Kutlo ea Bomolimo Lelapeng le Arohaneng Bolumeling
“HO UTLOISA bohloko haholo ho feta ho shapuoa leha e le hofe. . . . Ke utloa eka ke tletse matetetso hohle ’meleng, empa ho se motho ea ka a bonang.” “Ka linako tse ling ke utloa eka ke felloa ke tšepo bophelong . . . kapa eka nka tloha lapeng ke se ke ka hlola ke khutla.” “Ka linako tse ling ho thata ho nahana ka tsela e loketseng.”
Mantsoe ao a tletseng maikutlo a senola maikutlo a ho nyahama le bolutu. A tsoa ho ba hlaseloang ka litlhapa—liqoso, litšoso, litšomo, ho hlokomolohuoa—esita le ho hlekefetsoa ’meleng ke balekane le litho tsa lelapa. Ke hobane’ng ha batho baa ba tšoaroa hampe hakaale? E mpa feela e le ka lebaka la litumelo tsa bolumeli tse sa tšoaneng. Tlas’a maemo ana, ho phela lelapeng le arohaneng bolumeling ho etsa hore borapeli ba Jehova e be phephetso ea sebele. Empa, Bakreste ba bangata ba ileng ba hlaseloa ba bonahatsa kutlo ea bomolimo ka katleho.
Hoa thabisa hore ebe tsieleho e joalo le khatello ha li malapeng ’ohle a arohaneng bolumeling. Leha ho le joalo, li teng. Na lelapa la hao le tšoaneloa ke tlhaloso ee? Joale, u ka ’na ua fumana ho le thata ho hlompha molekane oa hao kapa batsoali ba hao. Haeba u mosali ea boemong boo kapa u ngoana tikolohong eo, u ka atleha joang ho bontša kutlo ea bomolimo lelapeng le arohaneng bolumeling? Ba bang ba ka fana ka tšehetso efe? ’Me ha e le hantle Molimo o talima taba ee joang?
Ke Hobane’ng ha ho le Thata Hakaale ho ba ea Utloang?
Boithati ba lefatše le ho hloka teboho li kopana hammoho le litšekamelo tsa hao tsa ho se phethahale ’me li etsa hore kutlo ea bomolimo e be ntoa e sa khaotseng. Satane o tseba sena, ’me o tsoile letšolo ho u nyahamisa. Hangata o sebelisa litho tsa lelapa tse nang le kananelo le tlhompho e fokolang bakeng sa litekanyetso tsa bomolimo kapa tse se nang kananelo le tlhompho bakeng sa tsona. Litekanyetso tsa hao tse phahameng tsa moea le tsa boitšoaro hangata li fapane haholo le tsa litho tsa lelapa tse sa lumelang. Sena se fella ka ho ba le maikutlo a loantšanang mabapi le boitšoaro le mosebetsi. (1 Petrose 4:4) Khatello ea hore u furalle litekanyetso tsa Bokreste e ka ’na ea ba matla, kahobane u utloile taelo e reng: “Le se ke la ba le kabelo mesebetsing e nyopang ea lefifi.” (Ba-Efese 5:11) Ho latela pono ea bona, ha ho sa na letho leo u le etsang le nepahetseng. Sena sohle se etsahala ka lebaka la bolumeli ba hao. ’Mè e mong, ha a ne a jere boikarabelo bo boima ba ho hlokomela bana ba kulang, o ile a kōpa thuso ho monna oa hae ’me a fumana karabo e phoqang, “U na le nako ea bolumeli ba hao; ha u hloke thuso.” Lipolelo tse joalo li eketsa phephetso ea ho ba ea utloang.
Joale ho na le linako tseo ka tsona le ka ’nang la se ke la lumellana linthong tse seng khahlanong le Mangolo ka ho toba. Empa, u hlokomela hore u karolo ea lelapa ’me ka hona u na le boikarabelo bo itseng. Connie o re: “Ke utloa bohloko haholo ha ke nahana ka tsela eo Ntate a re tšoereng ka eona hobane ke elelloa hore o ikutloa a lokotseha. Ke tlameha ho ikhopotsa khafetsa hore ke se hlonamele khanyetso ea Ntate. Ho hlokahala hore ke ipolelle hore ho na le lebaka le matla leo ka lona a leng khahlanong le boemo ba rōna kapa a bo hanyetsang. Satane ke morena oa tsamaiso ena ea lintho.” Susan, ea nyetsoeng ke motho ea sa lumelang, o ntša makunutu: “Qalong ke ne ke ee ke ikutloe ke batla ho arohana le eena—empa ha ho sa le joalo. Ke ne ke tseba hore Satane o ne a mo sebelisa ho nteka.”
Boiteko ba Satane ba ho etsa hore u ikutloe u se na thuso bo ka ’na ba bonahala bo sa khaotse. Ho ka ’na ha feta matsatsi le sa buisane le molekane oa hao. Bophelo bo ka ba bolutu haholo. Sena se felisa kholiseho le boitlhompho ’me se leka kutlo ea hao ea bomolimo. Bana le bona ba ikutloa ba tepeletse maikutlong le ’meleng. Ka lekhetlo le leng, le hoja batsoali ba bona ba ne ba hanyetsa, bahlanka ba Molimo ba bararo ba bacha ba ile ba kopanela libokeng tsa Bokreste ka botšepehi. E mong oa bona, eo hona joale e leng mosebeletsi oa nako e tletseng, o ile a re: “Re ne re ee re ikutloe re rebehile re bile re khathetse; re ne re sitoa ho robala; ho ne ho etsa hore re sareloe.”
Molimo o Lebeletse Eng ho Uena?
Ho utloa Molimo ho tla pele kamehla, ’me kutlo e lekanyelitsoeng bohloohong ba monna kamehla e tlameha ho ba ka tsela eo Jehova a e laelang. (Liketso 5:29) Seo se ka ’na sa e-ba thata, empa se ka etsahala. Tsoela pele ho itšetleha ka Molimo bakeng sa thuso. O batla hore u “rapele ka moea le ka ’nete” le ho mamela le ho ikokobeletsa tataiso ea hae. (Johanne 4:24) Tsebo e tsoang Lentsoeng la Molimo, ha e ntse e tlala mofuteng o nepahetseng oa pelo, e susumetsa kutlo e tlang ka ho rata. Le hoja maemo a hao a botho a ka ’na a fetoha, Jehova ha a fetohe leha e le hona hore Lentsoe la hae le ka fetoha. (Malakia 3:6; Jakobo 1:17) Jehova o file monna bohlooho. Sena se lula e le ’nete ho sa tsotellehe hore na o amohela bohlooho ba Kreste kapa che. (1 Ba-Korinthe 11:3) Le hoja ho ka ba thata hore u amohele ’me u mamelle sena haeba u talimana le tlhekefetso le tlotlollo tse sa khaotseng, morutuoa Jakobo o re: “Bohlale bo tsoang holimo . . . bo loketse ho mamela.” (Jakobo 3:17, NW) Ho hlokomela bohlooho bona ka tsela e se nang khoao le ho bo amohela ho hloka moea oa Molimo, haholo-holo tholoana ea oona ea lerato.—Ba-Galata 5:22, 23.
Ha u rata motho ea itseng, ho bonolo haholoanyane ho mo utloa ka tsela ea bomolimo mabapi le bolaoli bo hlophisitsoeng ke Molimo. Ba-Efese 5:33 ea eletsa: “E mong le e mong ho lōna a fele a rate mosali oa hae joalo ka ha a ithata, ’me mosali eena a hlomphe monna oa hae.”
Nahana ka Jesu. O ile a rohakoa le ho shapuoa, empa ha ho lea mong eo a ileng a mo rohaka. O ne a na le tlaleho e se nang sekoli. (1 Petrose 2:22, 23) E le hore Jesu a ka mamella tšoaro e mpe hakaalo, o ne a hloka sebete se sa tloaelehang le lerato le sa sisinyeheng bakeng sa Ntate oa hae, Jehova. Empa, lerato “le mamella tsohle.”—1 Ba-Korinthe 13:4-8.
Pauluse o ile a hopotsa mosebetsi-’moho le eena Timothea, ’me oa re hopotsa kajeno: “Molimo ha oa ka oa re nea moea o boi, empa e le oa matla, le oa lerato, le oa kelello.” (2 Timothea 1:7) Lerato le tebileng bakeng sa Jehova le Jesu Kreste le ka u susumelletsa kutlong ea bomolimo ha boemo bo bonahala e le bo ke keng ba mamelloa. Ho hlaphoheloa kelellong ho tla u thusa ho boloka pono e leka-lekaneng le ho lebisa tlhokomelo kamanong ea hao le Jehova le Jesu Kreste.—Bapisa le Ba-Filippi 3:8-11.
Balekane ba Atlehang ho Bontšeng Kutlo ea Bomolimo
Ka linako tse ling u tlameha ho leta nako e telele hore u bone hore na Jehova o tla rarolla mathata a hao joang. Empa, le ka mohla a ke ke a hlōleha ho fana ka thuso. Ea atlehang tabeng ea ho bontša kutlo ea bomolimo oa eletsa: “Kamehla etsa lintho tseo Jehova a u fang matla le tokelo ea ho li etsa—ho mo rapela libokeng le likopanong, ho ithuta, ho ea tšebeletsong, le ho rapela.” Jehova o hlohonolofatsa boiteko ba hao, eseng feela seo u se finyellang. Ho 2 Ba-Korinthe 4:17 (NW), moapostola Pauluse o itse ‘tlhoriso ena ke ea nakoana, empa e re sebeletsa khanya e sa feleng.’ Thuisa ka sena. Se tla etsa hore u tsitse. Mosali e mong oa hopola: “Bophelo ba lelapa la ka ha bo ntlafale, ’me ka linako tse ling kea ipotsa hore na Jehova o khahlisoa ke ’na. Empa ntho e le ’ngoe eo ke e nkang e le tlhohonolofatso ea hae ke ’nete ea hore ke tsoa maemong ana a thata boemo ba ka ba kelello bo le molemo ho feta ba monna oa ka. Taba ea hore seo re se etsang se thabisa Jehova e etsa hore matšoenyeho ’ohle a be molemo.”
Jehova o tšepisa hore a ke ke a lumella hore u thulane le maemo a ka holimo ho seo u ka se mamellang. Mo tšepe. O tseba hamolemo ho u feta, ’me o u tseba hamolemo ho feta kamoo u itsebang kateng. (Ba-Roma 8:35-39; 11:33; 1 Ba-Korinthe 10:13) Ho rapela Jehova maemong a thata hoa thusa. Rapella moea oa hae hore o u tataise, haholo-holo ha u sa tsebe hore na u lokela ho etsa eng kapa hore na u lokela ho sebetsana le boemo bo itseng joang. (Liproverbia 3:5; 1 Petrose 3:12) U se ke ua khaotsa ho mo kōpa ka tieo bakeng sa mamello, boitšoaro, le boikokobetso tabeng ea ho utloa bolaoli bophelong ba hao. Mopesaleme o itse: “Jehova, lefika la ka, qhobosheane ea ka, monamoleli oa ka.” (Pesaleme ea 18:2) Ho hopola sena ke thuso e matlafatsang bakeng sa ba leng malapeng a arohaneng bolumeling.
Ka holim’a tsohle, leka ka matla ho etsa hore lenyalo la hao e be le thabileng. E, Jesu o ile a bona esale pele hore litaba tse molemo li ne li tla baka likarohano. Leha ho le joalo, rapela hore likarohano leha e le life li se ke tsa bakoa ke mekhoa ea hao kapa boitšoaro. (Mattheu 10:35, 36) U hopotse sena, tšebelisano e fokotsa mathata a lenyalo. Esita leha e le uena feela ea nang le mekhoa ena e loketseng, seo se ka etsa ho hongata ho thibela mathata hore a ee bohōleng ba ho ba khohlano le qabang. Mamello le lerato ke tsa bohlokoa haholo. ‘E-ba mosa’ ’me u “mamelle ka sebete.”—2 Timothea 2:24.
Moapostola Pauluse e ile ea e-ba “ntho tsohle ho bohle.” (1 Ba-Korinthe 9:22) Ka ho tšoanang, u sa sekisetse boikarabelo ba Bokreste, ka linako tse ling ho ka ’na ha hlokahala hore u fetole kemiso ea hao e le hore u ka ba le nako e eketsehileng le molekane oa hao le lelapa. E-ba le nako e ngata kamoo u ka khonang le eo u khethileng ho arolelana bophelo le eena. Bontša ho nahanela ha Bokreste. Sena ke pontšo ea kutlo ea bomolimo.
Mosali ea tšabang Molimo le ea ikokobetsang ea feto-fetohang le maemo le ea nang le kutloelo-bohloko o fumana ho le bonolo haholoanyane ho bontša kutlo ea bomolimo. (Ba-Efese 5:22, 23) Mantsoe a nahanelang, a “nokiloeng ka letsoai,” a thusa ho fokotsa monyetla oa hore likhohlano li be teng nakong e tlang.—Ba-Kolosse 4:6; Liproverbia 15:1.
Bohlale ba bomolimo bo u eletsa hore u lokise liphapang kapele ’me u tsosolose khotso ka mantsoe a molemo a hahang, ho e-na le ho robala u ‘halefile.’ (Ba-Efese 4:26, 29, 31) Sena se hloka boikokobetso. Tšepa Jehova ka ho feletseng bakeng sa ho ba le matla. Mosali e mong oa Mokreste ka boikokobetso o ile a lumela: “Ka mor’a ho rapela ka tieo, ke ’nile ka utloa moea oa Jehova o phahamisa sephaka sa ka hore ke kope molekane oa ka.” Lentsoe la Molimo lea eletsa: “Le se ke la busetsa bobe ka bobe, leha e ka ba ho mang le mang. . . . U hlōle bobe ka botle.” (Ba-Roma 12:17-21) Ena ke keletso e bohlale le tsela ea kutlo ea bomolimo.
Bana ba Bontšang Kutlo ea Bomolimo
Keletso ea Jehova ho lōna bana ba malapeng a arohaneng bolumeling ke ena: “Utloang batsoali ba lōna nthong tsohle; hobane ke taba e khahlisang Morena.” (Ba-Kolosse 3:20) Hlokomela hore Morena Jesu Kreste o kenngoa tabeng ena. Ka hona, ho utloa batsoali ho lekanyelitsoe. Ho isa bohōleng bo itseng keletso ea Liketso 5:29, ea ho ‘utloa Molimo ho e-na le batho,’ le eona e loketse bacha ba Bakreste. Ho tla ba le linako tseo ka tsona u tla tlameha ho etsa qeto ea seo u lokelang ho se etsa motheong oa seo u tsebang hore se nepahetse ho latela Mangolo. Ho ka ’na ha fella ka kotlo ea mofuta o itseng bakeng sa ho hana ho kopanela ketsong e itseng ea borapeli ba bohata. Le hoja ena e le tebello e bohloko, u ka fumana matšeliso ua ba ua thaba ka lebaka la ’nete ea hore u utloa bohloko hobane u etsa se nepahetseng mahlong a Molimo.—1 Petrose 2:19, 20.
Kaha mehopolo ea hao e tataisoa ke melao-motheo ea Bibele, u ka ’na ua fapana le batsoali ba hao litabeng tse itseng. Sena ha se ba etse lira tsa hao. Esita le haeba hase bahlanka ba Jehova ba inehetseng, ba tšoaneloa ke tlhompho e loketseng. (Ba-Efese 6:2) Salomone o itse: “Mamela ntat’ao ea u tsoetseng, u se ke ua nyelisa ’m’ao.” (Liproverbia 23:22) Leka ho utloisisa bohloko boo ba bo utloang ha u latela tumelo e bonahalang e makatsa ho bona. Buisana le bona, ’me u etse hore ‘kahlolo ea hao e molemo e tsejoe.’ (Ba-Filippi 4:5, NW) Ntša maikutlo a hao le seo u amehileng ka sona. Khomarela melao-motheo ea bomolimo ka tieo, leha ho le joalo, “ha ho ka etsoa, ’me ha e le ka lōna, le lule ka khotso le batho bohle.” (Ba-Roma 12:18) ’Nete ea hore u utloa puso ea batsoali hona joale e bontša Jehova hore u lakatsa ho tsoela pele ho ba ea utloang u le mofo oa ’Muso.
Seo ba Bang ba ka se Etsang
Bakreste ba lulang malapeng a arohaneng bolumeling ba hloka tšehetso le ho utloisisoa ke barapeli-’moho le bona. Sena se totobala mantsoeng a ea ileng a re: “Ke ikutloa ke feletsoe ke tšepo ka ho feletseng ke bile ke sa sireletseha, kaha ha ho letho leo mang kapa mang a ka le etsang, ’me ha ho letho leo nka le etsang ho fetola sena. Ke tšepetse ho Jehova bakeng sa ho phetha thato ea hae lelapeng la rōna, ho sa tsotellehe hore na e ka ba eng.”
Ho ba hammoho le baena le bo-khaitseli moeeng libokeng tsa Bokreste ke tširelo. Motho eena enoa o ile a hlalosa bophelo ba hae e le “bo kang mafatše a mabeli a sa tšoaneng. Le leng ke tlameha ho ba ho lona ’me le leng ke rata ho ba ho lona.” Lerato la boena ke lona le etsang hore bana ba mahlomoleng ba khone ho mamella le ho sebeletsa maemong ’ohle. Ba kenyeletse lithapelong tsa hao. (Ba-Efese 1:16) Kamehla, boemong bo bong le bo bong, buisana le bona ka mantsoe a khothatsang, a nepahetseng, le a tšelisang. (1 Ba-Thessalonika 5:14) Ha ho khoneha le ha ho loketse, ba kenyeletse mesebetsing ea hao ea puso ea bomolimo le ea boikhathollo.
Litlhohonolofatso le Melemo ea Kutlo ea Bomolimo
Thuisa kamehla ka litlhohonolofatso le melemo ea ho bontša kutlo ea bomolimo lelapeng le arohaneng bolumeling. Sebeletsa ho ba ea utloang. ‘U se ke ua khathala.’ (Ba-Galata 6:9) Ho Molimo “ke ntho e lebohuoang, ha motho, ka baka la ho utloa letsoalo pel’a Molimo” a mamella maemo a sa thabiseng le leeme. (1 Petrose 2:19, 20) E-ba ea utloang ho isa bohōleng boo ho bona melao-motheo le melao ea Jehova e lokileng e sa sekisetsoeng. Sena se bontša botšepehi tokisetsong ea Jehova. Boitšoaro ba hao ba bomolimo bo ka ba ba boloka bophelo ba molekane oa hao, bana, kapa batsoali.—1 Ba-Korinthe 7:16; 1 Petrose 3:1.
Ha u ntse u leka ka matla ho khahlametsa litlhoko le litebello tsa lelapa le arohaneng bolumeling, hopola bohlokoa ba ho tšepahala ho Jehova Molimo le Jesu Kreste. U ka ’na ua sekisetsa lintlheng tse ngata tseo le hanyetsanang ho tsona, empa ho sekisetsa botšepehi ke ho sekisetsa ntho e ’ngoe le e ’ngoe, ho akarelletsa le bophelo ka bobona. Moapostola Pauluse o itse: “Molimo . . . mehleng ena ea qetello o buile le rōna ka Mora, eo o ’meileng mojalefa oa ntho tsohle, eo hape o entseng ka eena tse bōpiloeng kaofela.” Ho hlokomela “poloko e kalo” ho tla u matlafatsa hore u be ea utloang.—Ba-Heberu 1:1, 2; 2:3.
Kutlo ea hao e sa sekisetseng le ho tiea bakeng sa boitšoaro le litekanyetso tse nepahetseng ke tširelo e molemo bakeng sa hao le molekane oa hao ea sa lumelang. Botšepehi bo haha kamano e matla ea lerato ka lapeng. Liproverbia 31:11 e re ka mosali ea tšoanelehang le ea tšepahalang: “Pelo ea monna oa hae ea mo tšepa.” Boitšoaro ba hao bo hloekileng le tlhompho e tebileng li ka ’na tsa bula monna oa hao ea sa lumelang mahlo. Li ka ’na tsa mo susumeletsa ho amohela ’nete ea Molimo.
Kutlo ea bomolimo ruri ke ea bohlokoa ebile e boloka bophelo. E rapelle bophelong ba lelapa la hao. E tla fella ka khotso ea kelello e be e tlisetse Jehova thoriso.