Ipoloke U Tšaba Jehova

“Hobane ke Morena e moholo, ho bolela Jehova oa makhotla, ’me lebitso la ka le tšabeha har’a lichaba.”—MALAKIA 1:14.

1, 2. (a) Buka ea Malakia e tšoere molaetsa ofe o matla? (b) Mantsoe a qalang a molaetsa oa Jehova a fana ka thuto efe?

“PHATLALATSO: Lentsoe la Jehova ho Iseraele ka Malakia.” (Malakia 1:1, NW) Polelo ena e khutšoanyane e susumetsang e qala buka ea Bibele ea Malakia. Ka Bibeleng hangata phatlalatso ke nyatso ea bokhopo. Ka sebele hona ke ’nete tabeng ea buka ea Malakia ka molaetsa oa eona o matla le o tobileng sechabeng sa Iseraele. Ho e hlahloba ha rōna ho tla phahamisa tlhokahalo ea ho boloka tšabo ea rōna ho Jehova le lerato la rōna ho eena.

² Litemana tse peli tse qalang tsa buka eo li fana ka thuto ho faneng ka taeo. Jehova o tiisetsa bamameli ba hae ka takatso ea hae ea ho ba thusa: “Ke le ratile, ho bolela Jehova.” Ke kenyelletso e futhumatsang pelo hakaakang, e kholisang ho ba lipelo li tšepahalang ba sechaba sa Iseraele se sa utloeng. Molaetsa o tsoela pele: “’Me le re: U re ratile ka’ng? Ha ke re, Esau e ne e le ngoan’abo Jakobo? ho bolela Jehova; joale, ke ratile Jakobo, athe Esau eena ke mo hloile; ke sentse lithaba tsa hae, le lefa la hae ke le neile liphokojoe tsa lefeella.”—Malakia 1:2, 3.

 3. Ke mabaka afe a ileng a tlisa maikutlo ao Jehova a neng a e-na le ’ona ka Jakobo le Esau?

³ Ke hobane’ng ha Jehova a ile a rata Jakobo, ’me hamorao, litloholo tsa Jakobo, Baiseraele? Ke hobane Jakobo o ne a tšaba Molimo ’me a hlonepha batsoali ba hae ba tšabang Molimo. Ka lehlakoreng le leng, Esau e ne e le motho oa moikhabi, ea sa tšabeng Molimo. Hape, o ne a haelloa ke hlonepho ho batsoali ba hae, ba neng ba e-na le tokelo ea tlhaho, eo ba e neiloeng ke Molimo ea ho lebella hore a ba utloe. Ka nepo, Jehova o ile a rata Jakobo empa a hloea Esau. Hona ke temoso ho rōna. Re tlameha ho qoba hore le ka mohla re ka khaotsa ho tšaba Molimo, ra ba ba ratang lintho tse bonahalang joaloka Esau, ea neng a habile feela ho khotsofatsa litakatso tsa hae tsa nama.—Genese 26:34, 35; 27:41; Ba-Heberu 12:16.

4, 5. (a) Litsela tsa bophelo tsa Jakobo le Esau li bile le phello efe ho litloholo tsa bona? (b) Hoo ho lokela e be ho amme Baiseraele joang?

⁴ Joalokaha tsela ea Jakobo e ile ea ipaka e le tlhohonolofatso ho litloholo tsa hae, Baiseraele, tsela ea Esau e ile ea ipaka e le e fapaneng ka ho felletseng ho litloholo tsa hae, Baedomo. Baedomo ha baa ka ba thabela tlhohonolofatso ea Jehova. Ho fapana le hoo, ka khanyetso ea bona e matla ho batho ba hae ba selekane, ba ile ba ipitsetsa lehloeo la Jehova. Ba ile ba hlōloa ke mabotho a Nebukadnezare ’me hamorao ke Maarabia. Qetellong, joalokaha Jehova a ne a profetile, Baedomo e le sechaba ba ile ba fela.—Obadia 18.

⁵ Likahlolo tsa Jehova ho Edomo li qalile pele ho mehla ea Malakia. Hoo ho lokela ebe ho ile ha ama Baiseraele joang? Jehova o ba bolella hore: “Mahlo a lōna a tla ho bona, ’me lōna ka bolōna le tla re: ‘Jehova a ke a tlotlisoe holim’a naha ea Iseraele.’” (Malakia 1:5, NW) Ho theosa le makholo a lilemo, Iseraele e bone ka ‘mahlo a eona’ lerato leo Jehova a neng a e-na le lona ho eona e le sechaba.

Liketso tsa Rōna Li Tla Bontša Hore Na Re Tšaba Molimo Kapa Che

 6. Jehova o ile a qosa Baiseraele ka eng?

⁶ Phatlalatso e tsoela pele hore: “Mora o hlonepha ntat’ae, le mohlanka o hlonepha morena oa hae. Haeba ke ntat’a lōna, e kae hlonepho e ntokelang? Ha ke le morena oa lōna, e kae tšabo eo le ntšabang ka eona? ho bolela Jehova oa makhotla ho lōna baprista ba nyelisang lebitso la ka.” (Malakia 1:6; Exoda 4:22, 23; Deuteronoma 32:6) Jehova o ne a ile a khalemela Baiseraele, a ba hlokomela, ’me a ba sireletsa feela joalokaha ntate a ne a tla etsa ho mora oa hae. Ke eng eo ka nepo a neng a e lebelletse bakeng sa hoo? Hore a hlonepshoe le ho tšabjoa. Sechaba, ho akarelletsa baprista, se ile sa hlōleha ho etsa sena empa, ho fapana le hoo, sa bontša ho se hlomphe lebitso la Jehova le ho le nyelisa. Ba ile ba fetoha “bana ba koenehileng.”—Jeremia 3:14, 22; Deuteronoma 32:18-20; Esaia 1:2, 3.

 7. Baiseraele ba ile ba ikutloa joang ka qoso ee, ’me karabelo ea Jehova ho bona e ile ea e-ba efe?

⁷ Baiseraele ba ile ba botsa: “Re nyelisa lebitso la hao ka’ng?” Ka matla Jehova a arabela: “Le hlahisa sejo se sebe aletareng ea ka, ’me le re: Re u hlompholotse ka’ng? Ke ha le re: Tafole ea Jehova ea nyatseha. Ha le hlahisa ntho e sefofu ho etsa sehlabelo, ha ho molato na? Kapa ha le hlahisa e hlotsang, kapa e kulang, ha ho molato na? E ise he ho ’musi oa hao: na o tla u thabela, kapa a khahloe ke uena na? ho botsa Jehova oa makhotla.”—Malakia 1:6-8.

 8. Baiseraele ba ne ba bontša eng ka liketso tsa bona?

⁸ Motho a ka inahanela a bona Moiseraele a talima mohlape oa hae ’me ka bolotsana a khetha phoofolo ea sefofu kapa ea sehlotsa ho nehelana ka eona ho Jehova. Ka tsela ena o ne a ka ’na a etsa liketso tsa ho etsa sehlabelo empa ka boikhabi a ipoloketse tse ntle ka ho fetisisa mohlapeng. O ne a ke ke a leka ho etsa ntho e joalo ho ’musi oa hae! Empa Baiseraele ba ne ba ho etsa ho Jehova—joalokaha eka o ne a ke ke a bona merero ea bona e bolotsana le e qhekellang. Ka nepo Jehova a ba botsa, “E kae tšabo eo le ntšabang ka eona?” Ka lipolelo tsa bona, e ka ’na eaba ba ne ba bolela hore ba tšaba Jehova, empa ka ho hlakileng liketso tsa bona li ne li supa ho fapaneng le hoo.—Deuteronoma 15:21.

 9. Baprista ba ile ba itšoara joang mabapi le seo batho ba neng ba se etsa?

⁹ Baprista ba ne ba itšoara joang ka mahlabelo aa a nyatsehang? Ba ile ba re: “Ha ho molato.” Ba ile ba lokafatsa tsela e khopo ea Baiseraele. Kahoo, esita le hoja batlamuoa ba neng ba khutla Babylona ba ile ba qala ka cheseho ho tsosolosa borapeli ba ’nete, hamorao ba ile ba fetoha ba sa tsotelleng, baikhohomosi, le ba ipehang ba lokileng. Ba ile ba khaotsa ho tšaba Jehova. Kahoo tšebeletso ea bona tempeleng e ile ea e-ba nyeliso feela, ’me ba ile ba boloka mekete ea bona ka tsela ea molao feela.—Malakia 2:1-3; 3:8-10.

10. (a) Jehova o batla sehlabelo sefe kajeno? (b) Ke ka tsela efe feela sehlabelo sa rōna se ka amoheloang ke Jehova?

¹⁰ Ba bang ba ka ’na ba hanyetsa: ‘Hona ha ho sebetse ho rōna; ha re sa nehelana ka mahlabelo a liphoofolo.’ Empa re na le mofuta o mong oa sehlabelo oo re nehelanang ka oona. Hlokomela boipiletso ba Pauluse bo matla: “Banab’eso, kea le rapela hle ka mehauhelo ea Molimo, hore le ke le o beele ’mele ea lōna, e be sehlabelo se phelang, se halalelang, se khahlisang Molimo; ke eona tšebeletso e le tšoanetseng.” (Ba-Roma 12:1) Sehlabelo seo Jehova a se batlang kajeno ke uena! Ke hore, matla a hao, maruo a hao, le seo u ka khonang ho se etsa. O tla ananela sehlabelo sa rōna feela haeba re etsa sohle seo re ka se khonang. Ho nea Jehova masalla, joaloka sehlabelo se hlotsang, se kulang, ka sebele ho tla ama kamano ea rōna le eena.

11. Mohlanka ka mong ea inehetseng oa Jehova o lokela ho etsa tlhahlobisiso efe?

¹¹ Ha e le hantle, esita le hoja ba bang ba ka ’na ba re, “Ha ho molato,” rea tseba hore na Jehova o ikutloa joang ka hona. Kahona, a re ke re hlahlobeng ka hloko “sehlabelo” sa “tšebeletso e halalelang,” (NW) seo re nehelanang ka sona, ho akarelletsa karolo eo re nang le eona boboleling, boithutong ba botho, thapelong, le ho kopanela libokeng. Na u khotsofetse hore u nea Jehova sohle seo u ka se khonang, kapa ke masalla feela? Ho na le kotsi ea ho kopanela boithabisong kapa boikhathollong mafelong a beke hoo motho a ka hlokang nako kapa matla a ho bolela litaba tse molemo tsa ’Muso le ho ba teng libokeng. Tsela ea rōna eohle ea bophelo, bophelo ba rōna ba letsatsi le letsatsi, ho akarelletsa boikutlo le lipakane, li lokela ho tlamahanngoa le sehlabelo seo re se etsetsang Jehova. E se be letho ha ese sohle seo re ka se khonang!

Ho Khetholla Ba Tšabang Jehova Kannete

12. Joale ho fanoa ka keletso efe?

¹² Boprofeta bo re: “Joale he, rapelang sefahleho sa Molimo, hore o re hauhele.” (Malakia 1:9) Jehova o phehella Baiseraele hore ba etse se nepahetseng, ho bontša tšabo e loketseng ho Molimo, le ho mo nea se mo tšoanelang. Re tlameha ho etsa ho tšoanang kajeno. Ke feela ka ho phelela seo Jehova a se hlokang re ka fumanang le ho boloka kamohelo ea hae.

13. (a) Ha re sa tšabe Molimo, re ka oela lerabeng lefe? (b) Meharo e ile ea ama baprista ba Baiseraele joang?

¹³ Ha tšabo e loketseng ho Molimo e le sieo, tšebeletso ea rōna ho eena e ka etsoa feela ho phetha molao le bakeng sa molemo oa boikhabi. Hlokomela kamoo Jehova a botsang baprista ba Baiseraele mabapi le tšebeletso ea bona tempeleng: “Ke mang har’a lōna ea tla koala menyako, hore le se hlole le hotetsa mollo oa aletare ea ka ka lefeela? Ha ke khahloe ke lōna, ho bolela Jehova oa makhotla, nke ke ka amohela sehlabelo se hlahisoang ke matsoho a lōna.” (Malakia 1:10) E, baprista ba ne ba le moo ho phetha tšebetso ea tempeleng, ho notlela menyako ea sehalalelo, ho khantša lialetare. Empa ba ne ba sa etse sena ha ho se letho leo ba le fumanang. Ba ne ba lebelletse limpho le litjotjo tse tsoang ho Baiseraele ba neng ba tla ho tla etsa mahlabelo tempeleng. Jehova ha aa ka a khahloa ka nako eo, ’me le hona joale ha a khahloe ke tšebetso e etsoang feela bakeng sa molemo oa boikhabi. Ea nyonyeha ho eena.

14. Ke hobane’ng ha kamehla ho e-na le tlhokahalo ea ho itebela khahlanong le meharo?

¹⁴ Tlhokahalo ea ho itebela khahlanong le boikhabi le meharo e ntse e le khōlō mehleng ea rōna. Mangolo a re lemosa khafetsa khahlanong le meharo, a totobatsa hore batho ba meharo ha ba amohelehe ho Jehova. (1 Ba-Korinthe 6:10, NW; Ba-Efese 5:5, NW) Ha re ntse re phethahatsa tšebeletso ea rōna, e se e ka lerato la rōna le tšabo ea rōna ho Jehova kamehla li ka re thibela hore re ho etse feela bakeng sa molemo oa boikhabi. Re lokela ho potlakela ho tsomula tšekamelo leha e le efe e joalo e ka melang lipelong tsa rōna. Ka ho khetheha baholo le bahlanka ba sebeletsang ba lemosoa ho se be “meharo ea leruo la bolotsana.” (Tite 1:7, NW; 1 Timothea 3:8, NW; 1 Petrose 5:2) Ba bang ka morero ba ka ’na ba hlaolela likamano feela le baena ba ka ba thusang ka lintho tse bonahalang, e leng ho tlang ho fella ka leeme le ho ba leqe ho laea ba joalo. Ha re rate hore le ka mohla re tšoane le baprista ba meharo ba Iseraele ba neng ba lebelletse limpho le litjotjo tse tsoang ho Baiseraele ba habo bona.

15. (a) Malakia o ile a bontša joang hore ho ne ho tla ba le ba tšabang Jehova likarolong tsohle tsa lefatše? (b) Mangolo a mang a tšehetsang see ke afe?

¹⁵ Kajeno, haeba Jehova a ne a ka botsa potso, “E kae tšabo eo le ntšabang ka eona?” na ho na le batho ba ka arabang, ‘Ke rōna bana, batho ba u tšabang’? E, ntle le tikatiko! Ke bafe? Lipaki tse tšepahalang tsa Jehova, tse fumanoang likarolong tsohle tsa lefatše. Malakia 1:11 e ile ea bolela e sa le pele ka sehlopha sena sa batho ba lichaba tsohle le mosebetsi oo se neng se tla o etsa: “Hobane, ho tloha Bochabela ho isa Bophirimela, lebitso la ka le leholo har’a lichaba, . . . mahlabelo a hlahisetsoa lebitso la ka, e leng mahlabelo a hloekileng; hobane lebitso la ka le leholo har’a lichaba, ho bolela Jehova oa makhotla.”—Bona hape Pesaleme ea 67:7; Esaia 33:5, 6; 41:5; 59:19; Jeremia 32:39, 40.

16. Ho tloha bochaba-tsatsi ho isa bophirima-tsatsi ho ka ba le meelelo efe e fapaneng, ’me hoo ho phethahala joang?

¹⁶ Malakia o re bolella ka ho loketseng hakaakang moo ka mosebetsi o moholo o etsoang mehleng ea rōna ka ho boleloa ha litaba tse molemo lefatšeng lohle. (Mattheu 24:14; Tšenolo 14:6, 7) Ho tloha bochaba-tsatsi ho isa bophirima-tsatsi, ka kutloisiso ea sebopeho sa lefatše, ho bolela ho tloha bochabela ho isa bophirimela. Ho sa tsotellehe moo re talimang teng lefatšeng kajeno, re fumana ba tšabang Jehova ba etsa thato ea hae. Ho tloha bochaba-tsatsi ho isa bophirima-tsatsi ho boetse ho bolela letsatsi lohle. E, bahlanka ba tšabang Molimo ba ntse ba fana ka thoriso ba sa khaotse. Joalokaha Jehova a tšepisitse, lebitso la hae lea phatlalatsoa lefatšeng lohle ke ba mo tšabang e le kannete.—Exoda 9:16; 1 Likronike 16:23, 24; Pesaleme ea 113:3.

Boloka Tšabo e Loketseng ho Molimo

17. Ho felloa ke hlonepho ho Jehova le tšabo ho eena ho ka ba le liphello life?

¹⁷ Ho bao ba hlolōang ho hlonepha le ho tšaba Jehova, borapeli le tšebeletso li fetoha moroalo. Jehova o ile a re ho Baiseraele, “Lōna, lea le hlompholla, ha le ntse le re: Tafole ea Jehova e litšila, le se tsoang ho eona ke sejo se nyatsehang. ’Me le re: A ntho e khathatsang!” (Malakia 1:12, 13) Ho ka etsahala se tšoanang mehleng ea kajeno. Ho bao ba lahleheloang ke tšabo ho Jehova, liboka, tšebeletso ea tšimo, le mesebetsi e meng ea Bokreste li ka fetoha moroalo.

18. Nako le nako, ke eng e ’nileng ea hlahela ba bang ba bahlanka ba Molimo ba kajeno?

¹⁸ Hlokomela kamoo ba joalo ba hlalositsoeng ho The Watchtower ea la 1 Pherekhong, 1937: “Ho bao ba sa tšepahaleng tokelo ea ho sebeletsa Molimo ka ho tlisa litholoana tsa ’muso ho ba bang, joalokaha Morena a laetse, e se e le tšebeletso e khathatsang le ho phetha molao, e leng ho sa ba feng monyetla oa ho khanya mahlong a batho. Ho nka molaetsa oa ’muso ka ntlo le ntlo ka mokhoa oa likhatiso, le ho o buella bathong, ke ho nyenyefatsang haholo ho ba joalo ba inkang e le ba bohlokoa. Ha ba fumane thabo ho oona . . . Kahona ba itse, ’me ba tsoela pele ho re: ‘Ntho ena ea ho tsamaea ho jeroe libuka hohle e mpa e le morero oa ho rekisa libuka feela. Oo ke mosebetsi o tenang hakaakang!’” Esita le kajeno ho na le bao, nako le nako, ba fumanang tšebeletso ea tšimo e le moroalo le ho ba teng libokeng ho tena. Hona ke ho ka etsahalang haeba re khaotsa ho tšaba Jehova, ho tsamaeang le lerato la rōna ho eena.

19. Re ka tsoela pele ho bontša kananelo ea rōna bakeng sa litokisetso tsa Jehova joang?

¹⁹ Ho ipoloka re tšaba Jehova ho tla re boloka re ikokobelitse ka pele ho eena ’me kamehla re ananela sohle seo a re etsetsang sona. Ho sa tsotellehe hore na re kopanong e nyenyane lapeng, kapa re kopanong e khōlō ea ba mashome a likete lebaleng la lipapali, re leboha Jehova ka tokelo ea ho ba ’moho le baena ba rōna ba Bakreste. Re tla bontša teboho ea rōna ka ho ba teng moo le ka ho susumelletsa ba bang ba teng “leratong le mesebetsing e metle” ka meqoqo ea rōna e hahang le ka likarabelo tseo re li etsang nakong ea liboka. (Ba-Heberu 10:24, 25) Haeba re ka ba le tokelo ea ho nka karolo libokeng, re tla qoba ho behella tokisetso morao ho fihlela motsotsong oa ho qetela, re se re khobokanya ka lepotla-potla likhopolo tse itseng. Le ka mohla u se tšoare likabelo tse joalo joaloka ntho’a-mehla. Ke litokelo tse halalelang, ’me tsela eo re li tšoarang ka eona ke tsela e ’ngoe ea ho bontša kamoo re hlonephang le ho tšaba Jehova.

20. (a) Re tlameha hore le ka mohla re se lebale eng? (b) Re fihlela qeto efe?

²⁰ Phello ke e bohloko hakaakang ho bao ba khaotsang ho tšaba Molimo! Ba haelloa ke kananelo bakeng sa tokelo e sa tšoanelang ea ho ba le kamano le ’Musi oa Bokahohleng. “Ke Morena e moholo, ho bolela Jehova oa makhotla, ’me lebitso la ka le tšabeha har’a lichaba.” (Malakia 1:14; Tšenolo 15:4) E se eka le ka mohla re ke ke ra lebala hoo. E se eka e mong le e mong oa rōna a ka tšoana le mopesaleme ea itseng: “Ke tloaelane le bohle ba u tšabang.” (Pesaleme ea 119:63) Kamor’a ho nahanisisa ka taba ena re fihlela qeto e tšoanang le eo Salomone a ileng a e fihlela ha a re: “Tšaba Molimo, u boloke litaelo tsa oona, hobane, ke eona tšoanelo eohle ea motho; hobane Molimo o sa tla isa mesebetsi eohle kahlolong, le tse patiloeng kaofela, leha e le tse ntle, leha e le tse mpe.”—Moeklesia 12:13, 14.

Lithuto tse tsoang Bukeng ea Malakia—

◻ Ke hobane’ng ha Baiseraele ba ne ba tlameha ho tšaba Jehova?

◻ Liketso tsa rōna li bontša joang hore na re tšaba Jehova e le kannete kapa che?

◻ Ke eng e pakang hore ho na le ba tšabang Jehova lefatšeng ka bophara kajeno?

◻ Ke hobane’ng ha re lokela ho ipoloka re tšaba Molimo ka ho loketseng?

Ntlha e Qolotsoeng e leqepheng la 18]

Ho tloha bochaba-tsatsi ho isa bophirima-tsatsi, lebitso la Jehova le tla phahamisoa

[Setšoantšo se leqepheng la 17]

Baiseraele ba ile ba nyelisa Jehova ka ho nehelana ka liphoofolo tsa lifofu, tsa lihlotsa, kapa tse kulang e le mahlabelo