Jehova o Fana ka Khotso le ’Nete ka Bongata
“Ke tla ba folisa ’me ke ba hlahisetse khotso le ’nete ka bongata.”—JEREMIA 33:6, NW.
1, 2. (a) Tlaleho ea lichaba ke efe mabapi le khotso? (b) Ka 607 B.C.E., Jehova o ile a ruta Baiseraele thuto efe mabapi le khotso?
KHOTSO! E lakatseha hakaakang, empa ke ka seoelo hakaakang e ’nileng ea e-ba teng historing ea motho! Lekholo la bo20 la lilemo ka ho khetheha e ’nile ea e-ba le hlokang khotso. Ho e-na le hoo, ho bile le lintoa tse peli tse senyang ka ho fetisisa historing ea motho. Ka mor’a ntoa ea pele ea lefatše, Selekane sa Lichaba se ile sa thehoa ka morero oa ho boloka khotso ea lefatše. Mokhatlo oo o ile oa hlōleha. Ka mor’a ntoa ea bobeli ea lefatše, mokhatlo oa Machaba a Kopaneng o ile oa thehoa ka sepheo se tšoanang. Ho hlokahala feela hore re bale likoranta tsa letsatsi le letsatsi e le hore re ka bona kamoo le oona o hlōlehang ka ho feletseng kateng.
2 Na re ka makatsoa ke hore ebe mekhatlo ea batho ha e khone ho tlisa khotso? Le hanyenyane. Lilemo tse ka holimo ho 2 500 tse fetileng, sechaba sa Molimo se khethiloeng, Iseraele, se ile sa rutoa thuto tabeng ena. Lekholong la bo7 la lilemo B.C.E., khotso ea Iseraele e ile ea sokeloa ke ’muso oa lefatše o neng o busa, oa Babylona. Baiseraele ba ne ba tšepile hore Egepeta e tla tlisa khotso. Egepeta e ile ea hlōleha. (Jeremia 37:5-8; Ezekiele 17:11-15) Ka 607 B.C.E., mabotho a Babylona a ile a liha marako a Jerusalema ’me a chesa tempele ea Jehova. Kahoo Baiseraele ba ile ba ithuta ka phihlelo e bohloko hore ho itšetleha ka mekhatlo ea batho ha ho na thuso. Ho e-na le ho thabela khotso, sechaba se ile sa qobelloa ho ea botlamuoeng Babylona.—2 Likronike 36:17-21.
3. Phethahatsong ea mantsoe a Jehova ka Jeremia, ke liketsahalo life tsa histori tse ileng tsa ruta Baiseraele thuto ea bobeli ea bohlokoa mabapi le khotso?
3 Leha ho le joalo, pele Jerusalema e e-oa, Jehova o ne a se a senotse hore Baiseraele ba tla tlisetsoa khotso ea sebele ke eena, e seng Egepeta. Ka Jeremia o ile a tšepisa: “Ke tla ba folisa ’me ke ba hlahisetse khotso le ’nete ka bongata. Ke tla khutlisa batlamuoa ba Juda le batlamuoa ba Iseraele, ’me ke ba hahe joaloka qalong.” (Jeremia 33:6, 7, NW) Tšepiso ea Jehova e ile ea qala ho phethahala ka 539 B.C.E. ha Babylona e ne e haptjoa ’me Baiseraele ba batlamuoa ba lokolloa. (2 Likronike 36:22, 23) Karolong e qetellang ea 537 B.C.E., sehlopha sa Baiseraele se ile sa keteka Mokete oa Metlotloane naheng ea Iseraele ka lekhetlo la pele ka mor’a lilemo tse 70! Ka mor’a mokete oo, ba ile ba qala ho haha tempele ea Jehova. Ba ile ba ikutloa joang ka see? Tlaleho e re: ‘Ba etsa litlatse tse khōlō tsa ho rorisa Jehova ka taba ea hobane ho theoa metheo ea ntlo ea Jehova.’—Esdrase 3:11.
4. Jehova o ile a susumetsa Baiseraele joang hore ba etse mosebetsi oa ho haha tempele, ’me o ile a etsa tšepiso efe mabapi le khotso?
4 Leha ho le joalo, ka mor’a qalo eo e thabisang, Baiseraele ba ile ba nyahamisoa ke bahanyetsi ’me ba khaotsa mosebetsi oa ho haha tempele. Lilemo tse itseng hamorao, Jehova o ile a hlahisa baprofeta Haggai le Zakaria ho susumetsa Baiseraele hore ba phethe mosebetsi oa ho haha bocha. E tlameha ebe ba ne ba thabile hakaakang ha ba utloa Haggai a re mabapi le tempele e neng e tla hahuoa: “Khanya ea morao ea ntlo ena e tla feta ea ea pele, ho bolela Jehova oa makhotla; nģalong ena ke tla bea khotso”!—Haggai 2:9.
Jehova o Phethahatsa Litšepiso Tsa Hae
5. Ke’ng se thahasellisang khaolong ea borobeli ea Zakaria?
5 Bukeng ea Bibele ea Zakaria, re bala ka lipono tse ngata tse bululetsoeng le boprofeta tse ileng tsa matlafatsa batho ba Molimo morao koana lekholong la botšelela la lilemo B.C.E. Boprofeta bona boo bo tsoela pele ho re kholisa hore Jehova o re tšehelitse. Bo neha e mong le e mong lebaka la ho lumela hore Jehova o tla fa batho ba hae khotso le mehleng ea rōna. Ka mohlala, khaolong ea borobeli ea buka e bitsoang ka eena, moprofeta Zakaria o bua polelo ena ka makhetlo a leshome: “Ho itsoe ke Jehova.” Lekhetlo ka leng, polelo ena e kenyeletsa phatlalatso ea bomolimo e amanang le khotso ea batho ba Molimo. Litšepiso tse ling ho tsena li ile tsa phethahala morao koana mehleng ea Zakaria. Tsohle li phethahetse kapa li ntse li phethahala kajeno.
“Ke Boulela Sione”
6, 7. Jehova o ne a ‘boulela Sione ka khalefo e khōlō’ ka litsela life?
6 Polelo ena e hlaha ka lekhetlo la pele ho Zakaria 8:2, moo re balang: ‘Ho itsoe ke Jehova oa makhotla: Ke boulela Sione ka poulelo e khōlō, ke bile ke o boulela ka khalefo e khōlō.’ Tšepiso ea Jehova ea ho boulela le ho ba le cheseho e khōlō, bakeng sa batho ba hae e ne e bolela hore o ne a tla falimehela ho tsosolosa khotso ea bona. Ho busetsoa ha Baiseraele naheng ea bona le ho hahoa bocha ha tempele e bile bopaki ba cheseho eo.
7 Leha ho le joalo, ho thoe’ng ka ba neng ba hanyetsa batho ba Jehova? Cheseho ea hae bakeng sa batho ba hae e ne e tla lekana le ‘khalefo e khōlō’ ea hae ho lira tsena. Ha Bajode ba tšepahalang ba ne ba rapela tempeleng e hahiloeng bocha ba ne ba tla khona ho hopola koluoa ea Babylona e matla, e neng e oele ka nako eo. Hape ba ne ba ka nahana ka ho hlōleha ho feletseng ha lira tse neng li ile tsa leka ho thibela hore tempele e hahoe bocha. (Esdrase 4:1-6; 6:3) ’Me ba ne ba ka leboha Jehova ha a phethahalitse tšepiso ea hae. Cheseho ea hae e ile ea ba tlisetsa tlhōlo!
“Motse oa ’Nete”
8. Mehleng ea Zakaria, Jerusalema e ne e tla ba motse oa ’nete joang ha ho bapisoa le mehleng ea pejana?
8 Lekhetlong la bobeli Zakaria oa ngola: “Ho itsoe ke Jehova.” Jehova o re’ng lekhetlong lee? “Ke khutletse Sione, ’me ke ahile ka har’a Jerusalema; Jerusalema o bitsoa motse oa ’nete, thaba ea Jehova oa makhotla e bitsoa thaba e khethehileng!” (Zakaria 8:3) Pele ho 607 B.C.E., ho hang Jerusalema e ne e se motse oa ’nete. Baprista ba hae le baprofeta ba ne ba senyehile, ’me batho ba hae ba ne ba sa tšepahale. (Jeremia 6:13; 7:29-34; 13:23-27) Ka nako eo batho ba Molimo ba ne ba haha tempele bocha, ba bontša boitlamo ba bona borapeling bo hloekileng. Ka moea Jehova o ne a boetse a lula Jerusalema. Linnete tsa borapeli bo hloekileng li ne li boetse li buuoa ka hare ho eona, ka hona Jerusalema e ne e ka bitsoa “motse oa ’nete.” Sebaka se phahameng seo e leng ho sona se ne se ka bitsoa “thaba ea Jehova.”
9. “Iseraele oa Molimo” e ile ea fetoha boemong ka tsela efe e hlollang ka 1919?
9 Le hoja liphatlalatso tsena tse peli li ne li utloahala ho Baiseraele ba boholo-holo, li boetse li utloahala haholo ho rōna ha lekholo la bo20 la lilemo le ntse le atamela qetello ea lona. Hoo e ka bang lilemo tse 80 tse fetileng, ntoeng ea pele ea lefatše, batlotsuoa ba likete tse seng kae bao ka nako eo ba neng ba emela “Iseraele oa Molimo” ba ile ba ea botlamuoeng ba moea, hantle feela joalokaha Baiseraele ba boholo-holo ba ne ba ile ba ea botlamuoeng Babylona. (Ba-Galata 6:16) Ho latela boprofeta, ba ile ba hlalosoa e le litopo tse rapaletseng seterateng. Ho ntse ho le joalo, ba ne ba e-na le takatso e tiileng ea ho rapela Jehova “ka moea le ka ’nete.” (Johanne 4:24) Ka hona, ka 1919, Jehova o ile a ba lokolla botlamuoeng, a ba tsosa boemong ba bona ba ho shoa moeeng. (Tšenolo 11:7-13) Kahoo Jehova o ile a araba potso ea Esaia ea boprofeta ka E, e sa belaetseng: “Na naha e ka tsoaloa ka tsatsi le le leng, kapa sechaba se ka tsoaloa hang na?” (Esaia 66:8) Ka 1919, batho ba Jehova ba ile ba boela ba e-ba teng e le sechaba sa moea ‘naheng’ ea bona, kapa sebakeng sa moea se lefatšeng.
10. Ho tloha ka 1919, Bakreste ba tlotsitsoeng ba ’nile ba thabela litlhohonolofatso life ‘naheng’ ea bona?
10 Kaha ba sireletsehile naheng eo, Bakreste ba tlotsitsoeng ba sebelelitse tempeleng ea moea ea Jehova e khōlō. Ba ile ba bitsoa “mohlanka ea khabane, ea bohlale,” ba amohela boikarabelo ba ho hlokomela letlotlo la Jesu la lefatšeng, e leng tokelo eo ba ntseng ba e thabela ha lekholo lena la bo20 la lilemo le le haufi le ho fela. (Mattheu 24:45-47) Ba ithutile hantle thuto ea hore Jehova ka boeena ke “Molimo oa khotso.”—1 Ba-Thessalonika 5:23.
11. Baeta-pele ba bolumeli ba Bokreste-’mōtoana ba iponahalitse e le lira tsa batho ba Molimo joang?
11 Leha ho le joalo, ho thoe’ng ka lira tsa Iseraele oa Molimo? Cheseho ea Jehova bakeng sa batho ba hae e lekana le khalefo ea hae khahlanong le bahanyetsi. Ntoeng ea pele ea lefatše, baeta-pele ba bolumeli ba Bokreste-’mōtoana ba ile ba sebelisa khatello e khōlō haholo ha ba leka—’me ba hlōleha—ho felisa sehlotšoana sena sa Bakreste ba buang ’nete. Ntoeng ea bobeli ea lefatše, baruti ba Bokreste-’mōtoana ba ne ba kopane tabeng e le ’ngoe feela: Ka mahlakoreng a mabeli a ntoa, ba ile ba khothaletsa mebuso ho hatella Lipaki tsa Jehova. Esita le kajeno, linaheng tse ngata baeta-pele ba bolumeli ba susumetsa mebuso ho sitisa kapa ho thibela mosebetsi oa boboleli ba Bokreste oa Lipaki tsa Jehova.
12, 13. Khalefo ea Jehova e bontšoa joang khahlanong le Bokreste-’mōtoana?
12 Jehova o ’nile a hlokomela sena. Ka mor’a ntoa ea pele ea lefatše, Bokreste-’mōtoana, hammoho le Babylona e Moholo kaofela, bo ile ba oa. (Tšenolo 14:8) Bonnete ba ho oa ha Bokreste-’mōtoana bo ile ba tsejoa ho tloha ka 1922 ha letoto la likotlo tsa tšoantšetso le ne le tšolloa, le pepesa phatlalatsa boemo ba bona ba ho shoa moeeng le bile le lemosa ka timetso ea bona e tlang. (Tšenolo 8:7–9:21) E le bopaki ba hore ho tšolloa ha likotlo tsena ho tsoela pele, puo e reng “Bofelo ba Bolumeli ba Bohata bo Haufi” e ile ea neheloa lefatšeng lohle ka la 23 April, 1995, ’me e ile ea lateloa ke kabo ea likopi tse limilione tse makholo tsa tokollo e khethehileng ea (pampitšana ea) Litaba Tsa ’Muso.
13 Kajeno, Bokreste-’mōtoana bo boemong bo nyelisehang. Ho theosa le lekholo la bo20 la lilemo, litho tsa bona li bolaeane lintoeng tse mabifi tse ileng tsa hlohonolofatsoa ke baprista le baruti. Linaheng tse ling tšusumetso ea bona e batla e le sieo. Bo reretsoe timetso hammoho le Babylona e Moholo kaofela.—Tšenolo 18:21.
Khotso Bakeng sa Batho ba Jehova
14. Ke mokhabo-puo ofe oa boprofeta o entsoeng mabapi le batho ba leng khotsong?
14 Ka lehlakoreng le leng, selemong sena sa 1996, batho ba Jehova ba thabela khotso e ngata naheng ea bona e tsosolositsoeng, joalokaha ho hlalositsoe phatlalatsong ea Jehova ea boraro: “Ho itsoe ke Jehova oa makhotla: Ho sa tla ba banna ba baholo le basali ba baholo ba lulang mapatlelong a Jerusalema, ba tšoereng e mong le e mong lere la hae ka letsohong la hae, ka baka la bongata ba litšiu tsa bona; mapatlelo a motse a tla tlala bashanyana le banana ba bapalang mapatlelong a oona.”—Zakaria 8:4, 5.
15. Ho sa tsotellehe lintoa tsa lichaba, bahlanka ba Jehova ba ’nile ba thabela khotso efe?
15 Mokhabo-puo ona o thabisang o tšoantšetsa ntho e ’ngoe e hlollang lefatšeng lena le tsekolotsoeng ke ntoa—batho ba leng khotsong. Mantsoe a Esaia a boprofeta a phethahetse ho tloha ka 1919: ‘Khotso, khotso ho ea leng hōle, le ho ea leng haufi; hobane ke tla mo folisa. Empa . . . ha ho khotso e boloketsoeng ba bolotsana: ho bolela Molimo oa ka!’ (Esaia 57:19-21) Ha e le hantle, batho ba Jehova, le hoja e se karolo ea lefatše lena, ba ke ke ba qoba ho angoa ke pherekano ea lichaba. (Johanne 17:15, 16) Linaheng tse ling, ba mamella mathata a boima, ’me ba seng bakae ba bile ba bolaoa. Empa, Bakreste ba sebele ba na le khotso ka litsela tse peli tse ka sehloohong. Ea pele, ba na le “khotso ho Molimo, ka Jesu Kreste, Morena oa [bona].” (Ba-Roma 5:1) Ea bobeli, ba na le khotso ka hare ho bona. Ba hlaolela “bohlale bo tsoang holimo,” boo ‘tabeng ea pele e leng bo hloekileng, hape e le bo nang le khotso.’ (Jakobo 3:17; Ba-Galata 5:22-24) Ho feta moo, ba lebeletse ho thabela khotso ka kutloisiso e feletseng ka ho fetisisa nakong eo ka eona ‘ba bonolo ba tla rua lefatše, ba iketle khotsong e khōlō.’—Pesaleme ea 37:11.
16, 17. (a) “Banna ba baholo le basali ba baholo” esita le “bashanyana le banana” ba matlafalitse mokhatlo o hlophisitsoeng oa Jehova joang? (b) Ke’ng se bontšang khotso ea batho ba Jehova?
16 Ho ntse ho e-na le “banna ba baholo le basali ba baholo” ka har’a batho ba Jehova, ba tlotsitsoeng ba hopolang litlhōlo tsa pele tsa mokhatlo o hlophisitsoeng oa Jehova. Botšepehi ba bona le mamello li ananeloa haholo. Batlotsuoa ba neng ba sa ntse ba le bacha ba ne ba etella pele mehleng e mabifi ea bo-1930, le nakong ea Ntoa ea II ea Lefatše, le lilemong tse thabisang tsa khōlo e ileng ea latela. Ho feta moo, haholo-holo ho tloha ka 1935, “bongata bo boholo” ba “linku tse ling” bo iponahalitse. (Tšenolo 7:9; Johanne 10:16) Ha Bakreste ba tlotsitsoeng ba se ba hōlile ebile palo ea bona e se e fokola, linku tse ling li entse mosebetsi oa boboleli li bile li o atoloselitse lefatšeng lohle. Lilemong tsa morao tjena linku tse ling li ’nile tsa phallela naheng ea batho ba Molimo. Selemong se fetileng feela, tse 338 491 li ile tsa kolobetsoa tšoantšetsong ea boinehelo ba tsona ho Jehova! Bao ba bacha ’neteng ka sebele ba banyenyane haholo lilemong, ka puo ea moea. Matla a bona le cheseho lia ananeloa ha ba eketsa sehlopha sa ba binelang “Molimo oa rōna, o lutseng teroneng, le . . . Konyana” lithoriso tsa teboho.—Tšenolo 7:10.
17 Kajeno, “mapatlelo a motse a . . . tlala bashanyana le banana,” Lipaki tse mafolo-folo a kang a bacha. Selemong sa tšebeletso sa 1995, ho ile ha amoheloa litlaleho tse tsoang linaheng le lihleke-hlekeng tsa leoatle tse 232. Empa ha ho na bora ba bochaba, ho se na lehloeo la merabe, ho se na mōna o sa lokelang, lipakeng tsa batlotsuoa le linku tse ling. Bohle ba ne ba hōla hammoho moeeng, ba kopane leratong. Boena ba lefatše ka bophara ba Lipaki tsa Jehova ka sebele boa ikhetha lefatšeng.—Ba-Kolosse 3:14; 1 Petrose 2:17.
Na ho Thata Haholo ho Jehova?
18, 19. Lilemong tsa ho tloha ka 1919, Jehova o finyeletse joang se neng se ka ’na sa bonahala se le thata haholo ponong ea motho?
18 Morao koana ka 1918 ha masala a batlotsuoa e ne e le batho ba likete tse seng kae feela ba nyahameng botlamuoeng ba moea, ho ne ho se motho ea neng a ka bonela pele tsela eo liketsahalo li neng li tla e nka. Leha ho le joalo, Jehova o ne a tseba—joalokaha ho tiisoa ke phatlalatso ea hae ea boprofeta ea bone: ‘Ho itsoe ke Jehova oa makhotla: Leha taba eo e ka ba thata mahlong a masala a sechaba sena, matsatsing ao, na le mahlong a ka e ka ba thata? Ho botsa Jehova oa makhotla.’—Zakaria 8:6.
19 Ka 1919, moea oa Jehova o ile oa tsosa batho ba hae bakeng sa mosebetsi o larileng ka pele. Ho ntse ho le joalo, ho itšoarella ka tieo mokhatlong o hlophisitsoeng oa barapeli ba Jehova ho ne ho hloka tumelo. Ba ne ba fokola haholo, ’me lintho tse ngata li ne li sa hlaka. Leha ho le joalo, hanyane ka hanyane Jehova o ile a ba matlafatsa tlhophisong le ho ba hlomella hore ba etse mosebetsi oa Bokreste oa ho bolela litaba tse molemo le ho etsa barutuoa. (Esaia 60:17, 19; Mattheu 24:14; 28:19, 20) Butle-butle, o ile a ba thusa ho lemoha litaba tsa bohlokoa tse kang boemo ba ho se jele pate le bobusi ba bokahohle. Na ho ne ho le thata haholo hore Jehova a phethe thato ea hae ka sehlotšoana seo sa Lipaki? Ka sebele karabo ke che! Sena se tiisoa maqepheng a 12 ho ea ho 15 a makasine ena, moo ho hatisitsoeng chate ea mosebetsi oa Lipaki tsa Jehova selemong sa tšebeletso sa 1995.
“’Na ke be Molimo oa Bona”
20. Ho profetiloe hore ho bokelloa ha batho ba Molimo ho ne ho tla pharalla hakae?
20 Phatlalatso ea bohlano e bontša ka ho eketsehileng boemo ba thabo ba Lipaki tsa Jehova kajeno: “Ho itsoe ke Jehova oa makhotla: Bonang, ke ea pholosa ba sechaba sa ka lefatšeng la Bochabela le lefatšeng la Bophirimela; ke tla ba tlisa, ba tle ba ahe ka har’a Jerusalema, ’me e tla ba sechaba sa ka, ’na ke be Molimo oa bona ka ’nete le ka ho loka.”—Zakaria 8:7, 8.
21. Khotso e ngata ea batho ba Jehova e ’nile ea bolokoa le ho eketsoa ka tsela efe?
21 Ka 1996 re ka bua re sa qea-qee hore litaba tse molemo li boletsoe ho pota lefatše, ho tloha “lefatšeng la Bochabela” ho ea “lefatšeng la Bophirimela.” Barutuoa ba entsoe ka batho ba lichaba tsohle, ’me ba bone phethahatso ea tšepiso ea Jehova: ‘Bana ba hao bohle ba tla rutoa ke Morena; khotso ea bana ba hao e tla ba khōlō.’ (Esaia 54:13) Re na le khotso hobane re rutoa ke Jehova. Kaha re e-na le sepheo sena, lingoliloeng li ’nile tsa hatisoa ka lipuo tse 300. Selemong se fetileng feela, ho ile ha e-ba le lipuo tse 21 tse eketsehileng. Hona joale makasine ea Molula-Qhooa e hatisoa ka nako e le ’ngoe ka lipuo tse 111, le ea Tsoha! ka lipuo tse 54. Likopano tsa naha ka ’ngoe le tsa machaba li fana ka bopaki ba phatlalatsa ba khotso ea batho ba Molimo. Liboka tsa beke le beke lia re kopanya li bile li re fa khothatso eo re e hlokang e le hore re ka lula re tiile. (Ba-Heberu 10:23-25) E, Jehova o ruta batho ba hae “ka ’nete le ka ho loka.” O fa batho ba hae khotso. Re lehlohonolo hakaakang hore ebe re kopanela khotsong eo e khōlō!
Na U ka Hlalosa?
◻ Jehova o ’nile a ‘boulela batho ba hae ka khalefo e khōlō’ joang mehleng ea kajeno?
◻ Batho ba Jehova ba thabela khotso joang, esita le linaheng tse tsekolotsoeng ke ntoa?
◻ ‘Mapatlelo a motse a tletse bashanyana le banana’ ka tsela efe?
◻ Ho entsoe litokisetso life e le hore batho ba Jehova ba ka rutoa ke eena?
[Chate e leqepheng la 12-15]
TLALEHO EA SELEMO SA TŠEBELETSO SA 1995 EA LIPAKI TSA JEHOVA LEFATŠENG LOHLE
(Sheba boitsebiso bo hlophisitsoeng hantle khatisong)
[Setšoantšo se leqepheng la 8, 9]
Lekholong la botšelela la lilemo B.C.E., Bajode ba tšepahalang ba ileng ba haha tempele bocha ba ile ba ithuta hore Jehova ke eena feela mohloli o tšepahalang oa khotso