Lula ‘Motseng oa Setšabelo’ ’me U Phele!
“O na a tšoanetse ho lula motseng oa hae oa setšabelo, ho be ho shoe moprista [ea phahameng, NW].”—NUMERE 35:28.
1. Mophetetsi oa mali ke mang, ’me o tla tloha a nka bohato bofe?
MOPHETETSI oa mali oa Jehova, Jesu Kreste, o haufi le ho hlasela. Ka mabotho a hae a mangeloi, Mophetetsi enoa o tla tloha a nka bohato khahlanong le bohle ba molato oa mali ba sa bakeng. E, Jesu o tla sebeletsa e le Mophethahatsi oa Kahlolo oa Molimo ‘mahlomoleng a maholo’ a atamelang ka potlako. (Mattheu 24:21, 22; Esaia 26:21) Ka nako eo moloko oa batho o ke ke oa balehela molato oa oona oa mali.
2. Sebaka seo e leng sona feela sa ’nete sa setšabelo ke sefe, hona ke lipotso life tse hlokang likarabo?
2 Mokhoa oa ho sireletseha ke ho kena tseleng e isang motseng oa setšabelo o tšoantšetsoang ke oa boholo-holo le ho balehela teng hore motho a pholose bophelo ba hae! Haeba mophaphathehi a amohetsoe motseng ona, o tla tlameha ho lula teng, hobane ke sona feela sebaka sa setšabelo. Empa u ka ’na ua ipotsa, ‘Kaha bongata ba rōna ha re e-s’o bolaee motho, na ka sebele re molato oa mali? Ke hobane’ng ha Jesu e le Mophetetsi oa mali? Motse oa setšabelo oa kajeno ke eng? Na ho na le motho ea ka tlohang ho oona ’me a sireletseha?’
Na ka Sebele re Molato oa Mali?
3. Ke tšobotsi efe ea Molao oa Moshe e tla re thusa ho bona hore ba likete tsa limilione lefatšeng ba kopanetse molatong oa mali?
3 Tšobotsi e itseng ea Molao oa Moshe e tla re thusa ho bona hore ba likete tsa limilione lefatšeng ba kopanetse molatong oa mali. Molimo o ne a behile boikarabelo bo kopanetsoeng bakeng sa tšollo ea mali holim’a Baiseraele. Haeba motho a ne a fumanoa a bolailoe ’me ’molai oa hae a sa tsejoe, baahloli ba ne ba tlameha ho metha sebaka se eang metseng e potolohileng ho fumana motse o haufi-ufi. E le hore ba ka tlosa molato ona, baholo ba motse oo ho bonahalang o le molato oa mali ba ne ba tlameha ho robela molala oa khomo ea sethole e e-song ho sebelisoe, phuleng e sa lengoang eo metsi a eona a phallang ka matla. Sena se ne se etsoa ka pel’a baprista ba Balevi ‘hobane ke bona ba khethiloeng ke Jehova, e le hore linyeoe tsohle le liketso tsohle tsa pefo li ahloloe ke bona.’ Baholo ba motse oo ba ne ba hlapela matsoho a bona holim’a khomo ena ’me ba re: “Matsoho a rōna ha a ka a tšolla mali ana, le mahlo a rōna ha a ka a bona letho. Oho Jehova, u tšoarele sechaba sa hao sa Iseraele.” (Deuteronoma 21:1-9, bapisa le NW.) Jehova Molimo o ne a sa batle hore naha ea Iseraele e silafatsoe ka mali kapa hore batho ba eona ba jare molato oa mali o kopanetsoeng.
4. Babylona e Moholo o na le tlaleho efe ea ho ba le molato oa mali?
4 E, ho na le ntho e joaloka molato oa mali o kopanetsoeng, kapa oa sechaba. Nahana ka molato o moholo oa mali oo Babylona e Moholo, ’muso oa lefatše oa bolumeli ba bohata a nang le oona. Ka sebele o tahiloe ke mali a bahlanka ba Jehova! (Tšenolo 17:5, 6; 18:24) Malumeli a Bokreste-’mōtoana a bolela hore a latela Morena oa Khotso, empa lintoa, makhotla a bolumeli a otlang bakhelohi le lintoa tsa bolumeli tse bolaeang li entse hore a be molato oa mali ka pel’a Molimo. (Esaia 9:6; Jeremia 2:34) Ha e le hantle, o tlameha ho jara molato oa mali o moholo bakeng sa lefu la ba limilione lintoeng tse peli tsa lefatše tsa lekholo lena la lilemo. Ka lebaka leo, batho ba khomaretseng bolumeli ba bohata esita le ba tšehetsang lintoa tsa batho le ba loanang ho tsona ba molato oa mali ka pel’a Molimo.
5. Batho ba bang ba ile ba tšoana le ’molai eo e seng oa ka boomo joang Iseraeleng?
5 Batho ba bang ba bolaile batho ka boomo kapa ka lebaka la bohlasoa. Ba bang ba kopanetse polaong ea lihlopha tse itseng tsa batho, mohlomong ba kholisitsoe ke baeta-pele ba bolumeli hore sena e ne e le thato ea Molimo. Ba bang hape ba hlorisitse bahlanka ba Molimo le ho ba bolaea. Leha ho le joalo, le haeba ha rea ka ra etsa lintho tse joalo, re kopanela boikarabelo ba ho bolaoa ha batho hobane re ne re sa tsebe molao oa Molimo le thato ea hae. Re tšoana le ’molai eo e seng oa ka boomo “ea tšohileng a bolaea oa habo a sa rate, eo a neng a sa mo hloea maoba le maobane.” (Deuteronoma 19:4) Batho ba joalo ba tlameha ho kōpa mohau ho Molimo ka tieo ’me ba lokela ho balehela motseng oa setšabelo o tšoantšetsoang ke oa boholo-holo. Ho seng joalo Mophetetsi oa mali o tla ba bolaea.
Litšebeletso Tsa Bohlokoa Tsa Jesu
6. Ke hobane’ng ha ho ka boleloa hore Jesu ke mong ka moloko oa batho ea haufi-ufi?
6 Iseraeleng mophetetsi oa mali e ne e le mong ka mofu ea haufi-ufi. E le hore Mophetetsi oa mali oa kajeno a ka pheteletsa bohle ba bolailoeng lefatšeng, haholo-holo bahlanka ba Jehova ba bolailoeng, e ne e tla tlameha ho ba mong ka moloko oohle oa batho. Jesu Kreste o entse tšebeletso eo. O ile a tsoaloa e le motho ea phethahetseng. Jesu o ile a nehelana ka bophelo ba hae bo se nang sebe lefung e le sehlabelo sa thekollo, ’me ka mor’a hore a tsohele leholimong, o ile a fana ka molemo oa sona ho Molimo molemong oa bana ba Adama ba shoang ba baetsalibe. Ka tsela eo Kreste o ile a fetoha Molopolli oa moloko oa batho, mong ka rōna ea haufi-ufi—Mophetetsi oa mali ea nepahetseng. (Ba-Roma 5:12; 6:23; Ba-Heberu 10:12) Jesu o tsebahalitsoe e le ngoan’abo balateli ba mohlala oa hae ba tlotsitsoeng. (Mattheu 25:40, 45; Ba-Heberu 2:11-17) Joaloka Morena oa leholimo o fetoha “Ra-bo-sa-feleng” oa ba tla fumana molemo sehlabelong sa hae e le bafo ba hae ba lefatšeng. Bana ba tla phela ka ho sa feleng. (Esaia 9:6, 7) Ka hona Jehova ka nepo o khethile Mong Ka moloko oa batho enoa e le Mophetetsi oa mali.
7. Joaloka Moprista ea Phahameng e moholo, Jesu o etsetsa batho eng?
7 Hape Jesu ke Moprista ea Phahameng ea se nang sebe, ea lekiloeng, ea nang le kutloelo-bohloko. (Ba-Heberu 4:15, NW) A le boemong boo o sebelisa molemo oa sehlabelo sa hae se phekolang libe ho moloko oa batho. Metse ea setšabelo e ne e etselitsoe ‘bana ba Iseraele le motho oa lichaba, le motho ea jakileng har’a bona.’ (Numere 35:15) Ka hona Moprista ea Phahameng e moholo o ile a sebelisa molemo oa sehlabelo sa hae pele ho balateli ba hae ba tlotsitsoeng, “bana ba Iseraele.” Hona joale o sebelisoa ho ‘batho ba lichaba’ le ‘batho ba jakileng’ motseng oa setšabelo o tšoantšetsoang ke oa boholo-holo. “Linku tse ling” tsena tsa Morena Jesu Kreste li na le tšepo ea ho phela ka ho sa feleng lefatšeng.—Johanne 10:16; Pesaleme ea 37:29, 34.
Motse oa Setšabelo oa Kajeno
8. Motse oa setšabelo o tšoantšetsoang ke oa boholo-holo ke eng?
8 Motse oa setšabelo o tšoantšetsoang ke oa boholo-holo ke eng? Hase motse o itseng o kang Hebrone, o mong oa metse e tšeletseng ea setšabelo ea Balevi le lehae la moprista ea phahameng oa Iseraele. Motse oa setšabelo oa kajeno ke tokisetso ea Molimo ea ho re sireletsa lefung la ho tlōla molao oa hae o mabapi le khalalelo ea mali. (Genese 9:6) Ebang ke ka boomo kapa ha se ka boomo, motlōli e mong le e mong oa taelo eo o tlameha ho kōpa tšoarelo ho Molimo le ho leballoa sebe sa hae ka tumelo maling a Moprista ea Phahameng, Jesu Kreste. Bakreste ba tlotsitsoeng ba nang le tšepo ea leholimo le “bongata bo boholo” bo nang le litebello tsa lefatšeng ba amohetse melemo ea sehlabelo sa Jesu se phekolang libe ’me ba motseng oa setšabelo o tšoantšetsoang ke oa boholo-holo.—Tšenolo 7:9, 14; 1 Johanne 1:7; 2:1, 2.
9. Saule oa Tarese o ile a tlōla taelo ea Molimo e mabapi le mali joang, empa o ile a bontša joang hore boikutlo ba hae bo fetohile?
9 Pele e e-ba Mokreste, moapostola Pauluse o ne a ile a tlōla taelo e mabapi le mali. Ha e sa ntse e le Saule oa Tarese, o ne a hlorisa balateli ba Jesu a bile a tšehetsa polao ea bona. Pauluse o itse: “Empa ke rekolohetsoe, hobane ke ne ke etsa tseo ke ho se tsebe, ke sa le ho se lumeleng.” (1 Timothea 1:13; Liketso 9:1-19) Saule o ne a e-na le boikutlo ba ho baka, boo hamorao bo ileng ba pakoa ke mesebetsi e mengata ea tumelo. Empa ho hlokahala ho fetang tumelo thekollong e le hore re ka kena motseng oa setšabelo o tšoantšetsoang ke oa boholo-holo.
10. Re ka khona joang ho ba le letsoalo le letle, hona re tlameha ho etsa’ng ho le boloka?
10 ’Molai eo e seng oa ka boomo o ne a ka lula ho o mong oa metse ea setšabelo ea Iseraele hafeela a ne a ka paka hore o na le letsoalo le letle ho Molimo mabapi le tšollo ea mali. E le hore re ka ba le letsoalo le letle, re tlameha ho bontša tumelo sehlabelong sa Jesu, re bakele libe tsa rōna, ’me re fetole tsela ea rōna. Ho hlokahala hore re kōpe letsoalo le letle ka hore ka tieo re inehele ho Molimo ka Kreste, re tšoantšetse sena ka kolobetso ea metsing. (1 Petrose 3:20, 21) Letsoalo lena le letle le re lumella ho ba le kamano e hloekileng le Jehova. Mokhoa feela oa hore re boloke letsoalo le letle ke ho sebetsa tumellanong le seo Molimo a se hlokang ’me re etse mosebetsi oo re o abetsoeng motseng ona oa setšabelo o tšoantšetsoang ke oa boholo-holo, feela joalokaha baphaphathehi metseng ea setšabelo ea boholo-holo ba ne ba tlameha ho utloa Molao le ho etsa mosebetsi oo ba o abetsoeng. Mosebetsi o ka sehloohong oa batho ba Jehova kajeno ke oa ho bolela molaetsa oa ’Muso. (Mattheu 24:14; 28:19, 20) Ho etsa mosebetsi oo ho tla re thusa hore re be baahi ba molemo ba motse oa setšabelo oa kajeno.
11. Re lokela ho qoba eng e le hore re lule re sireletsehile motseng oa setšabelo oa kajeno?
11 Ho tloha motseng oa setšabelo oa kajeno ke ho ipepesetsa timetso, hobane Mophetetsi oa mali o tla tloha a nka bohato khahlanong le bohle ba molato oa mali. Ena hase nako ea ho tšoasoa kantle ho motse ona o sireletsehileng kapa sebakeng se kotsi haufi le moeli oa makhulo a oona. Re ne re tla qetella re le kantle ho motse oa setšabelo o tšoantšetsoang ke oa boholo-holo haeba re felloa ke tumelo sehlabelong se phekolang libe sa Moprista ea Phahameng. (Ba-Heberu 2:1; 6:4-6) Hape re ne re ke ke ra sireletseha haeba re ne re ka amohela mekhoa ea lefatše, re ema meeling ea mokhatlo oa Jehova o hlophisitsoeng, kapa re furalla litekanyetso tse lokileng tsa Ntate oa rōna oa leholimo.—1 Ba-Korinthe 4:4.
Ho Lokolloa Motseng oa Setšabelo
12. Bao pele ba neng ba le molato oa mali ba tlameha ho lula nako e kae motseng oa kajeno oa setšabelo o tšoantšetsoang ke oa boholo-holo?
12 ’Molai eo e seng oa ka boomo Iseraeleng o ne a tlameha ho lula motseng oa setšabelo “ho be ho shoe moprista [ea phahameng, NW].” (Numere 35:28) Ka hona bao pele ba neng ba le molato oa mali ba tlameha ho lula nako e kae motseng oa setšabelo o tšoantšetsoang ke oa boholo-holo? Ho fihlela ba se ba sa hloke litšebeletso tsa Moprista ea Phahameng, Jesu Kreste. Pauluse o itse: ‘A ka tseba ho pholosa ka ho fetisisa ba atamelang Molimo ka eena.’ (Ba-Heberu 7:25) Hafeela matheba a sebe le molato oa pele oa mali li ntse li le teng, litšebeletso tsa Moprista ea Phahameng lia hlokahala e le hore batho ba sa phethahalang ba ka ba boemong bo nepahetseng ho Molimo.
13. “Bana ba Iseraele” ba kajeno ke bo-mang, ’me ba tlameha ho lula ‘motseng oa setšabelo’ halelele hakae?
13 Hopola hore metse ea setšabelo ea boholo-holo e ne e etselitsoe “bana ba Iseraele,” batho ba lichaba le batho ba jakileng. “Bana ba Iseraele” ke Baiseraele ba moea. (Ba-Galata 6:16) Ba tlameha ho lula motseng oa setšabelo o tšoantšetsoang ke oa boholo-holo hafeela ba ntse ba phela lefatšeng. Hobane’ng? Hobane ba sa le nameng e sa phethahalang, ka lebaka leo ba hloka molemo o phekolang oa Moprista oa bona ea Phahameng oa leholimo. Empa ha Bakreste bana ba tlotsitsoeng ba e-shoa ’me ba tsosetsoa bophelong ba moea leholimong, ha ba sa hloka litšebeletso tse phekolang tsa Moprista ea Phahameng; ka ho sa feleng ba tla be ba furalletse nama le molato oa mali o e khomaretseng. Moprista ea Phahameng o tla be a shoele boemong ba ho ba ea phekolang le ea sireletsang ho ba joalo ba tlotsitsoeng ba tsositsoeng.
14. Ke’ng hape e hlokang hore ba nang le litebello tsa leholimo ba lule motseng oa setšabelo oa kajeno?
14 Ho ba le sebōpeho sa botho ka bohona ho hloka hore bao e tlang ho ba “majalefa hammoho le Kreste” ba lule motseng oa setšabelo o tšoantšetsoang ke oa boholo-holo ho fihlela ka botšepehi ba phetha tsela ea bona ea lefatšeng lefung. Ha ba e-shoa, ba tla tela sebōpeho sa botho ka ho sa feleng. (Ba-Roma 8:17; Tšenolo 2:10) Sehlabelo sa Jesu se sebetsa ho ba leng sebōpehong sa botho feela. Kahoo, Moprista ea Phahameng o-oa shoa ho Baiseraele ba moea ha ba tsoha e le libōpuoa tsa moea tse tla lula ka ho sa feleng leholimong tse nang le “kabelo ho seo Molimo o leng sona.”—2 Petrose 1:4.
15. ‘Batho ba lichaba’ le ‘batho ba jakileng’ ba kajeno ke bo-mang, ’me Moprista ea Phahameng e moholo o tla ba etsetsa’ng?
15 Moprista ea Phahameng o tla ‘shoa’ neng tabeng ea ‘batho ba lichaba’ ba kajeno le ‘batho ba jakileng,’ a ba lumella ho tloha motseng oa setšabelo o tšoantšetsoang ke oa boholo-holo? Litho tsena tsa bongata bo boholo li ke ke tsa tsoa motseng ona oa setšabelo hang ka mor’a mahlomola a maholo. Hobane’ng? Hobane ba tla be ba ntse ba le nameng ea bona e sa phethahalang, ea boetsalibe ’me ho tla hlokahala hore ba lule tlas’a tšireletso ea Moprista ea Phahameng. Ka ho amohela litšebeletso tsa hae tse phekolang nakong ea borena le boprista ba hae ba lilemo tse sekete, ba tla finyella phetheho ea botho. Ka nako eo, Jesu o tla ba hlahisa ho Molimo bakeng sa teko ea ho qetela, ea makhaola-khang ea botšepehi ba bona, ka ho lokolla Satane le bademona ba hae ka nakoana. Kaha ba feta teko ena e lumelletsoeng ke Molimo, Jehova o tla bolela hore ba lokile. Kahoo ba tla finyella phetheho ea botho ka ho feletseng.—1 Ba-Korinthe 15:28; Tšenolo 20:7-10.a
16. Ke neng ha baphonyohi ba mahlomola a maholo ba sa tl’o hloka litšebeletso tse phekolang tsa Moprista ea Phahameng?
16 Ka hona, ka nako eo baphonyohi ba mahlomola a maholo ba tla tlameha ho boloka letsoalo le letle ka ho lula motseng oa setšabelo o tšoantšetsoang ke oa boholo-holo ho fihlela qetellong ea Puso ea Kreste ea Lilemo tse Sekete. E le batho ba entsoeng ba phethahetseng, ha ba sa tla hloka litšebeletso tse phekolang tsa Moprista ea Phahameng, ’me ba tla tsoa tšireletsong ea hae. Ka nako eo Jesu o tla shoa tabeng ea bona joaloka Moprista ea Phahameng, hobane ho ke ke ha hlola ho hlokahala hore a nke bohato molemong oa bona ka mali a hloekisang a sehlabelo sa hae. Ka nako eo ba tla tloha motseng oa setšabelo o tšoantšetsoang ke oa boholo-holo.
17. Ke hobane’ng ha ho sa tl’o hlokahala hore ba tsositsoeng nakong ea Puso ea Kreste ea Lilemo tse Sekete ba kene motseng oa setšabelo o tšoantšetsoang ke oa boholo-holo ’me ba lule teng?
17 Na ba tsositsoeng Pusong ea Jesu ea Lilemo tse Sekete ba tla kena motseng oa setšabelo o tšoantšetsoang ke oa boholo-holo ’me ba lule teng ho fihlela ha moprista ea phahameng a e-shoa? Che, hobane ba ile ba lefa kotlo ea boetsalibe ba bona ka ho shoa. (Ba-Roma 6:7; Ba-Heberu 9:27) Leha ho le joalo, Moprista ea Phahameng o tla ba thusa ho finyella phetheho. Haeba ba feta teko ea ho qetela ka katleho ka mor’a Lilemo tse Sekete, Molimo o tla boela a bolele hore ba lokile a ba tiisetse bophelo bo sa feleng lefatšeng. Ho hlakile hore ho hlōleha ho sebetsa tumellanong le seo Molimo a se hlokang ho tla tlisetsa batho leha e le bafe ba sa feteng teko ea ho qetela e le baboloki ba botšepehi kahlolo ea nyatso.
18. Mabapi le puso ea Jesu le boprista ba hae, ho tla ’ne ho be le eng ka ho sa feleng molokong oa batho?
18 Baprista ba phahameng ba Iseraele qetellong ba ne ba e-shoa. Empa Jesu ‘o beiloe moprista ea phahameng ka ho sa feleng, ka mokhoa oa Melkisedeke.’ (Ba-Heberu 6:19, 20, mongolo o tšekaletseng ke oa rōna; 7:3.) Ka hona ho khaotsa ha tšebeletso ea Jesu e le Moprista ea Phahameng oa ’muelli oa moloko oa batho ha ho felise bophelo ba hae. Liphello tse molemo tsa tšebeletso ea hae e le Morena le Moprista ea Phahameng li tla ’ne li be teng molokong oa batho ka ho sa feleng, ’me batho ba tla ba molato ho eena ka ho sa feleng bakeng sa hore ebe o ile a sebeletsa boemong bona. Ho feta moo, Jesu o tla etella pele borapeling bo hloekileng ba Jehova kamehla le mehla.—Ba-Filippi 2:5-11.
Lithuto Tsa Bohlokoa Bakeng sa Rōna
19. Re ka ithuta eng mabapi le lehloeo le lerato tokisetsong ea metse ea setšabelo?
19 Re ka ithuta lithuto tse sa tšoaneng tokisetsong ea metse ea setšabelo. Ka mohlala, ha ho ’molai ea neng a hloile mofu ka lehloeo le bolaeang ea neng a lumelloa ho lula motseng oa setšabelo. (Numere 35:20, 21) Ka hona, ke joang motho leha e le ofe ea leng motseng oa setšabelo o tšoantšetsoang ke oa boholo-holo a ka lumellang lehloeo bakeng sa ngoan’abo hore le hōle ka pelong ea hae? Moapostola Johanne o ngotse: “E mong le e mong ea hloileng ngoan’abo ke ’molai; ’me lea tseba hobane ha ho ’molai eo bophelo bo sa feleng bo lutseng ho eena.” Ka lebaka leo, “a re rataneng; hobane lerato le tsoa ho Molimo.”—1 Johanne 3:15; 4:7.
20. Ba leng motseng oa setšabelo o tšoantšetsoang ke oa boholo-holo ba tlameha ho etsa eng e le hore ba ka sireletseha ho Mophetetsi oa mali?
20 Bakeng sa ho sireletseha ho mophetetsi oa mali, babolai bao e seng ba ka boomo ba ne ba tlameha ho lula motseng oa setšabelo ’me ba se ke ba khelohela kantle ho makhulo a oona. Ho thoe’ng ka ba leng motseng oa setšabelo o tšoantšetsoang ke oa boholo-holo? E le hore ba ka sireletseha ho Mophetetsi e moholo oa mali, ba tlameha hore ba se ke ba tloha motseng ona. Ruri, ho hlokahala hore ba itebele khahlanong le ho hoheloa hore ba ee lintšing tsa makhulo ana, ka puo ea tšoantšetso. Ba tlameha ho hlokomela hore ba se ke ba lumella lerato la lefatše la Satane hore le hōle ka lipelong tsa bona. Hona ho ka hloka hore ba rapele ba be ba etse boiteko, empa bophelo ba bona bo itšetlehile ka hona.—1 Johanne 2:15-17; 5:19.
21. Ba leng motseng oa setšabelo oa kajeno ba etsa mosebetsi ofe o putsang?
21 Babolai bao e seng ba ka boomo metseng ea setšabelo ea boholo-holo e ne e lokela ho ba basebetsi ba tsoang tema. Ka ho tšoanang, “bana ba Iseraele” ba batlotsuoa ba behile mohlala o motle joaloka bakotuli le baboleli ba ’Muso. (Mattheu 9:37, 38; Mareka 13:10) E le ‘batho ba lichaba’ le ‘batho ba jakileng’ motseng oa setšabelo oa kajeno, Bakreste ba nang le tšepo ea lefatšeng ba na le tokelo ea ho etsa mosebetsi ona o bolokang bophelo ba bapile le batlotsuoa ba sa ntseng ba le lefatšeng. ’Me ona ke mosebetsi o putsang hakaakang! Ba sebetsang ka botšepehi motseng oa setšabelo o tšoantšetsoang ke oa boholo-holo ba tla pholoha lefu la ka ho sa feleng matsohong a Mophetetsi oa mali. Ho e-na le hoo, ba tla amohela melemo e sa feleng tšebeletsong ea hae e le Moprista ea Phahameng e moholo oa Molimo. Na u tla lula motseng oa setšabelo ’me u phele ka ho sa feleng?
[Mongolo o botlaaseng ba leqephe]
U ne U Tla Araba Joang?
◻ Ke hobane’ng ha ho ka boleloa hore ba likete tsa limilione lefatšeng ba molato oa mali?
◻ Jesu Kreste o etsa litšebeletso life mabapi le moloko oa batho?
◻ Motse oa setšabelo o tšoantšetsoang ke oa boholo-holo ke eng, hona motho o kena ho oona joang?
◻ Batho ba tla lokolloa motseng oa setšabelo o tšoantšetsoang ke oa boholo-holo neng?
◻ Re ka ithuta lithuto life tsa bohlokoa tokisetsong ea metse ea setšabelo?
[Setšoantšo se leqepheng la 16]
Na u-ua tseba hore Jesu Kreste o etsa litšebeletso life tsa bohlokoa?