Ho Ithuta ho Fumana Thabo Tšabong ea Jehova
“Tloong, lōna bara ba ka, le ’mamele; ke tla le ruta ho tšaba Jehova.”—PESALEME EA 34:11.
1. ’Muso oa Molimo o tla tlosa tšabo joang, empa na hoo ho bolela tšabo eohle?
HOHLE batho ba laba-labela ho lokoloha tšabong—tšabo ea tlōlo ea molao le pefo, tšabo ea ho hloka mosebetsi, tšabo ea ho kula ho tebileng. Leo e tla ba letsatsi le leholo hakaakang ha tokoloho eo e ba ntho ea sebele tlas’a ’Muso oa Molimo! (Esaia 33:24; 65:21-23; Mikea 4:4) Leha ho le joalo, hase tšabo eohle e tla tlosoa ka nako eo, leha e le hore re lokela ho batla ho suthisa tšabo eohle bophelong ba rōna hona joale. Ho na le tšabo e ntle le tšabo e mpe.
2. (a) Tšabo e mpe ke ea mofuta ofe, hona e lakatsehang ke ea mofuta ofe? (b) Tšabo ea bomolimo ke eng, hona mangolo a boletsoeng a bontša seo joang?
2 Tšabo e ka ba chefu ea kelello, e holofatsang matla a motho a ho nahana. E ka fokolisa sebete le ho senya tšepo. Tšabo e joalo e ka ba teng ho motho ea sokeloang ka ho hlaseloa ke sera. (Jeremia 51:30) E ka ’na ea ba teng ho motho ea nkang hore ho amoheloa ke batho ba bang ba itseng ba nang le tšusumetso ke eona ntho ea bohlokoahali. (Liproverbia 29:25) Empa ho boetse ho na le tšabo ea mofuta o loketseng, e re thibelang ho etsa ntho leha e le efe e bontšang ho se tsotelle, ho intša kotsi. Tšabo ea bomolimo e akarelletsa se fetang moo. Ke tšabo e nang le tlhompho ho Jehova, tlhompho e tebileng e tsamaisanang le tšabo e loketseng ea ho se rate ho etsa lintho tse sa mo thabiseng. (Pesaleme ea 89:7) Tšabo ena ea ho se rate ho etsa lintho tse sa thabiseng Molimo e tsoa ho ananeleng mosa oa hae o lerato le molemo oa hae. (Pesaleme ea 5:7; Hosea 3:5) E boetse e akarelletsa ho hlokomela hore Jehova ke Moahloli e Moholo le Ea Matla ’Ohle, ea nang le matla a ho fana ka kotlo, esita le lefu, ho ba sa mo mameleng.—Ba-Roma 14:10-12.
3. Tšabo ea Jehova e bapisoa joang le e amanang le melimo e meng ea bohetene?
3 Tšabo ea bomolimo e molemo, hase e tšosang. E susumelletsa motho ho ba ea tiileng bakeng sa se nepahetseng, eseng hore a sekisetse ka ho etsa phoso. Ha e tšoane le tšabo e amanang le molimo oa boholo-holo oa Magerike Phobos, ea hlalosoang e le molimo ea tšabehang ea susumetsang tšabo. Hape hase tšabo e tšoanang le e amanang le Kali, molimo oa mosali oa Hindu, eo ka linako tse ling a tšoantšetsoang e le ea nyoretsoeng mali, ea sebelisang litopo, linoha, le mahata e le mekhabiso. Tšabo ea bomolimo ea hohela; ha e leleke. E lohellane le lerato le kananelo. Kahoo, tšabo ea bomolimo e re hulela ho Jehova.—Deuteronoma 10:12, 13; Pesaleme ea 2:11.
Lebaka Leo ba Bang ba Nang le Eona ’me ba Bang ba se na Eona
4. Joalokaha moapostola Pauluse a bontšitse, moloko oa batho o fihlile boemong bofe, hona ke eng e ikarabellang ho see?
4 Moloko oa batho ka kakaretso ha o susumetsoe ke tšobotsi ena ea tšabo ea bomolimo. Ho Ba-Roma 3:9-18, moapostola Pauluse o hlalosa kamoo batho ba khelohileng phethehong ea pele kateng. Ka mor’a ho bolela hore bohle ba tlas’a sebe, Pauluse o qotsa ho Lipesaleme, a re: “Ha ho ea lokileng, leha a le mong.” (Bona Pesaleme ea 14:1.) Joale o fana ka makolopetso ka ho bolela lintho tse kang ho se tsotelle ha moloko oa batho ho batla Molimo, ho haelloa ha bona ke mosa, puo ea bona e mano, mahlapa le tšollo ea mali. Seo se hlalosa lefatše ka ho nepahetseng hakaakang kajeno! Batho ba bangata ha ba thahaselle Molimo le merero ea hae. Ponahalo leha e le efe ea mosa hangata e behetsoe linako tse itseng moo motho a tla fumana ho itseng ka eona. Leshano le puo e litšila li tloaelehile. Tšollo ea mali ha e bontšoe feela litabeng empa hape le boithabisong. Ke’ng se ikarabellang bakeng sa boemo bo joalo? Ke ’nete hore bohle re litloholo tsa moetsalibe Adama, empa ha batho ba amohela lintho tseo moapostola Pauluse a li hlalositseng mona e le tsela ea bona ea bophelo, ho ameha ho eketsehileng ho feta moo. Temana ea 18 e hlalosa hore na ke eng, ha e re: “Ho tšaba Molimo ha ho eo pel’a mahlo a bona.”—Bona Pesaleme ea 36:1.
5. Ke hobane’ng ha batho ba bang ba e-na le tšabo ea bomolimo, ha ba bang ba se na eona?
5 Leha ho le joalo, ke hobane’ng ha batho ba bang ba na le tšabo ea bomolimo, ha ba bang ba se na eona? Ka mantsoe a bonolo feela, ke hobane batho ba bang baa e hlaolela, ha ba bang ba sa e hlaolele. Ha ho lea mong oa rōna ea hlahileng a e-na le eona, empa kaofela ha rōna re na le matla a ho e hlaolela. Tšabo ea bomolimo ke ntho eo re tlamehang ho ithuta eona. Joale, hore e tle e be tšusumetso e matla bophelong ba rōna, ho hlokahala re e hlaolele.
Memo e Ipiletsang
6. Ke mang ea re atolosetsang memo e tlalehiloeng ho Pesaleme ea 34:11, hona temana ee e bontša joang hore tšabo ea bomolimo e tlameha ho ithutoa?
6 Memo e ipiletsang ea ho ithuta tšabo ea Jehova e atolosetsoa ho rōna ho Pesaleme ea 34. Ena ke pesaleme ea Davida. ’Me Davida o ne a tšoantšetsa mang? Ha ho e mong haese Morena Jesu Kreste. Boprofeta boo moapostola Johanne a ileng a bo sebelisa ka ho khetheha ho Jesu bo tlalehiloe temaneng ea 20 ea pesaleme ena. (Johanne 19:36) Mehleng ea rōna, Jesu ke eena ea atolosang memo e tšoanang le e temaneng ea 11: “Tloong, lōna bara ba ka, le ’mamele; ke tla le ruta ho tšaba Jehova.” Ka ho hlakileng sena se bontša hore tšabo ea bomolimo ke ntho e ka ithutoang, ’me Jesu Kreste o tšoaneleha hantle haholo ho re ruta. Ke hobane’ng ha ho le joalo?
7. Ke hobane’ng ha tšabo ea bomolimo e tlameha ho ithutoa ho Jesu ka ho khetheha?
7 Jesu Kreste o tseba bohlokoa ba tšabo ea bomolimo. Ka eena Ba-Heberu 5:7 (NW) e re: “Mehleng ea nama ea hae Kreste o ile a nehelana ka lithapelo le likōpo ho Ea neng a ka khona ho mo pholosa lefung, ka mehoo e meholo le meokho, ’me o ile a utluoa ka mokhoa o amohelehang ka lebaka la tšabo ea hae ea bomolimo.” Tšabo e joalo ea bomolimo e ne e le tšobotsi eo Jesu Kreste a ileng a e bontša le pele a talimana le lefu thupeng ea tlhokofatso. Hopola, ho Liproverbia khaolong ea borobeli, Mor’a Molimo o hlalosoa e le mothofatso ea bohlale. ’Me ho Liproverbia 9:10, rea bolelloa: “Qalo ea bohlale ke ho tšaba Jehova.” Ka hona, tšabo ena ea bomolimo e ne e le karolo ea motheo ea botho ba Mor’a Molimo nako e telele pele a e-tla lefatšeng.
8. Ho Esaia 11:2, 3, re ithuta eng ka tšabo ea Jehova?
8 Ho feta moo, mabapi le Jesu joaloka Morena oa Bomessia, Esaia 11:2, 3 e re: “Moea oa Jehova o tla lula holim’a hae, moea oa bohlale le oa kelello, moea oa keletso le oa matla, moea oa ho tseba le oa ho tšaba Jehova. O tla thabela ho tšaba Jehova.” Seo se hlalosoa hantle hakaakang! Ho tšaba Jehova ke ntho e thabisang. Ho molemo ebile hoa haha. Ke tšobotsi e tla tlala hohle ’musong oo Kreste a tla busa joaloka Morena ho oona. Oa busa hona joale, ’me ho bohle ba bokelloang joaloka bafo ba hae, o fana ka taeo ea ho tšaba Jehova. Joang?
9. Jesu Kreste o re ruta tšabo ea Jehova joang, hona o rata hore re ithute eng ka eona?
9 Ka liboka tsa rōna tsa phutheho, ka likopano tse nyenyane le tse khōlō, Jesu, joaloka Hlooho ea phutheho e khethiloeng le Morena oa Bomessia, o re thusa ho utloisisa ka ho hlakileng seo tšabo ea bomolimo e leng sona le hore na ke hobane’ng ha e le molemo hakana. Ka hona o ikemiselitse ho re thusa ho tebisa kananelo ea rōna bakeng sa tšabo ea Jehova e le hore re tle re ithute ho fumana thabo ho eona joaloka eena.
Na U Tla Etsa Boiteko?
10. Ha re le libokeng tsa Bokreste, re tlameha ho etsa eng hore re tle re utloisise tšabo ea Jehova?
10 Ka ho hlakileng, ho bala ha rōna Bibele feela kapa ho ba teng libokeng Holong ea ’Muso ho ke ke ha tiisa hore re tla ba le tšabo ea bomolimo. Hlokomela seo re lokelang ho se etsa hore re tle re hle re utloisise tšabo ea Jehova. Liproverbia 2:1-5 e re: ‘Mora oa ka, etlere ha u amohela litaba tsa ka, ’me u ipolokela melao ea me ka ho uena, u e sekehela tsebe, ’me u lebisa pelo ea hao kutloisisong, ke re, ha u ka bitsa masene, ua hooeletsa kutloisiso, ua e batla joalo ka silefera, ua e rafa joalo ka matlotlo a patiloeng mobung; ke moo u tla tseba ho tšaba Jehova, u fihlele tsebo ea Molimo.’ Ka hona, ha re e-ea libokeng ho hlokahala hore re mamelisise se boleloang, re ikitlaetse ka matla ho tsepamisa mohopolo le ho hopola lintlha tsa sehlooho, re nahana ka ho teba ka kamoo tsela eo re ikutloang ka eona ka Jehova e lokelang ho susumetsa boikutlo ba rōna mabapi le keletso e fanoang—e, re bule lipelo tsa rōna. Joale re tla utloisisa ho tšaba Jehova.
11. Hore re hlaolele tšabo ea bomolimo, re lokela ho etsa eng ka tieo le hona khafetsa?
11 Pesaleme ea 86:11 (NW) e boetse e re hlokomelisa ka tšobotsi e ’ngoe ea bohlokoa, ea thapelo. Mopesaleme o ile a rapela: “Nthute, Uena Jehova, mabapi le litsela tsa hao. Ke tla tsamaea ’neteng ea hao. Momahanya pelo ea ka hore e tšabe lebitso la hao.” Jehova o ile a amohela thapelo eo, hobane o entse hore e ngoloe ka Bibeleng. Hore re hlaolele tšabo ea bomolimo, ho hlokahala hore le rōna re rapelle thuso ea Jehova, ’me re tla rua molemo ka ho rapela ka tieo le hona khafetsa.—Luka 18:1-8.
Pelo ea Hao E-ea Ameha
12. Ke hobane’ng ha pelo e lokela ho fuoa tlhokomelo e khethehileng, ’me hoo ho akarelletsa eng?
12 Ho na le se seng hape seo re tlamehang ho se hlokomela ho Pesaleme ea 86:11. Mopesaleme o ne a sa kōpe feela kutloisiso ea kelello ea ho tšaba Molimo. O bolela pelo ea hae. Ho hlaolela tšabo ea bomolimo ho akarelletsa pelo ea tšoantšetso, e hlokang tlhokomelo e khethehileng hobane ke motho ea ka hare joalokaha a bonahatsoa mesebetsing eohle ea rōna ea bophelo ’me e akarelletsa menahano ea rōna, boikutlo ba rōna, litakatso tsa rōna, lintho tse re susumetsang le lipakane tsa rōna.
13. (a) Ke eng e ka bontšang hore pelo ea motho e arohane? (b) Ha re hlaolela tšabo ea bomolimo, re lokela ho sebetsa re habile pakane efe?
13 Bibele e re lemosa hore pelo ea motho e ka arohana. E ka ba mano. (Pesaleme ea 12:2; Jeremia 17:9) E ka ’na ea re susumelletsa ho kopanela mesebetsing e metle—ho ea libokeng tsa phutheho le ho tsoela tšebeletsong ea tšimo—empa e ka boela ea rata litšobotsi tse itseng tsa tsela ea lefatše ea bophelo. Hona ho ka ’na ha re sitisa ho ntšetsa pele lithahasello tsa ’Muso ka moea oohle. Joale eona pelo eo e mano e ka ’na ea leka ho re susumelletsa ho lumela hore ha e le hantle re etsa ho hoholo joaloka ba bang. Kapa mohlomong sekolong kapa mosebetsing oa rōna oa boipheliso, pelo e ka susumetsoa ke ho tšaba motho. Ka lebaka leo, libakeng tse joalo re ka ’na ra tsila-tsila ho itsebahatsa joaloka Lipaki tsa Jehova ’me re ka ba ra ’na ra etsa le lintho tse sa lokelang bakeng sa Bakreste. Leha ho le joalo, ka mor’a moo, letsoalo la rōna lea re khathatsa. Ha re batle ho ba batho ba mofuta o joalo. Ka hona, hammoho le mopesaleme re rapela Jehova: “Momahanya pelo ea ka hore e tšabe lebitso la hao.” Re batla hore botho bohle ba ka hare joalokaha bo bonahatsoa mesebetsing eohle ea rōna ea bophelo, bo fane ka bopaki ba hore re ‘tšaba Molimo oa ’nete le hore re boloka litaelo tsa hae.’—Moeklesia 12:13.
14, 15. (a) Ha a bolela esale pele ka ho tsosolosoa ha Iseraele botlamuoeng Babylona, Jehova o ile a tšepisa ho fa batho ba hae eng? (b) Jehova o ile a etsa eng mabapi le ho kenya tšabo ea Molimo lipelong tsa batho ba hae? (c) Ke hobane’ng ha Iseraele e ile ea furalla litsela tsa Jehova?
14 Jehova o tšepisitse hore o ne a tla neha batho ba hae pelo e joalo e tšabang Molimo. O ile a bolela esale pele ka ho tsosolosoa ha Iseraele ’me a re, joalokaha re bala ho Jeremia 32:37-39: “Ke tla ba busetsa nģalong ena, ke ba ahise ka boiketlo. E tla ba sechaba sa ka, ’na ke be Molimo oa bona. Ke tla ba nea pelo e le ’ngoe le mokhoa o le mong oa ho ntšaba ka mehla, ba tle ba be le lehlohonolo, bona le bana ba bona ka mora’ bona.” Temaneng ea 40 tšepiso ea Molimo ea tiisoa: “Ke tla bea tšabo ea ka lipelong tsa bona, ba tle ba se ke ba nkoenehela.” Ka 537 B.C.E., Jehova o hlile a ba khutlisetsa Jerusalema joalokaha a ne a tšepisitse. Empa ho thoe’ng ka tšepiso eo kaofela—ea hore o ne a tla ba neha ‘pelo e le ’ngoe e le hore ba mo tšabe ka mehla’? Ke hobane’ng ha sechaba sa boholo-holo sa Iseraele se ile sa furalla Jehova ka mor’a hore a se late Babylona, moo phello e bileng ho timetsoa ha tempele ea sona ka 70 C.E., hoo e sa kang ea hahuoa hape le ka mohla?
15 Hona e ne e se ka lebaka la ho hlōleha leha e le hofe ka lehlakoreng la Jehova. Ka sebele, Jehova o ile a nka mehato ea ho kenya tšabo ea Molimo lipelong tsa batho ba hae. Ka mohau oo a o bontšitseng ha a ba lokolla Babylona le ho ba khutlisetsa naheng ea habo bona, o ile a ba neha mabaka ’ohle a ho mo talima ka tlhompho e nang le tšabo e tebileng. Molimo o ile a hatisa seo sohle ka likhopotso, likeletso le khalemelo ka baprofeta Haggai, Zakaria le Malakia; le ka Esdrase ea ileng a romeloa ho bona joaloka tichere; ka ’Musisi Nehemia; le ka Mora oa Molimo ka boeena. Ka linako tse ling batho ba ile ba mamela. Ba ile ba etsa joalo ha ba tsosolosa tempele ea Jehova ho latela kōpo ea Haggai le Zakaria, leha ba ne ba leleka basali ba balichaba mehleng ea Esdrase. (Esdrase 5:1, 2; 10:1-4) Empa ka makhetlo a mangata ba ne ba sa mamele. E ne e se ba tsitsitseng mabapi le ho ela hloko; ha baa ka ba tsoela pele ho amohela keletso; ha baa ka ba boloka lipelo tsa bona li bulehile. Baiseraele ba ne ba sa hlaolele tšabo ea bomolimo, ’me ka lebaka leo, e ne e se tšusumetso e matla bophelong ba bona.—Malakia 1:6; Mattheu 15:7, 8.
16. Jehova o kentse tšabo ea bomolimo lipelong tsa bo-mang?
16 Leha ho le joalo, tšepiso ea Jehova ea ho kenya tšabo ea bomolimo lipelong tsa batho ba hae ha e ea ka ea hlōleha. O ile a etsa selekane se secha le Iseraele oa moea, e leng Bakreste bao a ba nehileng tšepo ea leholimo. (Jeremia 31:33; Ba-Galata 6:16) Ka 1919, Molimo o ile a ba ntša botlamuoeng ba Babylona e Moholo, ’muso oa lefatše oa bolumeli ba bohata. Lipelong tsa bona o kentse ho mo tšaba ka ho tiileng. Sena se ba tliselitse litlhohonolofatso tse enneng bona le ba “bongata bo boholo,” bo nang le tšepo ea bophelo e le bafo ba lefatšeng ba ’Muso. (Jeremia 32:39; Tšenolo 7:9) Tšabo ea Jehova e kene le lipelong tsa bona.
Kamoo Tšabo ea Bomolimo e Kenngoang ka Lipelong Tsa Rōna
17. Jehova o kentse tšabo ea bomolimo lipelong tsa rōna joang?
17 Jehova o kentse tšabo ee ea bomolimo ka lipelong tsa rōna joang? Ka tšebetso ea moea oa hae. Hona re na le eng eo e leng tholoana ea moea o halalelang? Bibele, Lentsoe le bululetsoeng la Molimo. (2 Timothea 3:16, 17) Ka seo a se entseng nakong e fetileng, ka ho sebelisana le bahlanka ba hae hona joale phethahatsong ea Lentsoe la hae la boprofeta, le ka boprofeta ba lintho tse tlang, Jehova o fana ka motheo o tiileng bakeng sa hore kaofela re hlaolele tšabo ea bomolimo.—Joshua 24:2-15; Ba-Heberu 10:30, 31.
18, 19. Likopano tse khōlō le tse nyenyane, le liboka tsa phutheho li re thusa joang ho fumana tšabo ea bomolimo?
18 Ho thahasellisang ke hore, joalokaha ho tlalehiloe ho Deuteronoma 4:10, Jehova o ile a re ho Moshe: “Mphuthele sechaba, ke tle ke se utloise mantsoe a ka, hore ba tle ba ithute ho ntšaba ka matsatsi ’ohle a ho phela ha bona lefatšeng, ’me ba rute bana ba bona.” Ka ho tšoanang kajeno, Jehova o entse litokisetso tse ngata ho thusa batho ba hae hore ba ithute ho mo tšaba. Likopanong tse khōlō le tse nyenyane, le libokeng tsa phutheho, re pheta bopaki ba mosa o lerato oa Jehova le molemo oa hae. Ke seo re neng re se etsa ha re ithuta buka Motho e Moholo ka ho Fetisisa ea Kileng a Phela. Thuto eo e ile ea u ama joang uena le boikutlo ba hao ka Jehova? Joalokaha u hlokometse litšobotsi tse sa tšoaneng tsa botho bo phahameng ba Ntate oa rōna oa leholimo tse bonahetseng ho Mora oa hae, na ha lia ka tsa matlafatsa takatso ea hao hore le ka mohla u se etse lintho tse sa thabiseng Molimo?—Ba-Kolosse 1:15.
19 Libokeng tsa rōna, re boetse re ithuta ka litlaleho tsa ho pholosa ha Jehova batho ba hae linakong tse fetileng. (2 Samuele 7:23) Ha re ithuta buka ea Bibele ea Tšenolo ka thuso ea buka Tšenolo—Tlhōrō ea Eona e Hlollang ka Botle e Haufi!, re ithuta ka lipono tsa boprofeta bo seng bo phethahalitsoe lekholong lena la bo20 la lilemo le ka liketsahalo tse susumetsang tšabo tseo e leng hona li tla etsahala. Mabapi le liketso tsohle tse joalo tsa Molimo, Pesaleme ea 66:5 e re: “Tloong, le bone mesebetsi ea Molimo; o tšabeha ho etseng ha oona bakeng sa bana ba batho!” E, mesebetsi ena ea Molimo ha e talingoa ka ho loketseng e kenya tšabo ea Jehova lipelong tsa rōna, e leng tlhompho e tebileng. Ka hona, re ka bona kamoo Jehova Molimo a phethahatsang tšepiso ea hae: “Ke tla bea tšabo ea ka lipelong tsa bona, ba tle ba se ke ba nkoenehela.”—Jeremia 32:40.
20. E le hore tšabo ea bomolimo e tle e hatisoe ka ho teba lipelong tsa rōna, ho hlokoa eng ka lehlakoreng la rōna?
20 Leha ho le joalo, ho hlakile hore tšabo ena ea bomolimo e ke ke ea e-ba teng ka lipelong tsa rōna ka ntle ho boiteko bo matla ka lehlakoreng la rōna. Liphello ha li itlele feela. Jehova o phetha karolo ea hae. Re tlameha ho phetha karolo ea rōna ka ho hlaolela tšabo ea bomolimo. (Deuteronoma 5:29) Iseraele ea tlhaho e hlōlehile ho etsa joalo. Empa ka ho itšetleha ka Jehova, Baiseraele ba moea le metsoalle ea bona ba se ba ntse ba latsoa melemo e mengata e tlelang ba tšabang Molimo. Re tla hlahloba e meng ea melemo ena sehloohong se latelang.
U ne U Tla Arabela Joang?
◻ Tšabo ea bomolimo ke eng?
◻ Re rutoa joang ho fumana thabo tšabong ea Jehova?
◻ Ho ba le tšabo ea bomolimo, ho hlokahala boiteko bofe ka lehlakoreng la rōna?
◻ Ke hobane’ng ha ho fumana tšabo ea bomolimo ho akarelletsa litšobotsi tsohle tsa pelo ea rōna ea tšoantšetso?
[Setšoantšo se leqepheng la 12, 13]
Ho hlokoa thuto e tiileng hore re tle re utloisise tšabo ea Jehova