Morero oa Sebele oa Bophelo

AK’U nahane u etetse sebaka seo motsoalle oa hao a sebeletsang ho sona. O sa tsoa qeta ntho eo a neng a ntse a e etsa ’me u hlolloa ke eona. Mosebetsi ona ke o tsoileng matsoho kamoo o entsoeng ka teng. Empa leha u ka leka joang kapa joang, u ke ke ua hlalosa hore o etselitsoe morero ofe. U tla fumana joang hore na o etselitsoe eng? U lokela feela hore u botse motsoalle oa hao ’me o tla thabela ho u bolella.

Joale ke joang re ka fumanang morero oa bophelo? Ke hobane’ng ha re sa botse Molimo, “mohloli oa bophelo”? (Pesaleme ea 36:9, NW) U ka etsa seo joang? Ka thabo o buile le rōna ka Bibele. O entse hore batho ba tumelo ba ngole likhopolo tsa oona ka tsela eo re ka e utloisisang. Ha e le hantle, morero oa bophelo o ka hlalosoa ka mantsoe ana a ’maloa: Re phela hore re ithute ka Molimo le ho etsa thato ea oona. Bibele e re: “Bofello ba taba tseo kaofela ke jona: Tšaba Molimo, u boloke litaelo tsa oona, hobane, ke eona tšoanelo eohle ea motho.”—Moeklesia 12:13.

Na seo se utloahala se le bonolo haholo? Bonneteng ha ho joalo. Ho ba teng ha rōna hore re ithute ka Molimo le ho etsa thato ea oona ho na le bohlokoa bo tebileng.

Morero oa Molimo oa Mathomo

Ho ithuta ka morero oa Molimo oa mathomo bakeng sa batho ho tla u thusa ho utloisisa morero oa bophelo hamolemonyana. Ho tla boela ho hlalose lebaka la hore na ke hobane’ng ha tse ling tsa lintho tse boletsoeng sehloohong se fetileng li etsa hore bophelo bo be le morero ho batho ba bangata kajeno.

Tlaleho ea Bibele ka pōpo ea motho e re: “Molimo oa ntoo re: A re etseng motho ka setšoantšo sa rōna le ka ho tšoana ha rōna.” (Genese 1:26) Kahoo batho ba ne ba bōpiloe ba e-na le matla a hore ba tšoane le Molimo, ba na le litšoaneleho tse khethehileng tseo o nang le tsona tse kopanyelletsang bohlale, matla, ho loka le lerato. Joale, na ke ho makatsang ha batho ba bang ba fumana hore hoa khotsofatsa ho batla tsebo e ncha kapa ho etsa mesebetsi e phephetsang matla a bona a kelello kapa a ’mele? Na ke ho sa lebelloang hore ho thusa ba bang ho fana ka morero o khotsofatsang bophelong ba batho ba bangata? Le hanyenyane. Sena ke seo re bōpetsoeng ho se etsa.

Tlaleho ea Bibele e tsoela pele ho bolela hore batho ba ile ba nehoa boikarabelo ba ho hlokomela lintho tsohle tse phelang lefatšeng—“lihlapi tsa leoatle, le tse rurang tsa maholimo . . . le lihahabi tsohle tse hahabang lefatšeng.” (Genese 1:26) Ka baka leo, ha ho makatse hore esita le kajeno batho ba bangata ba fumana khotsofalo ka hore ba likolohuoe ke liphoofolo le ho bapala le tsona. Ba bang ba ikutloa ba na le boikarabelo ho liphoofolo ho isa bohōleng ba ho sebetsa ka thata ho sireletsa tse leng kotsing ea ho felisoa kapa ba etsa matšolo a boipelaetso mabapi le ho hlokofatsoa ha tsona ka ho sa hlokahaleng.

Batho ba boetse ba laeloa ho ‘rena lefatšeng.’ (Genese 1:28) Sena se ne se bolela’ng? Ha e le hantle, sena se ne se sa bolele hore batho ba sebelise lefatše ka boithati le ka ho hloka boikarabelo ho fihlela matlotlo a lona a felile, bokahohleng ba lona bo silafalitsoe ’me maoatle a lona le libaka tsa lefatše ebe lithotobolo. Ho e-na le hoo, Molimo o behile mohlala oa ho rena lefatšeng ka ho ‘hloma tšimo Edene ka nģa bochabela le ho beha teng motho eo o ’mōpileng.’ (Genese 2:8) Tšimo ena ea Edene e ne e le mohlala oa ho bontša seo lefatše le neng le lokela ho ba sona. E bontšitse morero oa Molimo bakeng sa polanete ea rōna.

Tlaleho ea Bibele e ea hlalosa: “Molimo oa ba hlohonolofatsa [monna oa pele le mosali], ’me Molimo oa re ho bona: Ngatafalang, le ate, le tlale lefatšeng, le rene holim’a lona.” (Genese 1:28) Molimo o ne o batla hore batho ba be le bana le ho tlala lefatšeng. O ile oa kopanya monna le mosali oa pele, ’me ka ho etsa joalo o ile oa theha lenyalo la pele. (Genese 2:22-24) Ha ho makatse ha lenyalo le lelapa li eketsa moelelo le morero bophelong ba batho ba bangata!

Seo Bophelo bo ka Beng bo Bile Sona

Ha re ntse re ithuta Bibele, ho hlakile hore Molimo o ne o rerile hore lelapa la Adama le ngatafale le hore eena hammoho le bana ba hae ba atolose meeli ea tšimo ea Edene ho fihlela lefatše lohle le tletse batho. Lefatše leo a le busang le ne le tla fetoha paradeise. Ke ’nete hore motho o ne a ka sebelisa matlotlo a lefatše molemong oa hae. Empa sena se ne se tla etsoa ka tsela e nang le boikarabelo. Motho e ne e lokela ho ba mohlokomeli oa lefatše eseng mosenyi oa lona. Ho senngoa ha lefatše hoo re ho bonang kajeno ho khahlanong le thato ea Molimo ’me ba kopanelang ho le senya ba khahlanong le morero oa bophelo.—Tšenolo 11:18.

Ho na le se seng seo re ithutang sona tlalehong ea pele ea Bibele hore e ne e se morero oa Molimo hore batho ba shoe. Batsoali ba rōna ba pele ba ile ba shoa hobane ha ba ka ba utloa Molimo. (Genese 2:16, 17) Ha ba ne ba sa o utloe, ba ne ba se ba sa hlole ba phethahatsa morero oa bophelo—ba ne ba se ba sa etse thato ea Molimo. Ha ba ka ba shoa feela empa bana ba bona bohle ba shoa hobane ba futsitse ho se phethahale ho bona. (Ba-Roma 5:12) Leha ho le joalo, qalong batho ba ne ba reretsoe ho phela ka ho sa feleng, eseng ho shoa. Mohlomong lena ke lona lebaka le etsang hore batho ba bangata ba fumane ho ferekanya ho nahana ka lefu le fokotsang matsatsi a mosebetsi oa bophelo ba bona.

Ho Phethahatsa Morero oa Molimo

Morero oa Molimo oa mathomo bakeng sa motho le lefatše lena ha oa fetoha. O sa ntse o rerile hore o le fetole paradeise e ahiloeng ke moloko o phethahetseng oa batho. Leha ho le joalo, o sa ntse a lokela ho etsa litokisetso tsena tsa ho hlōla liphello tse mpe tsa ho hlōleha ha batsoali ba rōna ba pele. Ho etsa thato ea Molimo kajeno ho kopanyelletsa ho sebetsa tumellanong le litokisetso tsohle tsa Molimo. Ka thabo, Bibele e fana ka tlhaloso e tsoelang pele ea morero oa oona.

Bukeng ea pele ea Bibele re bala hore Molimo o buile ka “peō” e neng e tla lokisa tšenyo eohle e bakiloeng ke Adama le Eva ka ho hlōleha ho etsa thato ea Oona. (Genese 3:15) Mangolong a Segerike a Bokreste (“Testamente e Ncha”), re bala ka ho hlaha ha Jesu Kreste joaloka “peō,” bophelo ba hae bo se nang sebe le ka ho bolaoa ha hae ke lira tsa hae. Ha e le hantle, lefu la Jesu, leo e leng thekollo molemong oa rōna, le re buletse tsela ea hore re fumane bophelo bo sa feleng boo Adama le Eva ba bo lahlileng. (Ba-Heberu 7:26; 9:28) E, Bibele e re: “E mong le e mong ea lumelang ho eena, a [ke] ke a timela, a mpe a be le bophelo bo sa feleng.”—Johanne 3:16.

Ho na le ho eketsehileng. Ka mor’a lefu la hae, Jesu o ile a tsosoa e le sebōpuoa sa moea se sa shoeng ’me hona joale o busa joaloka Morena oa ’Muso oa Molimo oa leholimo. Haufinyane ’Muso oo o tla nka khato ho nkela mebuso ea joale sebaka ka mokhatlo oa sechaba se secha o tlang ho laola litaba tsa batho. Boprofeta ba Bibele boa tšepisa: “Borena ba oona bo ke ke ba fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.”—Daniele 2:44.

Ka mor’a moo, ’Muso ona o tla laola mosebetsi o thabisang oa ho khutlisetsa Paradeise lefatšeng le ho isa moloko oa batho phethehong. Bibele e boetse e bua ka tsoho ea bafu, hore le bona ba be le monyetla oa ho kopanela ho phethahatsoeng ha morero o moholo oa Molimo bakeng sa moloko oa batho. (Liketso 24:15) Nakong eo ho tla phethahatsoa tšepiso ena e babatsehang: “Ba bonolo ba tla rua lefatše, ba iketle khotsong e kholo. Ba lokileng ba tla ja lefa la lefatše, ’me ba tla hlola ho lona ka ho sa feleng.”—Pesaleme ea 37:11, 29.

Ho Ithuisa Molemo

Hore re rue molemo ka borōna morerong o moholo oa Molimo bakeng sa lefatše, pele re tlameha ho tseba Molimo. Jesu Kreste o itse: “Sena se bolela bophelo bo sa feleng, ho bokella ha bona tsebo ka uena, Molimo o le mong oa ’nete, le eo u mo romileng, Jesu Kreste.” (Johanne 17:3, NW) Re ka etsa seo joang? Re ithuta linthong tse ling ka Molimo ka ho hlokomela lefatše le re potolohileng, pōpo, ho kopanyelletsa le maholimo a tletseng linaleli. (Pesaleme ea 19:1) Leha ho le joalo, haholo-holo re ithuta ka Molimo esita le ka Mor’a Oona, Jesu Kreste ka Bibeleng. Re ithuta lebitso la oona le litšobotsi tsa oona ’me re fumana makolopetso ’ohle a seo Molimo o se etselitseng moloko oa batho. Tsebo e joalo e etsa hore re o rate ’me sena se re atametsa haufi haholo ho oona le Mor’a oona.

Ho tseba Molimo ho tla re susumelletsa ho etsa thato ea oona. Mohlomong re ile ra rapela joalokaha Jesu a laetse: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Mattheu 6:10) Morero oa sebele oa bophelo—e leng oona o tlisang khotsofalo ea ’nete—ke ho phela bophelo ba rōna tumellanong le thato eo ea Molimo.

Leha ho le joalo, ho etsa thato ea Molimo ho akarelletsa eng? Ho Adama le Eva e ne e akarelletsa ho busa liphoofolo le ho rena lefatšeng le ho le tlatsa ka bana ba phethahetseng. Kajeno re tla be re etsa thato ea Molimo haeba re ithuta le ho ba le tumelo sehlabelong sa thekollo sa Jesu. Le rōna re lokela ho latela mohlala oa Jesu ka ho bolella ba bang ‘litaba tse molemo tsa ’muso oa Molimo.’—Mattheu 24:14.

Ho etsa thato ea Molimo ho boetse ho akarelletsa ho hlaolela botho bo tšoanang le ba Molimo. Re lokela ho tseba lintho tseo Molimo o li hloileng—lintho tse kang leshano, bosholu, ho bua ka batho ba bang ho kotsi le bohale bo sa laoleheng—re lokela ho hanela lintho tsena. Re boetse re ithuta litšoaneleho tseo Molimo o li ratang—tse kang lerato, thabo, khotso, mosa le molemo—le ho li hlaolela ka thuso ea moea o halalelang oa Molimo. (Ba-Galata 5:19-24) Haeba re tla fumana bophelo bo sa feleng, re lokela ho ba batho ba mofuta oo Molimo o o batlang ka ho sa feleng. Ka sebele, ho ithuta ka Molimo le thato ea oona ho tla etsa hore bophelo ba rōna bo be le morero ho feta ntho leha e le efe!

Phapang eo Sena se e Etsang

Bophelo ba batho ba limillione ho potoloha lefatše bo netefatsa hore ho ba le morero oa sebele bophelong ka ’nete ho etsa phapang. Nahana ka mohlala oa Wayne ea ileng a ferekanngoa ke lefu la mosali oa hae oa matsoa-thaka. Ha moruti oa hae a hlōleha ho mo tšelisa, Wayne o ile a ikakhela ka setotsoana mosebetsing oa baithaopi. O ile a sebeletsa joaloka molaoli mokhatlong oa Sesole sa Amerika ’me o ne a le mahlaha-hlaha mekheng ea lipolotiki. O ile a nyala hape empa lenyalo la bona e bile le hlokang khotso. Eena le mosali oa hae ba ne ba hloka tataiso bophelong.

Leha ho le joalo, ka letsatsi le leng Wayne o ile a nka Bibele ’me a qala ho e bala. Nakong ea likhoeli tse tharo o ile a qeta ho e bala, ’me o re: “Joale ke ile ka tseba hore re teng mona ka morero le tšepo ea bophelo ka mor’a lefu.” O ile a bolella mosali oa hae: “Re lokela ho fumana batho bao re ka kopanelang le bona ba khomarelang Bibele.” Kapele-pele ba ile ba kopana le Lipaki tsa Jehova ’me puisano ea bona le tsona e ile ea matlafatsa takatso ea bona ea ho etsa thato ea Molimo. Wayne le mosali oa hae ba ile ba nehela bophelo ba bona ho Molimo ’me bophelo ba lelapa la bona bo ile ba atleha haholo.

Susan, morali oa baromuoa ba Presbyterian, o ne a batla ho etsa ho hong ka bophelo ba hae ho neng ho hlile ho tla thusa lefatše. Thuto e buang ka likotsi tsa matla a nuclear e ile ea mo kholisa hore ona ke mosebetsi oa bohlokoa ka ho fetisisa. Kahoo, o ile a tlohela koleche hore a e’o qeta bophelo ba hae bohle a ruta batho ka bothata bona. Ha a le lilemo li 21, o ile a sebeletsa joaloka mohokahanyi oa letšoele le leholo la boipelaetso khahlanong le nuclear. Hamorao o ile a eteloa ke Lipaki tsa Jehova ’me a bontšoa seo Bibele e se bolelang, ’me ha nako e ntse e tsamaea o ile a fumana morero oa sebele oa bophelo. Le hoja ntle ho pelaelo a ntse a amehile ka batho ba senyang lefatše, o hlokomela hore Molimo ke oona o tla rarolla mathata ana ka ’Muso oa oona. Kahoo, o thusa batho ho beha tšepo ea bona ’musong oo.

Marielle o hlile a etsa ho thabela lintho tseo lefatše le fanang ka tsona pakane ea hae. O ile a hahamalla mosebetsi. O ile a thabela ‘lintho tsohle’ tse neng li fumaneha Los Angeles, California, U.S.A., ho kopanyelletsa le meketjana ea boithabiso le lithethefatsi. Empa ha a qala ho ithuta Bibele, a tseba Molimo le ho o sebeletsa, o ile a bona kamoo lintho tseo li neng li hloka morero ka teng. O bolela hore bophelo ba hae ke bo enneng haholoanyane hona joale ha e le mona bo lumellana le thato ea Molimo.

Lenane la batho bao bophelo ba bona bo entšitsoeng ke ho ithuta morero oa sebele oa bophelo le ntse le eketseha ka makholo letsatsi le letsatsi. Ka sebele, ho phela tumellanong le morero oo oa ’nete bophelong ka ho etsa thato ea Ntate oa rōna oa leholimo ea lerato ho etsa phapang. Ke ntho e ’ngoe e ka fetolang bophelo ba hao bohle hore bo be molemo. Re u mema hore u ke u hlahlobisise taba ena. Bophelo ba hao bo tla ba le morero haholoanyane haeba u etsa joalo.

[Setšoantšo se leqepheng la 19]

Monehi oa bophelo o ne a e-na le morero ha a bōpa motho

[Setšoantšo se leqepheng la 20]

Molimo ha oa fetola morero oa oona oa ho etsa lefatše paradeise e tletseng moloko oa batho o phethahetseng