Hlaolela ho ba ea Nahanelang Maemo

“Ho nahanela maemo ha lōna ho tsejoe ke batho bohle. Morena o haufi.”—BA-FILIPPI 4:5, NW.

 1. Ke hobane’ng ha ho nahanela maemo e le phephetso lefatšeng la kajeno?

“MOTHO ea nahanelang maemo”—mongoli oa Lenyesemane Sir Alan Patrick Herbert o ne a nahana hore ke motho oa tšōmong. Ka sebele, ka linako tse ling ho ka ’na ha bonahala eka ha ho batho ba sa ntseng ba phela ba nahanelang maemo lefatšeng lena le tsekolotsoeng ke ntoa. Bibele e boletse esale pele hore ‘mehleng ena ea qetello’ e bohloko, batho e ne e tla ba “ba bohale ka ho tšosang,” “ba lihlooho li thata,” le “ba sa bulehelang tumellano leha e le efe”—ka mantsoe a mang, ba sa nahaneleng maemo ho hang. (2 Timothea 3:1-5, NW) Leha ho le joalo, Bakreste ba ’nete ba nka ho nahanela maemo e le ha bohlokoa, ba tseba hore ke letšoao la bohlale ba bomolimo. (Jakobo 3:17) Ha re ikutloe hore ho nahanela maemo ha ho khonehe lefatšeng le sa nahaneleng maemo. Ho e-na le hoo, re amohela ka ho feletseng phephetso e leng keletsong ea moapostola Pauluse e fumanoang ho Ba-Filippi 4:5: “Ho nahanela maemo ha lōna ho tsejoe ke batho bohle.”

 2. Mantsoe a moapostola Pauluse ho Ba-Filippi 4:5 a re thusa joang ho lekanyetsa hore na re nahanela maemo kapa che?

² Hlokomela kamoo mantsoe a Pauluse a re thusang ho itekola hore na re nahanela maemo. Hase hakaalo taba ea kamoo re iponang kateng; ke taba ea hore na ba bang ba re bona joang, ea hore na re tsebahala re le joang. Phetolelo ea Phillips e fetolela temana ena tjena: “E-bang le botumo ba ho nahanela maemo.” E mong le e mong oa rōna a ka ’na a botsa, ‘Ke tsebahala ke le joang? Na ke na le botumo ba ho ba ea nahanelang maemo, ea feto-fetohang le maemo, le ea bonolo? Kapa ke tsebahala ke le ea sa fetoheng, ea se nang kutloelo-bohloko, kapa ea hlooho e thata?’

 3. (a) Lentsoe la Segerike le fetoletsoeng e le “ho nahanela maemo” le bolela’ng, hona ke hobane’ng ha tšoaneleho ee e ipiletsa? (b) Mokreste a ka ithuta ho nahanela maemo ka ho eketsehileng joang?

³ Botumo ba rōna tabeng ena bo tla bonahatsa ka ho totobetseng hore na re etsisa Jesu Kreste ho isa bohōleng bofe. (1 Ba-Korinthe 11:1) Ha a le mona lefatšeng, Jesu o ile a bonahatsa mohlala o phahameng ka ho fetisisa oa Ntate oa hae oa ho nahanela maemo. (Johanne 14:9) Ha e le hantle, ha Pauluse a ne a ngola ka “bonolo le ka mosa oa Kreste,” lentsoe la Segerike leo a le sebelisitseng bakeng sa mosa (e·pi·ei·kiʹas) le boetse le bolela “ho nahanela maemo” kapa, ka ho toba, “ho feto-fetoha le maemo.” (2 Ba-Korinthe 10:1) The Expositor’s Bible Commentary e re ke “le leng la mantsoe a maholo a ho hlalosa botho [T]estamenteng e [N]cha.” Le hlalosa tšoaneleho e ipiletsang haholo hoo setsebi se seng se fetolelang lentsoe lena e le “ho nahanela maemo ho tlisang boikutlo bo monate.” Kahoo a re buisaneng ka mekhoa e meraro eo ka eona Jesu, joaloka Ntate oa hae, Jehova, a bontšitseng ho nahanela maemo. Kahoo re ka ’na ra hlokomela kamoo rōna ka borōna re ka nahanelang maemo ka ho eketsehileng.—1 Petrose 2:21.

‘O Lula a Loketse ho Tšoarela’

 4. Jesu o ile a bontša joang hore o ‘lutse a loketse ho tšoarela’?

⁴ Joaloka Ntate oa hae, Jesu o ile a bontša hore o nahanela maemo ka ho ‘lula a loketse ho tšoarela’ ka makhetlo-khetlo. (Pesaleme ea 86:5, NW) Nahana ka nako eo ka eona Petrose, motsoalle ea haufi-ufi, a ileng a latola Jesu ka makhetlo a mararo bosiung boo Jesu a ileng a tšoaroa le ho lekoa ka bona. Jesu ka boeena o ne a ile a bolela pejana hore: “E mong le e mong ea tla ntatola pel’a batho, le ’na ke tla mo latola pel’a Ntate.” (Mattheu 10:33) Na Jesu o ile a sebelisa molao oo ho Petrose a sa fetohe a bile a hloka mohau? Che; ka mor’a tsoho ea Hae, Jesu ka boeena o ile a etela Petrose, ha ho pelaelo hore e ne e le ka morero oa ho tšelisa le ho khothatsa moapostola enoa ea bakileng le ea pelo e robehileng. (Luka 24:34; 1 Ba-Korinthe 15:5) Nakoana ka mor’a moo, Jesu o ile a lumella Petrose ho ba le boikarabelo bo boholo. (Liketso 2:1-41) Ena e ne e le pontšo e feletseng ea ho nahanela maemo e thabisang pelo! Na hase ho tšelisang ho nahana hore Jehova o khethile Jesu e le Moahloli oa moloko oohle oa batho?—Esaia 11:1-4; Johanne 5:22.

 5. (a) Baholo ba lokela ho ba le botumo bofe ka har’a linku? (b) Ke boitsebiso bofe boo baholo ba ka ’nang ba bo hlahloba pele ba sebetsa nyeoe ea boahloli, hona hobane’ng?

⁵ Ha baholo ba sebetsa e le baahloli ka phuthehong, ba leka ka matla ho latela mohlala oa Jesu oa ho nahanela maemo. Ha ba batle hore linku li ba tšabe joalokaha eka ke ba otlang. Ho e-na le hoo, ba batla ho etsisa Jesu e le hore linku li ka ikutloa li sireletsehile ha li na le bona e le balisa ba lerato. Linyeoeng tsa boahloli, ba leka ka matla ho ba ba nahanelang maemo, ba lutseng ba loketse ho tšoarela. Pele ba sebetsa taba e joalo, baholo ba bang ba ho fumane ho thusa hore ba hlahlobe lihlooho tsa Molula-Qhooa oa July 1, 1992, “Jehova, ‘Moahloli oa Lefatše Lohle’ ea sa Eeng ka Tšobotsi” le “Baholo, Ahlolang ka ho Loka.” Ka hona ba hopola tlhaloso ea tsela ea Jehova ea ho ahlola: Ho ‘tiisa letsoho ha ho hlokahala, ’me ha ho khoneha ho bontša mohau.’ Ho sekamela ho bontšeng mohau kahlolong hase phoso ha ho na le motheo o utloahalang bakeng sa ho etsa joalo. (Mattheu 12:7) Ho se be le kutloelo-bohloko kapa mohau ke phoso e tebileng. (Ezekiele 34:4) Kahoo baholo ba qoba ho etsa phoso ka hore ka linako tsohle ba batle tsela ea ho etsa lintho e lerato ka ho fetisisa, e bonahatsang mohau kamoo ho ka khonehang ka hare ho meeli ea toka.—Bapisa le Mattheu 23:23; Jakobo 2:13.

Ho Tenyetseha ha ho Tobanoe le Maemo a Fetohang

 6. Jesu o ile a bonahatsa ho nahanela maemo joang ha a sebelisana le mosali oa Molichaba eo morali oa hae a neng a kenoe ke bademona?

⁶ Joaloka Jehova, Jesu o ile a ipaka e le ea potlakelang ho fetola tsela ea ho etsa lintho kapa ea ikamahanyang le maemo a macha ha a hlaha. Ka nako e ’ngoe mosali oa Molichaba o ile a mo kōpa hore a folise morali oa hae ea neng a hlasetsoe ke bademona ka matla. Qalong Jesu o ile a bontša ka litsela tse tharo tse sa tšoaneng hore o ne a sa tl’o mo thusa—ea pele, ka ho qoba ho mo araba; ea bobeli, ka ho bolela ka ho toba hore o ne a rometsoe ho Bajode, eseng ho Balichaba; ’me ea boraro, ka ho etsa setšoantšo seo ka mosa se ileng sa fetisa mohopolo o tšoanang. Leha ho le joalo, mosali enoa o ile a phehella ho sa tsotellehe sena sohle, a fana ka bopaki ba tumelo e fetang e tloaelehileng. Ha a nahana ka boemo bona bo khethehileng, Jesu o ne a ka bona hore ena e ne e se nako ea ho sebelisa molao o akaretsang; e ne e le nako ea ho tenyetseha tumellanong le melao-motheo e phahameng haholoanyane.a Kahoo, Jesu o ile a etsa sona seo ka makhetlo a mararo a ileng a bontša hore a ke ke a se etsa. O ile a folisa morali oa mosali eo!—Mattheu 15:21-28.

 7. Batsoali ba ka bonahatsa ho nahanela maemo ka litsela life, hona hobane’ng?

⁷ Na ka ho tšoanang re tsebahala ka ho ikemisetsa ho tenyetseha ha ho hlokahala? Hangata ho hlokahala hore batsoali ba bonahatse ho nahanela maemo ho joalo. Kaha ngoana e mong le e mong o khethehile, mekhoa e atlehang ngoaneng e mong e ka ’na ea se be e loketseng ho e mong. Ho feta moo, ha bana ba hōla, litlhoko tsa bona lia fetoha. Na nako ea ho fihla lapeng e lokela ho fetoloa? Na thuto ea lelapa e ka ba e nang le molemo ha e etsoa hore e be e phelang haholoanyane? Ha motsoali a itšoara ka ho feteletseng litšitong tse nyenyane, na o ikemiselitse ho ikokobetsa le ho lokisa lintho? Batsoali ba feto-fetohang le maemo ka litsela tseo ba qoba ho halefisa bana ba bona le ho ba arohanya le Jehova ho sa hlokahale.—Ba-Efese 6:4.

 8. Baholo ba phutheho ba ka etella pele joang tabeng ea ho ikamahanya le litlhoko tsa tšimo?

⁸ Baholo le bona, ho hlokahala hore ba ikamahanye le maemo a macha a hlahang, le hoja le ka mohla ba sa sekisetse melao e tobileng ea Molimo. Ha u hlophisa mosebetsi oa boboleli, na u falimehela liphetoho tse leng teng tšimong? Ha mekhoa ea bophelo ea baahelani e fetoha, mohlomong bopaki ba mantsiboea, bopaki ba seterateng, kapa ho paka ka thelefono li lokela ho buelloa. Ho ikamahanya le maemo ka litsela tseo ho re thusa ho phetha thomo ea rōna ea ho bolela ka tsela e atlehileng haholoanyane. (Mattheu 28:19, 20; 1 Ba-Korinthe 9:26) Pauluse le eena o ile a tiisa hore o ikamahanya le maemo a batho ba mefuta eohle tšebeletsong ea hae. Ka mohlala, na re etsa se tšoanang ka ho ithuta ka ho lekaneng ka malumeli a sebaka se itseng le meetlo ea sona e le hore re ka khona ho thusa batho?—1 Ba-Korinthe 9:19-23.

 9. Ke hobane’ng ha moholo a sa lokela ho tsitlellela hore kamehla a sebetsane le mathata ka tsela eo a neng a ntse a sebetsana le ’ona nakong e fetileng?

⁹ Ha mehla ena ea qetello e ntse e e-ba bohloko haholoanyane, ho ka ’na ha hlokahala hore balisa le bona ba ikamahanye le ho rarahana ho makatsang le ho se thabise ha mathata a mang ao mohlape oa bona o talimanang le ’ona. (2 Timothea 3:1) Baholo, ena hase nako ea ho se fetohe! Ruri moholo o ne a ke ke a tsitlellela ho sebetsana le mathata joalokaha a ile a etsa nakong e fetileng haeba mekhoa eo a e sebelisang e se e sa atlehe kapa haeba “mohlanka ea khabane, ea bohlale” a bone ho hlokahala hore a hatise boitsebiso bo bocha litabeng tse joalo. (Mattheu 24:45; bapisa le Moeklesia 7:10; 1 Ba-Korinthe 7:31.) Moholo e mong ea tšepahalang ka tieo o ile a leka ho thusa khaitseli ea tepeletseng maikutlong eo haholo-holo a neng a hloka momameli ea molemo. Leha ho le joalo, ha a ka a ba le pono ea hore ho tepella maikutlong ha hae ho tebile hakaalo ’me a mo fa litharollo tse bebofatsang taba ea hae haholo. Eaba Mokhatlo oa Watch Tower o hatisa boitsebiso bo thehiloeng Bibeleng bo sebetsanang le bothata bona boo ba hae. Moholo eo o ile a etsa bonnete ba hore a buisane le eena hape, lekhetlong lena a sebelisa boitsebiso bo bocha ’me a bontša hore o ipeha boemong ba hae ba mahlomola. (Bapisa le 1 Ba-Thessalonika 5:14, 15.) Ke mohlala o motle hakaakang oa ho nahanela maemo!

10. (a) Baholo ba lokela ho bontša maikutlo a ho feto-fetoha le maemo e mong ho e mong le ho sehlopha sa baholo ka kakaretso joang? (b) Sehlopha sa baholo se lokela ho talima ba bonahatsang ho se nahanele maemo joang?

¹⁰ Baholo le bona ho hlokahala hore ba bonahatse maikutlo a ho feto-fetoha le maemo e mong ho e mong. Ha sehlopha sa baholo se kopana, ke habohlokoa hakaakang hore ho se be le moholo lea mong ea laolang lipuisano! (Luka 9:48) Ea okamelang ka ho khethehileng ho hlokahala hore a ithibe tabeng ena. ’Me ha moholo a le mong kapa ba babeli ba sa lumellane le qeto ea sehlopha sa baholo ka kakaretso, ba ke ke ba tsitlellela hore lintho li etsoe ka tsela ea bona. Ho e-na le hoo, hafeela ho se molao-motheo oa Mangolo o tlōloang, ba tla feto-fetoha le maemo, ba hopola hore ho nahanela maemo hoa hlokahala ho baholo. (1 Timothea 3:2, 3, NW) Ka lehlakoreng le leng, sehlopha sa baholo se lokela ho hopola hore Pauluse o ile a khalemela phutheho ea Korinthe bakeng sa ho ‘amohela ka mamello batho ba sa nahaneleng maemo’ ba neng ba itlhahisa e le “baapostola ba lokileng ho tlōla.” (2 Ba-Korinthe 11:5, 19, 20, NW) Kahoo ba lokela hore e be ba itokiselitseng ho laea moholo-’moho le bona ea itšoarang ka tsela e bonahatsang manganga, le ho se nahanele maemo, empa bona ka bobona ba lokela ho ba bonolo le ho ba mosa ha ba etsa seo.—Ba-Galata 6:1.

Ho Nahanela Maemo Tšebelisong ea Bolaoli

11. Ke phapang efe e neng e le teng pakeng tsa kamoo baeta-pele ba bolumeli ba Bajode ba mehleng ea Jesu ba neng ba sebelisa bolaoli le kamoo Jesu a neng a bo sebelisa?

¹¹ Ha Jesu a tsamaea lefatšeng, ho nahanela maemo hoa hae ruri ho ne ho khanya ka linako tsohle ka tsela eo a neng a sebelisa bolaoli boo Molimo a mo fileng bona. O ne a fapane hakaakang le baeta-pele ba bolumeli ba mehleng ea hae! Nahana ka mohlala ona. Molao oa Molimo o ne o laetse hore ho se be le mosebetsi o etsoang ka Sabbatha, esita le oa ho roalla patsi. (Exoda 20:10; Numere 15:32-36) Baeta-pele ba bolumeli ba ne ba batla ho laola tsela eo batho ba neng ba sebelisa molao oo ka eona. Kahoo ba nka hore ke boikarabelo ba bona ho laela ka ho toba seo motho a neng a ka se phahamisa ka Sabbatha. Ba ile ba etsa qeto: e se be ntho e boima bo fetang ba lifeiga tse peli tse omileng. Ba bile ba etsa thibelo ea meqathatso e kokoteletsoeng ka lipekere, ba bolela hore ho phahamisa boima bo eketsehileng ba lipekere e ne e tla ba ho sebetsa! Ho boleloa hore, ka kakaretso, bo-rabbi ba ile ba eketsa litaelo tse 39 molaong oa Molimo mabapi le Sabbatha ’me eaba ba eketsa tse ling ba sa khaotse litaelong tseo. Ka lehlakoreng le leng, Jesu ha a ka a batla ho laola batho ka ho ba hlabisa lihlong ka ho beha litaelo tse sa feleng tse ba thibelang kapa ka ho beha litekanyetso tse sa fetoheng, tseo ho leng thata ho li finyella.—Mattheu 23:2-4; Johanne 7:47-49.

12. Ke hobane’ng ha re ka bolela hore Jesu ha a ka a tsila-tsila mabapi le litekanyetso tsa Jehova tse lokileng?

¹² Joale, na re lokela ho nahana hore Jesu ha a ka a khomarela litekanyetso tse lokileng tsa Molimo ka tieo? Ruri o ile a ho etsa! O ne a utloisisa hore melao e sebetsa hamolemo ha batho ba tebisetsa melao-motheo e tšehelitseng melao eo lipelong tsa bona. Le hoja Bafarisi ba ne ba amehile ka ho leka ho laola batho ka litaelo tse se nang palo, Jesu o ne a batla ho finyella lipelo. Ka mohlala, o ne a tseba hantle hore ho feto-fetoha le maemo ha hoa lokela mabapi le melao ea bomolimo e kang “tšabang bofebe.” (1 Ba-Korinthe 6:18) Kahoo Jesu o ile a lemosa batho ka mehopolo e neng e ka lebisa boitšoarong bo bobe. (Mattheu 5:28) Thuto e joalo e ne e hloka bohlale le temoho tse fetang feela ho beha melao e sa fetoheng, e thata.

13. (a) Ke hobane’ng ha baholo ba lokela ho qoba ho etsa melao le litaelo tse sa tenyetseheng? (b) Libaka tse ling tseo ho tsona ho hlompha letsoalo la motho ho leng bohlokoa ke life?

¹³ Kajeno baena ba nang le boikarabelo ba thahasella ho finyella lipelo ka ho tšoanang. Kahoo, ba qoba ho etsa melao le litaelo tse hatellang tse sa tenyetseheng kapa ho fetola pono ea bona ea botho le maikutlo molao. (Bapisa le Daniele 6:7-16.) Nako le nako, likhopotso tse etsoang ka mosa litabeng tse kang moaparo le boitlhopho e ka ba tse loketseng le tse nakong, empa moholo a ka ’na a senya botumo ba hae joaloka motho ea nahanelang maemo haeba a hatella litaba tse joalo ka linako tsohle kapa a leka ho imetsa batho ka seo a nkang hore sea hlokahala ho latela litšekamelo tsa hae tsa botho. Ka sebele, bohle ba ka phuthehong ba lokela ho qoba ho leka ho laola ba bang.—Bapisa le 2 Ba-Korinthe 1:24; Ba-Filippi 2:12.

14. Jesu o bontšitse joang hore o nahanela maemo mabapi le seo a se lebeletseng ho ba bang?

¹⁴ Baholo ba ka ’na ba lakatsa ho itlhahloba tabeng e ’ngoe: ‘Na ke nahanela maemo mabapi le seo ke se lebellang ho ba bang?’ Ruri Jesu o ne a le joalo. Ka tsela e tsitsitseng o ile a bontša balateli ba hae hore o ne a sa lebella se fetang boiteko ba bona bo etsoang ka sephefumolohi sohle le hore o ne a nka boiteko boo e le ba bohlokoa haholo. O ile a babatsa mosali oa mohlolohali ea fumanehileng bakeng sa ho fana ka lichelete tsa hae tsa tšepe tseo matla a tsona a ho reka a fokolang. (Mareka 12:42, 43) O ile a khalemela barutuoa ba hae ka matla ha ba ne ba nyatsa monehelo oa Maria o toma, a re: “Mo leseng. . . . O entse seo a neng a ka se etsa.” (Mareka 14:6, 8) O ile a nahanela maemo esita le ha balateli ba hae ba mo nyahamisa. Ka mohlala, le hoja a ile a phehella baapostola ba hae ba haufi-ufi hore ba lule ba falimehile ’me ba lebetse le eena bosiung boo a ileng a tšoaroa ka bona, ba ile ba mo soabisa ka ho robala khafetsa. Leha ho le joalo, o ile a bua ka ho ba utloela bohloko: “Moea o mafolo-folo, empa nama eona ea fokola.”—Mareka 14:34-38.

15, 16. (a) Ke hobane’ng ha baholo ba lokela ho ela hloko hore ba se hatelle mohlape kapa ho o tšosa? (b) Ho tlile joang hore khaitseli e mong ea tšepahalang a fetole pono ea hae ka seo a neng a se lebella ho ba bang?

¹⁵ Ruri, Jesu o ile a khothaletsa balateli ba hae ho ‘etsa ka matla.’ (Luka 13:24) Empa le ka mohla ha a ka a ba qobella hore ba etse seo! O ile a ba khothatsa, a ba behela mohlala, a ba etella pele, ’me a batla ho finyella lipelo tsa bona. O ile a tšepela matleng a moea oa Jehova hore o etse se setseng. Kajeno baholo ka ho tšoanang ba lokela ho khothaletsa mohlape ho sebeletsa Jehova ka lipelo tsohle empa ba lokela ho qoba ho o tšosa ka boikutlo ba ho ba molato kapa ba ho hlajoa ke lihlong, ho bolelang hore seo ba se etsang ka nako eo tšebeletsong ea Jehova ka tsela e itseng ha sea lekana kapa ha se amohelehe. Katamelo ea ho se fetohe, ea ho khanna ka ho re “etsang se eketsehileng, etsang se eketsehileng, etsang se eketsehileng!” e ka nyahamisa ba etsang sohle seo ba ka se khonang. E ne e tla ba ho soabisang hakaakang haeba moholo a haha botumo ba ho ba ‘eo ho leng thata ho mo khahlisa’—e leng se fapaneng hōle le ho nahanela maemo!—1 Petrose 2:18, NW.

¹⁶ Kaofela ha rōna re lokela ho nahanela maemo mabapi le seo re se lebeletseng ho ba bang! Khaitseli e mong, ka mor’a hore eena le monna oa hae ba tlohe kabelong ea bona ea boromuoa bakeng sa ho hlokomela ’mè oa hae ea kulang, o ile a ngola: “Ruri linako tsena li thata bakeng sa rōna bahoeletsi ka ntle mona liphuthehong. Kaha re bile mosebetsing oa potoloho le oa setereke, re sirelelitsoe likhatellong tse ngata tse joalo, re ile ra hlokomelisoa sena ka tšohanyetso le ka tsela e bohloko. Ka mohlala, ke ne ke ee ke ipotse, ‘Ke hobane’ng ha khaitseli eo a sa tsamaise lingoliloeng tse nepahetseng tse tsamaisoang khoeling ee? Ha a bale Tšebeletso ea ’Muso?’ Hona joale ke tseba lebaka. Ba bang ke sohle seo ba ka se etsang e le hore ba ka tsoela [tšebeletsong].” Ke ho molemo hakaakang ho babatsa baena ba rōna ka seo ba se etsang ho e-na le ho ba ahlola ka seo ba sa se etseng!

17. Jesu o re behetse mohlala joang mabapi le ho nahanela maemo?

¹⁷ Nahana ka mohlala oa ho qetela oa kamoo Jesu a sebelisang matla a hae a bolaoli ka tsela e bonahatsang ho nahanela maemo. Joaloka Ntate oa hae, Jesu ha a sireletse bolaoli ba hae ka ho bo boulela. Le eena ke seabi se ka sehloohong sa bolaoli, o khetha sehlopha sa mohlanka oa hae ea khabane bakeng sa ho hlokomela “mesebetsi ea hae kaofela” e mona lefatšeng. (Mattheu 24:45-47) ’Me ha a tšabe ho mamela likhopolo tsa ba bang. O ne a atisa ho botsa bamameli ba hae: “Le nahana joang?” (Mattheu 17:25, NW; 18:12, NW; 21:28, NW; 22:42, NW) Kahoo ho lokela ho be joalo ho balateli bohle ba Kreste kajeno. Ha ho na tekanyo ea bolaoli e lokelang ho ba etsa ba sa rateng ho mamela. Batsoali, mamelang! Banna, mamelang! Baholo, mamelang!

18. (a) Re ka tseba joang haeba re na le botumo ba ho nahanela maemo? (b) E ka ba hantle hore kaofela ha rōna re etse qeto efe?

¹⁸ Ha ho pelaelo ea hore e mong le e mong ho rōna o batla ho “ba le botumo ba ho nahanela maemo.” (Ba-Filippi 4:5, Phillips) Empa re tseba joang haeba re na le botumo bo joalo? Ha e le hantle, ha Jesu a ne a e-na le takatso e matla ea ho tseba hore na batho ba re’ng ka eena, o ile a botsa metsoalle ea hae eo a e tšepang. (Mattheu 16:13) Ke hobane’ng ha re sa latele mohlala oa hae? U ka botsa motho e mong eo u mo tšepang mabapi le ho toba taba ha hae hore na u na le botumo ba ho nahanela maemo kapa ea feto-fetohang le maemo. Ruri kaofela ha rōna re ka etsa ho hongata ho etsisa haufi-ufi mohlala o phethahetseng oa Jesu oa ho nahanela maemo! Haholo-holo ha re sebelisa tekanyo e itseng ea bolaoli holim’a ba bang, e se eka kamehla re ka latela mohlala oa Jehova le Jesu, ka hore kamehla re a sebelise ka tsela e bonahatsang ho nahanela maemo, kamehla re ikemisetse ho tšoarela, ho tenyetseha, kapa ho feto-fetoha le maemo ha ho loketse. Ka sebele, e se eka e mong le e mong oa rōna a ka loanela “ho nahanela maemo”!—Tite 3:2, NW.

[Mongolo o botlaaseng ba leqephe]

U ne U Tla Araba Joang?

◻ Ke hobane’ng ha Bakreste ba lokela ho batla ho nahanela maemo?

◻ Baholo ba ka etsisa Jesu joang ka ho lula ba loketse ho tšoarela?

◻ Ke hobane’ng ha re lokela ho loanela ho tenyetseha joaloka Jesu?

◻ Re ka bonahatsa ho nahanela maemo joang ka tsela eo ka eona re sebelisang bolaoli?

◻ Re ka itlhahloba joang mabapi le hore na re hlile re nahanela maemo?

[Setšoantšo se leqepheng la 15]

Hang-hang Jesu o ile a tšoarela Petrose ea bakileng

[Setšoantšo se leqepheng la 16]

Ha mosali e mong a bontša tumelo e fetang e tloaelehileng, Jesu o ile a bona hore hase nako ea ho sebelisa molao o akaretsang

[Setšoantšo se leqepheng la 18]

Batsoali mamelang!

[Setšoantšo se leqepheng la 18]

Banna mamelang!

[Setšoantšo se leqepheng la 18]

Baholo mamelang!