Ho Leta Ka “Tebello e Nang le Taba-tabelo”
“Tebello e nang le taba-tabelo ea pōpo e letetse ho senoloa ha bara ba Molimo.”—BAROMA 8:19.
1. Ke ho tšoana hofe ho teng pakeng tsa boemo ba Bakreste kajeno le ba Bakreste ba lekholong la pele la lilemo?
BOEMO ba Bakreste ba ’nete kajeno bo tšoana le ba Bakreste ba lekholong la pele la lilemo. Boprofeta bo ile ba thusa bahlanka ba Jehova ba matsatsing ao ho tseba hore na Mesia o ne a tla hlaha neng. (Daniele 9:24-26) Boprofeta bona boo bo ile ba bolela esale pele ka timetso ea Jerusalema empa bo ne bo se na likarolo tse thusang Bakreste ho tseba esale pele hore na motse oo o ne o tla timetsoa neng. (Daniele 9:26b, 27) Ka ho tšoanang, ka tataiso ea bomolimo boprofeta bo ile ba etsa hore liithuti tsa Bibele tse tšepahalang tsa lekholong la bo19 la lilemo li lule li e-na le tebello. Ka ho amahanya “linako tse supileng” tsa Daniele 4:25 (NW) le “linako tsa Balichaba,” li ne li lebeletse hore Kreste o tla amohela matla a ’Muso ka 1914. (Luka 21:24, King James Version; Ezekiele 21:25-27) Le hoja buka ea Daniele e e-na le boprofeta bo bongata, ha ho le bo bong ba bona bo nolofalletsang liithuti tsa Bibele tsa mehleng ea kajeno ho lekanyetsa ka nepo hore na tsamaiso eohle ea lintho ea Satane e tla timetsoa neng. (Daniele 2:31-44; 8:23-25; 11:36, 44, 45) Leha ho le joalo, sena se tla etsahala haufinyane, kaha re phela “nakong ea bofelo.”—Daniele 12:4.a
Ho Falimeha Nakong ea ho ba Teng ha Kreste
2, 3. (a) Ke eng se fanang ka bopaki bo boholo ba hore re phela nakong ea ho ba teng ha Kreste matleng a borena? (b) Ke eng se bontšang hore Bakreste ba ne ba lokela ho lula ba lebetse nakong ea ho ba teng ha Jesu Kreste?
2 Ke ’nete hore boprofeta bo ile ba etsa hore Bakreste ba lule ba e-na le tebello pele Kreste a fuoa matla a ’Muso ka 1914. Empa “pontšo” eo Kreste a ileng a fana ka eona ea ho ba teng ha hae le ea ho fela ha tsamaiso ea lintho e ne e bontša liketsahalo. ’Me boholo ba tsona li ne li tla bonahala ka mor’a ho qaleha ha ho ba teng ha hae. Liketsahalo tse joalo—lintoa, likhaello tsa lijo, litšisinyeho tsa lefatše, mafu a seoa, ho hloka molao ho eketsehileng, ho hlorisoa ha Bakreste le ho boleloa ha litaba tse molemo tsa ’Muso lefatšeng ka bophara—li sebeletsa e le bopaki bo ka sehloohong ba hore joale re phela nakong ea ho ba teng ha Kreste matleng a borena.—Matheu 24:3-14; Luka 21:10, 11.
3 Leha ho le joalo, moko-taba oohle oa keletso ea Jesu ha a arohana le barutuoa ba hae e ne e le hore: “Lulang le talimile, le lule le falimehile, . . . le lule le lebetse.” (Mareka 13:33, 37; Luka 21:36) Ho bala ka hloko litemana tse potolohileng likhothatso tsena tsa ho lebela ho bontša hore Kreste o ne a sa bue hakaalo ka hore ba lule ba lebeletse ka hloko pontšo ea ho qaleha ha ho ba teng ha hae. Ho e-na le hoo, o ne a laela barutuoa ba hae ba ’nete hore ba lule ba lebetse nakong ea ho ba teng ha hae. Bakreste ba ’nete ba ne ba lokela ho lula ba lebeletse eng?
4. Pontšo eo Jesu a ileng a fana ka eona e ne e tla sebeletsa morero ofe?
4 Jesu o ile a fana ka boprofeta ba hae bo boholo ha a arabela potso ena: “Lintho tsee [liketsahalo tse lebisang timetsong ea tsamaiso ea lintho ea Sejuda] li tla etsahala neng, ’me pontšo e tla ba efe ea ho ba teng ha hao le ea qetello ea tsamaiso ea lintho?” (Matheu 24:3) Pontšo e boletsoeng esale pele e ne e ke ke ea sebeletsa ho tsebahatsa ho ba teng ha Kreste feela empa esita le liketsahalo tse lebisang bofelong ba tsamaiso ea hona joale e khopo ea lintho.
5. Jesu o bontšitse joang hore le hoja a ne a tla ba teng ka tsela ea moea, e ne e tla be e le hona a ntseng a ‘e-tla’?
5 Jesu o ile a bontša hore nakong ea “ho ba teng” (pa·rou·siʹa, ka Segerike) ha hae o ne a tla tla ka matla le ka khanya. Mabapi le “ho tla” ho joalo (ho hlalosoang ka libōpeho tsa lentsoe la Segerike erʹkho·mai), o ile a bolela: “Joale pontšo ea Mora oa motho e tla bonahala leholimong, ’me joale meloko eohle ea lefatše e tla ikotla ka lebaka la ho lla, ’me e tla bona Mora oa motho a tla ka maru a leholimo ka matla le khanya e khōlō. . . . Joale ithuteng ntlha ena sefateng sa feiga e le papiso: Hang feela ha lekala la sona le lenyenyane le nolofala ’me le hlahisa makhasi, le tsebe hore lehlabula le haufi. Ka ho tšoanang le lōna, ha le bona lintho tsena tsohle, le tsebe hore [Kreste] o haufi o menyako. . . . Ka hona, le lule le lebetse, hobane ha le tsebe hore na Morena oa lōna o tla ka letsatsi lefe. . . . Ipakeng le le ba itokisitseng, hobane ka hora eo le sa nahaneng hore ke eona, Mora oa motho oa tla.”—Matheu 24:30, 32, 33, 42, 44.
Ke Hobane’ng ha Jesu Kreste a Tla?
6. Timetso ea “Babylona e Moholo” e tla etsahala joang?
6 Le hoja a le teng e le Morena ho tloha ka 1914, Jesu Kreste o sa ntse a lokela ho ahlola mekhatlo e hlophisitsoeng le batho ka bomong pele a liha kahlolo holim’a bao a ba fumanang ba le khopo. (Bapisa le 2 Bakorinthe 5:10.) Haufinyane Jehova o tla kenya likelellong tsa babusi ba lipolotiki hore ba timetse “Babylona e Moholo,” ’muso oa lefatše oa bolumeli ba bohata. (Tšenolo 17:4, 5, 16, 17) Ka ho toba, moapostola Pauluse o boletse hore Jesu Kreste o tla timetsa “motho oa ho se ee ka molao”—baruti ba bakoenehi ba Bokreste-’mōtoana, e leng karolo e hlaheletseng ea “Babylona e Moholo.” Pauluse o ngotse: “Ea sa eeng ka molao o tla senoloa, eo Morena Jesu a tla mo felisa ka moea oa molomo oa hae ’me a mo etse lefeela ka ponahalo ea ho ba teng ha hae.”—2 Bathesalonika 2:3, 8.
7. Ha Mora oa motho a fihla ka khanya ea hae, ke kahlolo efe eo a tla fana ka eona?
7 Nakong e tlang e haufi, Kreste o tla ahlola batho ba lichaba motheong oa hore na ba tšoere barab’abo joang ba sa ntseng ba le lefatšeng. Rea bala: “Ha Mora oa motho a fihla ka khanya ea hae, ’me mangeloi ’ohle a e-na le eena, joale o tla lula teroneng ea hae e khanyang. ’Me lichaba tsohle li tla bokelloa ka pel’a hae, ’me o tla arola batho e mong ho e mong, feela joalokaha molisa a arola linku ho lipōli. ’Me o tla beha linku ka letsohong la hae le letona, empa lipōli ka ho la hae le letšehali. . . . Morena o tla re ho [linku], ‘Kannete ke re ho lōna, Ho isa tekanyong eo ho eona le ileng la ho etsa ho e mong oa ba banyenyane ka ho fetisisa ba bana barab’eso, le ile la ho etsa ho ’na.’ . . . ’Me [lipōli li] tla ea ho khaoloeng ho sa feleng, empa ba lokileng bophelong bo sa feleng.”—Matheu 25:31-46.
8. Pauluse o hlalosa ho tla ha Kreste ha a tlil’o liha kahlolo ho ba sa tšabeng Molimo joang?
8 Joalokaha ho bontšitsoe setšoantšong sa linku le lipōli, Jesu o liha kahlolo ea ho qetela holim’a bohle ba sa tšabeng Molimo. Pauluse o ile a tiisetsa balumeli-’moho le eena ba mahlomoleng ka “phomolo hammoho le rōna tšenolong ea Morena Jesu ho tsoa leholimong le mangeloi a hae a matla ka mollo o tukang, ha a tlisa phetetso holim’a ba sa tsebeng Molimo le ba sa mameleng litaba tse molemo tse mabapi le Morena oa rōna Jesu. Bona bana ba tla feta kotlong ea boahloli ea timetso e sa feleng e tsoang ka pel’a Morena le e tsoang khanyeng ea matla a hae, ka nako eo a tlang hore a tlotlisoe mabapi le bahalaleli ba hae.” (2 Bathesalonika 1:7-10) Re e-na le liketsahalo tsena tsohle tse susumetsang tse larileng ka pel’a rōna, na ha rea lokela ho sebelisa tumelo le hore ka tabatabelo re lule re lebeletse ho tla ha Kreste?
Ho Letela ka Tabatabelo Tšenolo ea Kreste
9, 10. Ke hobane’ng ha batlotsuoa ba ntseng ba le lefatšeng ba letetse ka tabatabelo tšenolo ea Jesu Kreste?
9 ‘Tšenolo ea Morena Jesu ho tsoa leholimong’ e ke ke ea e-ba feela ho tla timetsa ba khopo empa hape le ho tla putsa ba lokileng. Masala a barab’abo Kreste ba tlotsitsoeng ba ntseng ba le lefatšeng a ka ’na a utloa bohloko pele ho tšenolo ea Kreste, empa a thabela tšepo ea ’ona e khanyang ea leholimo. Moapostola Petrose o ile a ngolla Bakreste ba tlotsitsoeng: “Le tsoele pele ho thaba kahobane le le ba nang le karolo litlhokofatsong tsa Kreste, e le hore le ka thaba ’me la nyakalla le nakong ea tšenolo ea khanya ea hae.”—1 Petrose 4:13.
10 Batlotsuoa ba ikemiselitse ho lula ba tšepahala ho fihlela Kreste a ba ‘bokellela ho eena’ e le hore “tšobotsi e lekiloeng ea tumelo” ea bona “e ka fumanoa e le lebaka la thoriso le khanya le tlhompho tšenolong ea Jesu Kreste.” (2 Bathesalonika 2:1; 1 Petrose 1:7) Mabapi le Bakreste ba joalo ba tšepahalang ba tsoetsoeng ka moea, ho ka thoe: “Bopaki bo mabapi le Kreste bo tiisitsoe har’a lōna, e le hore le se ke la haelloa ho hang mphong leha e le efe, ha ka taba-tabelo le ntse le letetse tšenolo ea Morena oa rōna Jesu Kreste.”—1 Bakorinthe 1:6, 7.
11. Ha ba ntse ba letetse tšenolo ea Jesu Kreste, Bakreste ba tlotsitsoeng ba etsa’ng?
11 Masala a tlotsitsoeng a na le maikutlo a tšoanang le a Pauluse, ea ngotseng: “Ke lekanya hore litlhokofatso tsa nako ea hona joale hase letho ha li bapisoa le khanya e tlang ho senoloa ho rōna.” (Baroma 8:18) Ha ho hlokahale hore tumelo ea ’ona e tšehetsoe ke ho lekanyetsoa ha linako. A ipoloka a tšoarehile tšebeletsong ea Jehova, a fana ka mohlala o babatsehang ho metsoalle ea ’ona, “linku tse ling.” (Johanne 10:16) Bana ba tlotsitsoeng baa tseba hore bofelo ba tsamaiso ena e khopo bo atametse, ’me ba ela hloko khothatso ea Petrose: “Hlomellang likelello tsa lōna bakeng sa tšebetso, le lule le hlaphohetsoe likelellong ka ho feletseng; behang tšepo ea lōna moseng o sa tšoanelang o tla tlisoa ho lōna tšenolong ea Jesu Kreste.”—1 Petrose 1:13.
“Tebello e Nang le Taba-tabelo ea Pōpo”
12, 13. Pōpo ea moloko oa batho e ile ea “behoa tlas’a lefeela” joang, ’me linku tse ling li labalabela eng?
12 Na linku tse ling le tsona li na le ho hong hoo li ka phelang li ho lebeletse ka tabatabelo? Ka sebele ho joalo. Ka mor’a ho bua ka tšepo e khanyang ea ba amohetsoeng ke Jehova e le “bara” ba hae ba tsoetsoeng ka moea le “majalefa hammoho le Kreste” ’Musong oa leholimo, Pauluse o ile a re: “Tebello e nang le taba-tabelo ea pōpo e letetse ho senoloa ha bara ba Molimo. Kaha pōpo e ile ea behoa tlas’a lefeela, eseng ka thato ea eona empa ka ea ileng a e beha tlaase, motheong oa tšepo ea hore pōpo ka boeona le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.”—Baroma 8:14-21; 2 Timothea 2:10-12.
13 Ka sebe sa Adama, litloholo tsohle tsa hae li ile tsa “behoa tlas’a lefeela,” kaha li tsoaletsoe bokhobeng ba sebe le lefu. Ha lia khona ho itokolla bokhobeng bo joalo. (Pesaleme ea 49:7; Baroma 5:12, 21) Linku tse ling li labalabela hakaakang ho “lokolloa bokhobeng ba ho bola”! Empa pele seo se etsahala, lintho tse itseng li lokela ho etsahala tumellanong le linako tsa Jehova le mehla.
14. Ho tla akarelletsoa eng ‘ho senoloeng ha bara ba Molimo,’ ’me hoo ho tla fella ka hore moloko oa batho o ‘lokolloe bokhobeng ba ho bola’ joang?
14 Pele, masala a tlotsitsoeng a “bara ba Molimo” a lokela ho ‘senoloa.’ See se tla akarelletsa eng? Ka nako e loketseng ea Molimo, ho tla totobala ho linku tse ling hore batlotsuoa ba qeteletse ba “tiisitsoe” ’me ba tlotlisitsoe hore ba buse le Kreste. (Tšenolo 7:2-4) “Bara ba Molimo” ba tsositsoeng bafung le bona ba tla ‘senoloa’ ha ba kopanela le Kreste ho timetseng tsamaiso e khopo ea lintho ea Satane. (Tšenolo 2:26, 27; 19:14, 15) Joale, nakong ea Puso ea Kreste ea Lilemo tse Sekete, ba tla ‘senoloa’ ka ho eketsehileng e le mecha ea boprista bakeng sa ho abela ‘pōpo,’ e leng moloko oa batho, melemo ea sehlabelo sa Jesu sa thekollo. Sena se tla fella ka hore moloko oa batho o ‘lokolloe bokhobeng ba ho bola’ ’me qetellong o kene ‘tokolohong e khanyang ea bana ba Molimo.’ (Baroma 8:21; Tšenolo 20:5; 22:1, 2) Li e-na le litebello tse joalo tse hlollang, na ke ho makatsang hore ebe linku tse ling li “letetse ho senoloa ha bara ba Molimo” ka “tebello e nang le taba-tabelo”?—Baroma 8:19.
Ho se Fele Pelo ha Jehova ho Bolela Poloko
15. Ke eng seo le ka mohla re sa lokelang ho se lebala mabapi le ho beha ha Jehova nako bakeng sa liketsahalo?
15 Jehova ke ’Moloki e Moholo oa Nako. Ho laola ha hae nako bakeng sa liketsahalo ho tla ipaka ho phethahetse. Hase kamehla lintho li ka bonahalang li etsahala ka tsela eo rōna ka borōna re neng re lebeletse ka eona. Leha ho le joalo, re ka ba le tumelo e feletseng ea hore litšepiso tsohle tsa Molimo li tla phethahala. (Joshua 23:14) E ka ’na eaba o lumella hore lintho li tsoele pele nako e telele ho feta kamoo ba bangata ba neng ba lebeletse kateng. Empa a re batleng ho utloisisa litsela tsa hae ’me re tsote bohlale ba hae. Pauluse o ngotse: “O! botebo ba maruo le bohlale le tsebo tsa Molimo! Likahlolo tsa hae ke tse ke keng tsa batlisisoa hakaakang ’me litsela tsa hae ke tse ke keng tsa fuputsoa hakaakang! Etsoe ‘ke mang ea tsebang kelello ea Jehova, kapa ke mang eo e bileng moeletsi oa hae?’”—Baroma 11:33, 34.
16. Ke bo-mang ba leng mocheng oa ho rua molemo ka ho se fele pelo ha Jehova?
16 Petrose o ngotse: “Baratuoa, kaha le letetse lintho tsena [timetso ea “maholimo” a khale le “lefatše” la khale le hore li nkeloe sebaka ke “maholimo a macha” le “lefatše le lecha”], le etse sohle se matleng a lōna hore qetellong a le fumane le se na letheba ebile le se na sekoli ’me le le khotsong. Ho feta moo, le nke ho se fele pelo ha Morena oa rōna e le poloko.” Ka lebaka la ho se fele pelo ha Jehova, ba limilione ba eketsehileng ba ntse ba fuoa monyetla oa ho pholoha “letsatsi la Jehova,” le tla tla ka tšohanyetso “joaloka lesholu.” (2 Petrose 3:9-15) Ho se fele pelo ha hae ho boetse ho lumella e mong le e mong oa rōna hore a ‘’ne a sebeletse poloko ea hae ka tšabo le thothomelo.’ (Bafilippi 2:12) Jesu o itse re lokela ho ‘ikela hloko’ ’me re ‘lule re falimehile’ haeba re batla ho amoheloa le ho atleha ho “ema ka pel’a Mora oa motho” nakong eo a tlang ka eona ho tla ahlola.—Luka 21:34-36; Matheu 25:31-33.
Lulang le Letile ka Mamello
17. Ke mantsoe afe a moapostola Pauluse ao re lokelang ho a ela hloko?
17 Pauluse o ile a phehella barab’abo ba moea hore ba behe mahlo a bona, “eseng linthong tse bonoang, empa linthong tse sa bonoeng.” (2 Bakorinthe 4:16-18) O ne a batla hore ho se ke ha e-ba le letho le fifatsang pono ea bona ka moputso oa leholimo o behiloeng ka pel’a bona. Ebang re Bakreste ba tlotsitsoeng kapa re ba linku tse ling, a re hopoleng tšepo e babatsehang e behiloeng ka pel’a rōna ’me re se ke ra tela. A re ‘tsoeleng pele ho leta ka mamello,’ re paka hore “ha re mofuta o ikhulang ho ea timetsong, empa re mofuta o nang le tumelo hore soule e bolokoe e phela.”—Baroma 8:25; Baheberu 10:39.
18. Ke hobane’ng ha ka kholiseho re ka tlohela linako le mehla matsohong a Jehova?
18 Ka kholiseho re ka tlohela linako le mehla matsohong a Jehova. Phethahatso ea litšepiso tsa hae “e ke ke ea lieha” ho ea ka kemiso ea hae ea nako. (Habakuke 2:3, NW) Khabareng, khothatso ea Pauluse ho Timothea ke ea bohlokoa haholo ho rōna. O itse: “Ke u laela ka tieo ka pel’a Molimo le Kreste Jesu, ea reretsoeng ho ahlola ba phelang le bafu, le ka ponahalo ea hae le ’muso oa hae, u bolele lentsoe, u be ho lona ka ho phehella ka potlako nakong e tšoanelang, nakong e likhathatso . . . U etse mosebetsi oa moevangeli, u phethe bosebeletsi ba hao ka botlalo.”—2 Timothea 4:1-5.
19. E sa ntse e le nako ea hore batho ba Jehova ba etse’ng, hona hobane’ng?
19 Bophelo bo kotsing—ba rōna le ba baahelani ba rōna. Pauluse o ngotse: “Ikele hloko ka mehla le thuto ea hao. Lula linthong tsena, kaha ka ho etsa sena u tla ipholosa hammoho le ba u mamelang.” (1 Timothea 4:16) Nako e khutšoanyane haholo bakeng sa tsamaiso ena e khopo ea lintho. Ha re ntse re letetse ka tabatabelo liketsahalo tse susumetsang tse larileng ka pel’a rōna, kamehla a re hlokomeleng hore e sa ntse e le nako ea Jehova le mehla bakeng sa hore batho ba hae ba bolele litaba tse molemo tsa ’Muso. Mosebetsi oo o lokela ho phethoa ho fihlela a khotsofetse. Joalokaha Jesu a boletse, “joale e ntan’o ba hona bofelo bo tla tla.”—Matheu 24:14.
[Mongolo o botlaaseng ba leqephe]
a Bona khaolo ea 10 le ea 11 ea buka ea Tsebo e Isang Bophelong bo sa Feleng, e hatisitsoeng ke Watchtower Bible and Tract Society of New York, Inc.
Bakeng sa Tlhahlobo
◻ Mabapi le ho lekanyetsoa ha linako, boemo ba rōna bo tšoana le ba Bakreste ba lekholong la pele la lilemo joang?
◻ Ke hobane’ng ha Bakreste ba lokela ho ‘lula ba lebetse,’ esita le nakong ea ho ba teng ha Kreste?
◻ Ke hobane’ng ha pōpo eo e leng moloko oa batho e lebeletse ka tabatabelo “ho senoloa ha bara ba Molimo”?
◻ Ke hobane’ng ha ka kholiseho re ka tlohela linako le mehla matsohong a Jehova?
[Setšoantšo se leqepheng la 17]
Bakreste ba lokela ho falimeha ka tebello ea ho tla ha Kreste
[Setšoantšo se leqepheng la 18]
Masala a tlotsitsoeng a ipoloka a tšoarehile tšebeletsong ea Jehova, a sa tšetlehe tumelo ea ’ona ho lekanyetsoeng ha linako
[Setšoantšo se leqepheng la 20]