Khaolo ea 1
“U be Molateli oa ka”—Jesu o ne a Bolela’ng?
1, 2. Ke memo efe e ikhethang ka ho fetisisa eo motho a ka e fuoang, hona re ka ’na ra ipotsa potso efe?
KE MEMO efe e ikhethang ka ho fetisisa eo u kileng ua e fumana? U ka ’na ua nahana ka nako eo u neng u memeloa ketsahalong e itseng e khethehileng, mohlomong lechatong la batho bao u ba ratang haholo. Kapa u ka ’na ua hopola mohla u neng u memeloa ho etsa mosebetsi o itseng oa bohlokoa. Haeba u kile ua fuoa memo e joalo, ha ho pelaelo hore u ile ua thaba, ua ba ua ikutloa u le motlotlo. Empa ’nete ke hore u fuoe memo e ’ngoe ea bohlokoa ho feta eo hōle. E mong le e mong oa rōna o fuoe memo eo. Tsela eo re khethang ho arabela memo eo ka eona e re ama ka ho teba. Ke khetho ea bohlokoa ka ho fetisisa eo re tlang ho e etsa bophelong.
2 Ke memo ea eng? Ke memo e tsoang ho Jesu Kreste, e leng Mora ea tsoetsoeng a ’notši oa Molimo ea Matla ’Ohle, Jehova, ’me e tlalehiloe ka Bibeleng. Ho Mareka 10:21, re bala mantsoe a Jesu a reng: ‘Tloo u be molateli oa ka.’ Ha e le hantle, eo ke memo eo Jesu a memang e mong le e mong oa rōna ka eona. Re lokela ho ipotsa, ‘Ke tla arabela memong ee joang?’ Ho ka ’na ha bonahala eka ho bonolo ho araba potso eo. Ke mang ea ka hanang ho amohela memo e thabisang joalo? Ho makatsang ke hore batho ba bangata ha ba e amohele. Hobane’ng?
3, 4. (a) Ke’ng eo batho ba ka ’nang ba e nka e lakatseha ka monna ea ileng a ea ho Jesu ho mo botsa ka taba ea bophelo bo sa feleng? (b) E ka ’na eaba Jesu o ile a bona litšobotsi life tse ntle ho ’musi eo e mocha ea ruileng?
3 Ka mohlala, nahana ka monna e mong ea ileng a fuoa memo eo ka ho toba lilemong tse ka bang 2 000 tse fetileng. E ne e le motho ea hlomphehang haholo. Bonyane o ne a e-na le lintho tse tharo tseo batho ba atisang ho li nka li rateha, li bile li lakatseha—o ne a le mocha, a ruile a bile a e-na le matla a bolaoli. Tlaleho ea Bibele e re e ne e le “mohlankana,” “a ruile haholo,” ebile e le “’musi.” (Matheu 19:20; Luka 18:18, 23) Empa mohlankana enoa o ne a boetse a e-na le tšobotsi e ’ngoe ea bohlokoa. O ne a utloetse ka Mosuoe e Moholo, Jesu, ’me a ratile seo a se utloileng.
4 Babusi ba bangata ba mehleng eo ba ne ba sa fe Jesu tlhompho e mo tšoanetseng. (Johanne 7:48; 12:42) Empa ’musi enoa eena o ile a etsa se fapaneng. Bibele e re: “Eare ha [Jesu] a tsamaea, monna ea itseng a matha ’me a oa ka mangole ka pel’a hae a mo botsa potso ena: ‘Mosuoe ea Molemo, ke etse’ng hore ke rue bophelo bo sa feleng?’” (Mareka 10:17) Hlokomela kamoo monna enoa a neng a chesehela ho bua le Jesu kateng, o mo mathela pooaneng, ka tsela eo e ka ’nang eaba mafutsana le batho ba bang ba maemo a tlaase le bona ba ne ba mo mathela ka eona. Ho feta moo, o khumama ka tlhompho ka pel’a Kreste. Kahoo, o ne a ikokobelitse ka tsela e itseng a bile a ela hloko hore ho na le seo a se hlokang moeeng. Jesu o ile a ananela litšobotsi tseo tse ntle. (Matheu 5:3; 18:4) Ha ho makatse hore ebe ‘Jesu o ile a mo sheba ’me a ikutloa a mo rata.’ (Mareka 10:21) Jesu o ile a re’ng ha a araba potso ea mohlankana eo?
Memo e Ikhethang
5. Jesu o ile a re’ng ha a arabela mohlankana ea ruileng, hona re tseba joang hore “ntho e le ’ngoe” e haellang e ne e se hore e be mofutsana? (Bona le mongolo o botlaaseng ba leqephe.)
5 Jesu o ile a bontša hore Ntate oa hae o ne a se a ntse a fane ka boitsebiso tabeng ea bohlokoa e mabapi le ho fumana bophelo bo sa feleng. O ile a qotsa Mangolo, ’me mohlankana eo a tiisa hore o latela Molao oa Moshe ka botšepehi. Empa kaha Jesu o na le temohisiso e ikhethang, o ile a hlokomela ntlha e ’ngoe e tebileng. (Johanne 2:25) O ile a hlokomela hore ’musi enoa o na le bothata bo itseng bo tebileng moeeng. Kahoo, Jesu o ile a re: “Ho haella ntho e le ’ngoe ho uena.” Ke efe “ntho e le ’ngoe” e neng e haella? Jesu o ile a re: “E-ea, u rekise lintho tseo u nang le tsona ’me u fe mafutsana.” (Mareka 10:21) Na Jesu o ne a bolela hore motho e lokela ho ba mofutsana e le hore a sebeletse Molimo? Che.a Kreste o ne a senola ntlha e ’ngoe ea bohlokoa haholo.
6. Jesu o ile a fana ka memo efe, hona tsela eo ’musi e mocha ea ruileng a ileng a arabela ka eona e senola eng ka se neng se le pelong ea hae?
6 Ho senola se neng se haella, Jesu o ile a fa monna eo monyetla o babatsehang, a re: ‘Tloo u be molateli oa ka.’ Ak’u nahane feela—Mora oa Molimo ea Phahameng ka ho Fetisisa o mema monna eo ba shebane mahlong, hore a mo latele! Jesu o ile a boela a mo tšepisa moputso o ke keng oa lekanngoa. O ile a re: “U tla ba le letlotlo leholimong.” Na ’musi e mocha ea ruileng o ile a amohela memo eo e babatsehang hona hoo? Tlaleho e re: “A nyahamisoa ke polelo eo ’me a tloha a saretsoe, kaha o ne a e-na le matlotlo a mangata.” (Mareka 10:21, 22) Kahoo mantsoe ao a Jesu ao mohlankana enoa a neng a sa a lebella a ile a senola bothata bo neng bo le teng pelong ea hae. O ne a rata matlotlo a hae haholo, ’me ha ho potang hore o ne a bile a rata matla le botumo boo a mo tlisetsang bona. Ka masoabi, lerato leo a neng a rata lintho tseo ka lona le ne le le matla ho feta leo a neng a rata Kreste ka lona. Kahoo “ntho e le ’ngoe” e neng e haella e ne e le ho rata Jesu le Jehova ka pelo eohle le ka boitelo. Kaha mohlankana eo o ne a se na lerato leo, ha aa ka a amohela memo eo e ikhethang! Joale uena u ameha joang?
7. Ke hobane’ng ha re ka kholiseha hore memo ea Jesu ea re akarelletsa le rōna kajeno?
7 Memo ea Jesu e ne e sa lebisoa ho mohlankana eo feela, ebile e ne e sa lebisoa ho batho ba itseng feela ba seng bakae. Jesu o ile a re: “Haeba mang kapa mang a batla ho ntšala morao, a ke a . . . ntatele a sa khaotse.” (Luka 9:23) Hlokomela hore “mang kapa mang” e ka ba molateli oa Kreste hafeela “a batla.” Molimo o hulela ba tšepahalang ho Mora oa hae. (Johanne 6:44) Monyetla ona oa ho amohela memo ea Jesu ha o fuoe barui kapa mafutsana feela, batho ba morabe o itseng kapa ba sechaba se itseng feela, kapa ba neng ba phela mehleng eo, empa o fuoa bohle. Kahoo mantsoe a Jesu a reng ‘Tloo u be molateli oa ka’ ha e le hantle a lebisitsoe ho uena. Ke hobane’ng ha u lokela ho batla ho ba molateli oa Kreste? Hona ho mo latela ho akarelletsa eng?
Ke Hobane’ng ha U Lokela ho ba Molateli oa Kreste?
8. Batho bohle ba hloka eng, hona hobane’ng?
8 Ho na le ’nete eo re ke keng ra iphapanyetsa eona: Re hloka boeta-pele bo molemo ka tieo. Hase batho bohle ba lumelang hore baa bo hloka, empa leha ho le joalo baa bo hloka. Moprofeta oa Jehova ea bitsoang Jeremia o ile a bululeloa hore a tlalehe ’nete ena e ke keng ea fetoha: “Ke tseba hantle, Jehova, hore tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.” (Jeremia 10:23) Batho ha ba na matla a ho ipusa ebile ha ba na tokelo ea ho etsa joalo. Ha e le hantle, karolo e khōlō ea histori ea batho ke tlaleho ea boeta-pele bo sa jeseng litheohelang. (Moeklesia 8:9) Mehleng ea Jesu, baeta-pele ba ne ba hatella batho, ba ba hlekefetsa ba bile ba ba khelosa. Jesu o ile a hlokomela hore batho feela ba tloaelehileng ba “joaloka linku tse se nang molisa.” (Mareka 6:34) Hoa tšoana le kajeno. Re le batho ka bomong le ha re le sehlopha, re hloka boeta-pele boo re ka bo tšepang le ho bo hlompha. Na Jesu ke moeta-pele eo re ka mo tšepang le ho mo hlompha? Hlokomela mabaka a ’maloa a etsang hore re re Jesu ke moeta-pele ea joalo.
9. Ke’ng e khethollang Jesu ho baeta-pele ba bang bohle?
9 Lebaka la pele, Jesu o khethiloe ke Jehova Molimo. Baeta-pele ba bangata ba batho ba khethiloe ke batho ba bang ba sa phethahalang, bao hangata ba thetsitsoeng ba bileng ba etsang liqeto tse fosahetseng. Jesu ke moeta-pele ea fapaneng. Le tlotla eo a bitsoang ka eona e bontša seo. Lentsoe “Mesia” joaloka lentsoe “Kreste” le bolela “Motlotsuoa.” Ha e le hantle, ’Musi Morena oa bokahohle ke eena ea tlotsitseng Jesu, kapa a mo khethela boemo ba hae bo khethehileng. Jehova Molimo o ile a re ka Mora oa hae: “Bonang! Mohlanka oa ka eo ke mo khethileng, moratuoa oa ka, eo moea oa ka o mo amohetseng! Ke tla beha moea oa ka holim’a hae.” (Matheu 12:18) Ke ’Mōpi oa rōna feela ea tsebang hantle hore na re hloka moeta-pele ea joang. Bohlale ba Jehova ke bo ke keng ba lekanngoa, kahoo re na le lebaka le utloahalang la ho tšepa eo a mo khethileng.—Liproverbia 3:5, 6.
10. Ke hobane’ng ha mohlala oa Jesu e le o molemo ka ho fetisisa oo batho ba ka o latelang?
10 La bobeli, Jesu o re behetse mohlala o phethahetseng le o susumetsang. Moeta-pele ea ipabolang o na le litšobotsi tse khahlang bafo ba hae tseo ba ka li etsisang. O etella pele ka mohlala, o susumelletsa ba bang hore ba ntlafatse botho ba bona. Ke litšobotsi life tseo u li ananelang ka ho khetheha ho ’musi? Na ke sebete? Bohlale? Qenehelo? Ho thoe’ng ka mamello ha ho nyolosetsa? Ha u ntse u ithuta tlaleho ea bophelo ba Jesu lefatšeng, u tla hlokomela hore o ne a e-na le litšobotsi tseo—le tse ling tse ngata. Jesu, ea neng a bonahatsa ka ho phethahetseng seo Ntate oa hae oa leholimo a leng sona, o ne a e-na le litšobotsi tsohle tseo Molimo a nang le tsona le hona ka botlalo. E ne e le motho ea phethahetseng ka litsela tsohle. Kahoo re ithuta ho itseng hoo re ka ho etsisang ho sohle seo a neng a se etsa, seo a neng a se bua le maikutlong a hae a tebileng ao a ileng a a senola. Bibele e re o ile a ‘re siela mohlala hore re latele mehato ea hae haufi-ufi.’—1 Petrose 2:21.
11. Jesu o bontšitse joang hore ke “molisa ea khabane”?
11 La boraro, Kreste o ile a phelela sohle seo a se buileng, ha a ne a re: “Ke ’na molisa ea khabane.” (Johanne 10:14) Batho ba mehleng ea Bibele ba ne ba tloaelane haholo le papiso eo. Balisa ba ne ba sebetsa ka thata ho hlokomela linku tse tlhokomelong ea bona. “Molisa ea khabane” o ne a etelletsa boiketlo ba mohlape ka pele ho ba hae. Ka mohlala, ntate-moholo oa Jesu, e leng Davida, e ne e le molisa bocheng ba hae, ’me o ile a ipeha kotsing ka makhetlo a sireletsa linku tsa hae tse neng li hlaseloa ke liphoofolo tse hlaha. (1 Samuele 17:34-36) Jesu o ile a etsetsa balateli ba hae se fetang seo. O ile a ba tella bophelo ba hae. (Johanne 10:15) Ke baeta-pele ba bakae ba nang le moea o joalo oa boitelo?
12, 13. (a) Molisa o tseba linku tsa hae ka kutloisiso efe, hona tsona li mo tseba ka tsela efe? (b) Ke hobane’ng ha u batla ho ba tlas’a boeta-pele ba Molisa ea Khabane?
12 Jesu e bile “molisa ea khabane” ka tsela e ’ngoe hape. O ile a re: “Ke tseba linku tsa ka le linku tsa ka lia ntseba.” (Johanne 10:14) Ak’u nahane ka boemo bona boo Jesu a bo hlalosang mona. Ho motho feela ea shebeletseng, mohlape oa linku o ka ’na oa shebahala eka ke boieane ba linku feela. Empa molisa eena o tseba nku e ’ngoe le e ’ngoe. Oa tseba hore na ke linku life tseo haufinyane li tla hloka thuso ea hae ha li tsoala, ke likonyana life tseo ho ntseng ho hlokahala hore a li jare hobane li sa le nyenyane ebile li sa fokola hoo li ke keng tsa tsamaea nako e telele le hore na ke linku life tse sa tsoa kula kapa tse lemetseng. Linku le tsona li tseba molisa oa tsona. Li tseba lentsoe la hae, ha li le fapanye le la molisa leha e le ofe e mong. Ha li utloa a li bitsa ka tsela e li lemosang, li arabela ka potlako. Ha a tsamaea, lia mo latela. ’Me le eena o tseba moo a lokelang ho li isa teng. O tseba moo makhulo a leng matala le moo ho nang le melatsoana ea metsi a hloekileng, moo ho sireletsehileng. Ha a ntse a li lisitse, linku li ikutloa li sireletsehile.—Pesaleme ea 23.
13 Na ha u labalabele ho ba le moeta-pele ea joalo? Molisa ea Khabane o tsebahala ka ho tšoara balateli ba hae ka tsela eo e ikhethang. O tšepisa hore o tla u tataisa ho u isa bophelong bo thabileng le bo khotsofatsang hona joale le ka ho sa feleng! (Johanne 10:10, 11; Tšenolo 7:16, 17) Ka hona, re lokela ho tseba hore na ha e le hantle ho latela Kreste ho akarelletsa eng.
Se Boleloang ke ho ba Molateli oa Kreste
14, 15. Hore motho e be molateli oa Kreste, ke hobane’ng ha ho sa lekana hore a ipolele feela hore ke Mokreste kapa hore o rata Jesu?
14 Batho ba limilione tse makholo kajeno ba nka hore ba amohetse memo ea Kreste. Ha e le hantle, ba ipitsa Bakreste. Mohlomong ba kena kereke eo batsoali ba bona ba ba kolobelitseng ho eona. Kapa ba ka ’na ba ipolela hore ba rata Jesu ba bile ba mo amohela e le Mopholosi oa bona. Empa na seo se etsa hore e be balateli ba Kreste? Na ke seo Jesu a neng a se bolela ha a re mema hore re be balateli ba hae? Ho ameha ho eketsehileng.
15 Nahana ka se etsahalang linaheng tseo ho thoeng ke tsa Bokreste—tseo baahi ba tsona ba bangata ba reng ke balateli ba Kreste. Na linaha tseo li bonahatsa seo Jesu Kreste a se rutileng? Kapa na ho e-na le hoo re bona linaheng tseo ho e-na le lehloeo, khatello, tlōlo ea molao le ho hloka toka ho tšoanang feela le hoo re ho bonang likarolong tse ling tsa lefatše? Moeta-pele ea hlomphuoang oa Mohindu, e leng Mohandas Gandhi, o kile a re: “Ha ke tsebe motho e mong ea etselitseng batho se fetang se entsoeng ke Jesu. Ha e le hantle, ha ho letho le phoso ka Bokreste.” O ile a phaella ka ho re: “Ba nang le bothata ke lōna Bakreste. Le hōle le ho phelela seo le se rutang.”
16, 17. Hangata ke’ng e haellang ho ba ipitsang Bakreste, hona ke’ng e khethollang balateli ba Kreste ba sebele?
16 Jesu o ile a re balateli ba hae ba ’nete ba tla tsebahala ka ho khetheha ka seo ba se etsang, eseng ka seo ba se buang kapa seo ba ipitsang sona. Ka mohlala, o ile a re: “Hase e mong le e mong ea reng ho ’na, ‘Morena, Morena,’ ea tla kena ’musong oa maholimo, empa ho tla kena ea etsang thato ea Ntate ea maholimong.” (Matheu 7:21) Ke hobane’ng ha ba bangata hakaale ba reng Jesu ke Morena oa bona ba hlōleha ho etsa thato ea Ntate oa hae? Hopola ’musi eloa e mocha ea ruileng. Hangata ho “haella ntho e le ’ngoe” ho ba ipitsang Bakreste—e leng ho rata Jesu le Ea mo romileng ka moea oohle.
17 Seo se ka etsahala joang? Na batho ba limilione ba ipitsang Bakreste ha ba re ba rata Kreste? Ke ’nete ba rialo. Empa ho rata Jesu le Jehova hase feela taba ea molomo. Jesu o ile a re: “Haeba leha e le mang a nthata, o tla boloka lentsoe la ka.” (Johanne 14:23) A bua e le molisa, o ile a boela a re: “Linku tsa ka li mamela lentsoe la ka, ’me kea li tseba, ’me lia ntatela.” (Johanne 10:27) Ha e le hantle, tsela e ka sehloohong eo re bonahatsang ka eona hore re rata Kreste ke ka seo re se etsang, eseng feela ka seo re se buang kapa kamoo re ikutloang kateng.
18, 19. (a) Ho ithuta ka Jesu ho lokela ho re ama joang? (b) Morero oa buka ee ke ofe, hona e tla thusa bao e seng e le nako joale ba nka hore ke balateli ba Kreste joang?
18 Leha ho le joalo, lintho tseo re li etsang ha li iketsahalle feela tjee. Li senola seo re hlileng re leng sona. Ke sona seo re lokelang ho se ntlafatsa. Jesu o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Ha re tsoela pele ho rua tsebo e nepahetseng ka Jesu re bile re thuisa ka eona, lipelo tsa rōna li tla susumetseha. Lerato la rōna ho eena le tla teba le ho feta, re tla ba le takatso e matla le ho feta ea ho batla ho mo latela letsatsi le leng le le leng.
19 Ona ke oona morero oa buka ena. Sepheo sa eona hase ho akaretsa lintlha tsohle tsa bophelo ba Jesu le tšebeletso ea hae, empa ke ho re thusa hore re bone ka ho hlaka kamoo re ka mo latelang kateng.b E reretsoe ho re thusa hore re itlhahlobe ka Mangolo joalokaha eka re ichebile ka seiponeng ebe rea ipotsa, ‘Na ha e le hantle ke latela Jesu?’ (Jakobo 1:23-25) Mohlomong e se e le nako joale u nka hore u nku e tataisoang ke Molisa ea Khabane. Empa na hase ’nete hore ka linako tsohle re ka lula re fumana litsela tseo re ka ntlafatsang ka tsona? Bibele e re phehella ka ho re: “Le ’ne le inonye hore na le tumelong, le ’ne le leke seo le leng sona.” (2 Bakorinthe 13:5) Ka sebele re lokela ho etsa sohle se matleng a rōna hore re leke ho tataisoa ke Molisa ea Khabane, Jesu, eo Jehova a mo khethileng hore a re etelle pele.
20. Re tlil’o tšohla eng khaolong e latelang?
20 E se eka ho ithuta ha hao buka ena ho ka u thusa ho matlafatsa lerato la hao ho Jesu le Jehova. Ha lerato leo le u tataisa bophelong, u tla ba le khotso le khotsofalo ka hohle kamoo ho ka khonehang lefatšeng lena la khale, ’me u tla phelela ho rorisa Jehova ka ho sa feleng ha e le mona a re file Molisa enoa ea Khabane. Ke ’nete hore ho ithuta ha rōna ka Kreste ho lokela ho thehoa motheong o nepahetseng. Ka hona, ke ho loketseng hore ebe Khaolong ea 2 re tla tšohla karolo eo Jesu a e phethang morerong oa Jehova oa bokahohleng.
[Mongolo o botlaaseng ba leqephe]
a Jesu ha aa ka a re motho e mong le e mong ea mo latelang a tele lintho tsohle tseo a nang le tsona. Le hoja a ile a bolela kamoo ho leng thata kateng hore morui a kene ’Musong oa Molimo, o ile a phaella ka ho re: “Lintho tsohle lia khoneha ho Molimo.” (Mareka 10:23, 27) Ha e le hantle, barui ba ’maloa e ile ea e-ba balateli ba Kreste. Ba ile ba fuoa keletso e tobileng ka phuthehong ea Bokreste, empa ha baa ka ba kōpuoa hore ba fe mafutsana maruo ’ohle a bona.—1 Timothea 6:17.
b Ho fumana boitsebiso bo feletseng mabapi le tatellano ea liketsahalo tse etsahetseng bophelong ba Jesu le tšebeletsong ea hae, bona buka ea Motho e Moholo ka ho Fetisisa ea Kileng a Phela, e hatisitsoeng ke Lipaki Tsa Jehova.
[Lebokose le leqepheng la 13]
Memo e Tsoang ho Mora oa Molimo ea Tsoetsoeng a ’Notši
A re nke hore Jesu o u mema ka ho toba hore u etse se latelang. U ne u tla arabela joang, hona hobane’ng?
“E-ba molateli oa ka.”—Matheu 9:9; Luka 9:59; Johanne 1:43.
“Haeba mang kapa mang a batla ho ntšala morao, a ke a itatole ’me a nke thupa ea hae ea tlhokofatso a ntatele a sa khaotse.”—Matheu 16:24.
“Tloong ho ’na, lōna bohle ba sehlang le ba imetsoeng, ’me ke tla le khatholla. Jarang joko ea ka ’me le ithute ho ’na.”—Matheu 11:28, 29.
“Haeba leha e le mang a nyoriloe, a ke a tle ho ’na ’me a noe.”—Johanne 7:37.
[Setšoantšo se leqepheng la 4]
“Ke etse’ng hore ke rue bophelo bo sa feleng?”