Jesu Bophelo le Tšebeletso Tsa Hae

O Patoa ka Labohlano, ka Sontaha Lebitla ha le na Letho

HONA joale ke Labohlano motšehare oa mantsiboea o moholo, ’me Sabbatha ea Nisane 15 e tla qala ka shoalane. Setopo sa Jesu se lepelletse se se na matla thupeng, empa linokoane tse peli tse ka mahlakoreng a hae li sa ntse li phela. Motšehare oa mantsiboea a Labohlano o bitsoa Hlekelo hobane ke nako eo ka eona batho ba lokisang lijo le ho qetella mesebetsi eohle e tlamang e ke keng ea ema ho fihlela ka mor’a Sabbatha.

Sabbatha e tla tloha e qala hase Sabbatha feela e tloaelehileng (letsatsi la bosupa bekeng) empa e boetse ke Sabbatha e habeli, kapa e ‘khōlō.’ E bitsoa tjena hobane Nisane 15 e leng letsatsi la pele la Mokete oa Mahobe a sa Lomosoang oa matsatsi a supileng (’me ka mehla ke Sabbatha, ho sa tsotellehe hore na e tla letsatsing lefe la beke), e ba letsatsing le tšoanang le la Sabbatha e tloaelehileng.

Ho ea ka molao oa Molimo, litopo ha lia tšoanela ho tloheloa li fanyehiloe thupeng bosiu kaofela. Kahoo Bajode ba kōpa Pilato hore lefu la ba ahlotsoeng le akofisoe ka ho roba maoto a bona. Kahoo, masole, a roba maoto a linokoane tse peli. Empa kaha Jesu o bonahala a shoele, maoto a hae ha a rojoe. Hona ho phethahatsa lengolo le reng: “Ha ho lesapo la hae le tlang ho rojoa.”

Leha ho le joalo, ho tlosa pelaelo efe kapa efe ea hore ebe na Jesu o fela a shoele, le leng la masole le mo hlaba ka lerumo lehlakoreng. Lerumo le mo phohlotsa lehlakoreng pel’a pelo, ’me hang-hang ho tsoa mali le metsi. Moapostola Johanne, eo e leng paki e boneng ka mahlo, o tlaleha hore sena se phethahatsa lengolo le leng: “Ba tla bona eo ba mo hlabileng.”

Josefa ea hlahang motseng oa Arimathea, setho se hlomphehang sa Sanhedrin, le eena o ne a le teng sebakeng seo sa polao. O hanne ho tšehetsa khato e sa lokang ea lekhotla le phahameng khahlanong le Jesu. Ha e le hantle Josefa ke morutuoa oa Jesu, le hoja a ile a tšaba ho itsebahatsa e le eena. Leha ho le joalo, hona joale, o sebete ’me o ea ho Pilato ho kōpa setopo sa Jesu. Pilato o laela molaoli oa sesole ea ikarabellang, ’me ka mor’a hore molaoli a tiise hore Jesu o shoele, Pilato o nehelana ka setopo.

Josefa a nka setopo ’me o se phuthela ka line e ntle e hloekileng e le ho se lokisetsa lepato. O thusoa ke Nikodema, setho se seng sa Sanhedrin. Nikodema le eena o hlōlehile ho bolela tumelo ea hae ho Jesu ka lebaka la ho tšaba ho lahleheloa ke boemo ba hae. Empa joale o tlisa sephutheloana se nang le lipondo tse lekholo tsa Roma (lik’hilogramo tse 33) tsa mira le makhala a theko e boima. Setopo sa Jesu se phutheloa ka masela ana a nang le linōko tsena, ka tsela e tšoanang hantle le eo Bajode ba tloaetseng ho lokisa litopo bakeng sa lepato ka eona.

Joale setopo se robatsoa lebitleng la khopotso le lecha la Josefa le chekiloeng lefikeng tšimong e haufi. Qetellong, lejoe le leholo le phikolosetsoa ka pel’a lebitla. E le hore ba ka phetha lepato pele ho Sabbatha, ho lokisa setopo hoa potlakisoa. Kahoo, Maria Magdalena le Maria ’m’a Jakobo e Monyenyane, bao mohlomong ba neng ba ntse ba thusa ka litokisetso, ba potlakela hae ho lokisa linōko tse eketsehileng le oli tse nkhisitsoeng hamonate. Morero oa ho hlokomela setopo sa Jesu hore se tšoarelle nako e telele o tsoela pele, ka mor’a Sabbatha.

Letsatsing le latelang, leo e leng Moqebelo (Sabbatha), baprista ba baholo le Bafarisi ba ea ho Pilato ’me ba re: “Morena, re sa hopola hobane mothetsi eo, ha a sa phela, o na a re: Ke tla tsoha ka letsatsi la boraro. Ka baka leo, ak’u laele hore lebitla le tiisoe, letsatsi la boraro le be le chabe, esere mohlomong barutuoa ba hae ba mo utsoa, ’me ba re ho sechaba: O tsohile bafung; leshano leo la ho fela le ne le tla fetisa la pele.”

Pilato oa arabela: “Le na le balebeli; e-eang, le tiise kamoo le tsebang.” Kahoo ba ea ’me ba tiisa lebitla ka ho le koala ka lejoe le ho bea masole a Roma joaloka balebeli.

Sontaha hoseng haholo Maria Magdalena, Maria ’m’a Jakobo, hammoho le Salome, Joanna le basali ba bang, ba tlisa linōko lebitleng ho tlotsa ’mele oa Jesu. Ha ba le tseleng baa botsana: “Ke mang ea tla re phikolosetsa lejoe, ho le tlosa monyako oa lebitla?” Empa ha ba fihla, ba fumana hore tšisinyeho ea lefatše e etsahetse ’me lengeloi la Jehova le phikolositse lejoe. Balebeli ba tsamaile, ’me lebitla ha le na letho! Mattheu 27:57–28:2; Mareka 15:42–16:4; Luka 23:50–24:3, 10; Johanne 19:31–20:1; 19:14; 12:42; Levitike 23:5-7; Deuteronoma 21:22, 23; Pesaleme ea 34:20; Zakaria 12:10.

◆ Ke hobane’ng ha Labohlano le bitsoa Hlekelo, ’me Sabbatha e ‘khōlō’ ke eng?

◆ Ke mangolo afe a phethahatsoang mabapi le ’mele oa Jesu?

◆ Josefa le Nikodema ba ameha joang lepatong la Jesu, ’me kamano ea bona le Jesu ke efe?

◆ Baprista ba etsa kōpo efe ho Pilato, ’me o arabela joang?

◆ Ho etsahala eng e sa le hoseng ka Sontaha?