Na U na le “Pelo e Mamelang”?
HA Solomone e ne e e-ba morena oa Iseraele ea boholo-holo, o ile a ikutloa a sa tšoanelehe. Ka lebaka leo, o ile a kōpa Molimo bohlale le tsebo. (2 Likronike 1:10) Solomone o ile a boela a rapela: “U fe mohlanka oa hao pelo e mamelang hore a ahlole batho ba hao.” (1 Marena 3:9, NW) Haeba Solomone a ne a e-na le “pelo e mamelang,” o ne a tla latela melao le melao-motheo ea bomolimo ’me o ne a tla latsoa tlhohonolofatso ea Jehova.
Pelo e mamelang hase moroalo empa ke mohloli oa thabo. Moapostola Johanne o ile a ngola: “Se boleloang ke lerato la Molimo ke sena, hore re boloke litaelo tsa hae; ’me leha ho le joalo litaelo tsa hae ha li boima.” (1 Johanne 5:3) Ka sebele, re lokela ho mamela Molimo. Etsoe Jehova ke ’Mōpi oa rōna e Moholo. Ke eena ea entseng lefatše le tsohle tse ho lona, esita le silivera le khauta eohle. Kahoo ha ho letho le bonahalang leo re ka le fang Molimo, le hoja a re lumella ho sebelisa matlotlo a rōna ho bontša lerato la rōna ho eena. (1 Likronike 29:14) Jehova o lebeletse hore re mo rate ’me re tsamaee le eena ka boikokobetso, re etse thato ea hae.—Mikea 6:8.
Ha Jesu Kreste a ne a botsoa hore na taelo e khōlō ka ho fetisisa Molaong ke efe, o ile a re: “U rate Jehova Molimo oa hao ka pelo ea hao eohle le ka soule ea hao eohle le ka kelello ea hao eohle. Ena ke eona taelo e khōlō ka ho fetisisa le ea pele.” (Matheu 22:36-38) Tsela e ’ngoe ea ho bontša lerato leo ke ho mamela Molimo. Kahoo, e lokela ho ba thapelo ea e mong le e mong oa rōna hore Jehova a re fe pelo e mamelang.
Ba Bile le Pelo e Mamelang
Bibele e tletse ka mehlala ea ba bileng le pelo e mamelang. Ka mohlala, Jehova o ile a bolella Noe hore a hahe areka e khōlōhali bakeng sa ho pholosa bophelo. Ona e ne e le mosebetsi o moholohali o ileng oa nka lilemo tse ka bang 40 kapa 50. Le haeba ho ne ho sebelisoa mechine eohle ea morao-rao e fumanehang le lisebelisoa tse ling, e ne e tla ’ne e be mosebetsi o moholo oa boenjiniere ho haha mohaho o moholohali joalo o neng o ka phaphamala metsing. Ho feta moo, Noe o ile a tlameha ho lemosa batho bao ntle ho pelaelo ba neng ba mo soma le ho mo phoqa. Empa o ile a bontša ho mamela lintlheng tsohle. Bibele e re: ‘A fela a etsa joalo.’ (Genese 6:9, 22; 2 Petrose 2:5) Noe o ile a bontša lerato la hae ho Jehova ka ho mo mamela ka botšepehi ka lilemo tse ngata. Ke mohlala o motle hakaakang ho rōna bohle!
Hape, nahana ka mopatriareka Abrahama. Molimo o ile a mo bolella hore a tlohe motseng o atlehileng oa Ure ea Bakalde a ee naheng eo a sa e tsebeng. Abrahama o ile a mamela a sa belaele. (Baheberu 11:8) Bophelo bohle ba hae, eena le lelapa la hae ba ile ba phela litenteng. Ka mor’a lilemo tse ngata e le mojaki naheng eo, Jehova o ile a mo hlohonolofatsa eena le mosali oa hae ea mamelang, Sara, ka mora ea bitsoang Isaka. E tlameha ebe Abrahama ea lilemo li 100 o ne a rata mora oa hae oa botsofaling hakaakang! Lilemo tse ’maloa hamorao, Jehova o ile a bolella Abrahama hore a etse Isaka sehlabelo e le nyehelo e chesitsoeng. (Genese 22:1, 2) Ho nahana ka ho etsa sena ka bohona e tlameha e bile ho utloisang bohloko ho Abrahama. Leha ho le joalo, o ile a tsoela pele ho mamela hobane a ne a rata Jehova ’me a e-na le tumelo ea hore peō e tšepisitsoeng e ne e tla tla ka Isaka, esita le haeba Molimo a ne a tla lokela ho mo tsosa bafung. (Baheberu 11:17-19) Leha ho le joalo, ha Abrahama a le mothating oa ho bolaea mora oa hae, Jehova o ile a mo thiba ’me a re: “Joale, kea tseba hoba u tšaba Molimo, ha u sa ka ua nkhanela le mora oa hao, ea mong ho uena.” (Genese 22:12) Ka lebaka la ho mamela ha hae, Abrahama ea tšabang Molimo o ile a tsejoa e le “motsoalle oa Jehova.”—Jakobo 2:23.
Jesu Kreste ke mohlala o molemo ka ho fetisisa ho rōna oa ho mamela. Nakong ea pele e e-ba motho, o ile a thabela ho sebeletsa Ntate oa hae oa leholimo, a mamela. (Liproverbia 8:22-31) Ha e se e le motho, Jesu o ile a mamela Jehova nthong e ’ngoe le e ’ngoe, kamehla a thabela ho etsa thato ea hae. (Pesaleme ea 40:8; Baheberu 10:9) Kahoo, ka botšepehi Jesu o ne a ka re: “Ha ke etse letho le itsoelang ho ’na; empa feela joalokaha Ntate a nthutile ke bua lintho tsena. ’Me ea nthomileng o na le ’na; ha aa ka a ntlohela ke ’notši, hobane ka mehla ke etsa lintho tse mo khahlisang.” (Johanne 8:28, 29) Qetellong, e le hore a tlose qoso bobusing ba Jehova le ho lopolla moloko oa batho o mamelang, Jesu o ile a ithaopela ho fana ka bophelo ba hae, ho shoa lefu le tlontlollang le le bohloko ka ho fetisisa. Ka sebele, “ha a iphumana ka sebōpeho e le motho, o ile a ikokobetsa ’me a mamela ho isa lefung, e, lefu thupeng ea tlhokofatso.” (Bafilippi 2:8) Ke mohlala o babatsehang hakaakang oa ho bontša pelo e mamelang!
Ho se Mamele ka ho Feletseng ha Hoa Lekana
Hase bohle ba ’nileng ba ipolela hore ba mamela Molimo ba ileng ba mo mamela. Nahana ka Morena Saule oa Iseraele ea boholo-holo. Molimo o ile a mo laela hore a felise Baamaleke ka ho feletseng. (1 Samuele 15:1-3) Le hoja Saule a ile a ba timetsa e le sechaba, o ile a baballa morena oa bona ’me a sireletsa tse ling tsa linku le likhomo tsa bona. Samuele o ile a botsa: “Ha ua ka ua utloa lentsoe la Jehova ke’ng?” Ha a arabela, Saule o ile a re: “Ka ’nete ke utloile lentsoe la Jehova . . . Ke sechaba [sa Iseraele] se nkileng tsa khapo, linku le likhomo tse ntle . . . ka ho re, se tla li hlabela Jehova.” Ha a hatisa bohlokoa ba ho mamela ka ho feletseng, Samuele o ile a re: “Hleka Jehova o khahloa ke licheso le ke mahlabelo, joalo ka ha a khahloa ha ho utluoa lentsoe la Jehova na? Bona kutlo e fetisa sehlabelo, ’me mamelo e fetisa mafura a lipheleu. Hobane boikhantšo bo ka sebe sa bonohe, ’me bohata bo tšoana le tšebeletso ea litšoantšo le ea literafime; ereka ha u lahlile taelo ea Jehova, le eena o u lahlile, hore u se ke ua ’na ua ba morena.” (1 Samuele 15:17-23) Saule o ile a lahleheloa hakaakang ka lebaka la ho hloka pelo e mamelang!
Esita le Morena Solomone ea bohlale, ea ileng a rapella pelo e mamelang, ha a ka a tsoela pele ho mamela Jehova. Khahlanong le thato ea Molimo, o ile a nyala basali ba balichaba ba ileng ba etsa hore a tlōle molao oa Molimo. (Nehemia 13:23, 26) Solomone o ile a lahleheloa ke kamohelo ea bomolimo hobane ha aa ka a tsoela pele ho ba le pelo e mamelang. Sena ke temoso e kaakang ho rōna!
Sena hase bolele hore Jehova o batla phetheho ho bahlanka ba hae ba batho. Oa “elelloa hoba re lerōle feela.” (Pesaleme ea 103:14) Ke ’nete hore kaofela ha rōna re etsa liphoso ka linako tse ling, empa Molimo oa bona haeba re hlile re e-na le takatso e tiileng ea ho mo khahlisa. (2 Likronike 16:9) Haeba re fosa ka lebaka la ho se phethahale ha botho empa re baka, re ka kōpa tšoarelo motheong oa sehlabelo sa thekollo sa Kreste, re kholisehile hore Jehova o tla re “tšoarela haholo.” (Esaia 55:7; 1 Johanne 2:1, 2) Thuso e lerato ea baholo ba Bakreste e ka boetse ea hlokahala e le hore re khone ho hlaphoheloa moeeng ’me re be le tumelo e matla le pelo e mamelang.—Tite 2:2; Jakobo 5:13-15.
U Mamela ka ho Feletseng Hakae?
Joaloka bahlanka ba Jehova, ba bangata ba rōna ntle ho pelaelo ba ikutloa hore ba na le pelo e mamelang. Re ka ’na ra ikemela ka hore, Na ha ke kopanele mosebetsing oa boboleli ba ’Muso? Na ha ke eme ke tiile ha ho hlaha likhang tsa bohlokoa joaloka ea ho se nke lehlakore? ’Me na ha ke be teng libokeng tsa Bokreste kamehla, joalokaha moapostola Pauluse a ile a khothalletsa? (Matheu 24:14; 28:19, 20; Johanne 17:16; Baheberu 10:24, 25) Ke ’nete hore batho ba Jehova ba bontša ho mamela ho tlohang pelong lintlheng tse joalo tsa bohlokoa.
Empa ho thoe’ng ka boitšoaro ba rōna mesebetsing ea letsatsi le letsatsi, mohlomong linthong tse bonahalang eka li nyenyane? Jesu o ile a re: “Motho ea tšepahalang ho se senyenyane ka ho fetisisa o tšepahala le ho se seholo, ’me motho ea sa lokang ho se senyenyane ka ho fetisisa ha aa loka le ho se sengata.” (Luka 16:10) Ka hona e mong le e mong oa rōna o ne a tla etsa hantle ho ipotsa, Na ke na le pelo e mamelang ha ho tluoa linthong tse nyenyane kapa linthong tseo ba bang ba bileng ba sa li tsebeng?
Mopesaleme o ile a bontša hore esita le ka tlung ea hae, moo ba bang ba sa mo boneng, o ‘tsamaea botšepehing ba pelo ea hae.’ (Pesaleme ea 101:2, NW) Ha u ntse u lutse ka tlung ea hao, u ka ’na ua bulela thelevishene ’me ua qala ho shebella baesekopo. Hona moo, ho mamela ha hao ho ka ’na ha lekoa. Baesekopo eo e ka ’na ea bontša boitšoaro bo bobe. Na u tla tsoela pele ho e shebella, u ikemela ka hore ke mofuta oa libaesekopo tse bontšoang matsatsing aa? Kapa na pelo ea hao e mamelang e tla u susumelletsa hore u latele temoso ea Mangolo, ea hore ‘bohlola le ho se hloeke le ho boleloa a li se ke tsa boleloa har’a lōna’? (Baefese 5:3-5) Na u tla tima TV, esita le haeba e bontša pale e thahasellisang? Kapa na u tla chencha seteishene haeba se bontša lenaneo le tletseng pefo? Mopesaleme o ile a bina: “Jehova o lekola ea lokileng; moea oa hae o hloile ea khopo le ea ratang sehlōhō.”—Pesaleme ea 11:5.
Pelo e Mamelang e Tlisa Litlhohonolofatso
Ka sebele ho na le likarolo tse ngata bophelong tseo ho ka bang molemo hore re itlhahlobe hore re bone haeba re hlile re mamela Molimo ho tsoa pelong. Lerato la rōna ho Jehova le lokela ho re susumelletsa ho mo khahlisa le ho etsa seo a re bolellang sona ka Lentsoeng la hae, Bibele. Pelo e mamelang e tla re thusa ho boloka kamano e ntle le Jehova. Ka sebele, haeba re mamela ka ho feletseng, ‘lipolelo tsa melomo oa rōna le ho thuisa ha pelo ea rōna e tla ba tse khahlisang ka pel’a Jehova.’—Pesaleme ea 19:14, NW.
Kaha Jehova oa re rata, o re ruta ho mamela bakeng sa molemo oa rōna. ’Me re ithuisa molemo haholo ka ho ela hloko thuto ea bomolimo ka pelo eohle. (Esaia 48:17, 18) Ka hona, a re amoheleng ka thabo thuso eo Ntate oa rōna oa leholimo a fanang ka eona ka Lentsoe la hae, moea oa hae le mokhatlo oa hae o hlophisitsoeng. Re rutoa ka bokhabane hoo e kang re utloa lentsoe ka mor’a rōna le reng: “Tsela ke eona ena, tsamaeang ho eona.” (Esaia 30:21) Ha Jehova a ntse a re ruta ka Bibele, likhatiso tsa Bokreste le liboka tsa phutheho, e se eka re ka ela hloko, ra sebelisa seo re ithutang sona, ’me ra “mamela linthong tsohle.”—2 Bakorinthe 2:9.
Pelo e mamelang e tla fella ka thabo e khaphatsehang le litlhohonolofatso tse ngata. E tla re tlisetsa khotso ea kelello, kaha re tla tseba hore re khahlisa Jehova Molimo le ho etsa hore pelo ea hae e thabe. (Liproverbia 27:11) Pelo e mamelang e tla ba tšireletso ho rōna ha re lekoa hore re etse se fosahetseng. Ka sebele, re lokela ho mamela Ntate oa rōna oa leholimo ’me re lokela ho rapela: “U fe mohlanka oa hao pelo e mamelang.”
[Setšoantšo se leqepheng la 29]
From the Self-Pronouncing Edition of the Holy Bible, containing the King James and the Revised versions