Na u sa Hopola?
Na u fumane litokollo tsa haufinyane tsa Molula-Qhooa e le tsa bohlokoa bo sebetsang? Joale bona hore na u ka hopola tse latelang:
◻ Ho bolela eng ho tšoaeloa pholoho ke monna oa boprofeta ea nang le lenaka la mongoli ponong ea Ezekiele? (Ezekiele 9:2-6)
Ho bolela hore motho o ineetse ho Molimo ho etsa thato ea oona, ’me o kolobelitsoe e le morutuoa oa Jesu Kreste, le hore o apere botho bo kang ba Kreste.—4/15, maqephe 11, 12.
◻ Boprofeta ba Bibele bo sebeletsa merero efe?
Boprofeta bo tsebahatsa ’nete ka Molimo, thato ea oona, le litekanyetso tsa oona tsa boitšoaro. Bo hlakisa kamano ea motho le Jehova e le ho khutlisetsa batho tumellanong le morero oa Hae, ho isa phethahatsong ea oona e feletseng. (Esaia 1:18-20; 2:1-5; 55:8-11)—5/1, leqephe 5.
◻ Ke tlala efe e bolaeang e koahetseng lefatše lohle kajeno?
Ke tlala ea moea, “e leng ho lapela mantsoe a Jehova.” (Amose 8:11)—5/1, maqephe 10, 11.
◻ “Ho tšaba Jehova” ke eng? (Liproverbia 1:7)
Ke tšabo e tletseng boikokobetso le e tebileng ea ho se batle ho khopisa Jehova hobane re ananela mosa oa hae o lerato le molemo oa hae. Hape ho bolela ho lumela hore Jehova ke Moahloli ea Phahameng le ea Matla ’Ohle, ho mo tšepa ka ho feletseng, le ho hloea ho etsa se sebe mahlong a hae. (Pesaleme ea 2:11 ; 115:11; Liproverbia 8:13)—5/15, leqephe 28.
◻ Ke lintlha life tse re tataisang tse bontšitsoeng ho 1 Timothea 5 mabapi le ho hlokomela ba hōlileng?
Le hoja litho tsa lelapa li jara boikarabelo bo ka sehloohong, mathata a ba hōlileng a ama phutheho eohle; tlhokomelo ea bona e lokela ho hlophisoa hantle; tlhokomelo e joalo e lokela ho lekanyetsoa ho ba hlokang kannete.—6/1, maqephe 9, 10.
◻ Ke ka litsela life tse akaretsang, Jehova a ’nileng a hloekisa batho ba hae ka lilemo tse 69 tse fetileng?
(1) Ka mokhatlo o hlophisitsoeng; (2) ho kopanela tšebeletsong ea tšimo; (3) ho eketsa leseli la ’nete; (4) ho lahla mekhoa e litšila.—6/15, maqephe 17-20.
◻ Ke ka litsela life tse peli lentsoe ‘ema’ le sebelisitsoeng mabapi le Mikaele ho Daniele 12:1?
Mikaele o hlalosoa e le ea “emelang bara ba sechaba sa heno.” Jesu Kreste o ’nile a busa ka tsela ena molemong oa batho ba hae lefatšeng ho tloha ka 1914 ha a ne a behoa teroneng e le Morena ea busang oa ’Muso oa Molimo. Daniele o boetse o re: “Mehleng eo Mikaele o tla ema” (NW). Hona ho supa bohato bo bocha boo puso ea hae e kenang ho bona e leng boo ho bona a sa ntsaneng a tla nka bohato ka tsela e hlollang ho pholosa batho ba habo Daniele. Kahoo, ba ke ke ba ripitloa ke mebuso ea batho “mehleng ea qetello” ea morena oa leboea le morena oa boroa. (Daniele 11:40-45)—7/1, maqephe 18, 19.