Jesu Bophelo le Tšebeletso tsa Hae
Ho Phekoloa Balepera ba Leshome Leetong la ho Qetela la Jesu Jerusalema
JESU o ferekanya boiteko ba ho ’molaea ba Lekhotla le Phahameng la Bajode ka ho tloha Jerusalema ’me a leba motseng oa Efraime, mohlomong o ka bang lik’hilomithara tse 24 feela ka leboea-bochabela ho Jerusalema. O lula moo le barutuoa ba hae, hōle le lira tsa hae.
Leha ho le joalo, nako ea Paseka ea 33 C.E. ea atamela, ’me kapele Jesu o boetse o leetong. O pholletsa le Samaria ’me o nyolohela Galilea. Ena ke ketelo ea hae ea ho qetela sebakeng sena pele ho lefu la hae. Ha a ntse a le Galilea, mohlomong eena le barutuoa ba hae ba tsamaea le ba bang leetong la bona ho ea Jerusalema bakeng sa mokete oa Paseka. Ba tsamaea ka tsela e fohlang setereke sa Perea, ka bochabela ho Nōka ea Jordane.
Qalong ea leeto, ha Jesu a kena motseng oa Samaria kapa oa Galilea, o khahlanyetsoa ke banna ba leshome ba nang le lepera. Lefu lena le tšabehang le ja butle-butle likarolo tsa ’mele oa motho—menoana ea hae ea letsoho, menoana ea maoto, litsebe tsa hae, nko ea hae, le melomo ea hae. Ho sireletsa ba bang hore ba se tšoaetsoe, Molao oa Molimo o re ka molepera: “A itširele litelu, a hoe: Sesila! sesila! O tla ba le sesila mehleng eohle eo a nang le bohloko boo. . . . ’me o tla aha a inotši.”
Balepera ba leshome ba boloka lithibelo tsa Molao bakeng sa balepera ’me ba emella hōle le Jesu. Empa, ba hoa ka mantsoe a phahamileng: “Jesu, Monghali, re hauhele.”
Ha Jesu a ba bonela hojana, oa laela: “E-eang, le ipontše ho baprista.” Jesu o bolela sena hobane Molao oa Molimo o fa baprista matla a ho phatlalatsa balepera ba folileng bohlokong ba bona e le ba phekotsoeng. Ka tsela ena ba joalo ba fumana tumello ea ho phela hape le batho ba bang ba phelang hantle.
Balepera ba leshome ba tšepa matla a Jesu a mohlolo. Ka hona ba potlakela ho ea bona baprista, le hoja ba ntse ba e-s’o phekoloe. Ha ba le tseleng, tumelo ea bona ho Jesu e-ea putsoa. Ba qala ho bona le ho ikutloa ba e-na le bophelo bo ntlafetseng hape!
Ba robong ho balepera ba hloekisitsoeng ba tsoela pele tseleng ea bona, empa molepera e mong, Mosamaria, o khutla ho ea batla Jesu. Hobane’ng? Hobane o leboha haholo ka se etsahetseng ho eena. O rorisa Molimo ka lentsoe le phahameng, ’me ha a fumana Jesu, o itihela maotong a hae, oa mo leboha.
Ha Jesu a arabela, o re: “Na ha ba ka ba ntlafala ba le leshome na? Ba robileng mono o le mong ba kae na? Ha ba ka ba boea, ba tle ba tlotlise Molimo, ha e se motho enoa oa mofuta osele?”
Joale o bolella Mosamaria: “Ema, u ikele; tumelo ea hao e u pholositse.”
Ha re bala ka ho phekola ha Jesu balepera ba leshome, re lokela ho nka ka ho teba thuto e fanoang ke potso ea hae: “Ba robileng mono o le mong ba kae na?” Ho hloka teboho ho bontšitsoeng ke ba robileng mono o le mong ke phoso e tebileng. Na rōna, joaloka Mosamaria, re tla bontša hore re na le teboho ka lintho tseo re li amohelang ho Molimo, ho akarelletsa le tšepiso e tiileng ea bophelo bo sa feleng lefatšeng le lecha la ho loka la Molimo? Johanne 11:54, 55; Luka 17:11-19; Levitike 13:16, 17, 45, 46; Tšenolo 21:3, 4.
◆ Jesu o ferekanya boiteko ba ho ’molaea joang?
◆ Ka mor’a moo Jesu o leba hokae, ’me leeto la hae le fella hokae?
◆ Ke hobane’ng ha balepera ba emella thokoana, ’me ke hobane’ng ha Jesu a ba bolella hore ba ee ho baprista?
◆ Ke thuto efe eo re lokelang ho ithuta eona phihlelong ee?
[Setšoantšo se tletseng leqephe la 9]