Seo Re Ithutang Sona Thapelong E lokiselitsoeng Hantle

 1. Ke pokano efe ea bahlanka ba Molimo eo re tla e tšohla, hona re ka ipotsa lipotso life?

“EMANG, le boke Jehova Molimo oa lōna ho tloha nakong e sa lekanyetsoang ho isa nakong e sa lekanyetsoang.” Ha ba bua mantsoe ana a susumetsang, bahlanka ba Molimo ba mehleng ea boholo-holo ba ne ba bokane ho etsa thapelo hammoho, e leng thapelo e telele ka ho fetisisa ho tse tlalehiloeng ka Bibeleng. (Neh. 9:4, 5) Ba ne ba bokane Jerusalema ka li 24 tsa khoeli ea bosupa ea Sejuda, e leng Tishri, selemong sa 455 B.C.E. Ha re ntse re hlahloba liketsahalo tsa pele ho letsatsi lena le ikhethang, ipotse: ‘Ke lintho life tse ntle tse ileng tsa etsa hore ketsahalo eo e atlehe? Ke lintho life tse ling tseo nka ithutang tsona thapelong ee e lokiselitsoeng hantle?’—Pes. 141:2.

 2. Ke mohlala ofe o motle oo Baiseraele ba ileng ba re behela oona ha ba bokane ka mor’a hore ba tsosolose marako a Jerusalema?

² Bajuda ba ne ba sa tsoa qeta ho tsosolosa marako a Jerusalema khoeli pele ho pokano e boletsoeng ka holimo. (Neh. 6:15) Bahlanka ba Molimo ba ile ba phetha mosebetsi oo ka matsatsi a 52 feela ’me ka mor’a moo ba tsoela pele ho itlhokomela moeeng. Kahoo, ka letsatsi la pele la khoeli e ncha ea Tishri, ba ile ba bokana lebaleng la sechaba ho tla mamela Esdrase hammoho le Balevi ba bang, ha ba balla holimo Molao oa Molimo ba bile ba o hlalosa. Litho tsohle tsa malapa ho akarelletsa le “bohle ba kelello ka ho lekaneng hore ba ka mamela,” li ile tsa ema ’me tsa mamela “ho tloha ka meso ho fihlela har’a motšehare.” Ke mohlala o motle hakaakang ho rōna bao kajeno re nang le Liholo Tsa ’Muso tsa boemo bo botle! Leha ho le joalo, na ka linako tse ling ha u le libokeng kelello ea hao e ea lelera ebe u qala ho nahana ka lintho tseo e seng tsa bohlokoa? Haeba ho joalo, nahana hape ka mohlala oa Baiseraele bao ba boholo-holo ba ileng ba mamela ba ba ba tebisetsa seo ba neng ba ithuta sona pelong hoo ba ileng ba lla ka lebaka la hore ebe ba hlōlehile ho mamela Molao oa Molimo e le sechaba.—Neh. 8:1-9.

 3. Baiseraele ba ile ba mamela tataiso efe ka boikokobetso?

³ Leha ho le joalo, ena e ne e se nako ea hore batho ba ipolele libe phatlalatsa. Kaha e ne e le letsatsi la mokete, e ne e lokela ho ba nako e thabisang ho barapeli ba Jehova. (Num. 29:1) Kahoo, Nehemia o ile a re ho sechaba: “Tsamaeang, le je lintho tse nonneng ’me le noe lintho tse monate, hape le romele likabelo ho eo ho seng letho le lokisitsoeng bakeng sa hae; etsoe letsatsi lena lea halalela ho Morena oa rōna, ’me le se ke la utloa bohloko, etsoe thabo ea Jehova ke qhobosheane ea lōna.” Hoa thabisa hore ebe batho ba ile ba mamela ’me “ba thaba haholo” ka letsatsi leo.—Neh. 8:10-12.

 4. Lihlooho tsa malapa a Baiseraele li ne li etsa’ng, hona ke ntho efe ea bohlokoa eo li ileng tsa hlokomela hore e lokela ho etsoa Moketeng oa Maphephe?

⁴ Ka letsatsi le hlahlamang, lihlooho tsa malapa li ile tsa bokana hammoho e le hore li shebisane kamoo sechaba se neng se ka mamela Molao oa Molimo haholoanyane kateng. Ha li ntse li ithuta Mangolo, li ile tsa fumana hore khoeling ea bosupa ho ne ho lokela hore ho be le Mokete oa Maphephe o qetellang ka seboka se hlomphehang, ho tloha ka li 15 ho ea ho li 22 khoeling ea Tishri, kahoo li ile tsa qala ho etsa litokisetso. Mokete oo oa Maphephe e ile ea e-ba o atlehileng ka ho fetisisa haesale ho tloha mehleng ea Joshua ’me ho ile ha e-ba le “ho thaba ho hoholo.” Ntho ea bohlokoa e neng e etsoa moketeng ona ke hore ho ne ho balloa sechaba Molao oa Molimo “letsatsi le letsatsi, ho tloha ka letsatsi la pele ho fihlela ka letsatsi la ho qetela.”—Neh. 8:13-18.

 5. Bahlanka ba Molimo ba ne ba etsa’ng pele Balevi ba ba rapella ho Jehova?

⁵ Matsatsi a mabeli hamorao, e ne e le nako e nepahetseng ea hore Baiseraele ba ipolele phatlalatsa hore ba hlōlehile ho mamela Molao oa Molimo. Lena e ne e se letsatsi la ho ja le ho ithabisa. Ho fapana le hoo, bahlanka ba Molimo ba ne ba itima lijo ’me ba apara masela a mokotla ho bontša hore ba siame. Ho feta moo, batho ba ne ba balloa Molao oa Molimo ka lihora tse ka bang tharo hoseng. Thapama, “ba ne ba ipolela ’me ba inamela Jehova Molimo oa bona.” Joale Balevi ba ne ba etsetsa batho thapelo e lokiselitsoeng hantle. —Neh. 9:1-4.

 6. Ke’ng e ileng ea thusa Balevi hore ba etse thapelo e utloahalang, hona re ithuta’ng ho seo?

⁶ Ha ho pelaelo hore ho bala Molao oa Molimo kamehla ke hona ho ileng ha thusa Balevi hore ba lokisetse thapelo ena e utloahalang. Litemana tsa pele tse leshome li lebisitse tlhokomelo ka ho khetheha mesebetsing ea Jehova le litšobotsing tsa hae. Karolong e setseng ea thapelo, Balevi ba ile ba totobatsa libe tse ngata tsa sechaba ’me ba hlalosa ka ho hlaka hore na ke hobane’ng ha Baiseraele ba ne ba sa tšoaneloe ke ‘mohau oa Molimo o mongata.’ (Neh. 9:19, 27, 28, 31) Lithapelo tseo re li etsang ho Jehova le tsona e ka ba tse utloahalang haeba joaloka Balevi bao, re thuisa ka Lentsoe la Molimo, re bile re lumella Jehova hore a bue le rōna pele re etsa thapelo e telele ho eena.—Pes. 1:1, 2.

 7. Balevi ba ile ba kōpa’ng ho Molimo, hona see se re ruta’ng?

⁷ Thapelong ea bona, Balevi ba ile ba kōpa ntho e le ’ngoe e bontšang boikokobetso. Eona e karolong e qetellang ea temana ea 32, ’me e baleha tjena: “Joale, Molimo oa rōna, Molimo e moholo, ea matla le ea tšabehang, ea bolokang selekane le mosa o lerato, u se ke ua tlohela hore tsietsi eohle e hlahetseng rōna, marena a rōna, likhosana tsa rōna le baprista ba rōna le baprofeta ba rōna le baholo-holo ba rōna le batho ba hao bohle ho tloha matsatsing a marena a Assyria ho fihlela letsatsing lena, e bonahale e le nyenyane ka pel’a hao.” Kahoo, Balevi ba re behetse mohlala o motle oa hore re qale ka ho rorisa le ho leboha Jehova pele re etsa likōpo lithapelong tsa rōna.

8, 9. (a) Balevi ba ile ba qala thapelo ea bona ka tsela efe e bontšang boikokobetso? (b) Ke mabotho afe a mabeli a leholimo ao ho totobetseng hore Balevi ba bua ka ’ona?

⁸ Le hoja lithapelo tsa bona li ne li lokiselitsoe hantle, Balevi ba ne ba ikokobelitse ’me ba nka hore mantsoe ao ba a sebelisang a ne a ke ke a rorisa Jehova ka tsela e hlileng e mo tšoanelang. Ka lebaka leo, ba ile ba rapella Baiseraele bohle ka hore ba kōpe Jehova ka boikokobetso ba re: “Ba ke ba boke lebitso la hao le khanyang, le phahametseng poko le thoriso eohle.”—Neh. 9:5.

⁹ Thapelo eo e tsoela pele ka ho re: “Ke uena Jehova u le mong; u entse maholimo, esita le leholimo la maholimo, le lekhotla lohle la ’ona, lefatše le sohle se holim’a lona, maoatle le sohle se ho ’ona; ’me kaofela u li boloka li phela; makhotla a maholimo aa u inamela.” (Neh. 9:6) Ka sebele, Jehova Molimo o bōpile bokahohle bo nang le lihlopha tse ngata tsa linaleli. Ka tsela e hlollang, o boetse o bōpile lintho tsohle tse lefatšeng la rōna le letle le nang le bokhoni ba ho boloka lintho tse phelang tse tsotehang tse fapa-fapaneng—tse tsoelang pele ho ikatisa ho ea ka mefuta ea tsona. Mangeloi a halalelang a Molimo, ao hape a hlalosoang e le “lebotho . . . la maholimo,” ke ’ona a boneng ha ho ne ho bōptjoa lintho tsena tsohle. (1 Mar. 22:19; Jobo 38:4, 7) Ho feta moo, ka boikokobetso mangeloi a etsa thato ea Molimo ka ho sebeletsa batho ba baetsalibe “ba tla rua poloko.” (Baheb. 1:14) Ke mohlala o babatsehang hakaakang oo mangeloi a re behelang oona ha re ntse re sebeletsa Jehova re momahane joaloka lebotho le koetlisitsoeng hantle!—1 Bakor. 14:33, 40.

10. Ke’ng eo re ithutang eona tseleng eo Molimo a ileng a sebelisana le Abrahama ka eona?

¹⁰ Ka mor’a moo, Balevi ba ile ba bua ka tšebelisano ea Molimo le Abrame, eo le hoja a ne a le lilemo li 99 a neng a se na ngoana hobane mosali oa hae Sarai, e ne e le nyopa. Ke hona nakong ena moo Jehova a ileng a fetola lebitso la hae hore e be Abrahama, e bolelang “ntat’a lichaba tse ngata.” (Gen. 17:1-6, 15, 16) Molimo o ile a boela a tšepisa Abrahama hore peō ea hae e ne e tla rua naha ea Kanana. Hangata batho ba lebala litšepiso tseo ba li entseng; empa ha ho joalo ka Jehova. Ho joalokaha thapelo ea Balevi e hlalosa: “Ke uena Jehova Molimo oa ’nete, ea ileng a khetha Abrame ua mo ntša Ure ea Bakalde ’me ua etsa hore lebitso la hae e be Abrahama. Ua fumana pelo ea hae e tšepahala ka pel’a hao; kahoo ha etsoa tumellano ea selekane le eena ho mo fa naha ea Bakanana, . . . ho e fa peō ea hae; eaba u phetha mantsoe a hao, hobane u lokile.” (Neh. 9:7, 8) E se eka le rōna re ka etsisa Molimo oa rōna ea lokileng ka hore re phethahatse seo re se buileng.—Mat. 5:37.

11, 12. Hlalosa hore na lebitso la Jehova le bolela’ng, hona seo se ile sa bonahala joang tseleng eo a ileng a sebelisana ka eona le litloholo tsa Abrahama.

¹¹ Lebitso Jehova le bolela “O Etsa Hore ho be,” e leng se bontšang hore Molimo o nka bohato bo tsoelang pele e le hore a phethahatse litšepiso tsa hae. Sena se ile sa bonahala ka ho hlaka tseleng eo Molimo a ileng a sebelisana ka eona le litloholo tsa Abrahama ha e ntse e le makhoba Egepeta. Nakong eo, ho ne ho bonahala ho se na tšepo ea hore sechaba sohle se ka lokolloa ’me se lule Naheng e Tšepisitsoeng. Leha ho le joalo, ka hore a nke bohato bo tsoelang pele, Molimo o ile a phethahatsa tšepiso ea hae, ’me kahoo a ipaka hore o tšoaneloa ke lebitso leo le leholo, e leng Jehova.

¹² Thapelo e tlalehiloeng ke Nehemia e re ka Jehova: “U ile ua bona mahloreho a baholo-holo ba rōna Egepeta, ’me ua utloa mohoo oa bona Leoatleng le Lefubelu. Joale ua fana ka lipontšo le mehlolo khahlanong le Faro le bahlanka bohle ba hae le batho bohle ba naha ea hae, kaha u ne u tseba hore ba ile ba iketelletsa pele khahlanong le bona; eaba u iketsetsa lebitso joaloka letsatsing lena. Ua arola leoatle ka pel’a bona, hoo ba ileng ba tšela bohareng ba leoatle mobung o omileng; eaba ba ba lelekisang u ba lahlela bolibeng joaloka lejoe metsing a matla.” Thapelo eo e tsoela pele ’me e bolela ntho e ’ngoe eo Jehova a ileng a e etsetsa bahlanka ba hae, e re: “Ua kokobetsa ka pel’a bona baahi ba naha, Bakanana, . . . Ba hapa metse e etselitsoeng liqhobosheane le mobu o nonneng ’me ba rua matlo a tletseng lintho tsohle tse ntle, liliba tse chekiloeng, lirapa tsa morara le meru ea mohloaare le lifate bakeng sa lijo ka bongata, ’me ba qala ho ja le ho khora le ho nona le ho iketla molemong oa hao o moholo.”—Neh. 9:9-11, 24, 25.

13. Jehova o ile a hlokomela Baiseraele moeeng ka tsela efe, empa ba ile ba etsa’ng?

¹³ Ho na le lintho tse ling tse ngata tseo Molimo a ileng a tsoela pele ho li etsa e le hore a phethahatse morero oa hae. Ka mohlala, nakoana ka mor’a hore Baiseraele ba tsoe Egepeta, Jehova o ile a ba hlokomela moeeng. Ha ba rapela Molimo, Balevi ba ile ba re: “Thabeng ea Sinai ua bua le bona u le leholimong ’me ua tsoela pele ho ba fa liqeto tsa boahloli tse lokileng le melao ea ’nete, melao ea tsamaiso le litaelo tse molemo.” (Neh. 9:13) Jehova o ile a leka ho ruta bahlanka ba hae e le hore ba ka tšoaneleha ho bitsoa ka lebitso la hae le halalelang kaha e ne e le majalefa a Naha e Tšepisitsoeng, empa ba ile ba furalla lintho tse ntle tseo ba neng ba ithutile tsona.—Bala Nehemia 9:16-18.

14, 15. (a) Ka mohau Jehova o ile a hlokomela bahlanka ba hae ba baetsalibe joang? (b) Re ithuta’ng tseleng eo Molimo a ileng a sebelisana ka eona le sechaba seo a se khethileng?

¹⁴ Thapelong ea bona, Balevi ba bua ka libe tse peli ka ho khetheha tseo Baiseraele ba ileng ba li etsa hang ka mor’a hore ba etse tšepiso Thabeng ea Sinai ea hore ba tla mamela Molao oa Molimo. Ka lebaka la seo, ba ne ba lokela ho lahloa kherehloa hore ba shoe. Empa thapelo eo e rorisa Jehova ka ho re: “Ka mohau oa hao o mongata ha ua ka ua ba tlohela lefeelleng. . . . Ua ba fa lijo . . . ka lilemo tse mashome a mane . . . Ba ne ba sa haelloe ke letho. Liaparo tsa bona ha lia ka tsa tsofala, le maoto a bona ha aa ka a ruruha.” (Neh. 9:19, 21) Le kajeno, Jehova o re fa lintho tsohle tseo re li hlokang e le hore re tsoele pele ho mo sebeletsa ka botšepehi. E se eka re ke ke ra tšoana le Baiseraele ba likete ba ileng ba shoella lefeelleng hobane ba ne ba sa mamele ba bile ba hloka tumelo. Ha e le hantle, lintho tseo “li ile tsa ngoloa hore e be temoso ho rōna bao bofelo ba litsamaiso tsa lintho bo ba fihletseng.”—1 Bakor. 10:1-11.

¹⁵ Ka masoabi, ka mor’a hore Baiseraele ba kene Naheng e Tšepisitsoeng, ba ile ba inehella borapeli bo tsosang takatso le bo tletseng polao ba melimo ea Bakanana. Kahoo, Jehova o ile a lumella lichaba tsa boahelani hore li hatelle sechaba seo a se khethileng. Ha se ne se baka, ka mohau Jehova o ne a se tšoarela ’me a se sireletsa lireng tsa sona. Sena se ne se etsahala “nako le nako.” (Bala Nehemia 9:26-28, 31.) Balevi ba ile ba tsoela pele ka ho re: “Ua ba mamella ka lilemo tse ngata ’me ua ’na ua paka khahlanong le bona ka moea oa hao u sebelisa baprofeta ba hao, ’me ha baa ka ba mamela. Qetellong ua nehelana ka bona matsohong a lichaba tsa linaha.”—Neh. 9:30.

16, 17. (a) Ho ile ha etsahala’ng ha Baiseraele ba boela ba qala ho se mamele Jehova? (b) Baiseraele ba ile ba re’ng, hona ba ile ba tšepisa ho etsa’ng?

¹⁶ Esita le ka mor’a hore ba khutle botlamuoeng, Baiseraele ba ile ba boela ba se ke ba mamela. Litholoana tsa seo e ile ea e-ba life? Thapelo ea Balevi e tsoela pele ka ho re: “Bona! Kajeno re makhoba; ’me ha e le naha eo u ileng ua e fa baholo-holo ba rōna hore ba je litholoana tsa eona le lintho tsa eona tse ntle, bona! re makhoba holim’a eona, lihlahisoa tsa eona li atela marena ao u a behileng hore a re okamele ka lebaka la libe tsa rōna . . . ’me re mahlomoleng a maholo.”—Neh. 9:36, 37.

¹⁷ Na Balevi ba ne ba bolela hore Molimo o ba sebelitse ka ho hloka toka ka hore a ba tlohele mahlomoleng ao? Le hanyenyane! Ba ile ba re: “U lokile mabapi le sohle se re etsahaletseng, etsoe u sebelitse ka botšepehi, empa ke rōna ba entseng bokhopo.” (Neh. 9:33) Kahoo, thapelo ena e bontšang ho hloka boithati e phetha ka hore sechaba se ikane hore ho tloha ka nako eo, se tla mamela Molao oa Molimo. (Bala Nehemia 9:38; 10:29) Ka lebaka leo, ho na le tokomane e tiisitsoeng ke baeta pele ba Bajuda ba 84.—Neh. 10:1-27.

18, 19. (a) Ke’ng eo re e hlokang e le hore re tle re pholohele lefatšeng le lecha la Molimo? (b) Ke’ng eo re sa lokelang ho khaotsa ho e rapella, hona hobane’ng?

¹⁸ Ho hlokahala hore Jehova a re laee e le hore re tsebe ho pholohela lefatšeng la hae le lecha la ho loka. Moapostola Pauluse o ile a botsa a re: “Ke mora ofe eo ntat’ae a sa mo laeeng?” (Baheb. 12:7) Re bontša hore re amohela tataiso ea Molimo bophelong ba rōna ka hore re mamelle ka botšepehi tšebeletsong ea hae le ka ho lumella moea oa hae ho re koetlisa. Haeba re etsa sebe se tebileng, re ka kholiseha hore Jehova o tla re tšoarela haeba re baka e le kannete ’me ka boikokobetso re amohela taeo.

¹⁹ Haufinyane, Jehova o tla etsa hore lebitso la hae le be leholo ho feta kamoo le ileng la ba leholo kateng ha a ne a lopolla Baiseraele Egepeta. (Ezek. 38:23) ’Me feela joalokaha bahlanka ba Molimo ba boholo-holo ba ile ba rua Naha e Tšepisitsoeng, Bakreste bohle ba mamellang e le barapeli ba Jehova ba tšepahalang, ba tla fumana bophelo lefatšeng le lecha la Molimo la ho loka. (2 Pet. 3:13) Kaha re na le tšepo ena e hlollang, e se eka re ke ke ra khaotsa ho rapella hore lebitso la Molimo le khanyang le halaletsoe. Sehloohong se latelang ho tla tšohloa thapelo e ’ngoe eo re lokelang ho etsa lintho tumellanong le eona e le hore re fumane litlhohonolofatso tsa Molimo hona joale le ka ho sa feleng.