’Mōpi oa Rōna e Moholo le Mesebetsi ea Hae
LI KHŌLŌ hakaakang! Liphororo tse hoasang tsa Iguaçú kapa Niagara, likhohlo tse khōlō tsa Arizona kapa Hawaii, likou tse khōlō tsa leoatle tsa Norway kapa New Zealand—limaka tsena tsa tlhaho li ntša mohoo o moholo hakaakang oa tlhompho! Empa na ke lintho tse bileng teng ka kotsi tsa ho bitsoang Matla a Tlhaho a Mohloli oa Bophelo? Che, ke ho hongata ho feta hoo! Ke mesebetsi e susumetsang tšabo ea ’Mōpi e Moholo, Ntate ea lerato oa leholimo eo Morena Salomone ea bohlale a ngotseng ka eena: “O entse tsohle li le ntle nakong ea tsona; o bile o beile lefatše lohle pel’a bona hore ba lemohe litaba tsa lona; leha ho le joalo, ha ho motho ea utloisisang mesebetsi e entsoeng ke Molimo, ho qala qalong ea eona ho isa qetellong ea eona.” (Moeklesia 3:11) Kannete, ho ne ho tla nka batho nako e sa feleng hore ba batlisise mesebetsi eohle e khanyang eo ka eona ’Mōpi oa rōna a e tlatsitseng bokahohle.
Re na le ’Mōpi e Moholo hakaakang! ’Me re thaba hakaakang hore ebe Molimo enoa ea matla ’ohle “mehleng ena ea qetello o buile le rōna ka Mora, eo o ’meileng mojalefa oa ntho tsohle, eo hape o entseng ka eena tse bōpiloeng kaofela.” (Ba-Heberu 1:2) Mora enoa, Jesu Kreste, o ile a ananela lintho tse ratehang tsa pōpo ea Ntate oa hae. O ile a bua ka tsona khafetsa ha a tšoantšisa merero ea Ntate oa hae leha a bua mantsoe a khothatsang ho bamameli ba hae. (Mattheu 6:28-30; Johanne 4:35, 36) “Ka tumelo” ba bangata ba ile ba utloisisa hore lintho tse tsotehang tsa pōpo “li bōpiloe ke lentsoe la Molimo.” (Ba-Heberu 11:3) Bophelo ba rōna ba letsatsi ka leng bo lokela ho bontša tumelo e joalo.—Jakobo 2:14, 26.
Pōpo ea Molimo oa rōna e khōlō ruri. E bontša ka ho tsotehang bohlale ba hae, matla a hae, ho loka ha hae, le lerato la hae. Ka mohlala, o ile a sekamisa lefatše la rōna ’me a etsa hore le potolohe letsatsi e le hore pōpo ea hae ea nako e tlang, motho, e ka thabela tatellano e thabisang ea linako tsa selemo. Molimo o ile a re: “Lefatše ha le sa ntse le le teng, ho jala le ho kotula, mohatsela le mofuthumela, lehlabula le mariha, bosiu le motšehare li ke ke tsa hlokahala.” (Genese 8:22) Ho feta moo, Molimo o ile a hlomella lefatše la rōna ka liminerale tse ngata tsa bohlokoa. Ka ho khetheha, o ile a fana ka metsi a mangata, ao hamorao e neng e tla ba ntho ea bohlokoa le e tšehetsang bophelo bohle ba lefatšeng.
Ka tatellano e hlophisehileng ea ‘matsatsi a pōpo’ a tšeletseng, le le leng le le bolelele ba lilemo tse sekete, “matla a Molimo a sebetsang” a ile a tsoela pele ho lokisa lefatše bakeng sa ho lula ha motho. Leseli leo re bonang ka lona, moea oo re o phefumolohang, lefatše le ommeng leo re phelang ho lona, lijalo, tatellano ea letsatsi le bosiu, litlhapi, linonyana, liphoofolo—tsohle li ile tsa etsoa ka tatellano e hlophisehileng ke ’Mōpi oa rōna e Moholo bakeng sa hore li sebelisoe le ho thabeloa ke motho. (Genese 1:2-25, NW) Ka sebele, re ka kopanela le mopesaleme ha a re: “Jehova, mesebetsi ea hao e mengata hakaakang! U e entse kaofela ka bohlale; lefatše le tletse matlotlo a hao.”—Pesaleme ea 104:24.
Pōpo ea Molimo e Tsoileng Matsoho
Ha “letsatsi” la botšelela la pōpo le se le ea ho fela, Molimo o ile a etsa monna eaba joale o bōpa le mothusi oa hae, mosali. Ke tlhōrō ea mosebetsi oa setsebi pōpong ea lefatše, e tsotehang haholo ho feta pōpo eohle e bonahalang e tlileng pele! Pesaleme ea 115:16 ea re tsebisa: “Ha e le maholimo, ke maholimo a Jehova, ’me lefatše o le neile bana ba batho.” Ka lebaka leo, Jehova o entse rōna liphefumolohi tse batho e le hore re ka thabela le ho sebelisa pōpo ea hae ea pele e lefatšeng. Re lokela ho leboha hakaakang bakeng sa mahlo a rōna—a rarahaneng ho feta k’hamera e entsoeng hantle ka ho fetisisa—a ka kenyang ka kelellong lefatše le mebala-bala e re pota-potileng! Re na le litsebe—tse sebetsang hantle ho feta sesebelisoa leha e le sefe sa molumo se entsoeng ke motho—ho re thusa ho thabela moqoqo, ’mino, le pina e monate ea linonyana. Re na le sesebelisoa sa ho bua se haheletsoeng ho rōna, ho akaretsa le leleme le etsang lintho tse ngata. Lisele tsa leleme tsa tatso, li kopantsoe le setho sa rōna sa kutlo sa ho nkha, li fana ka thabo ea ho latsoa le ho nkha monkho oa lijo tse fapaneng tse se nang palo. ’Me re ananela hakaakang ho angoa ke letsoho ho lerato! Ka sebele re ka leboha ’Mōpi oa rōna, joalokaha ho entse mopesaleme ea itseng: “Ke o boka ka baka la mohlolo oa pōpeho ea ka. Mesebetsi ea hao ea makatsa, moea oa ka o tseba teng haholo-holo.”—Pesaleme ea 139:13, 14.
Mosa o Lerato oa ’Mōpi oa Rōna
Mopesaleme o ngotse: “Lebohang Jehova, hobane o molemo . . . ; ho eena Moetsi oa lintho tse tsotehang le tse khōlō: hobane mosa oa hae o lerato ke oa ka ho sa feleng.” (Pesaleme ea 136:1-4, NW) Mosa oo o lerato joale o mo susumeletsa ho etsa lintho tse ling tse tsotehang tse khōlō ho feta pōpo eohle eo re sa tsoa e hlalosa. E, esita leha a phomotse ho bōpeng lintho tse bonahalang, oa bōpa tekanyong ea moea. O etsa hona ho arabela phephetso e lonya e tobisitsoeng ho eena. Joang?
Monna oa pele le mosali ba ile ba behoa paradeiseng e ntle, Edene. Leha ho le joalo, lengeloi la lerabele, Satane, le ile la iketsa molimo ’me la lebisa batho bao ba babeli ho fetoheleng Jehova. Ka ho loketseng, Molimo o ile a ba ahlolela lefu, ka phello ea hore bana ba bona, e leng moloko oohle oa batho, o tsoaloe o le boemong ba sebe, ba ho shoa. (Pesaleme ea 51:5) Tlaleho ea Bibele e amang Jobo e bontša hore Satane o ile a phephetsa Molimo, a bolela hore ha ho motho ea ka bolokang botšepehi ho Eena tlas’a teko. Empa Jobo o ile a paka Satane e le ea leshano haholo, joalokaha ho entse bahlanka ba bang ba bangata ba tšepahalang ba Molimo linakong tsa Bibele le ba mehleng ea rōna. (Jobo 1:7-12; 2:2-5, 9, 10; 27:5) Joaloka motho ea phethahetseng, Jesu o ile a beha mohlala o ke keng oa lekanngoa oa ho boloka botšepehi.—1 Petrose 2:21-23.
Ka hona, Jesu o ne a ka re, “Morena oa lefatše lena [Satane] ha a na letho ho ’na.” (Johanne 14:30) Leha ho le joalo, ho fihlela kajeno “lefatše lohle le rapaletse ka tlase ho e mobe.” (1 Johanne 5:19) Ka mor’a ho hana ho lokela ha borena ba Jehova, Satane o filoe lilemo tse ka bang 6 000 ho bontša haeba bobusi ba hae ho batho bo ka atleha. O hlōlehile ka ho soabisang hakaakang, joalokaha maemo a mpefalang a lefatše a tsoela pele ho paka! Molimo oa rōna ea lerato, Jehova, haufinyane o tla tlōsa mokhatlo oa lefatše lena o senyehileng, a bontša ho lokela ha borena ba hae holim’a lefatše. Hoo ho tla tlisa tokoloho e thabisang hakaakang ho batho ba lakatsang puso ea khotso le ea ho loka!—Pesaleme ea 37:9-11; 83:17, 18.
Leha ho le joalo, hoo hase phetho! Mosa o lerato oa Molimo o tla bontšoa ka ho eketsehileng motheong oa mantsoe a Jesu a ho Johanne 3:16: “Molimo o ratile lefatše [la batho] hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” Ho khutlisetsoa hona ha batho boemong ba pele ba tebello ea bophelo bo sa feleng lefatšeng ho akareletsa ho bōptjoa ha lintho tse ncha. Lintho tseo ke life? Li tsoela batho ba bobolang molemo joang? Sehlooho sa rōna se latelang se tla bolela.