba phela linaheng tseo ho tsona ba e-s’o ka ba fumana monyetla oa ho ithuta ka molaetsa oa ’Muso. (Mat. 25:46) Moahloli oa lefatše lohle o tsotella batho bana ho feta kamoo rona re ka ba tsotellang kateng. Ha re tsebe hore na Jehova o tla feto-fetola lintho joang nakong ea mahlomola a maholo. Mohlomong ba bang ba batho bana ba tla ba le monyetla oa ho ithuta ka Jehova, ho beha tumelo ho eena le ho ema ka lehlakoreng la hae ha a ikhalaletsa ho lichaba tsohle.—Ezek. 38:16. w24.05 12 ¶14-15

Batho ba Jehova ba rata ho thusana. (2 Bakor. 8:4) Leha ho le joalo, ka linako tse ling ho hlokahala hore motho a be sebete e le hore a etse joalo. Ka mohlala, ha ho e-ba le ntoa, baholo baa hlokomela hore bara le barali ba bo rona ba hloka ho khothatsoa le ho tšehetsoa. Hape baa hlokomela hore ba hloka lingoloa, Bibele, lijo, liaparo le moo ba ka lulang teng. Ka lebaka la ho rata linku, baholo ba beha bophelo ba bona kotsing e le hore ba ka fana ka thuso e hlokahalang ho bara le barali ba bo rona. Maemong a joalo, ho bohlokoa hore re mamele tataiso e le hore re ka lula re momahane. Re lokela ho mamela tataiso e tsoang ofising ea lekala. (Baheb. 13:17) Baholo ba lokela hore khafetsa ba ikhopotse litaelo tsa hore na ba lokela ho itokisa joang bakeng sa likoluoa le hore na ba etse’ng ha likoluoa li hlaha. (1 Bakor. 14:​33, 40) E-ba sebete empa u be hlokolosi. (Liprov. 22:3) Nahana pele u nka qeto. U lokela ho etsa bonnete ba hore u bolokehile. Itšetlehe ka Jehova. Hopola hore Jehova o batla hore uena le bana beno le bolokehe. Kahoo, a ka u thusa hore u ba thuse ka tsela e bolokehileng. w24.07 4 ¶8; 5 ¶11

Morena Davida o ne a tseba Jehova hantle ebile o ne a mo tšepa. Ha Morena Saule le lira tse ling tsa Davida ba ne ba batla ho bolaea Davida, Davida o ile a rapela Jehova ’me a mo kopa hore a mo thuse. Ka mor’a hore Molimo a arabe thapelo ea hae ’me a mo pholose, Davida o ile a re: “Jehova oa phela.” (Pes. 18:46) Davida ha aa ka a bua mantsoe ao ho bontša feela hore Molimo o teng. Buka e ’ngoe ea lipatlisiso e re Davida o ne a kholisehile hore Jehova ke “Molimo ea phelang ea lulang a thusa bahlanka ba hae.” Lintho tse ileng tsa etsahalla Davida li ile tsa etsa hore a tsebe hore Molimo oa hae oa phela ’me li ile tsa etsa hore a ikemisetse ho sebeletsa Jehova le ho mo rorisa. (Pes. 18:​28, 29, 49) Ha re kholisehile hore Jehova ke Molimo ea phelang, seo se ka re thusa hore re mo sebeletse ka cheseho. Re tla ba le matla a ho mamella mathata hape re tla ikemisetsa ho tsoela pele re sebetsa ka thata tšebeletsong ea hae. Re tla boela re ikemisetse ho lula re le haufi le Jehova. w24.06 20-21 ¶3-4

Re ka ithuta eng mantsoeng ao Moapostola Pauluse a ileng a a ngolla Bathesalonika? Haeba re utloa ntho e sa lumellaneng le seo re ithutileng sona ka Bibeleng kapa ha re utloa mabare-bare a makatsang, re lokela ho ba le temoho. Lira tsa rona tsa Soviet Union ea pele, li ile tsa fa bara ba bo rona lengolo leo e neng eka le tsoa ntlo-kholo. Lengolo leo le ne le khothaletsa ba bang ba bara ba bo rona hore ba iketsetse mokhatlo o mong o ikemetseng. E ne eka lengolo leo le tsoa ntlo-kholo empa bara ba bo rona ba tšepahalang ha baa ka ba thetsoa. Ba ile ba hlokomela hore molaetsa oa lengolo leo o ne o sa lumellane le lintho tseo ba li rutiloeng. Mehleng ena, ka linako tse ling batho ba sa rateng ’nete ba sebelisa marang-rang ho re ferekanya le ho re arola. Ho e-na le hore ‘re lumelle likelello tsa rona hore li ferekanngoe habonolo,’ re ka itšireletsa ka hore re nahanisise ka hloko hore na lintho tseo re li utloang kapa tseo re li balang li lumellana le ’nete eo re ithutileng eona kapa che.—2 Bathes. 2:2; 1 Joh. 4:1. w24.07 12 ¶14-15

Qeto ea bohlokoa ka ho fetisisa eo motho a ka e etsang ke ho inehela ho Jehova ’me e be karolo ea lelapa la hae. Jehova o batla hore re mo rapele re e-na le Bakreste-’moho. Hobane’ng? Hobane o rata batho ebile o ba batlela se molemo. O batla hore ba thabele ho ba metsoalle ea hae le hore ba phele ka ho sa feleng. (Deut. 30:​19, 20; Bagal. 6:​7, 8) Jehova ha a qobelle mang kapa mang hore a mo sebeletse. O lumella motho e mong le e mong ho etsa qeto ea hore na o batla ho etsa’ng. Empa ho tla etsahala’ng haeba Mokreste ea kolobelitsoeng a tlola molao oa Molimo ’me a etsa sebe se tebileng? Haeba a sa bake, o lokela ho tlosoa ka har’a phutheho. (1 Bakor. 5:13) Leha ho le joalo, Jehova o batla hore motho eo a bake ’me a khutlele ho eena. Ha e le hantle, lebaka le ka sehloohong le entseng hore Jehova a fane ka Mora oa hae e le tefo ea topollo ke hore o batla ho tšoarela baetsalibe ba bakileng. Jehova ke Molimo ea lerato haholo ’me o kopa bohle ba entseng libe tse tebileng hore ba bake.—Zak. 1:3; Bar. 2:4; Jak. 4:8. w24.08 14 ¶1-2

Ha Johanne a ne a ngola lengolo la boraro, batho ba bang ka phuthehong ba ne ba ruta mashano ba bile ba baka likarohano. Leha ho le joalo, ba bang ba ile ba tsoela pele ba “tsamaea tseleng ea ’nete.” Ba ne ba mamela Jehova ’me ba ntse ba tsoele pele ho mamela litaelo tsa hae. (2 Joh. 4, 6) Bakreste bana ba tšepahalang ha baa ka ba thabisa Johanne feela empa ba ile ba boela ba thabisa le Jehova. (Liprov. 27:11) Re ithuta’ng? Ha re lula re tšepahalla Jehova, re tla thaba ebile re tla thabisa le ba bang. (1 Joh. 5:3) Ka mohlala, re thabisoa ke ho tseba hore re thabisa Jehova. Oa thaba ha re qoba ho etsa lintho tse mpe re bile re mamela melao ea hae. Mangeloi le ’ona aa thaba. (Luka 15:10) Le rona rea thaba ha re bona Bakreste-’moho le rona ba lula ba tšepahala. (2 Bathes. 1:4) Ha lefatše lena le felisoa, re tla thabisoa ke ho tseba hore re ile ra tšepahalla Jehova le hoja re ne re phela lefatšeng le laoloang ke Satane. w24.11 12 ¶17-18

U lokela ho nka nako e kae u shebile motho e mong pele u ka mo bolella hore oa mo rata? Haeba u potlakela ho bolella motho maikutlo a hao, a ka ’na a nahana hore ha u nahane lintho ka hloko pele u etsa liqeto. (Liprov. 29:20) Ka lehlakoreng le leng, haeba a hlokomela hore oa mo rata empa u nka nako e telele pele u mo bolella, a ka ’na a nahana hore u motho ea liehang ho etsa liqeto. (Moek. 11:4) Hopola hore pele u bolella motho e mong maikutlo a hao, ha se hore u lokela ho kholiseha hore u tla mo nyala. Empa ntho eo u ka kholisehang ka eona ke hore uena u se u loketse ho nyala le hore motho eo e ka ’na ea e-ba molekane oa lenyalo ea u loketseng. U ka etsa’ng haeba u hlokomela hore ho na le motho ea u ratang? Haeba u e-na le maikutlo a fapaneng, ho ka ba molemo hore u mo bontše ka ho hlakileng ka liketso. E ka ba ho hloka mosa ho etsa hore a be le maikutlo a hore le ka ratana empa uena u e-na le maikutlo a fapaneng.—Baef. 4:25. w24.05 23 ¶9-10

Ke Bakreste ba tlotsitsoeng ba tšepahalang feela ba tla nkoa. Jesu o tla ba kenya ’Musong o leholimong. Bakreste ba tlotsitsoeng ba sa falimehang ba ke ke ba bokelloa le “bakhethoa.” (Mat. 24:31) Ha e le hantle bahlanka bohle ba Molimo ba lokela ho lula ba falimehile ba bile ba tšepahala ho sa tsotellehe hore na ba na le tšepo ea ho phela lefatšeng kapa leholimong. Kaha re tseba Jehova hantle, re tšepa hore ntho e ’ngoe le e ’ngoe eo a e etsang e nepahetse. Kahoo, ha re tšoenyehe ha Jehova a khetha ho tlotsa Bakreste ba bang ba tšepahalang lilemong tsa morao tjena. Rea hopola hore na Jesu o ile a re’ng ka basebetsi ba ileng ba hiroa motsotsong oa ho qetela papisong ea tšimo ea morara. (Mat. 20:​1-16) Ba ileng ba hiroa ho tloha hoseng ba ile ba fumana moputso o lekanang le oa ba ileng ba hiroa motsotsong oa ho qetela. Kahoo, ho sa tsotellehe hore na batlotsuoa ba khethoa neng, ba tla fumana moputso oa bona haeba feela ba lula ba tšepahala. w24.09 24 ¶15-17

Jesu o behile mohlala o motle ka ho fetisisa oa ho sebetsana le ho hloka toka. O ile a tšoaroa ka ho hloka toka ke batho ba bangata ho akareletsa le beng ka eena. Beng ka eena ba ile ba re ha a sa nka hantle, baeta-pele ba bolumeli ba re o sebelisana le bademona, ’me masole a Roma a ile a mo soma, a mo otla ’me qetellong a mo bolaea. (Mar. 3:​21, 22; 14:55; 15:​16-20, 35-37) Leha ho le joalo, Jesu o ile a mamella ho tšoaroa ka ho hloka toka maemong ao kaofela ntle le hore a iphetetse. Re ka ithuta eng mohlaleng oa hae? (1 Petrose 2:​21-23) Jesu o re behetse mohlala o motle oa hore na re lokela ho etsa eng ha re tšoaroa ka ho hloka toka. O ne a tseba hore na o lokela ho thola neng le ho bua neng. (Mat. 26:​62-64) Ka linako tse ling, o ne a khetha ho itholela ha batho ba bua mashano ka eena. (Mat. 11:19) Ha a ne a bua, o ne a sa rohake batho ba neng ba mo hlorisa kapa ho ba tšosa. w24.11 5 ¶9-10

Nahana u fa motho eo u mo ratang mpho e ikhethang, e ntle le e ka mo thusang. U ne u ka ikutloa u soetsehile haeba motho eo a ne a ka e beha ka setorong ebe ka mor’a moo ha a sa na taba le eona. Empa u ne u ka thaba haeba motho eo a ne a ka e sebelisa ’me a bontša hore oa e ananela. Re ithuta’ng mohlaleng oo? Jehova o fane ka Mora oa hae molemong oa rona. E tlameha ebe Jehova o thaba haholo ha re bontša hore re ananela mpho eo ea bohlokoa le lerato la hae le entseng hore a fane ka tefo ea topollo. (Joh. 3:16; Bar. 5:​7, 8) Ha nako e ntse e ea re ka ’na ra qala ho nka mpho ea tefo ea topollo hanyane. Haeba re etsa joalo, ho tla be ho tšoana le ha re nka mpho ena e ntle e tsoang ho Molimo ebe re e beha ka setorong, moo re ke keng ra e bona le ho nahana ka eona. Ho qoba hore seo se etsahale, re lokela ho lula re nahana ka seo Molimo le Kreste ba re etselitseng sona. w25.01 26 ¶1-2

Mor’abo rona ea tšoanelehang ho ba moholo ha ea lokela ho ba motho eo e sa tsoa ba Mokreste. Ha ho hlokahale hore u be le lilemo tse ngata u kolobelitsoe, empa u hloka nako e le hore u be Mokreste ea holileng tsebong. Joaloka Jesu, u lokela ho ba motho ea ikokobelitseng le ea thabelang ho sebelisoa ke Jehova ka tsela leha e le efe. U tla ba le mamello ’me u letele Jehova hore a u fe mesebetsi e eketsehileng ka phuthehong. (Mat. 20:23; Bafil. 2:​5-8) U bontša hore oa tšepahala ha u khomarela Jehova ka hore u phele tumellanong le melao ea hae le ka hore u latele tataiso e tsoang mokhatlong oa hae. Mangolo a bontša ka ho hlaka hore molebeli o lokela hore a khone ho ruta. Na see se bolela hore u lokela ho ba sebui se hloahloa? Che. Ha se baholo bohle bao e leng libui tse hloahloa. Leha ho le joalo, baholo ba lokela ho tseba ho sebelisa Bibele hantle ha ba ruta tšimong le ha ba khothatsa bara le barali ba bo rona maetong a bolisa. w24.11 23-24 ¶14-15

Etsa lipatlisiso ha ho e-na le seo u sa se utloisiseng ka Bibeleng. Ha letsatsi le ntse le ea, nahana ka seo u se fumaneng ha u ne u etsa lipatlisiso le hore na se u ruta’ng ka Jehova, Mora oa hae le lerato leo ba u ratang ka lona. (Pes. 119:​97, nal.) U se ke oa nyahama haeba ka linako tse ling u sa fumane ntho e ncha kapa e monate ha u ntse u ithuta kapa u etsa lipatlisiso. Boemong bona, u ka itšoantša le motho ea batlang khauta. Ha batho ba batla khauta, ba qeta lihora kapa matsatsi a mangata pele ba ka fumana leha e le lejoe le lenyenyane la khauta. Ho ntse ho le joalo, ha ba khathalloe ke pere hobane ho sa tsotellehe hore na khauta eo e nyenyane hakae, ho bona ke ea bohlokoa haholo. Linnete tsa Bibele tsona li bohlokoa le ho feta khauta. (Liprov. 8:10) Kahoo, tsoela pele ho bala Bibele le ho batlisisa lintho tse ncha tseo u ka ithutang tsona ho eona.—Pes. 1:2. w25.01 25 ¶14-15

Jehova o lebelletse hore re ikemisetse ho tšoarela batho ba re utloisang bohloko. (Pes. 86:5; Luka 17:4; Baef. 4:32) Re ka utloa bohloko haholo haeba motho e mong a ka bua kapa a re etsa ntho e itseng e bohloko, haholo-holo haeba e le motho eo re mo tloaetseng kapa e mong oa lelapa. (Pes. 55:​12-14) Ka linako tse ling, bohloko boo re bo utloang bo ka ba joalokaha eka re hlabiloe ka ntho e itseng. (Liprov. 12:18) Maemong a mang re ka leka ho etsa eka ha rea utloa bohloko empa ho etsa joalo ho ka ba joalokaha eka motho o u hlabile ka thipa ebe ha u ntše thipa eo leqebeng la hao. Ka tsela e tšoanang, haeba re iphapanyetsa taba ea hore re utloile bohloko, re ke ke ra lebella hore bohloko boo bo fole. Haeba motho e mong a re fosetsa, boikutlo bo tlang pele e ka ba ho halefa. Le Bibele ea bontša hore re ka halefa. Leha ho le joalo, ea re lemosa hore re se ke ra lula re halefile. (Pes. 4:4; Baef. 4:26) Hobane’ng? Hobane ha motho a halefile, ha se hangata a etsang liqeto tse nepahetseng. (Jak. 1:20) Hopola hore ho halefa ke ntho ea tlhaho empa hore na re tla lula re halefile kapa che, eo ke khetho ea rona. w25.02 15 ¶4-6

Jesu o ile a etsa papiso ea motho ea booatla ea ipokellang chelete e ngata “empa mahlong a Molimo e le mofutsana.” (Luka 12:​16-21) ’Nete ke hore tsa hosane ha li tsejoe. (Liprov. 23:​4, 5; Jak. 4:​13-15) Kaha re balateli ba Kreste, re tobana le teko e ikhethang. Jesu o ile a re re lokela ho ikemisetsa ho ‘tela’ lintho tsohle tsa rona e le hore re be balateli ba hae. (Luka 14:33) Le hoja Bakreste ba Judea mehleng ea baapostola ba ile ba lahleheloa ke lintho tsohle tseo ba neng ba e-na le tsona, ba ile ba lula ba thabile. (Baheb. 10:34) Mehleng ena, bana ba bo rona ba bangata ba tetse maruo a bona kapa mesebetsi ea bona ka lebaka la ho se kenelle lipolotiking. (Tšen. 13:​16, 17) Ba thusitsoe ke eng? Ke kholiseho e tiileng eo ba nang le eona tšepisong ena ea Jehova e reng: “Ho hang nke ke ka u tlohela kapa ka u furalla.” (Baheb. 13:5) Re sebetsa ka thata ho itokisa bakeng sa litlhoko tsa rona tsa nakong e tlang, empa haeba re hlaheloa ke maemo a sa lebelloang, re tšepa hore Jehova o tla re tšehetsa. w25.03 29 ¶13-14

Jehova ha aa lebella hore re be Bakreste ba holileng ka matla a rona feela. O re file balisa le mesuoe ka phuthehong, ba re thusang hore re be Bakreste ba holileng ’me “re tla ba batho ba holileng ka litsela tsohle joaloka Kreste.” (Baef. 4:​11-13) Jehova o boetse o re fa moea oa hae o halalelang ho re thusa hore re tsebe ho “nahana joaloka Kreste.” (1 Bakor. 2:​14-16) Ho feta moo, Molimo o re file Likosepele tse ’nè tse re bontšang hore na Jesu o ne a nahana joang, a bua joang a bile a etsa lintho joang ha a ne a le lefatšeng. Haeba u nahana u bile u etsa lintho joaloka Jesu, u tla khona ho ba Mokreste ea holileng. Leha ho le joalo e le hore re be Bakreste ba holileng, re lokela ho ithuta ho fetang feela “lithuto tsa motheo tse mabapi le Kreste.” w24.04 4-5 ¶11-12

Re lokela ho etsa liqeto letsatsi le leng le le leng. Ho batla ho le bonolo ho etsa liqeto tse ling, joaloka hore na u tla ja’ng hoseng kapa hore na u tla robala ka nako mang. Empa ho na le liqeto tse ling tseo ho batlang ho le thata ho li etsa. Li ka ama taba ea ho phela hantle ’meleng, thabo ea rona le ba malapa a rona kapa tsela eo re sebeletsang Jehova ka eona. Re batla hore liqeto tsa rona li tsoele rona le ba malapa a rona molemo. Ka holim’a tsohle, re na le tšepo ea hore liqeto tsa rona li tla thabisa Jehova. (Bar. 12:​1, 2) Ntho ea bohlokoa eo u lokelang ho e etsa e le hore u etse qeto e nepahetseng ke ho fumana lintlha ka botlalo. Ke hobane’ng ha ho le bohlokoa ho etsa joalo? Nahana ka mokuli ea eang ngakeng hobane a kula haholo. Na ngaka e ne e tla etsa qeto ea hore na e tla fa mokuli moriana ofe ntle le hore e mo hlahlobe pele kapa e mo botse lipotso? Le letho. Le uena u tla etsa liqeto tse nepahetseng haeba u qala pele ka ho batla lintlha ka botlalo tse amanang le bothata ba hao. w25.01 14 ¶1-3

Re tseba eng ka mohau oa Jehova? O bontšitse joang hore “ha a lakatse hore mang kapa mang a timetsoe”? (2 Pet. 3:9) Nahana ka mohau oo a ileng a o bontša ba bang ba ileng ba etsa libe tse tebileng. Morena Davida o ile a etsa libe tse tebileng joaloka bofebe le ho bolaea. Leha ho le joalo, Davida o ile a baka ’me Jehova a mo bontša mohau ka ho mo tšoarela. (2 Sam. 12:​1-12) Morena Manase o ne a le khopo haholo hoo e ka bang bophelo bohle ba hae. Le boemong bo bobe hakaalo Jehova o ile a mo bontša mohau ’me a mo tšoarela hobane o ile a baka. (2 Likron. 33:​9-16) Mehlala ena e re hopotsa hore Jehova o bontša mohau hafeela ho e-na le lebaka le utloahalang la hore a etse joalo. O tla tsosa batho ba joalo hobane ba ile ba hlokomela hore ba entse libe tse tebileng ba ba ba li bakela. w24.05 4 ¶12