U ka Phela Halelele Hakae?

“Nama ea hae e ke e nchafale ho feta bocheng; a ke a khutlele matsatsing a mahlahahlaha a hae a bocha.”—JOBO 33:25.

HA NTJA e shoa ka mor’a lilemo tse 10 kapa tse 20, ho ka etsahala hore e se e entse boholo ba lintho tseo ka tloaelo lintja li li etsang. E ka ’na eaba e se e hōlisitse malinyane, ea ngoanyapisa likatse, ea epela masapo haesitana le ho sireletsa mong’a eona. Empa ha motho a e-shoa ka mor’a lilemo tse 70 kapa tse 80, o fihletse ho honyenyane feela linthong tseo a ka beng a li entse. Haeba o ne a rata lipapali, e ka ’na eaba o ne a ipabola mofuteng o le mong kapa e ’meli feela ea tsona. Haeba o ne a rata ’mino, e ka ’na eaba o ne a ipabola ho bapaleng seletsa se le seng kapa tse peli feela sa ’mino. Haeba o ne a rata ho bua le batho ka lipuo tsa bona, e ka ’na eaba o ne a se a le phollatsi ho bueng lipuo tse peli kapa tse tharo. A ka be a thabetse ho hongata ho feta moo—ho kopana le batho, ho sibolla lintho tse ncha, le ho atamela haufi le Molimo—hafeela eba o ile a phela nako e teletsana.

U ka ’na ua ipotsa, ‘Ke hobane’ng ha Molimo a bōpile motho a e-na le kelello e ka thabelang lintho tse ngata hakaale ebe joale o mo ferekanya ka ho etsa hore a phele lilemo tse etsang hore a thabele lintho tse seng kae feela?’ Ha ho bonahale eka nako e khutšoanyane eo motho a e phelang e lumellana le tsela eo lintho li neng li reriloe ka eona pōpong. U ka boela ua ipotsa, ‘Ke hobane’ng ha Molimo a entse hore motho a be le litšoaneleho tse ntle tse kang toka le qenehelo, ebe ka nako e tšoanang o etsa hore a sekamele ho etseng bobe?’

Haeba u bona koloi e ntle e e-na le moo e khobehileng, na u etsa qeto ea hore e entsoe e khobehile joalo? Che ha ho joalo! Ha ho pelaelo hore u etsa qeto ea ho re, ‘Hase kamoo koloi ena e entsoeng kateng. E tlameha ebe e entsoe hantle, empa ka mor’a moo ha e-ba le motho ea e senyang.’ Hoa tšoana le ha re nahanisisa ka lefa la rōna le hlollang la bophelo, re ka etsa qeto ea hore tsela eo re phelang ka eona hona joale hase eo e neng e reriloe tšimolohong. Ho phela ha rōna nako e khutšoanyane le ho sekamela ha rōna ho etseng bobe ho tšoana le ho khobeha ha koloi. Ho hlakile hore ho na le motho ea sentseng lefa la moloko oa motho. Ke mang ea entseng seo? Bibele e fana ka bopaki bo kholisang bo supang motho a le mong feela.

Haeba moloko oa batho qalong o ne o le boemong ba ho phela ka ho sa feleng, ke mang ea neng a ka senya lefa leo la moloko oohle oa batho? E tlameha ebe e bile moholo-holo oa batho bohle, eo kaofela ha rōna re leng litloholo tsa hae. Haeba e ne e le motho e mong, a ka be a sentse feela karolo e itseng ea moloko oa batho—e leng leloko la hae. Ka hona, Bibele, e leng Lentsoe la Molimo, e lumellana le ’nete ena e hlakileng ha e re: “Sebe se ile sa kena lefatšeng ka motho a le mong [Adama, motho oa pele] le lefu la kena ka sebe, ’me kahoo lefu la namela ho batho bohle.” (Baroma 5:12) Mangolo a beha Adama molato ka ho senya lefa la rōna. Tšimolohong ho ne ho reriloe hore bophelo ba batho bo be joang?

Ho Utloisisa Morero oa Tšimolohong

Ha Bibele e re lefu “le kene lefatšeng,” seo se bontša hore moloko oa batho tšimolohong o ne o sa rereloa hore o shoe. Batho baa tsofala le ho shoa kahobane motho oa pele a ile a fetohela Molimo. Liphoofolo ka lehlakoreng le leng, li ne li sa rereloa hore li phele ka ho sa feleng.—Genese 3:21; 4:4; 9:3, 4.

Batho ba ne ba reretsoe hore ba fapane le liphoofolo. Re libōpuoa tse phahametseng liphoofolo, feela joalokaha mangeloi a re phahametse. (Baheberu 2:7) Ho fapana le liphoofolo, motho o entsoe ka “setšoantšo sa Molimo.” (Genese 1:27) Hape, ho fapana le liphoofolo, Bibele e re Adama ke “mora oa Molimo.” (Luka 3:38) Ka hona, re na le mabaka a utloahalang a ho lumela hore motho o ne a sa rereloa hore a tsofale a be a shoe. Molimo ha a shoe, ’me le bara ba hae o ne a sa ba bōpela hore ba shoe.—Habakuke 1:12; Baroma 8:20, 21.

Litlaleho tsa histori tsa batho ba qalong li fana ka kutloisiso e eketsehileng ka morero oa Molimo oa tšimolohong ka bophelo ba batho. Ka nako eo, batho ba ne ba phela lilemo tse makholo pele ba tsofala. Adama o phetse lilemo tse 930. Melokong e seng mekae ka mor’a oo, mora oa Noe, Sema, o ile a phela lilemo tse 600 feela, ’me setloholo sa Noe, Arpakshade, a phela lilemo tse 438.a (Genese 5:5; 11:10-13) Hamorao, Abrahama o ile a phela lilemo tse 175. (Genese 25:7) Ho bonahala phello ea sebe butle-butle e ile ea ama lilemo tseo batho ba li phelang, tsa ’na tsa fokotseha ha batho ba ntse ba suthela thōko le phetheho ea tšimolohong. Empa qalong motho o ne a etselitsoe hore a phele ka ho sa feleng. Ka hona, hoa utloahala hore motho a ipotse, ‘Na Molimo o ntse a batla hore batho ba thabele bophelo lefatšeng ka ho sa feleng?’

Ha Botsofali bo se bo le Sieo

Kaha Jehova Molimo o ile a bolela hore motho leha e le ofe ea sa mo mameleng o ne a tla lefella sebe sa hae ka lefu, ho bonahala litloholo tsohle tsa Adama li le boemong bo se nang tšepo. (Genese 2:17) Leha ho le joalo, Mangolo a bululetsoeng a ile a tšepisa hore ho na le motho ea neng a tla lefa tefo eo ho lopolla batho botsofaling. Rea bala: “Mo tloheleng hore a se ke a theohela ka sekoting! Ke fumane thekollo! Nama ea hae e ke e nchafale ho feta bocheng; a ke a khutlele matsatsing a mahlahahlaha a hae a bocha.” (Jobo 33:24, 25; Esaia 53:4, 12) Mona Bibele e fana ka tšepo e babatsehang—ea hore ho na le ea neng a tla lopolla batho botsofaling ka ho lefa thekollo!

Ke mang ea neng a ka lefa thekollo ee? Tefo e ne e le ka nģ’ane ho se ka rekoang ke chelete. Ha e bua ka batho ba sa phethahalang, Bibele e re: “Ha ho le ea mong oa bona eo ka mokhoa leha e le ofe a ka lopollang esita le mor’abo, kapa a fa Molimo thekollo bakeng sa hae . . . e le hore a ka ’na a phela ka ho sa feleng.” (Pesaleme ea 49:7-9) Leha ho le joalo, Jesu Kreste o ne a e-na le ho itseng ho bohlokoa ho feta chelete. Ha a le lefatšeng, o ne a e-na le bophelo bo phethahetseng hobane joaloka Mora oa Molimo, o ne a sirelelitsoe hore a se futse sebe sa Adama. Jesu o ile a re o ne a tletse ho tla “fana ka moea oa hae hore e be thekollo e le phapanyetsano bakeng sa ba bangata.” Ketsahalong e ’ngoe o ile a re: ‘Ke tlile e le hore ba ka ba le bophelo le hore ba be le bona bo le bongata.’—Matheu 20:28; Johanne 10:10.

Tšepo ea bophelo bo sa feleng e ne e le eona ntho e ka sehloohong eo Jesu a neng a ruta ka eona. Molateli oa hae ea tšepahalang, Petrose, o kile a re ho eena: “Ke uena ea nang le lipolelo tsa bophelo bo sa feleng.” (Johanne 6:68) Bibele e bolela’ng ha e bua ka bophelo bo sa feleng?

Bophelo bo sa Feleng

Baapostola ba Jesu ba ne ba lebeletse pele ho ea thabela bophelo bo sa feleng leholimong e le karolo ea ’Muso oa Jesu. (Luka 22:29; Johanne 14:3) Leha ho le joalo, Jesu o ne a atisa ho bua ka morero oa Molimo ka lefatše. (Matheu 5:5; 6:10; Luka 23:43) Ka hona, mehlolo eo Jesu a ileng a e etsa le lithuto tsa hae ka bophelo bo sa feleng li ne li tiisa hore tšepiso ea Molimo eo e neng e le khale e entsoe ka moprofeta Esaia e tla phethahala, ea ileng a ngola: “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.” (Esaia 25:8) Bophelo ba batho e ke ke ea hlola e e-ba ba lilemo tse ’maloa tse fetang ka potlako bocheng ebe ho latela lilemo tsa ho qala ho fokola le ho tsofala.

Lefatšeng le lecha la Molimo, ha batho ba tšepahalang ba fihla phethehong, ba tla thabela ho lokoloha botsofaling. Bibele e re: “Pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.” (Baroma 8:21) Ak’u nahane feela! Batho ba tla tsoela pele ho hlalefa le ho ba le phihlelo. Empa ha lilemo tse makholo li ntse li feta, matla a bona a bocha a ke ke a fela. Na u tla ba teng nakong eo?

U Tla Phela Halelele Hakae?

Ho latela Jesu, baahi ba lefatše ba tla fokotseha haholo ka lebaka la letsatsi la Molimo la kahlolo. (Matheu 24:21, 22) Jesu o itse: “Tsela e isang timetsong e pharaletse ebile e khōlō, ’me ba kenang ka eona ba bangata; athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.”—Matheu 7:13, 14.

E le hore u be har’a ba tla thabela bophelo bona bo sa feleng, u tlameha ho batla mohau oa Molimo. Ho batla ho tseba Molimo ke mohato oa pele oa bohlokoa. Jesu o ile a hlalosa: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete.” (Johanne 17:3) Ke ’nete hore ho hlokahala boiteko hore motho a tsebe Molimo hantle; empa boiteko boo boa putsa. Ka ho tšoanang, ho hloka boiteko hore motho a fumane chelete ea ho reka lijo letsatsi le leng le le leng. A tšoantša tsebo ea Molimo le lijo, Jesu o ile a fana ka khothatso ena: “Le se ke la sebeletsa lijo tse senyehang, empa le sebeletse lijo tse lulang ho isa bophelong bo sa feleng.” (Johanne 6:27) Ruri boiteko leha e le bofe boo re bo etsang ke ba bohlokoa bakeng sa ho fumana bophelo bo sa feleng.—Matheu 16:26.

Jesu o itse: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) Ka hona, hore na u tla phela halelele hakae ho itšetlehile ka hore na u arabela joang leratong la Molimo.

[Mongolo o botlaaseng ba leqephe]

[Ntlha e Qolotsoeng e leqepheng la 7]

Ka mor’a ho phela lilemo tse 80, motho o fihletse ho honyenyane feela linthong tseo a ka beng a li entse

[Ntlha e Qolotsoeng e leqepheng la 8]

Batho ba entsoe e le libōpuoa tse phahametseng liphoofolo

[Setšoantšo se leqepheng la 7]

Na koloi ee e entsoe e se e ntse e khobehile tjee?

[Setšoantšo se leqepheng la 8, 9]

Lentsoe la Molimo le re batho ba tla khutlela ‘matsatsing a mahlahahlaha a bona a bocha’