“Jehova a ke ke a Lahla Batho ba Hae”
“Mahlomola a ea lokileng a mangata; empa Jehova o mo ntša ho ’ona kaofela.”—PESALEME EA 34:19.
1, 2. (a) Jehova o hlohonolofatsa batho ba hae joang kajeno? (b) Bakreste ba bangata ba tobane le eng, ’me ho hlaha lipotso life?
PHETHAHATSONG ea boprofeta ba Bibele, barapeli ba Jehova ba lula paradeiseng ea moea. (2 Bakorinthe 12:1-4) Lipaki tsa Jehova ke litho tsa mokhatlo oa machaba o khetholloang ka lerato le bonngoe. (Johanne 13:35) Li na le tsebo e tebileng le e pharaletseng ea linnete tsa Bibele. (Esaia 54:13) Li leboha Jehova hakaakang hore ebe o li fa tokelo ea ho ba baeti tenteng ea hae ea moea!—Pesaleme ea 15:1.
2 Le hoja bohle mokhatlong o hlophisitsoeng oa Jehova ba atlehile moeeng, ho bonahala hore ba bang ba phela ka tsela eo ha ho bapisoa e leng e nang le khotso le khutso ha ba bang ba oeloa ke mahlomola a mofuta o mong o itseng. Bakreste ba bangata ba iphumana ba le boemong bo bohloko ka linako tse telele ’me ho se tšepo ea hore ba tla lopoloha haufinyane. Ke ha tlhaho hore motho a nyahame tlas’a maemo a joalo. (Liproverbia 13:12) Na litlokotsi ke bopaki ba ho se amoheloe ke Molimo? Na Jehova o fana ka tšireletseho e khethehileng ho Bakreste ba bang ha a lahla ba bang?
3. (a) Na Jehova oa ikarabella bakeng sa mahlomola ao batho ba hae ba fetang ho ’ona? (b) Ke hobane’ng haesita le barapeli ba Jehova ba tšepahalang ba utloa bohloko?
3 Bibele ea araba: “Ha a le tlas’a teko, a ho se ke ha e-ba le ea mong ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe leha e le hore eena ka boeena o leka leha e le mang ka tsona.” (Jakobo 1:13) Jehova ke Mosireletsi le Motšehetsi oa batho ba hae. (Pesaleme ea 91:2-6) “Jehova a ke ke a lahla batho ba hae.” (Pesaleme ea 94:14, NW) Sena ha se bolele hore barapeli ba tšepahalang ba ke ke ba utloa bohloko. Tsamaiso ea lefatše ea lintho ea hona joale e busoa ke batho bao ka tlhaho ba sa phethahalang. Ba bangata ba senyehile, ’me ba seng bakae ba khopo ka ho feletseng. Ha ho le ea mong oa bona ea talimang ho Jehova bakeng sa bohlale. Sena se fella ka hore batho ba utloe bohloko haholo. Bibele e hlakisa hore hase kamehla batho ba Jehova ba ka qobang liphello tse bohloko tsa ho se phethahale ha botho le bokhopo.—Liketso 14:22.
Bakreste ba Tšepahalang ka ho sa Sekisetseng ba Lebeletse ho Utloa Bohloko
4. Bakreste bohle ba ka lebella eng hafeela ba ntse ba phela tsamaisong ee e khopo ea lintho, hona hobane’ng?
4 Le hoja e se karolo ea lefatše, balateli ba Jesu ba phela tsamaisong ena ea lintho. (Johanne 17:15, 16) Bibele e bontša hore Satane ke matla a laolang lefatše lena. (1 Johanne 5:19) Kahoo, Bakreste bohle ba ka lebella hore nakong e tlang e sa tsejoeng, ba tobane le mathata a tebileng. A hopotse seo, moapostola Petrose o re: “Lulang le hlaphohetsoe likelellong, le lebele. Mohanyetsi oa lōna, Diabolose, o tsamaea joaloka tau e purumang, e batlang ho harola e mong. Empa emang khahlanong le eena, le tiile tumelong, le tseba hore lintho tse tšoanang mabapi le litlhokofatso li ntse li phethahala mokhatlong oohle oa barab’abo lōna lefatšeng.” (1 Petrose 5:8, 9) E, mokhatlo oohle oa Bakreste o ka lebella ho utloa bohloko.
5. Jesu o ile a hlakisa joang hore Bakreste ba tšepahalang ba tla tobana le lintho tse bohloko bophelong?
5 Esita le haeba re rata Jehova ka ho teba re bile re tšepahalla melao-motheo ea hae ka ho sa sekisetseng, re tla thulana le lintho tse bohloko bophelong. Jesu o ile a hlakisa sena papisong ea hae e tlalehiloeng ho Matheu 7:24-27, moo a ileng a bontša phapang pakeng tsa ba mamelang mantsoe a hae le ba sa a mameleng. O ile a bapisa barutuoa ba mamelang le motho ea masene ea hahang ntlo ea hae holim’a lefika. Ba sa mameleng mantsoe a hae o ile a ba tšoantša le monna oa leoatla ea hahang ntlo ea hae lehlabatheng. Ka mor’a sefefo se matla, ke ntlo e hahiloeng holim’a lefika feela e pholohang. Hlokomela hore tabeng ea ntlo ea monna ea masene, “pula ea tšoloha le meroallo ea tla ’me meea ea foka eaba e otla ntlo eo, empa ha ea ka ea heleha.” Jesu ha aa ka a tšepisa hore monna ea masene o ne a tla thabela khotso le khutso kamehla. Ho e-na le hoo, masene a monna eo a ne a tla mo lokisetsa ho mamella sefefo. Ho fanoa ka maikutlo a tšoanang papisong ea mojali. Ho eona Jesu o hlalosa hore esita le barapeli ba mamelang “ka pelo e ntle le e molemo” ba ne ba tla “beha litholoana ka mamello.”—Luka 8:4-15.
6. Papisong ea Pauluse ea thepa e sa cheng, ke bo-mang ba fetang tekong e kang mollo?
6 Ha a ngolla Bakorinthe, moapostola Pauluse o ile a sebelisa puo ea tšoantšetso ho bontša bohlokoa ba litšoaneleho tse tšoarellang tse ka re thusang ho tobana le liteko. Thepa e sa cheng e kang khauta, silevera le majoe a bohlokoa e tšoana le litšoaneleho tsa bomolimo. (Bapisa le Liproverbia 3:13-15; 1 Petrose 1:6, 7.) Ka lehlakoreng le leng, litšoaneleho tsa nama li tšoantšoa le thepa e chang. Joale Pauluse o re: “Mosebetsi oa e mong le e mong o tla bonahala, etsoe letsatsi le tla o bonahatsa, hobane o tla senoloa ka mollo; ’me mollo ka booona o tla paka hore na mosebetsi oa e mong le e mong ke oa mofuta ofe. Haeba mosebetsi oa mang kapa mang oo a o hahileng holim’a oona o sala, o tla amohela moputso.” (1 Bakorinthe 3:10-14) Le mona, Bibele e hlalosa hore rōna bohle re tla fela re tobane le mofuta o itseng oa teko e kang mollo.
7. Ho ea ka Baroma 15:4, Mangolo a ka re thusa joang ho mamella liteko?
7 Ho na le litlaleho tse ngata ka Bibeleng tsa bahlanka ba Molimo ba tšepahalang ka ho sa sekisetseng ba ileng ba tlameha ho mamella litlokotsi, ka linako tse ling ka nako e telele. Empa, Jehova ha aa ka a ba lahla. Ho ka etsahala hore ebe moapostola Pauluse o ne a hopotse mehlala e joalo ha a ne a re: “Lintho tsohle tse ileng tsa ngoloa nakong e fetileng li ile tsa ngolloa taeo ea rōna, e le hore ka mamello ea rōna le ka matšeliso a tsoang Mangolong re ka ba le tšepo.” (Baroma 15:4) Nahana ka mehlala ea banna ba bararo bao, le hoja ba ne ba e-na le kamano e haufi le Molimo, ba ileng ba thulana le litlokotsi tse ngata.
Seo re Ithutang Sona Litlalehong Tsa Bibele
8. Jehova o ile a lumella eng tabeng ea Josefa, ’me e le ka nako e kae?
8 Mora oa Jakobo, Josefa, o ile a ratoa ke Jehova ho tloha bonyenyaneng. Ho ntse ho le joalo, o ile a oeloa ke litlokotsi tse latellanang a se na molato. O ile a koeteloa a ba a tšoaroa ka sehlōhō ke banab’abo. O ile a rekisoa bokhobeng naheng esele moo a ileng a qosoa ka taba ea bohata ’me a kenngoa “teronkong.” (Genese 40:15) Ha a le moo, “ba mo hlōkōfatsa ka ho mo tlama maoto ka litšepe, ba ’mofa ka mahlaahlela.” (Pesaleme ea 105:17, 18, BPN) Nakong ea bokhoba ba hae le ho kenngoa teronkong, ha ho pelaelo hore Josefa ka makhetlo-khetlo o ile a kōpa hore Jehova a mo lokolle. Empa, ka lilemo tse ka bang 13, le hoja a ile a matlafatsoa ke Jehova ka litsela tse sa tšoaneng, o ile a lula e le lekhoba kapa motšoaruoa letsatsi le letsatsi.—Genese 37:2; 41:46.
9. Davida o ile a tlameha ho mamella eng ka lilemo tse ngata?
9 Taba e tšoanang le eo ke ea Davida. Ha Jehova a ne a khetha monna ea tšoanelehelang ho busa Iseraele, o ile a re: “Ke fumane Davida mora oa Jese, monna ea lumellanang le pelo ea ka.” (Liketso 13:22) Ho sa tsotellehe boemo ba hae bo amohelehang mahlong a Jehova, Davida o ile a feta bohlokong bo boholo. Ha a ne a le kotsing e bolaeang, o ile a ipata ka lilemo tse ngata lefeelleng, mahaheng, mafarung le naheng esele. Ha a ne a tsongoa joaloka sebatana, o ile a nyahama le ho ba le tšabo. Leha ho le joalo, o ile a mamella ka matla a Jehova. Ke ka nepo Davida a neng a ka re ho tsoa phihlelong ea hae: “Mahlomola a ea lokileng a mangata; empa Jehova o mo ntša ho ’ona kaofela.”—Pesaleme ea 34:19.
10. Ke tlokotsi efe e fetisisang e ileng ea oela Nabothe le lelapa la hae?
10 Mehleng ea moprofeta Elija, ho ne ho e-na le ba 7000 feela Iseraeleng ba neng ba sa ka ba khumamela molimo oa bohata Baale. (1 Marena 19:18; Baroma 11:4) Nabothe, eo e ka ’nang eaba e ne e le e mong oa bona, e ile ea e-ba phofu ea ho hloka toka ho tšabehang. O ile a utloisoa bohloko ke tlotlollo ea ho qosoa ka ho nyefola. Ha a fumanoa a le molato, ka taelo ea borena o ile a ahloleloa lefu la ho tlepetsoa ka majoe, ’me mali a hae a ile a nyekoa ke lintja. Esita le bara ba hae ba ile ba bolaoa! Empa, o ne a se molato qosong eo. Lipaki tse neng li le khahlanong le eena li ne li le leshano. Taba eo eohle e ne e le morero o bolotsana o ileng oa etsoa ke Mofumahali Jezebele e le hore morena a ka inkela tšimo ea morara ea Nabothe.—1 Marena 21:1-19; 2 Marena 9:26.
11. Moapostola Pauluse o re bolella eng ka banna le basali ba tšepahalang historing ea Bibele?
11 Josefa, Davida le Nabothe ke banna ba bararo feela ho ba bangata ba tšepahalang bao ho builoeng ka bona ka Bibeleng ba bileng litlokotsing. Moapostola Pauluse o ile a ngola tlaleho ea histori ea bahlanka ba Jehova ho theosa le mehla. Ka har’a eona o buile ka ba ileng ba “amohela teko ea bona ka litšomo le lichapo, ka sebele, ho feta moo, ka litlamo le lichankana. Ba ile ba tlepetsoa ka majoe, ba lekoa, ba sakhoa likoto, ba shoa ka ho bolaoa ka mabifi ka sabole, ba phaila ka matlalo a linku, ka matlalo a lipōli, ha ba ntse ba le bohloking, ba le matšoenyehong, ba le tlas’a tšoaro e mpe; ’me lefatše le ne le sa ba tšoanele. Ba ile ba lelera mahoatateng le lithabeng le mahaheng le maphaong a lefatše.” (Baheberu 11:36-38) Empa Jehova ha aa ka a ba lahla.
Jehova o Tsotella ba Utloang Bohloko
12. Mahlomola a mang ao Lipaki tsa Jehova li fetang ho ’ona kajeno ke afe?
12 Ho thoe’ng ka batho ba Jehova kajeno? Joaloka mokhatlo o hlophisitsoeng, re ka lebella tšireletso ea Molimo le ho sireletseha ho pholletsa le matsatsi a ho qetela le matšoenyeho a maholo. (Esaia 54:17; Tšenolo 7:9-17) Leha ho le joalo, re le batho ka bomong, re hlokomela hore “nako le ketsahalo e sa lebelloang” li oela batho bohle. (Moeklesia 9:11, NW) Kajeno ho na le Bakreste ba bangata ba tšepahalang ba litlokotsing. Ba bang ba mamella bofutsana bo fetisisang. Bibele e bua ka “likhutsana le bahlolohali” ba Bakreste ba leng matšoenyehong. (Jakobo 1:27) Ba bang ba utloa bohloko ka lebaka la likoluoa tsa tlhaho, lintoa, tlōlo ea molao, tšebeliso e mpe ea matla, ho kula le lefu.
13. Ke liphihlelo life tse boima tse tlalehiloeng haufinyane?
13 Ka mohlala, litlalehong tsa tsona tsa 1996 tse eang ho Sehlopha se Busang sa Lipaki tsa Jehova, liofisi tsa makala tsa Watch Tower li ile tsa bolela hore ba bang ba bara le barali babo rōna ba kenngoa literonkong maemong a sisimosang ka lebaka la ho khomarela ha bona melao-motheo ea Bibele. Liphutheho tse tharo naheng ea Amerika Boroa li ile tsa koaloa ha lihlopha tsa likhukhuni li ne li qobella Lipaki tse makholo ho tloha sebakeng seo. Naheng e ’ngoe ea Afrika Bophirimela, Lipaki tse ling tse ileng tsa tšoaseha qhoebeshanong ea ntoa ea lehae li ile tsa bolaoa. Naheng e ’ngoe ea Amerika Bohareng, boemo ba lichelete ba barab’abo rōna ba bang bo seng bo ntse bo le bobe bo ile ba mpefatsoa le ho feta ke tlhaselo ea leholiotsoana. Libakeng tse ling moo e ka ’nang eaba bofutsana le khaello ea lijo hase mathata a tebileng, litšusumetso tse fosahetseng li ka ’na tsa senya thabo ea ba bang. Ba bang ba hateletsoe ke likhatello tsa bophelo ba kajeno. Ka lebaka la ho hloka thahasello ha batho ka kakaretso, ba bang hape ba ka ’na ba ikutloa ba nyahame ha ba bolela litaba tse molemo tsa ’Muso.
14. (a) Re ithuta eng mohlaleng oa Jobo? (b) Ho e-na le ho ba le monahano o fosahetseng, re lokela ho etsa eng ha re thulana le tsieleho?
14 Maemo ana ha aa lokela ho nkoa e le bopaki ba ho se amoheloe ke Molimo. Hopola taba ea Jobo le mahlomola a mangata ao a ileng a feta ho ’ona. E ne e le “motho . . . ea tsamaeang ka ho loka le ka bokhabane.” (Jobo 1:8) E tlameha ebe Jobo o ile a ikutloa a nyahame hakaakang ha Elifaze a mo qosa ka hore o entse phoso! (Jobo, khaolo ea 4, 5, 22) Ha re batle ho potlakela ho etsa qeto ea hore re oeloa ke litlokotsi hobane re soetsitse Jehova ka tsela e itseng kapa hobane Jehova a hutse tlhohonolofatso ea hae. Ha re tobane le matšoenyeho, monahano o fosahetseng o ka fokolisa tumelo ea rōna. (1 Bathesalonika 3:1-3, 5) Ha re tsielehile, ho molemo ka ho fetisisa ho nahanisisa ka ’nete ea hore Jehova le Jesu ba haufi le ba lokileng ho sa tsotellehe hore na ho etsahala eng.
15. Re tseba joang hore Jehova o amehile ka ho teba ka litlokotsi tseo batho ba hae ba fetang ho tsona?
15 Moapostola Pauluse oa re tiisetsa ha a re: “Ke mang ea tla re arohanya le lerato la Kreste? Na e tla ba matšoenyeho kapa mahlomola kapa mahloriso kapa tlala kapa tlhobolo kapa kotsi kapa sabole? . . . Ke kholisehile hore leha e le lefu kapa bophelo kapa mangeloi kapa mebuso kapa lintho tse teng hona joale kapa lintho tse tlang ho tla kapa matla kapa bophahamo kapa botebo kapa pōpo leha e le efe e ’ngoe ha li na ho khona ho re arohanya le lerato la Molimo le leng ho Kreste Jesu Morena oa rōna.” (Baroma 8:35, 38, 39) Jehova o amehile ka ho tebileng ka rōna ’me oa elelloa ha re utloa bohloko. Ha e sa ntse e le mophaphathehi, Davida o ile a ngola: “Mahlo a Jehova a ntse a talimile ba lokileng, litsebe tsa hae li bulehetse mehoo ea bona. Jehova o haufi le ba pelo tse robehileng.” (Pesaleme ea 34:15, 18; Matheu 18:6, 14) Ntate oa rōna oa leholimo oa re tsotella ’me o hauhela ba utloang bohloko. (1 Petrose 5:6, 7) O fana ka seo re se hlokang bakeng sa ho mamella, ho sa tsotellehe bohloko boo ebang rea bo utloa.
Limpho Tsa Jehova Lia re Tšehetsa
16. Ke tokisetso efe e tsoang ho Jehova e re thusang ho mamella, hona joang?
16 Le hoja re ke ke ra lebella bophelo bo se nang mahlomola tsamaisong ena ea lintho ea khale, “ha rea tloheloa kherehloa.” (2 Bakorinthe 4:8, 9) Jesu o tšepisitse ho fa balateli ba hae mothusi. O itse: “Ke tla kōpa Ntate ’me o tla le fa mothusi e mong hore a be le lōna ka ho sa feleng, moea oa ’nete.” (Johanne 14:16, 17) Ka Pentekonta ea 33 C.E., moapostola Petrose o ile a bolella bamameli ba hae hore ba ne ba ka amohela “mpho e sa lefelloeng ea moea o halalelang.” (Liketso 2:38) Na moea o halalelang oa re thusa kajeno? E! Matla a sebetsang a Jehova a re fa litholoana tse babatsehang: “Lerato, thabo, khotso, tiisetso, mosa, molemo, tumelo, bonolo, boitšoaro.” (Bagalata 5:22, 23) Tsena tsohle ke litšoaneleho tsa bohlokoa tse re thusang ho mamella.
17. Linnete tse ling tsa Bibele tse matlafatsang tumelo ea rōna le boikemisetso ba rōna ba ho letela Jehova ka mamello ke life?
17 Moea o halalelang o boetse o re thusa ho utloisisa hore matšoenyeho a hona joale ke a “motsotsoana hape a . . . bobebe” ha a bapisoa le moputso oa bophelo bo sa feleng. (2 Bakorinthe 4:16-18) Re kholisehile hore Molimo a ke ke a lebala mesebetsi ea rōna le lerato leo re mo bontšang lona. (Baheberu 6:9-12) Ha re bala mantsoe a bululetsoeng a Bibele, re tšelisoa ke mehlala ea bahlanka ba khale ba tšepahalang ba ileng ba mamella litlokotsi tse ngata empa ba ileng ba phatlalatsoa e le ba thabileng. Jakobo oa ngola: “Barab’eso, nkang e le mohlala oa ho utloisoa bohloko ke bobe le ho sebelisa ho se fele pelo baprofeta, ba ileng ba bua ka lebitso la Jehova. Bonang! Re phatlalatsa ba mameletseng e le ba thabileng.” (Jakobo 5:10, 11) Bibele e tšepisa “matla a ka ’nģane ho se tloaelehileng” ho re thusa ho mamella liteko. Jehova le eena o re hlohonolofatsa ka tšepo ea tsoho. (2 Bakorinthe 1:8-10; 4:7) Ka ho bala Bibele letsatsi le letsatsi le ka ho nahanisisa ka litšepiso tsena, re tla matlafatsa tumelo ea rōna le boikemisetso ba rōna ba ho letela Molimo ka mamello.—Pesaleme ea 42:5.
18. (a) Ho 2 Bakorinthe 1:3, 4, re khothalletsoa ho etsa eng? (b) Balebeli ba Bakreste ba ka ipaka ho ba mohloli oa matšeliso le khatholoho joang?
18 Ho phaella moo, Jehova o re file paradeise ea moea eo ho eona re ka thabelang lerato la sebele la bara le barali babo rōna ba Bakreste. Kaofela re na le karolo eo re lokelang ho e phetha ea ho tšelisana. (2 Bakorinthe 1:3, 4) Balebeli ba Bakreste ka ho khetheha e ka ba mohloli o ka sehloohong oa matšeliso le khatholoho. (Esaia 32:2) Joaloka “limpho tseo e leng banna,” ba laetsoe ho haha ba utloang bohloko, ho ‘bua ka mokhoa o tšelisang le lisoule tse tepeletseng maikutlo’ le ho ‘tšehetsa ba fokolang.’ (Baefese 4:8, 11, 12; 1 Bathesalonika 5:14) Baholo ba khothalletsoa ho sebelisa limakasine tsa Molula-Qhooa le Tsoha! hamolemo, esita le lingoliloeng tse ling tseo “lekhoba le tšepahalang le le masene” le fanang ka tsona. (Matheu 24:45-47) Tsena li fupere letlotlo la keletso e ngata e thehiloeng Bibeleng e ka re thusang ho rarolla—esita le ho thibela—mathata a mang a etsang hore re tšoenyehe. E se eka re ka etsisa Jehova ka ho tšelisana le ho khothatsana linakong tse thata!
19. (a) Ke’ng se re thusang ho qoba mahlomola a mang? (b) Ha e le hantle, re lokela ho tšepa mang, ’me ke’ng se tla re nolofalletsa ho tobana le liteko?
19 Ha re ntse re kenella hare matsatsing a ho qetela ’me maemo a ntse a mpefala le ho feta tsamaisong ea hona joale ea lintho, Bakreste ba etsa sohle seo ba ka se khonang ho qoba litlokotsi. (Liproverbia 22:3) Kahlolo e molemo, ho hlaphoheloa kelellong le tsebo ea melao-motheo ea Bibele li ka re thusa ho etsa liqeto tse bohlale. (Liproverbia 3:21, 22) Re mamela Lentsoe la Jehova ’me rea le utloa e le hore re qobe ho etsa liphoso tse sa hlokahaleng. (Pesaleme ea 38:4) Leha ho le joalo, rea hlokomela hore ha ho na tekanyo leha e le efe ea boiteko ka lehlakoreng la rōna e ka felisang bohloko ka ho feletseng bophelong ba rōna. Tsamaisong ena ea lintho, ba bangata ba lokileng ba tobana le mahlomola a matla. Leha ho le joalo, re ka sebetsana le liteko tsa rōna re kholisehile ka ho feletseng hore “Jehova a ke ke a lahla batho ba hae.” (Pesaleme ea 94:14, NW) ’Me rea tseba hore tsamaiso ena ea lintho le mahlomola a eona li tla fela haufinyane. Ka lebaka leo, e se eka re ka etsa qeto ea hore re se ke ra “tela ho etsa se setle, kaha ka nako e loketseng re tla kotula haeba re sa khathale.”—Bagalata 6:9.
Re Ithutile Eng?
◻ Mokhatlo oohle oa Bakreste o thulana le liteko life?
◻ Ke mehlala efe ea Bibele e re thusang ho utloisisa hore mahlomola hase bopaki ba ho se amoheloe ke Jehova?
◻ Jehova o ikutloa joang ka mahlomola ao batho ba hae ba bang ho ’ona?
◻ Tse ling tsa limpho tse tsoang ho Jehova tse re thusang ho mamella liteko ke life?
[Setšoantšo se leqepheng la 10]
Davida, Nabothe le Josefa ke ba bararo ba ileng ba thulana le litlokotsi