Bacha ba Nang le Bokamoso bo Sireletsehileng

MOAHLOLI ea neng a tsamaisa nyeoe e sa tsoa tšoaroa o ile a hlalosa tlōlo eo ea molao “e le e nyarosang le e ferolang libete joalokaha [qoso ea peto] leha e le efe e ka ho etsa.” Sehlopha sa bacha ba robeli ba lipakeng tsa lilemo tse 14 le 18, se ile sa lalla mosali oa mohahlauli sebakeng se ka hare-hare motseng oa London, sa mo hlekefetsa ka likamano tsa botona le botšehali ka makhetlo, joale sa ntan’o mo lahlela ka nōkeng e haufi le hoja mosali eo a ile a re o ne a ke ke a khona ho sesa. Ka ho utloahalang, ’mè oa mocha e mong ea neng a le teng moo o ile a bolela hore ha a bona seo mora oa hae a se entseng tlalehong ea litaba tsa TV, o ile a kula.

Ka masoabi, ketsahalo ena e bontša se etsahalang sechabeng kajeno. Bobatana bo fetohile tloaelo, ebang ke ketsong ea bonokoane, ntoeng ea lelapa kapa lintoeng tsa merabe tsa Balkans, tsa Afrika bohareng le bophirimela le tsa libakeng tse ling. Bacha ba hōlela har’a maemo a tjena, kapa hangata ba utloela ka ’ona. Ka hona, ha ho makatse hore ebe ba bangata ba tiile lipelo, ba bontša ho hloka “boikutlo bo mofuthu ba tlhaho,” ’me ke “ba hlokang boitšoaro.”—2 Timothea 3:3.

“Bohale bo Tšosang”

Ha moapostola oa Mokreste Pauluse a ne a ngolla Timothea, moholo-’moho le eena lengolo la bobeli, Roma e ne e le eona e busang lefatše. Bokhopo le bobatana li ne li tloaelehile mabaleng a boithabiso a Roma. Leha ho le joalo, Pauluse o ile a lemosa hore nakong e tlang, linako e ne e tla ba tseo ho leng “thata ho sebetsana le tsona.” (2 Timothea 3:1) Ka ho thahasellisang, lentsoe la Segerike le hlalosang linako tsena e le tseo ho leng “thata ho sebetsana le tsona” le kopanyelletsa khopolo ea ho ba ha bona ba “bohale bo tšosang.” Se ileng sa etsahala nakong ea tšebeletso ea Jesu ea lefatšeng lilemong tse ka holimo ho 30 pejana, se bontša se neng se ikarabella bakeng sa bo bong ba bokhopo ba nakong eo ea hae.

Jesu o ne a sa tsoa fihla ka sekepe lebōpong le ka bochabela la Leoatle la Galilea. Ha a hata lebōpong, o ile a teana le banna ba babeli. Ponahalo ea bona e hlaha le ho hooa ha bona li ile tsa hlakisa hore ho ne ho e-na le ho phoso ka ho feletseng ka bona. Ba ne ba le “bohale bo tšosang ka ho sa tloaelehang,” ha e le hantle, ba ne ba laoloa ke bademona.a Tletlebo ea bona e ne e e-tsoa ho meea e khopo e neng e laola liketso tsa bona tse mabifi. Banna bao ba ile ba tleroha: “Taba ea rōna le uena ke efe, Mora oa Molimo? Na u tlile mona ho tla re hlokofatsa pele ho nako e behiloeng?” Meea e khopo e neng e laola banna bao ba babeli e ne e tseba hantle hore Molimo o se a behile nako e tiisitsoeng ea ho phethahatsa kahlolo ea hae ho bademona. Seo se ne se tla bolela timetso ea bona ea ka ho sa feleng. Empa ho fihlela ka nako eo, ba ne ba tla sebelisa matla a bona a phahametseng motho ho hlohlelletsa pefo e mabifi. Banna ba babeli bao ba ile ba imolloa feela ke ketso ea Jesu ea mohlolo ea ho leleka bademona bao.—Matheu 8:28-32; Jude 6.

Ha batho ba kajeno, ho kopanyelletsa le bacha, ba itšoara ka tsela e hlaha, re etsa hantle ho hopola ketsahalo eo. Hobane’ng? Hobane lekholong lena la bo20 la lilemo, re tobane le kotsi e tšoanang, joalokaha Tšenolo, buka ea ho qetela ea Bibele, e hlalosa: “Ho malimabe lefatše le leoatle, hobane Diabolose o theohetse ho lōna, a halefile haholo, a tseba hore o na le nako e khutšoanyane.” (Tšenolo 12:12) Ka kōpo, hlokomela hore ho tlotlolloa hona ha Satane ho tsamaea le ‘bohale bo boholo’ kaha oa tseba hore nako ea hae e khutšoanyane.

Ho Hlaseloa

Joalokaha koranta ena e lula e bolela, ka 1914 Kreste Jesu o ile a behoa teroneng e le Morena oa ’Muso oa Molimo leholimong. Jesu o ile a nka khato ka potlako khahlanong le Satane, sera se seholo sa Molimo. Kahoo, Diabolose le bademona ba hae ba lelekiloe leholimong ’me joale ba lebisitse tlhokomelo ea bona mona lefatšeng. (Tšenolo 12:7-9) A lekanyelitsoe sebaka seo a ka fanang ka tšusumetso ho sona, Satane “o tsamaea joaloka tau e purumang, e batlang ho harola e mong.” (1 Petrose 5:8) Liphofu tsa hae tse fumanehang habonolo ke life? Na ha ho utloahale hore ka ho khetheha, e ne e tla ba batho ba hlokang phihlelo bophelong le likamanong tsa bona le batho? Kahoo, kajeno bacha ba fetohile bahlaseluoa ba Diabolose. Ka boholo ba ’mino oa bona le ho phehella ha bona boikhathollo, ba laoloa habonolo ke mothetsi enoa ea mano ea sa bonahaleng.—Baefese 6:11, 12.

Esita leha bacha ba leka ho etsa ntho e itseng e molemo bophelong, baa thatafalloa. Haesale ho tloha qetellong ea Ntoa ea II ea Lefatše, batho ba linaheng tse ngata tse ileng tsa angoa ke ntoa ba lekile ho itšelisa ka ho etsa hore malapa a bona a phele bophelo bo mabothobotho. Lintho tse bonahalang, boikhathollo bo se nang moeli le boithabiso li fetohile pakane e ka sehloohong. Ka lebaka leo, ba bangata ba bile le mathata. Pauluse o ile a lemosa Timothea: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi . . . Etsoe lerato la chelete ke motso oa mefuta eohle ea lintho tse kotsi, ’me ka ho hahamalla lerato lena ba bang . . . ba itlhabile hohle ka bohloko bo boholo.” (1 Timothea 6:9, 10) Ka kakaretso, re fumana sechaba sa kajeno sa batho ba amehileng ka lintho tse bonahalang se itlhabile ka bohloko ba moruo, ba lichelete le ba maikutlo. Har’a sona ho na le bacha ba bangata, bahlaseluoa ba leqheka lena la sera se seholo sa Molimo.

Leha ho le joalo, hoa thabisa hore ebe ho na le litaba tse monate. ’Me li ama bacha bao ka pel’a bona ho larileng bokamoso bo sireletsehileng. See se ka etsahala joang?

Batla ’me U Tla Fumana

Bacha ba bangata ba na le litekanyetso tse phahameng. Ba khesa mekhoa e ntseng e hlepha e tloaelehileng har’a batho ba baholo. Ba nyarosoa ke leeme le botho bo hlokang kutloelo-bohloko ba bo-ralipolotiki ba lapetseng puso le bo-rakhoebo. Haeba u mocha, mohlomong ke kamoo u ikutloang kateng.

Nahana ka Cedric, mohlankana ea seng a le haufi le ho ba lilemo tse 20 eo phihlelo ea hae e seng ea mohlolo.b Ha e sa le ngoana, o ne a tšaba lintho tse ngata, ho kopanyelletsa le ho tšaba ho shoa. O ne a ipotsa hore na morero oa bophelo ke ofe. A sa fumane likarabo lipotsong tsa hae ha a le lilemo li 15, o ile a lesa ho nahanisisa ka morero oa bophelo ka ho tloaelana le bacha ba bang ba nang le likhopolo tsa lefeela. Oa hopola: “Re ne re tsuba lithethefatsi ’me re lula re qoqa mocha-o-chele. Ke ne ke lumela hore motho e mong le e mong o nahana joaloka ’na, empa ho ne ho se ea nang le likarabo.”

Joaloka bacha ba bang, Cedric o ne a labalabela monyaka. Ha aa ka a khotsofatsoa feela ke ho sebelisa lithethefatsi. Ka potlako, o ile a kopanela bosholung le ho mokoleng lithethefatsi. Ho ntse ho le joalo, o ne a batla liphephetso tse ling. O ile a qala ho utsoetsa batho ba entseng liodara. Oa lumela: “Ke ne ke thabela ho etsa sena. Empa ha ho mohla ke neng ke utsoa ntho e itseng ho motho feela ea tloaelehileng. Haeba ke ne ke utsoitse koloi, ke ne ke e tlohela e le boemong bo botle. Haeba ke ne ke thuha khoebong e itseng, ke ne ke etsa joalo feela moo ke tsebang hore khoebo eo e sirelelitsoe ka inshorense. Seo se ne se nthusa hore ke lokafatse seo ke se entseng.” Joalokaha u ka lebella, Cedric o ile a qetella a le chankaneng.

Cedric oa hopola: “Mark, eo e neng e le motšoaruoa-’moho le ’na, o ile a buisana le ’na. Ha a hlokomela hore ke ne ke e-na le mongolo oa sefapano se seholo o cheselelitsoeng sephakeng sa ka, o ile a mpotsa hore na ke hobane’ng ha ke e-na le oona. O ne a nahana hore ke ntho eo ke e nkang e le ea bohlokoa bolumeling.” Libeke tse seng kae hamorao, Mark o ile a fa Cedric kopi ea buka ea U ka Phela ka ho sa Feleng Paradeiseng Lefatšeng.c “‘U ka Phela ka ho sa Feleng’—mantsoe ao a seng makae a ile a nkhahla hang-hang. Ke sona seo kamehla re neng re bua ka sona, empa ho ne ho se mohla re kileng ra fumana bonnete ba sona.” Ka mor’a hore a buisane ka makhetlo le e mong oa Lipaki tsa Jehova ea neng a etela chankaneng, Cedric o ile a hlokomela hore seo a neng a se labalabela se ne se ka finyelloa—empa, ka tsela ea Molimo feela.

Cedric oa hlokomela: “Ka mor’a ho khaotsa ho kopana le metsoalle ea ka ea pele, ke ile ka hatela pele ka potlako.” Khatelo-pele ea hae kutloisisong le ho fumaneng thabo ea sebele ha ea ka ea e-ba bonolo. O re: “Ke sa ntse ke ntlafatsa. Ke lokela ho ba seli ka seo ke se nahanang.” E, hona joale Cedric oa hlokomela hore ho ba le likhopolo tsa lefeela ho ile ha mo lebisa lerabeng la Diabolose, a nahana hore lipakane tsa hae li ne li ka finyelloa feela ka ho etsa lintho tse tletseng monyaka.

Hoa thabisa hore ebe e se e le nako e telele Cedric a tsoile chankaneng, ’me o thabela botsoalle ba kamehla le ba bang ba fumaneng seo ba neng ba se batla. Hona joale ke e mong oa Lipaki tsa Jehova ’me o bolella ba bang ka tšepo ea tsona ea ho phela Paradeiseng mona lefatšeng. O boetse o lebeletse ka thabo ha tšusumetso ea bosatane ka mefuta eohle ea eona e timetsoa.

Ke ’nete hore hase bacha ba kang Cedric feela ba nang le bokamoso bo sireletsehileng; ba bang ba hōlisitsoe ke batsoali ba tšabang Molimo ba ileng ba kenya lerato la ’nete ea Bibele baneng ba bona.

Koetliso ea Bomolimo ea Putsa

Morena Solomone oa boholo-holo o ngotse: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.” (Liproverbia 22:6) Sena se ipakile e le ’nete tabeng ea bacha ba bangata bao ka pelo eohle ba khethileng ho latela litekanyetso tsa Bibele.

Sheila, Gordon le Sarah ba entse sena. Baa hopola hore batsoali ba bona ba ile ba hatisa haholo bohlokoa ba ho mamela taelo ea Kreste ea ‘ho ea le ho etsa barutuoa’ ka ho bolela litaba tse molemo tsa ’Muso. (Matheu 24:14; 28:19, 20) Sheila oa hopola: “Qetong efe le efe e neng e lokela ho etsoa, ’na le ’Mè re ne re tloaetse ho botsana, ‘E tla ama mosebetsi oa ho bolela joang?’” Oa lumela: “Re ile ra tlohela merero e mengata ka lebaka la ho ipotsa potso ena,” ’me oa phaella, “leha ho le joalo, re bile le litlhohonolofatso tse kaakang!” Esita le qetellong ea matsatsi a malelele ao ba neng ba a qeta ba etela batho ka litaba tse molemo malapeng, Sheila le ’mè oa hae ba ne ba totobela hae ba bina. O re: “Thabo ea ka e ne e feletse. Ke sa e utloa le joale.”

Gordon o hopola linako tse ngata tse monate tsa mantsiboea a Meqebelo. Gordon oa hopola: “Ke ne ke memeloa malapeng a baholo ba phutheho, moo re neng re botsana lipotso le ho qoqa lintho tse ruisang molemo. Re ne re khothalletsoa ho tšoara litemana tsa Bibele ka hlooho, ho bua ka bolokolohi ka litaba tse ka Mangolong, ho pheta phihlelo ea boboleli le ho ithuta hore na mosebetsi oa ’Muso o hōla joang. Lintho tsena kaofela li ile tsa nthusa hore ke rale motheo o motle le ho hlaolela lerato ho Jehova Molimo.”

Sarah o hopola mantsiboea a thabisang a ha ba ne ba etetsoe ke Lipaki. “Re ne re e-ja hammoho. Joale, e le ho lihela likhala, re ne re letsa piano, re tsamaisana le ba neng ba bina lipina tsa ’Muso oa Molimo. Ka sebele ’mino o ile oa re thusa haholo, haholo-holo nakong ea ha re sa kena sekolo kaha o ne o etsa hore re etse lintho hammoho re le lelapa.”

Ke ’nete hore hase bacha bohle ba ratang ho thabisa Jehova ba leng maemong a matle a lelapa. Leha ho le joalo, ho ba haufi le malapa a mang a Lipaki ka phuthehong hoa ba sireletsa ’me ho etsa hore ba ikutloe hore ho na le moo ba amoheloang teng.

Nka Motheo o Sireletsehileng oa Bokamoso e le oa Bohlokoa

Kajeno bacha ba na le khetho. Ba ka ’na ba tsoela pele le lefatše lena le khopo ha le tsubella timelong, ‘matšoenyehong a maholo’ a tlang ao Jesu a hlileng a bua ka ’ona. Kapa, joalokaha mopesaleme ea bululetsoeng Asafe a ile a bina, ba “itšepele Molimo . . . ’me ba boloke litaelo tsa oona.” Ho mamela Molimo ho tla ba thibela ho ba “moloko o ikhantšang, o hanyetsang, moloko o sa kang oa tsamaea ka pelo e tiileng, oo moea oa oona o sa kang oa tšepeha ho Molimo.”—Matheu 24:21; Pesaleme ea 78:6-8.

Liphuthehong tsa Lipaki tsa Jehova tse ka holimo ho 80 000 lefatšeng ka bophara, u tla fumana bacha ba bangata bao u ka khahloang ke bona. Ba etse hloko keletso ea Pauluse ho Timothea e monyenyane ea “hore ba sebetse se molemo, hore ba rue mesebetsing e metle, hore ba be seatla se bulehileng, ba itokisetse ho arolelana, ba ipolokele ka mokhoa o sireletsehileng motheo o motle bakeng sa ka moso.” Ka lebaka leo, hona joale ba ‘tšoere ka tieo bophelo ba sebele.’ (1 Timothea 6:18, 19) Fumana ho eketsehileng ka Bakreste bana ba ’nete ka ho kopanela libokeng tsa bona. Joale, le uena u ka ba le tšepo ea bokamoso bo sireletsehileng.

[Mongolo o botlaaseng ba leqephe]

[Setšoantšo se leqepheng la 7]

Meea e khopo e ne e le eona e susumetsang banna ba neng ba le “bohale bo tšosang ka ho sa tloaelehang” bao Jesu a ileng a ba phekola

[Setšoantšo se leqepheng la 8]

Ho rala “motheo o motle bakeng sa ka moso”