Na U ka Tima Khole ea Lebone e Kunkelang?

JESU KRESTE o ile a bolela litaba tse molemo tsa ’Muso oa Molimo ho batho ba mefuta eohle. Ba bangata ba bona ba ne ba hatelletsoe, ba nyahame. Empa Jesu o ile a ba fa molaetsa o matlafatsang. O ne a e-na le kutloelo-bohloko ho batho ba mahlomoleng.

Mongoli oa Kosepele, Mattheu o ile a totobatsa kutloelo-bohloko ea Jesu ka ho phahamisa thahasello boprofeteng bo ngotsoeng ke Esaia. Ha a qotsa mantsoe a ileng a phethahatsoa ke Kreste, Mattheu o ile a ngola: “Ha ho lehlaka le tletleraneng leo a tla le silakanya, ’me ha ho khoele ea lebone ea folakse e kunkelang eo a tla e tima, ho fihlela a romela toka ka katleho.” (Mattheu 12:20, NW; Esaia 42:3) Mantsoe aa a bolela eng, ’me Jesu o ile a phethahatsa boprofeta boo joang?

Ho Hlahloba Boprofeta

Hangata lehlaka le mela mokhoabong ’me hase semela se matla le se tiileng. Ka sebele “lehlaka le tletleraneng” e ne e tla ba le fokolang. Ka hona ho bonahala eka le emela batho ba hatelletsoeng kapa ba utloang bohloko joaloka monna ea neng a omeletse letsoho eo Jesu a ileng a mo folisa ka Sabbatha. (Mattheu 12:10-14) Empa ho thoe’ng ka ho bua ha boprofeta ka khole ea lebone?

Lebone la ka tlung le neng le tloaelehile lekholong la pele la lilemo C.E. e ne e le sejana sa letsopa se senyenyane, se kang jeke, se nang le mohele. Ka tloaelo, lebone leo le ne le tlatsoa ka oli ea mohloaare. Khole ea lebone e entsoeng ka folakse e ne e monya oli e le hore e ka fepela lelakabe. Ka ho hlakileng, ‘khole ea lebone e kunkelang’ e ne e tla ba e ka ’nang ea tima neng kapa neng.

Jesu o ile a phatlalatsa molaetsa oa hae o tšelisang ho ba bangata bao ka tšoantšetso e neng eka ke lehlaka le tletleraneng, le kobehileng le le sohlokehileng. Batho bana ba ne ba boetse ba tšoana le khole ea lebone ea folakse e kunkelang hobane tlhase ea bona ea ho qetela ea bophelo e ne e ile ea batla e tingoa. Ka sebele ba ne ba hateletsoe ba bile ba nyahame. Leha ho le joalo, Jesu ha aa ka a roba lehlaka la tšoantšetso le tletleraneng kapa a tima khole ea lebone ea tšoantšetso e kunkelang. Mantsoe a hae a tletseng lerato, a mofuthu le a utloelang bohloko ha aa ka a nyahamisa le ho feta, le ho hatella batho ba utloang bohloko. Ho e-na le hoo, litlhaloso tsa hae le litšebelisano tsa hae le bona li bile le phello e hlasimollang.—Mattheu 11:28-30.

Le kajeno ba bangata ba hloka kutloelo-bohloko le khothatso hobane ba tobane le mathata a ba nyahamisang lipelo. Esita le bahlanka ba Jehova hase kamehla ba bang matla tlas’a mahlomola. Ka linako tse ling ba bang ba ba joaloka likhole tse kunkelang tsa mabone. Ka hona, Bakreste e lokela ho ba ba khothatsang—joalokaha eka ba butsoela mollo hore o etse lelakabe—ka tsela ena baa matlafatsana.—Luka 22:32; Liketso 11:23.

Joaloka Bakreste, re batla ho ba ba hahang. Re ke ke ra leka ho fokolisa ka boomo mang kapa mang ea batlang thuso ea moea. Ruri re lakatsa ho etsisa mohlala oa Jesu ka ho matlafatsa ba bang. (Ba-Heberu 12:1-3; 1 Petrose 2:21) ’Nete ea hore re ka senya leha e le ofe ea itšetlehileng ka rōna bakeng sa khothatso empa re sa hlokomele ke lebaka le letle la hore re nahane ka ho teba ka tsela eo re sebelisanang le ba bang ka eona. Ka sebele ha re batle ho ‘tima khole ea lebone e kunkelang.’ Ke litataiso life tsa Mangolo tse ka re thusang tabeng ee?

Liphello Tsa ho Tšoaea-tšoaea Liphoso

Haeba Mokreste a ‘oela molatong o mong, bao e leng ba moea ba lokela ho leka ho tsosa motho ea joalo ka moea o mosa.’ (Ba-Galata 6:1) Leha ho le joalo, na e ka ba ho loketseng ho sheba mefokolo ea ba bang le ho sebelisa monyetla o mong le o mong ho e lokisa? Kapa na eka ba hantle ho ba susumeletsa ho etsa hamolemonyana ka ho fana ka maikutlo a hore boiteko ba bona ba hona joale ha boa lekana, mohlomong re etsa hore ba ikutloe ba le molato? Ha ho na bopaki ba hore Jesu o ile a etsa ntho leha e le efe ea mofuta o joalo. Le hoja e le sepheo sa rōna ho thusa ba bang hore ba ntlafatse, ba tšoauoang liphoso ka tsela e seng mosa ba ka ’na ba ikutloa ba fokolisoa ho e-na le ho matlafatsoa. Esita le ho tšoaea liphoso ka tsela e ntle ho ka nyahamisa haholo haeba ho se ho etsoa ka ho tlōlisa. Haeba boiteko bo molemohali ba Mokreste ea hlokolosi bo ne bo tla thulana le ho nyatsuoa feela, o ne a ka ’na a akha matsoho ’me a re, ‘Ho iteka ho na le molemo ofe?’ Ka sebele a ka ’na a qetella a khaolitse ka ho feletseng.

Le hoja ho fana ka keletso ea Mangolo e le habohlokoa, hase hona ho lokelang ho khetholla moea oa baholo ba khethiloeng kapa oa ba bang ka phuthehong. Liboka tsa Bokreste ha li tšoareloe feela hore li fane ka keletso le ho e amohela. Ho e-na le hoo, re bokana hammoho kamehla ho tla hahana le ho khothatsana e le hore bohle ba ka thabela botsoalle ba bona le ba bang le tšebeletso ea bona e halalelang ho Molimo. (Ba-Roma 1:11, 12; Ba-Heberu 10:24, 25) Ke ho hotle hakaakang ha re khona ho hlalohanya phapang lipakeng tsa mefokolo e tebileng le ho se phethahale hoo e leng ho bohlale le ho lerato ho ho hlokomoloha!—Moeklesia 3:1, 7; Ba-Kolosse 3:13.

Batho ba arabela kapele haholo ha ba khothatsoa ho feta ha ba tšoauoa liphoso. Ha e le hantle, ha batho ba ikutloa ba tšoauoe phoso ka ho hloka toka, ba ka ’na ba tseparela le ho feta boitšoarong boo bo nyatsuoang! Empa ha ba babatsoa ka toka, baa khothala, ’me ba susumeletseha ho ntlafatsa. (Liproverbia 12:18) Ka lebaka leo, joaloka Jesu, a re beng ba khothatsang ’me le ka mohla re se ke ra ‘tima khole ea lebone e kunkelang.’

Ho Thoe’ng ka ho Bapisa?

Ho utloa liphihlelo tse monate tsa Bakreste ba bang e ka ba ho susumetsang haholo. Jesu ka boeena o ile a thaba ha a utloa ka katleho ea barutuoa ba hae ha ba bolela ka molaetsa oa ’Muso. (Luka 10:17-21) Ka ho tšoanang, ha re utloa ka katleho, mohlala o motle kapa botšepehi ba ba bang tumelong, rea khothala ’me re ikutloa re ikemiselitse haholoanyane ho tšoarella tseleng ea rōna ea Bokreste.

Empa ho thoe’ng haeba tlaleho e ne e fanoa ka tsela e fetisang boikutlo ba hore, ‘ha u hlile ha u etse hantle joaloka Bakreste bana, ’me u tšoanela ho etsa ho hongata ho feta hoo u ho etsang hona joale’? Na momameli a ka qalisa ka matla ho ntlafatsa? Ho ka etsahala hore a nyahame ’me mohlomong a nyahlatse, haholo-holo haeba ho bapisoa khafetsa kapa ho fanoa ka maikutlo a joalo. Hona ho ka tšoana haholo le haeba motsoali a botsa ngoana oa hae, ‘Ke hobane’ng ha u sa tšoane haholoanyane le ngoan’eno?’ Polelo ea mofuta oo e ka khopisa le ho nyahamisa, empa ha ho bonahale e ka khothaletsa boitšoaro bo molemonyana. Ho bapisa ho ka ’na ha e-ba le liphello tse tšoanang le ho batho ba baholo, ha ba ha ba etsa hore ka tsela e itseng ba khopehele bao ba bapisoang le bona.

Re ke ke ra lebella hore bohle ba etse mosebetsi o lekanang tšebeletsong ea Molimo. Ho e ’ngoe ea lipapiso tsa Jesu, monghali e mong o ile a neha bahlanka ba hae litalenta tsa silevera, ebang ke e le ’ngoe, tse peli kapa tse hlano. Li ile tsa fuoa ‘e mong le e mong ho latela matla a hae.’ Bahlanka ba babeli ba ileng ba hoeba ka bohlale ka litalenta tsa bona ’me ba li eketsa ba ile ba babatsoa hobane ba ile ba tšepahala, le hoja mesebetsi ea bona e ile ea hlahisa litholoana tse fapaneng.—Mattheu 25:14-30.

Ka nepo, moapostola Pauluse o ile a ngola: “Motho ka mong a hlahlobe liketso tsa hae, e be hona a ka ithorisang ka seo a leng sona feela, e seng ka ho ipapisa le ba bang.” (Ba-Galata 6:4, BPN) Kahoo, e le hore re ka ba ba khothatsang ho ba bang, re lokela ho leka ho qoba ho bapisa ka mokhoa o seng molemo.

Litsela Tse Ling Tsa ho Matlafatsa

Re ka etsa eng ho matlafatsa ba nyahameng le ho qoba ho ‘tima khole ea lebone e kunkelang’? Ha e le hantle, ho fana ka khothatso hase taba ea ho latela melao e itseng. Leha ho le joalo, ho ka etsahala hore mantsoe a rōna e be a matlafatsang ba bang haeba re sebelisa melao-motheo ea Bibele. E meng ea eona ke efe?

E-ba ea ikokobelitseng. Ho Ba-Filippi 2:3, Pauluse o ile a re phehella ka matla hore re se ke ra ‘etsa letho ka khang, leha e le ka boithoriso ba lefeela.’ Ho e-na le hoo, re lokela ho bua le ho itšoara ka tsela e ikokobelitseng. ‘Ka boikokobetso, re lekanye hobane ba bang baa re fetisa.’ Pauluse o ne a sa bolele hore re lokela ho inka re se na thuso. Empa, re lokela ho utloisisa hore motho e mong le e mong o na le se seng se itseng seo a re fetisang ka sona. Lentsoe la Segerike leo mona le fetoletsoeng e le “fetisa” le bolela hore motho o “faposa mahlo a hae melemong eo e leng ea hae, ’me o nahanisisa ka ho teba bokhoni boo ba bang ba mo fetisang ka bona.” (New Testament Word Studies, ea John Albert Bengel, Moqolo 2, leqepheng la 432) Haeba re etsa sena ’me re talima ba bang ba re fetisa, re tla sebelisana le bona ka mokhoa o ikokobelitseng.

Bontša tlhompho. Ka ho itlhalosa ka botšepehi, re ka hlakisa hore re na le tšepo ho balumeli-’moho le rōna ba tšepahalang, re ba talima joaloka batho ba ratang ho thabisa Molimo. Empa ha re re mohlomong ba hloka thuso ea moea. Joale a re faneng ka thuso ka mokhoa o hlomphehang, o nang le seriti. Pauluse o ile a beha taba ka mokhoa ona: ‘le ’ne le beane pele ka hlomphano.’—Ba-Roma 12:10.

E-ba momameli ea molemo. E, e le hore re ka khothatsa bao e ka ’nang eaba ba tobane le mathata a nyahamisang, re lokela ho ba bamameli ba molemo, e seng bakhalemeli. Ho e-na le ho potlakela ho fana ka litlhahiso tseo e seng tsa sebele, a re ke re nkeng nako e hlokahalang ho fana ka tataiso ea Mangolo eo ka sebele e finyellang litlhoko tse leng teng. Haeba re sa tsebe seo re ka se buang, ho etsa lipatlisiso ka Bibeleng ho tla re thusa ho bua ka ho tšelisang le ho matlafatsa ba bang.

E-ba le lerato. Re lokela ho ba le lerato bakeng sa bao re lakatsang ho ba khothatsa. Ha le sebelisoa ho bahlanka-’moho le rōna ba Jehova, lerato la rōna le lokela ho feta feela hore re etse se molemong oa bona. Le lokela ho akarelletsa boikutlo bo tebileng haholo. Haeba re e-na le lerato le joalo ho batho bohle ba Jehova, mantsoe a rōna e tla ba a nang le khothatso ea sebele ho bona. Esita le haeba re batla ho fana ka tlhahiso ea hore motho a ntlafatse, ho ke ke ha etsahala hore seo re se buang se utloisisoe hampe kapa se bake khathatso haeba sepheo sa rōna e se feela ho hlahisa pono ea rōna empa e le ho fana ka thuso e lerato. Joalokaha ka nepo Pauluse a boletse, “lerato lea hahisa.”—1 Ba-Korinthe 8:1; Ba-Filippi 2:4; 1 Petrose 1:22.

E-ba ea Hahang Kamehla

‘Mehleng ena ea qetello’ e bohloko, batho ba Jehova ba tobana le liteko tse ngata. (2 Timothea 3:1-5) Hase feela ka linako tse ling ba utloang bohloko ho fihlela moo ho bonahalang eka ke qetellong ea mamello ea bona. Kaha re bahlanka ba Jehova, ka sebele re ke ke ra rata ho bua kapa ho etsa lintho tse ka ’nang tsa baka hore leha e le mang oa barapeli-’moho le rōna a ikutloe eka ke khole ea lebone e kunkelang e ka ’nang ea tima neng kapa neng.

Ka hona, ke habohlokoa hakaakang hore re khothatsane! A re etseng boiteko bohle bo ka khonehang ho ba ba hahang ka ho ba ba ikokobetsang le ba hlomphang ho barapeli-’moho le rōna ba nyahameng. E se eka re ka mamela ka hloko ha ba re bolella mathata a bona ’me kamehla re leke ho ba thusa ka ho lebisa tlhokomelo ea bona Lentsoeng la Molimo, Bibele. Ka holim’a tsohle, a re bontšeng lerato, hobane tholoana ena ea moea o halalelang oa Jehova e tla re thusa hore re matlafatsane. E se eka le ka mohla re ka se bue kapa hona ho itšoara ka tsela e ka ‘timang khole ea lebone e kunkelang.’