Na u Batla Matlotlo a Patiloeng?

“E se eka mosa o sa tšoanelang le khotso li ka eketseha ho lōna ka tsebo e nepahetseng ea Molimo le ea Jesu Morena oa rōna.”—2 PETROSE 1:2, “NW.”

1, 2. Ke lintlha life tse etsang hore gauda e be ea bohlokoa ’me e be theko e boima?

KE HOBANE’NG ha gauda e le theko e boima hakaale? Ke tšepe feela e bonolo, empa theko ea eona e fihla ho makholo a lidolara ounce e le ’ngoe. Ke ’nete hore e khobeha habobebe ’me e etsa mokhabiso o khahlehang oa lesale la monoana kapa sepetja. (1 Timothea 2:9; Jakobo 2:2) Empa haeba u ne u lahlehile lehoatateng, u bolaoa ke tlala le lenyora, u ne u ke ke ua e ja kapa ua e noa. Boemong bono lofo ea bohobe kapa poleiti ea reise le seno sa metsi li ne li tla ba molemo ho feta gauda hōle.

² Joale, ke hobane’ng ha gauda e nkoa e le ea bohlokoa bo phahameng hakaale? Lebaka le leng ke hore e-ea sokoleha ’me ho thata ho e fumana. Ka mohlala, ha morafo oa gauda oa Empire o neng o le California leboea o koaloa ka 1957 hobane o se o sa tlise phaello, batho ba rafang ba ne ba cheka botebong ba limithara tse 1⁠500 empa ba ne ba lokela ho theoha lik’hilomithara tse tharo ka tsela e tšekaletseng ho fihla moo gauda e leng teng. Ho tla fihlela ntlheng eo, theko e phahameng ea gauda e ne e entse hore ho tsoela pele ho e batla ho tšoanele boiteko bo boholo.

 3. Ke letlotlo lefe leo re ka le batlang?

³ Leha ho le joalo, rōna re ka cheka ntho e ’ngoe ea bohlokoahali ho feta gauda. Ke eng? Morena Salomone ea bohlale o ile a fana ka karabelo lilemong tse ka bang 3⁠000 tse fetileng: “Ha u ka bitsa masene, ua hoeletsa kutloisiso, ua e batla joale ka silevera, ua e rafa joale ka matlotlo a patiloeng mobung; ke moo u tla tseba ho tšaba Jehova, u fihlele tsebo ea Molimo.” U ka inahanela ha batho ba fokolang ba se ba khona ho fumana “tsebo ea Molimo”!—Liproverbia 2:3-5.a

Lebaka Leo ka Lona Bohle ba Hlokang Tsebo e Nepahetseng

 4. Ho lokela ho akarelletsoa eng tsebong e nepahetseng ea Mokreste?

⁴ Ho tloha nakong ea Kreste, tsebo eo ea bohlokoahali e atolohile ho akarelletsa ho hongata haholo ho feta hoo banna le basali ba boholo-holo ba tšepahalang ba Baheberu ba neng ba ka ho fumana. Joalokaha Pauluse a ho hlalositse: “Hore Molimo oa Morena oa rōna Jesu Kreste, Ntate oa khanya, o le nee moea oa bohlale le oa tšenolo tsebong [“tsebong e nepahetseng,” NW] ea oona; o elise mahlo a lipelo tsa lōna, le tle le tsebe tšepo e leng teng pitsong ea oona le monono oa khanya ea lefa la oona har’a bahalaleli.”—Ba-Efese 1:17, 18.

 5. Ke hobane’ng ha ho hlokahala hore ka mehla batlotsuoa ba ele hloko tsebo ea bona ea thato ea Molimo?

⁵ Morao koo, ena e ne e le keletso e tobileng bakeng sa baena ba Kreste ba tlotsitsoeng ba halalelang, ’me e sa ntsane e le eona le kajeno. Joaloka karolo ea bobeli ea “peō” e tšepisitsoeng, baena ba joalo ke bona ba hlaseloang ka ho khetheha ke ho nanarela batho ha Satane moeeng. (Ba-Galata 3:26-29, NW; Ba-Efese 6:11, 12) Batlotsuoa ka ho khetheha ba tlameha ho tiisa ho bitsoa ha bona ka ho se hlokomolohe mpho e sa lefelloeng ea mosa o sa tšoanelang oa Molimo. Ke ka lebaka leo ba tlamehang hore ka mehla ba matlafatse meliko ea bona ea moea ka ho nchafatsa tsebo ea bona e nepahetseng ea thato ea Molimo le Lentsoe la oona.—Ba-Efese 3:7, NW; Ba-Heberu 6:4-6; 2 Petrose 1:9-12.

 6. (a) Ke hobane’ng ha kaofela re hloka tsebo e nepahetseng, ho sa tsotellehe hore na tšepo ea rōna ke ea leholimong kapa ea lefatšeng? (b) Ho hlokahala eng ho fumana tsebo e nepahetseng?

⁶ Ho thoe’ng ka bao tšepo ea bona e leng bophelo bo sa feleng lefatšeng? Ke hobane’ng ha tsebo e nepahetseng e hlokahala bakeng sa bona? Hobane ha ho litekanyo tse fapaneng tsa botšepehi ba Bokreste, joalokaha eka ho na le tekanyo e phahameng haholoanyane bakeng sa batlotsuoa, ba nang le tšepo ea leholimo, ho feta linku tse ling, tse nang le tšepo ea lefatšeng. (Johanne 10:16; 2 Petrose 3:13) Melao-motheo ea Bokreste e sebetsa ka ho lekana ho bohle. Ka lebaka leo, ho hlokahala hore kaofela ha rōna re ‘chache’ libeteri tsa rōna tsa moea ka tsebo e nepahetseng ka mehla. Empa ho ameha nako le boiteko. Re tlameha ho kenella ho chekeng ha moea, joalokaha eka re batla matlotlo a patiloeng.—Pesaleme ea 105:4, 5.

Ho Lopolla Nako ea ho Cheka

 7. (a) Ke mathata afe a teng a ka ’nang a re sitisa ho fumana tsebo e nepahetseng? (b) Liphello tsa ho itlhokomoloha moeeng e ka ’na ea e-ba life?

⁷ Kajeno batho ba bangata ba phela bophelo bo maphatha-phathe, ’me joaloka Bakreste ho bonahala re phathahane ho feta ba bangata ka likemiso tsa rōna bakeng sa liboka tsa Bibele, tšebeletso ea tšimo, mosebetsi oa boipheliso, mosebetsi oa ntlo, mosebetsi oa sekolo, joalo-joalo. Empa feela joalokaha re etsa kemiso bakeng sa nako ea ho ja letsatsi le leng le le leng, kahoo re tlameha ho behella ka thōko nako ea ho fepa likelello tsa rōna le bomoea ba rōna. Polelo e builoeng ke Jesu ha a qotsa ho Deuteronoma 8:3 e ne e se ea lefeela: “Ho ngoliloe, ho thoe: Motho a ke ke a phela ke bohobe feela, empa o tla phela le ke polelo tsohle tse tsoang molomong oa Molimo.” (Mattheu 4:4) Haeba re hlokomoloha bomoea ba rōna, re hlokomoloha melao-motheo ea rōna ea moea le tšepo ea rōna bakeng sa bokamoso. Joale re ka ’na ra qala ho oa le ho thekesela. Kahoo ke joang re ka hlahisang nako bakeng sa thuto ea botho ea Bibele ea ka mehla?

 8. Ke keletso efe ea Mangolo e re fang pono e loketseng ka thuto ea botho?

⁸ Mantsoe a moapostola Pauluse ke a loketseng haholo: “Iponeleng hore le tsamaee ka kelello, e seng joale ka maoatla, e mpe e be joale ka ba bohlale. Lopollang linako, hobane mehla e se e le mebe. Ka baka leo, le se ke la etsa ka booatla, le mpe le tsebisise hantle ho ratoang ke Morena.” Re ka utloisisa hore na thato ea Jehova ke efe feela haeba re ela Lentsoe la hae hloko ka thuto ea rōna ea botho. ’Me hoo ho bolela hore re tlameha ho ‘lopolla nako’ kapa ‘re sebelise nako ea rōna ka tsela e molemohali.’—Ba-Efese 5:15-17; Phillips.

 9. Ke hokae moo e ka ’nang eaba re ntse re lahla nako e ka lopolloang bakeng sa thuto ea botho? Fana ka liphihlelo tsa botho.

⁹ Haeba re hlahlobisisa lintho tseo re li etsang letsatsi ka leng tseo e seng tsa bohlokoa, re fumana hore karolo e khōlō ea nako eo re lokolohileng ka eona e sebelisoa joang? Na ke ho shebella thelevishene? Mochini oo o koieetsang o ka utsoa ho tloha ka lihora tse peli ho ea ho tse hlano mantsiboea a mang le a mang bophelong ba rōna! Ke lihora tse kae ka letsatsi tseo uena ka bouena u li qetang u shebelletse thelevishene? Hangata se hlahisoang, ka khatello ea sona e khōlō holim’a pefo le botona le botšehali, ke se khothalletsang boitšoaro bo hlephileng. ’Me hangata se reretsoe ho ipiletsa ho “takatso ea nama, le takatso ea mahlo, le boikhantšo joa bophelo.” (1 Johanne 2:15-17) Empa ba bangata ba haelloa ke matla a ho koala thelevishene. E, ntho ena ea boqapi ba sejoale-joale e ka ja letlotlo la rōna la bohlokoa ka ho fetisisa, nako.

10. Ke hobane’ng ha kajeno e le habohlokoa hakaale hore re sebelise nako ea rōna ka bohlale?

¹⁰ Haeba re sa ithetse, re tla hlokomela hore hangata hoa khoneha ho lopolla nako bakeng sa lintho tsa bohlokoa tse kang ho ithuta Bibele. ’Me thuto ea botho ea Bibele e lebisa tsebong e nepahetseng ea seo e leng sa bohlokoa ho Mokreste mehleng ena e thata. Empa, kaha ho khaotsoe ba ka holimo ho 41​000 selemong se fetileng, ho hlakile hore baena le bo-khaitseli ba bangata ba hlokomolohile bomoea ba bona. Ho apara le ho boloka “seaparo se felletseng sa lihlomo tse tsoang ho Molimo” hase feela mosebetsi o ka etsoang ka ho se tsotelle. Joaloka tabeng ea lesole le nkang lihlomo tsa sebele, ke mosebetsi oa letsatsi le letsatsi.—Ba-Efese 6:10-18, NW; Ba-Roma 1:28-32; 2 Timothea 3:1.

11. Lelapa la Bethele le beha mohlala ofe ka ho hlophisoa bakeng sa thuto ea lelapa?

¹¹ Lefatšeng ka bophara litho tse fetang 9⁠000 tsa malapa a Bethele a 95 liofising tsa makala tsa Mokhatlo oa Watch Tower li tšoara thuto ea tsona ea lelapa mantsiboea ka ’Mantaha o mong le o mong. Li ithuta Molula-Qhooa ho lokisetsa seboka mafelong a beke, ’me hangata li boetse li ba le puo ea thupelo ea Bibele kapa lenaneo le bang ka kamoreng eo ho ruteloang ho eona bakeng sa litho tse ncha tsa lelapa. E, ’Mantaha ke mantsiboea a thuto ea lelapa la Bethele lefatšeng ka bophara. Uena nako ea hao ea thuto ea botho kapa ea lelapa ke efe?—Ba-Heberu 10:24, 25.

Likofuto le Mokhoa oa ho li Sebelisa

12. Tse ling tsa litšobotsi tse hlahelletseng tsa ho ithuta New World Translation of the Holy Scriptures—With References ke life?

¹² Feela joalokaha motho ea rafang a e-na le likofuto tsa mosebetsi oa hae, kahoo re na le likofuto tseo ka tsona re ka chekang ka morafong oa gauda oa Lentsoe la Molimo. Ka mohlala, nahana ka New World Translation of the Holy Scriptures—With References. Hona joale e hatisitsoe ka Sedutche, Senyesemane, Sefora, Sejeremane, Setaliana, Sejapane, Sepotoketsi le Sepanishe. Ka hona, boholo ba Lipaki tsa Jehova bo ka fumana kofuto e tsotehang bakeng sa ho fumana tsebo e nepahetseng ea Molimo oa ’nete. Khatiso ena ea Bibele e kenyellelitse litšupiso tse bohareng tse likete-kete le litlhaloso tse ngata haholo botlaaseng ba maqephe. Hape e na le sehlomathiso (appendix) sa maqephe a 36 se nang le boitsebiso bo qaqileng lipotsong tsa bohlokoa tse fapa-fapaneng tsa Bibele.b

13. Ho hlahisoa linnete life tse thahasellisang mabapi le ho sebelisoa ha “tsebo” le “tsebo e nepahetseng” ka Mangolong a Seheberu le ka Mangolong a Segerike?

¹³ Ka morao, Reference Bible e na le lethathamo la “Bible Words Indexed” (Mantsoe a Bibele a Behiloeng ka Lenaneo) a sehlooho. Re ka sebelisa lethathamo lee joang? Haeba u hlahloba kopi ea hao bakeng sa poleloana “accurate knowledge” (tsebo e nepahetseng), u tla fumana ho thathamisitsoe litemana tse leshome. Empa ha ho le e ’ngoe ea tsena e hlahang ka Mangolong a Seheberu. Na see se bolela hore Mangolo a Seheberu ha a phahamise tlhokahalo ea tsebo e joalo? Che. Hobane tlas’a lentsoe “knowledge” (tsebo), ho na le litšupiso tse 24, ho akarelletsa tse 18 tse hlahang Mangolong a Seheberu. Leha ho le joalo, puo ea Seheberu ha e na lentsoe le khethehileng bakeng sa “tsebo e nepahetseng.” Kahoo, joalokaha u tla bona litšupisong tseo, ka linako tse ling e phahamisa tlhokahalo ea ho fetang feela tsebo e akaretsang ka ho amahanya “tsebo” le mantsoe a kang “kutloisiso” le “temoho” kapa e bua ka tsebo e le “ngata.”—Daniele 1:4, NW; 12:4, NW; Jeremia 3:15, NW.

14. Ke lintlha life tsa sehlooho tse thahasellisang tse teng tlas’a “knowledge” (tsebo) ho Insight on the Scriptures?

¹⁴ Joalokaha re ithutile sehloohong se ka pele, Segerike sa Bibele se ne se senola phapang e potelletseng pakeng tsa litekanyo tse peli tsa tsebo. ’Me ha re ntse re cheka, re batla ho tseba ho eketsehileng ka phapang e teng pakeng tsa lipoleloana tsena tse peli kamoo li sebetsang ka teng ho Bakreste. Ke hobane’ng ha tsebo, gnoʹsis, le tsebo e nepahetseng, e·piʹgno·sis, li hlokahala bakeng sa Bakreste? Re ka fumana karabelo hokae? Bukeng ea boitsebiso ba Bibele Insight on the Scriptures. Meqolo ee ke ntlo e kaakang ea matlotlo! Batla sehlooho “Knowledge” (Tsebo). Mono u tla fumana taba e felletseng e buang ka mantsoe ao re buisanang ka ’ona le litšoaneleho tse amanang le ’ona tsa bohlale, kutloisiso, le matla a ho nahana. ’Me re fumane “gauda” ena eohle, boitsebiso bona, feela ka ho sebelisa lithuso tse seng kae tsa ho ithuta Bibele! Empa ho na le tse eketsehileng.—Pesaleme ea 19:9, 10.

15. Ke likofuto life tse ling tsa ho etsa patlisiso tseo re nang le tsona, ’me li ka sebelisoa joang?

¹⁵ Haeba u ne u batla ho ithuta ka mokhoa o phethahetseng haholoanyane ka “tsebo” le mantsoe a amanang le eona, u ne u ka sebelisa li-Index tsa likhatiso tsa Mokhatlo oa Watch Tower, tse fumanehang ka lipuo tse ’maloa. ’Me feela joalokaha re ile ra batla sehlooho sa tsebo, u ka latela mokhoa o tšoanang bakeng sa litaba tse ling tse makholo-kholo. U ka inahanela letlotlo la boitsebiso bo fumanoang tlas’a lebitso la Jehova! Ho na le tsebo e nepahetseng e ngata hakaakang ka Morena ’Musi oa bokahohle!—Pesaleme ea 68:19, 20; Liketso 4:24.

16. Mangolo a re’ng mabapi le ho batla?

¹⁶ Ka lithuso tsena tsa ho ithuta le tse ling tse hatisitsoeng ke Watch Tower Bible and Tract Society, ke “matlotlo a patiloeng” a matle hakaakang ao re ka a fumanang! Na u batla “gauda”? Na u nahana hore ke ea bohlokoa? Na u tla ipha nako ea ho e cheka?—Liproverbia 2:1-5.

Ke Mang ea Etellang Pele ho Rafeng Lintho Tsa Moea?

17. Re tlameha ho etsa eng hore re fumane tsebo ka Molimo le Kreste?

¹⁷ Senotlolo sa ho fumana tsebo ee ea bohlokoahali ea Molimo le Kreste ke sefe? Sepheo—takatso ea ho fumana boemo bo amohelehang pel’a Jehova le Mora oa hae le takatso ea ho amohela mpho ea bophelo bo sa feleng. Jesu o ile a ho beha ka tsela ena: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Hobane e mong le e mong ea kōpang oa amohela, ’me e mong le e mong ea batlang oa fumana, ’me e mong le e mong ea kokotang o tla buleloa.” Empa hlokomela boemo. Jesu o itse, ‘Le ’ne le kōpe, le batle, ’me le kokote.’ Hase ntho e etsoang hanngoe feela. Ho batla tsebo ho tlameha ho etsoa ka qophello.—Mattheu 5:6; 7:7, 8, NW.

18. Ka lapeng, ke mang ea lokelang ho etella pele ho batleng tsebo e nepahetseng, hona hobane’ng?

¹⁸ Ka lapeng la Bokreste, ke mang ea tlamehang ho etella pele ho chekeng tsebo e nepahetseng? Pauluse oa arabela: “Lōna bontat’a bana, le se ke la halefisa bana ba lōna; le mpe le ba hōlise ka ho ba laea le ka ho ba rutela Moreneng.” E, batsoali, haholo-holo ntate, ba tlameha ho etella pele ho bontša kananelo bakeng sa melao-motheo ea moea. ’Me hoo ho re hopotsa hape tlhokahalo ea tokisetso ea ka mehla eo lelapa le ka e lebellang ’me la lula le ntse le e hopotse.—Ba-Efese 6:4.

19. Ho ka etsoa joang hore linako tsa thuto ea lelapa e be tse thahasellisang? Phihlelo ea lelapa la hao ke efe?

¹⁹ Linako tsa thuto ea lelapa li ka etsoa tse thahasellisang. Ka mohlala, haeba u na le bana, ke hobane’ng ha u sa re ba khethe sehlooho e be u ba abela ho etsa patlisiso likhatisong tse fapaneng ho ea ka lilemo tsa bona le matla a bona? Joale ka mor’a halofo ea hora kapa nako e isang moo, le kopane hammoho ho bona hore na e mong le e mong o fumane eng tabeng eo a e abetsoeng. Haeba buka ea concordance e-ea fumaneha, ngoana a ka bala hore na lentsoe le itseng le hlaha ka makhetlo a makae ka Mangolong a Seheberu le ka Mangolong a Segerike. Mohlomong e moholoanyane o tla fumana matlotlo a mang meqolong ea Insight. Batsoali ba tseba matla a bana ba bona le hore na ba ka ela ntho hloko halelele hakae ’me ba lokela ho haha lenaneo leo holim’a lintlha tseo. E-bang ba tenyetsehang le ba bontšang kananelo. Khothatsang lelapa la lōna ho chekeng ha lona ha moea—’me le be le sepheo se nepahetseng.

Ho Cheka ka Sepheo se Nepahetseng

20. Ke sepheo sefe se fosahetseng seo re lokelang ho se qoba thutong ea rōna ea botho?

²⁰ Boikokobetso ke tšoaneleho ea Bokreste. (Liproverbia 11:2; 1 Timothea 2:9, NW) Ka hona, na re lokela ho ithutela hore re tle re ithorise ka seo re ithutileng sona? Kapa re lokela ho etsa mponeng ka tsebo ea rōna ’me mohlomong re bontše ba bang e le ba hlokang tsebo? Kapa re lokela ho etsa litlhaloso tsa rōna kapa ho bolela kamoo rōna re nahanang ka teng? Pauluse o elelitse: “Hobane ka mohau oo ke o neiloeng, ke bolella motho e mong le e mong har’a lōna, hore a se ke a itekanya boholo bo tlōlisang moo a tšoanetseng ho lekanya teng; a mpe a ikhopole ka se mo lekaneng, e mong le e mong ka tekanyo ea tumelo eo Molimo o mo abetseng eona.”—Ba-Roma 12:3.

21, 22. Tsebo ea rōna e nepahetseng e lokela ho re susumetsa joang?

²¹ Boiteko bo matla le ho sebelisa tsebo e nepahetseng li ka lebisa tumelong, bokhabaneng, boitšoarong, mamellong, boinehelong ba bomolimo, kamehong e mofuthu ea boena, le leratong. Petrose o bontšitse bohlokoa ba tsena ha a ngola: “Hobane haeba lintho tsena li teng ka har’a lōna ’me lia tšoloha, li tla le thibela ho ba ba sa etseng letho kapa ba sa beheng litholoana mabapi le tsebo e nepahetseng ea Morena oa rōna Jesu Kreste.”—2 Petrose 1:2-8, NW.

²² Tsebo ea rōna e lokela ho susumetsa pelo. E lokela ho re susumelletsa ho bontša lerato ho Molimo le ho moahisani le ho fetoha Bakreste ba behang litholoana boitšoarong ba rōna le tšebeletsong ea rōna. Sena se tla fella ka bonngoe le kutloisiso e felletseng haholoanyane ea mohlala oa Kreste. (Ba-Efese 4:13) Ke moputso o motle hakaakang bakeng sa ho batla matlotlo a patiloeng!

[Mongolo o botlaaseng ba leqephe]

Lipotso Tse ka Thuisoang

◻ Ho latela Morena Salomone, ke eng eo e leng ea bohlokoa ho feta matlotlo a patiloeng?

◻ Ke hobane’ng ha tsebo e nepahetseng e le ea bohlokoa bakeng sa batlotsuoa le linku tse ling?

◻ Ke joang re ka lopollang nako bakeng sa thuto ea botho?

◻ Ke likofuto life tse khethehileng tseo re nang le tsona bakeng sa ho cheka tsebo e nepahetseng?

◻ Ke mang ea lokelang ho etella pele thutong ea lelapa, ’me re lokela ho ithuta ka sepheo sefe?