Bontša Ho Tšepa Jehova—Ka Ho Sebelisa Lintho Tseo U Ithutileng Tsona
“Tšepa Jehova ’me u etse molemo; lula lefatšeng, ’me u sebetse ka botšepehi.”—PESALEME EA 37:3, NW.
1, 2. (a) Ke litholoana life tseo motho a lokelang ho batla ho li fumana boithutong ba botho? (b) Jakobo o fana ka papiso efe, ’me na ho ipona hoo a ho hlalosang ke ho etsoang ka ho thalatsa mahlo feela?
BOITHUTO ba motho ba Lentsoe la Molimo ha bo etsoe feela hore motho a ithabise. Ho ithuta e lokela ho ba mokhoa oa ho hlaolela ho tšepa Jehova. (Liproverbia 3:1-5) Mantsoe a mopesaleme a ka holimo a bontša hore tšepo e nang le bomolimo, e ipontša ho motho ka hore a ‘etse molemo.’
2 Jakobo o kile a phehella: “Le be baetsi ba lentsoe, eseng bautloi feela ba ithetsang. Hobane motho, leha e le moutloi oa lentsoe, e seng moetsi oa lona, o joale ka motho ea iponang seiponeng tšobotsi eo a tsoetsoeng ka eona. Ere hobane a ipone, o ee a tlohe, a lebale hang hore ke motho ea joang.” (Jakobo 1:22-24) Kahoo ho ipona hona e ne e se ho thalatsa mahlo feela. Lentsoe la Segerike le sebelisitsoeng mona bakeng sa “bona” ha e le hantle “le bontša se etsoang ke kelello ka ho utloisisa linnete tse itseng ka ntho e ’ngoe.”—An Expository Dictionary of New Testament Words, ea W. E. Vine; bapisa Liketso 7:31, Kingdom Interlinear.
3. Ke joang motho ea iponang ka seiponeng ka potlako a ka ’nang a lebala “hore ke motho ea joang”?
3 Joale, nahana ka monna ea itlhahlobang ka hloko ka seiponeng, mohlomong a fumana seo a se bonang e le se sa mo thabiseng. A ka ’na a bona lebolu le bakiloeng ke ho ja haholo le ho noa ho tlōlisa, ho ruruha tlas’a mahlo ka baka la ho se robale, masoebe phatleng ka baka la likhatello tse sa mo feng phomolo. Ha a italimile sefahleho, o etsa qeto ea ho etsa liphetoho tseo e seng e le khale li fetiloe ke nako mekhoeng ea hae le tseleng eo a phelang ka eona. Joale “o ee a tlohe.” Ha a se a thabile ka baka la ho se bone setšoantšo se mo tšoenyang, o ee “a lebale hang,” eseng hakaalo hore na o shebahala joang, empa “hore ke motho ea joang.” Qeto ea hae ea ho etsa liphetoho ea nyamela.
4. Papiso ea Jakobo e sebetsa joang boithutong ba rōna ba Mangolo?
4 Ka ho tšoanang, u ka ’na ua ba seithuti se hloahloa sa Bibele. Empa, u itšoara joang ho seo u se bonang ka seiponeng sa Lentsoe la Molimo? Ha seipone seo se bontša lipha tsa moea le matheba a moea, na see se etsa hore u amehe ka motsotsoana feela, kapa u etsa qeto e tiileng ea ho lokisa mefokolo eo? Jakobo o ile a phaella: “Empa ea shebisisang molaong o phethehileng, e leng oa tokoloho, ’me a tiisetsa teng, e se moutloi ea hakoang, empa e le moetsi ea sebetsang, motho eo o tla ba le lehlohonolo ho etseng ha hae.” (Jakobo 1:25) Mopesaleme o kile a rapela: “Jehova, u nthute tsela ea likomelo tsa hao, ke tle ke tsamaee ka eona ho isa qetellong.”—Pesaleme ea 119:33.
Seo Liketso Tsa Rōna li se Bolelang ka Rōna
5. (a) Liketso tsa rōna li bolela eng ka rōna? (b) “Ba etsang se bohloko” ba letetsoe ke qetello efe?
5 Ha ele hantle, liketso tsa rōna kapa seo re se etsang li paka seo re leng sona ka hare. Hape e-bang ke hona joale kapa neng-neng hamorao motho a ka ’na a bonahatsa ‘sephiri sa hae’ ka liketso tse ntle kapa tse mpe. (Pesaleme ea 51:6) Salomone o itse: “Esita le moshanyana o itsebahatsa ka liketso tsa hae, ha metsamao ea hae e tla ba metle, e loke.” (Liproverbia 20:11) Ho bile joalo ka Jakobo le Esau ha ba sa le banyenyane. Ha nako e ntse e feta, liketso tsa Esau tsa totobatsa ho hloka ha hae kananelo bakeng sa lintho tsa moea. (Genese 25:27-34; Ba-Heberu 12:16) Hape ho bile joalo ho ba likete ba neng ba ipolela hore ba tšepa Jehova empa ba ipaka e le bao Bibele e ba bitsang “ba etsang se bohloko.” (Jobo 34:8, NW) Mopesaleme o ngotse: “Ha ba khopo ba hōla joaloka limela ’me bohle ba etsang se bohloko ba tlōkoma, ke hore ba tle ba ripitloe ka ho sa feleng.”—Pesaleme ea 92:7, NW.
6. Ke hobane’ng ha ho potlakile hore re bontše hore re tšepa Jehova hona joale?
6 Lenane la batho ba khopo le ntse le phahama, ’me ho timetsoa ha bona ho atametse; Molimo o ke ke oa mamella ba babe ka ho sa feleng. (Liproverbia 10:29) Ka hona ho potlakile hore re bontše ho tšepa ha rōna Jehova ka ho sebelisa seo re ithutileng sona. Petrose o fane ka khothatso e matla ea hore: “Le be le motsamao o motle har’a bahedene.” (1 Petrose 2:12) Joale, libaka tse ling tseo re ka ntlafatsang ho tsona ke life?
Litšebelisanong Tsa Rōna le Ba Bang
7. Ke hobane’ng ha re tlameha ho ba hlokolosi litšebelisanong tsa rōna le “ba kantle”?
7 Karolo e ’ngoe e ka ’na ea e-ba tsela eo re sebetsanang le ba bang ka eona. Liproverbia 13:20 ea lemosa: “Ea tloaelaneng le maoatla o tla senyeha.” Ka baka la ho hlōleha ho sebelisa keletso ena e bululetsoeng, ba bang ba itumella hore ba tloaelane ho tlōlisa le batho ba lefatše mosebetsing le sekolong. Moena e mong ea nyetseng o ile a kenella boitšoarong bo litšila le mosali e mong mosebetsing. Hape o ne a kopanela le banna bao a sebetsang le bona maetong a ho ea libakeng tsa lino, ’me ha fella ka hore e fetohe letahoa. Ka sebele ho hlokahala hore re ‘tsamaee ka bohlale pel’a ba kantle.’—Ba-Kolosse 4:5.
8. Ba bang ba ka ’na ba ntlafatsa litšebelisanong tsa bona le Bakreste ’moho le bona joang?
8 Empa ho thoe’ng ka litšebelisano tsa rōna le Bakreste ’moho le rōna? Ka mohlala, ha re re u na le molato oa chelete ho moena e mong. Na ka ntle ho mabaka u ka lieha ho mo lefa, u bea lebaka la hore kahobane moena eo o bonahala a e-na le chelete e ngata, uena u e hloka ho feta kamoo eena a e hlokang kateng? Pesaleme ea 37:21 e re: “E mobe oa alima, ’me ha a buse.” Kapa haeba u mohiri, na u sebelisa molao-motheo “Ea sebetsang o tšoaneloa ke moputso oa hae” tabeng ea ho lefa bahiruoa ba Lipaki? (1 Timothea 5:18) Pauluse o ne a ka bua tjena ka litšebelisano tsa hae le ba bang: “Hoba re tsamaile lefatšeng, haholo-holo har’a lōna, ka pelo e hlokang mano le ka ’nete ea Molimo.”—2 Ba-Korinthe 1:12.
Moaparo le Boitlhopo Tse Itekanetseng
9. Ke mekhoa efe ea ho apara le ho itlhopha e hlokometsoeng ke baholo ba bang?
9 Molebeli e mong ea tsamaeang oa Jeremane o ile a hlalosa Bakreste ba bang ba sebaka seo e le “moloko oa lieta tsa thenese” ka baka la moaparo oa bona o bontšang ho se tsotelle ho feteletseng ha ba e-tla libokeng. Ofisi ea lekala ea phaella ka hore ba bang ba tlang libokeng, “ho setse hanyenyane feela ho thoe ba apere habohlasoa,” empa “boholo ba baena ba rōna ba apara ka mokhoa o itekanetseng.” Ka ho tšoanang naha e ’ngoe e tlaleha hore “mona bothata ke bohloeki ba ’mele . . . Baena ba bang ha ba apare liphahlo tse hloekileng. Ba tlohela moriri oa bona o sa kangoa o bile o le litšila ha ba ea libokeng kapa tšebeletsong ea tšimo.” Ke habohlokoa hakaakang hore bahlanka ba Jehova ba be makhethe ’me ba hloeke ka litsela tsohle!—2 Ba-Korinthe 7:1.
10. (a) Ke molao-motheo ofe o lokelang ho tataisa moaparo oo re o khethang le boitlhopho boo re bo khethang? (b) Ke neng keletso e ka bang e loketseng, ’me re lokela ho itšoara joang?
10 Ho hlokahala hore re “apare ka ho itekanetseng, ka boitlhompho le ka tsela e nang le molao,” haholo-holo ha re tšoarehile linthong tsa moea. (1 Timothea 2:9, New International Version) Taba hase hore na mokhoa o itseng oa moaparo o kene fesheneng haholo empa hore na ke o loketseng bakeng sa motho ea ipolelang hore ke mosebeletsi oa Molimo. (Ba-Roma 12:2; 2 Ba-Korinthe 6:3) Liaparo tse bontšang ho se tsotelle ho feteletseng kapa tse tlenyang li ka faposa likelello tsa batho molaetseng oa rōna. Mekhoa eo ka morero le ka boomo e etsang hore banna ba shebahale joaloka basali kapa basali ba shebahale joaloka banna ho hang ha ea lokela. (Bapisa Deuteronoma 22:5.) Ke ’nete hore meetlo ea libaka ea fapana, ho latela mocheso kapa mohatsela, litlhokahalo tsa mosebetsi, joalo-joalo, kahoo phutheho ea Bokreste ha e etse melao e thata e sa fetoheng e akaretsang boena ba lefatše ka bophara. Kapa hona hore baholo ba hatella litakatso tsa bona tsa botho holim’a mohlape. Leha ho le joalo, haeba mokhoa oa ho itlhopha oa mohoeletsi e mong oa ’Muso ka kakaretso o ferekanya phutheho kapa o faposa likelello tsa batho tšebeletsong, ke ho loketseng hore ho fanoe ka keletso e mosa. Na u ne u tla arabela keletsong e joalo ka boikokobetso, u bontša ho tšepa Jehova?—Ba-Heberu 12:7.
Ho Tšepa Hore Molimo o Tla Hlokomela Ba Batlang ’Muso
11. Ba bang ba ’nile ba tšoaseha ho lelekiseng lintho tse bonahalang joang, ’me ke hobane’ng ha hoo e le booatla?
11 “Le mpe le batle ’muso oa Molimo le ho loka ha oona pele; ’me lintho tseo tsohle le tla li ekeletsoa.” (Mattheu 6:33) Ke ho soabisang hakaakang ha ba bang ba hlōleha ho utloa mantsoe ao! Ba kholoa tšōmo ea tšireletseho ea lichelete, ka ho ferekana ba lelekisa leruo, thuto ea lefatše, le lipakane tsa lefatše, “ba tšepile mokhoa oa bona oa ho iphelisa.” (Pesaleme ea 49:6, NW) Salomone oa lemosa: “U se ke ua ikhathatsa ho bokella leruo; . . . U le talimela’ng, ha e le moo le tla feta kapele? Le tla mela mapheo ruri, le rurele holimo joale ka ntsu.”—Liproverbia 23:4, 5.
12. Ke joang ba lelekisang leruo ‘ba itlhabang ka mahlomola a mangata’?
12 Moapostola Pauluse o tsoela pele ho lemosa: “Hobane lerato la leruo ke motso oa libe tsohle; ba bang ka ho le lakatsa ba khelohile tumelo, ’me ba itlhabile ka mahlomola a mangata.” (1 Timothea 6:10) Puisanong e neng e le ho U.S.News & World Report, Dr. Douglas LaBier o boletse hore bahlankana ba bangata le baroetsana ba bangata ba lelekisang leruo “ba tlaleha maikutlo a ho hloka khotsofalo, ho ferekana, khatello ea maikutlo, ho nyahama, lefu la kelello, ’moho le ho lla ka lintho tse ngata tse fapaneng ’meleng—ho tšoaroa ke hlooho, bohloko ba mokokotlo, likhathatso ka maleng, ho hloka boroko, likhathatso tsa ho ja.”
13. Ke hobane’ng ha ho le molemohali hore re khotsofale ke “lijo le liaparo”?
13 Ba tšepang hore Jehova o tla ba hlokomela ba ipoloka mahlomoleng a mangata le ho ferekaneng ho hongata. Ke ’nete hore ho khotsofalla “lijo le liaparo” ho ka ’na ha bolela mokhoa o ikokobelitseng haholoanyane oa bophelo. (1 Timothea 6:8) Empa “maruo ha a thuse letho mohl’a letsatsi la bohale.” (Liproverbia 11:4) Ho feta moo, ha re eketsa tšebeletso ea rōna ho Jehova, re ipea har’a ba tla fumana “tlhohonolofatso ea Jehova” e “entšang, ’me ha ho bohloko boo a e tlisang le eona.”—Liproverbia 10:22, NW.
“Batla Khotso ’Me U e Phehelle”
14, 15. (a) Ke litseko tsa mofuta ofe tseo ka linako tse ling li ’nileng tsa ferekanya khotso ea liphutheho? (b) Ke joang ho ka phehelloang khotso ha ho hlaha ho se lumellane?
14 Tsela e ’ngoe eo ka eona re bontšang ho tšepa Jehova ke hore motho “a batle khotso, a e phehelle” har’a balumeli-’moho le rōna. (1 Petrose 3:10-12) Empa ka linako tse ling, litaba tse nyenyane li lumelloa hore li fetohe mohloli oa khohlano e khōlō har’a baena: ho khabisoa ha Holo ea ’Muso, ho fetoloa ha masimo a phutheho, likabelo tsa Thuto ea Buka, ho tšoaroa ha limakasine le libuka. Kapa, mabakeng a mang, ho e-na le ho lokisa likhohlano tsa botho le tsa khoebo ka moea o ho Mattheu 18:15-17, baena ba ’nile ba khaotsa ho buisana kapa ba ferekanya phutheho ka tsekisano ea bona.
15 Jakobo o re: “’Me tholoana tsa ho loka li jalloa khotsong.” (Jakobo 3:18) Ka hona, molemong oa ho boloka khotso, lokisetsa ho inehela lithahasellong tsa ba bang kapa likhopolong tsa bona, esita le ho tlohela litokelo tsa botho. (Bapisa Genese 13:5-12.) Ka mohlala, haeba liphutheho tse peli li kopanetse Holo ea ’Muso, phutheho e ’ngoe ha ea lokela ho ba le khopolo ea hore holo ke “ea eona” ’me e na le matla a ho laela phutheho e ’ngoe hore na linako tsa liboka e be life kapa lintho tse ling. Ntho e khōlō e lokela ho ba ho hlomphana le ho sebelisana ’moho.
16. Molemo oa ho hlokomela taolo ea puso ea Molimo ka lapeng le ka phuthehong ke ofe?
16 Likhohlano tse ngata li ka qobjoa feela ka hore re hlokomele taolo ea puso ea Molimo ’me re boloke libaka tsa rōna tse loketseng. (1 Ba-Korinthe 11:3; Ba-Efese 5:22-27) Ha basali ba hlompha litakatso tsa banna ba bona, bana ba hlompha litaelo tsa batsoali ba bona, bahlanka ba sebeletsang ba hlompha tsamaiso ea baholo, liketso tsa bona li “hōlisa [phutheho] bakeng sa hore e ikahe leratong.” (Ba-Efese 4:16, NW) Ke ’nete hore ka linako tse ling banna, batsoali, le baholo baa fosa. (Ba-Roma 3:23) Empa na ho ba fetohela, ho belaela, kapa ho hanyetsa litaelo tse fanoeng ka sepheo se setle ho ntlafatsa boemo? Ho ka ba molemo hakaakang hore re boloke libaka tsa rōna tseo re li abetsoeng ke Molimo ’me re batle khotso!
Ho Ikitlaetsa Tšimong
17. (a) Ba bang ba fana ka mabaka afe bakeng sa ho kopanela hanyenyane feela mosebetsing oa boboleli? (b) Jesu o khothalelitse Bakreste hore ba itšoare joang likhatellong tsa kajeno?
17 Empa, ho ba bangata phephetso e khōlō ka ho fetisisa ke ho phethahatsa thōmo ea Bokreste ea ho bolela litaba tse molemo. (Mattheu 24:14; 28:19, 20) Ba bang ba kopanela hanyenyane feela tšebeletsong ea tšimo, mohlomong ba phea khang ea hore likhatello tsa ho iphelisa le ho hōlisa bana li ba thatafaletsa ho etsa ho eketsehileng. Ke ’nete hore likhatello tsa “mehleng ea qetello” li boima. (2 Timothea 3:1) Leha ho le joalo, Jesu o elelitse hore re se ke ra ‘imeloa ke lipelaelo tsa bophelo bona.’ Ha maemo a ntse a mpefala, Bakreste ba lokela ho ‘emisa lihlooho ’me ba lelale holimo.’ (Luka 21:28, 34) E ’ngoe ea litsela tse molemohali tsa ho ‘tiea’ khahlanong le litlhaselo tsa Satane ke ho ‘roala mafolo-folo a Evangeli’ maotong a rōna—ho kopanela ka mehla boboleling!—Ba-Efese 6:14, 15.
18. E ka ’na eaba lebaka leo ka lona ba bang ba sa kopaneleng ka botlalo mosebetsing oa boboleli ke lefe?
18 Morao koana mehleng ea Pauluse, Bakreste ba bangata (bonyane liphuthehong tse ling) ba ne ba “ipatlela tsa bona, e seng tsa Jesu Kreste.” (Ba-Filippi 2:21) Na e be ho joalo ho ba bang ba rōna kajeno? Mohlomong ba hlōleha ho talima ho batla ’Muso joaloka monna ea ileng a fumana “perela ea bohlokoa” eo a neng a ka tela eng kapa eng bakeng sa eona. (Mattheu 13:45, 46) Ka ho inehela lithahasellong tsa botho, ba etsa boiteko bo fokolang feela ba ho loana ’me ba etsa feela tšebeletso ea ho phetha tšoanelo. Empa, hopola hore ho rata Jehova le ho rata batho ba bang ho susumelletsa Bakreste ba ’nete ho bolela esita le haeba ho qalisa moqoqo le batho bao re sa ba tsebeng ho loantšana le tšekamelo ea rōna ea tlhaho.—Mattheu 22:37-39.
19. Ke hobane’ng ha Jehova a sa batle boiteko bo sa etsoeng ka pelo eohle, hona re ka hlahloba tšebeletso eo re mo etsetsang eona joang?
19 Haeba re sa susumelletsehe ho bolela, joale lerato la rōna ho Jehova le ho mo tšepa ha rōna hase letho ha e se tsebo feela e teng ka hloohong. Davida o ile a khothaletsa Salomone ka matla hore: “Hlokomela Molimo oa ntat’ao, ’me u o sebeletse ka pelo eohle ea hao . . . hobane Jehova o botsisisa lipelo tsohle, ’me o lekola merero eohle le mehopolo eohle.” (1 Likronike 28:9) Jehova a ke ke a thetsoa ke boiteko bo sa etsoeng ka pelo eohle. Esita le ho kopanela ka mehla tšebeletsong ea tšimo ha ho mo khotsofatse haeba re fana ka karoloana feela ea seo re neng re ka se etsa haeba re ne re ‘etsa ka matla.’ (Luka 13:24) Ka hona Mokreste ka mong o tlameha ho hlahloba ka botšepehi karolo eo a bang le eona tšebeletsong ea tšimo ’me a ipotse: ‘Na kannete ke etsa sohle seo nka se khonang?’ Mohlomong ho hlokahala hore re etse liphetoho tse itseng linthong tse tlang pele bophelong ba rōna.
Ho Susumelletsoa ho “Etsa Molemo” ke Mehlala ea Ba Bang
20. Ke hobane’ng ha ho loketse hore re hlahlobe mehlala e metle e beiloeng ke Bakreste ’moho le rōna?
20 Tšebeletso ea rōna ho Molimo ha e etsoe “ka ho ipapisa le ba bang.” (Ba-Galata 6:4, TLP) Leha ho le joalo, hangata mehlala e metle ea ba bang e ka re susumelletsa hore re etse ho eketsehileng. Moapostola Pauluse ka boeena o itse: “Le be baetsisi ba ka, joale ka ha le ’na ke le oa Kreste.” (1 Ba-Korinthe 11:1) Ka hona, nahana hore na baena ba rōna ba qeta nako e ngata hakaakang tšebeletsong ea tšimo khoeli e ’ngoe le e ’ngoe. United States, karolelano ea lihora tsa bahoeletsi e nyolohile ho tloha ho 8,3 ka 1979 ho ea ho lihora tse 9,7 ka 1987! Baena ba rōna ba ’nile ba eketsa nako eo ba e qetang tšimong ka mokhoa o tsitsitseng. Na ho joalo le ho uena?
21. Ke eng e susumellelitseng ba bangata hore ba kenele mosebetsi oa bopula-maliboho? Bontša.
21 Ba susumelitsoe ke mehlala ea ho cheseha ha ba bang, ba bangata ka mokhoa o e-s’o bonoe ba kenela mosebetsi oa bopula-maliboho ba ka mehla. California (U.S.A.) khaitseli e mong e monyenyane ea bitsoang Angela o ile a fumana tšepiso e lekang ea mosebetsi, e akarelletsang hlapiso ea ho ea kolecheng eo a e batlang. Ho e-na le hoo, Angela a khetha tšebeletso ea nako e tletseng. Lebaka la hae? “Ka ho tloaelana le bo-pula-maliboho ba bangata, ke ne ke bona thabo e tebileng kannete le khotsofalo e tebileng eseng feela ho bona empa kamanong ea bona le Jehova. Ke ne ke batla ho ba le khotsofalo ena e tebileng le thabo e tebileng.”
22. Melemo ea ho sebelisa lintho tseo re ithutileng tsona ke efe?
22 Na u batla “thabo e tebileng le khotsofalo e tebileng”? Joale “tšepa Jehova ’me u etse molemo”! Etsa hore seo u se tsebang se u susumelletse hore u etse sohle seo u ka se khonang tšebeletsong ea Jehova. Ho sebelisa lintho tseo u ithutileng tsona ho tla etsa hore tsoelo-pele ea hao moeeng e bonahale ho bohle ’me e tla tsoela ba bang molemo ka tsela e tla pholosa bophelo. (1 Timothea 4:15, 16) Ka hona, e se eka bohle ba ka arabela mantsoeng a Pauluse a ho Ba-Filippi 4:9: “Tseo le ithutileng tsona, la li amohela, la li utloa, la li bona ho ’na, etsang tsona; ’me Molimo oa khotso o tla ba le lōna.”
Lintlha tsa Tlhahlobo
◻ Boitšoaro ba rōna e lokela ho ba bofe ha re ipona ka seiponeng sa Lentsoe la Molimo?
◻ Re ka ’na ra ntlafatsa joang tseleng eo re sebelisanang le ba bang ka eona?
◻ Ke hobane’ng ha e le booatla ho lelekisa lintho tse bonahalang?
◻ Ke joang re ka batlang khotso ka phuthehong?
◻ Ke eng e lokelang ho re susumelletsa ho kopanela ka botlalo tšebeletsong ea tšimo?
[Setšoantšo se leqepheng la 16]
Ha hoa lekana hore feela re bone lipha tsa moea le matheba a moea. Re tlameha ho nka bohato ba ho li lokisa!
[Litšoantšo tse leqepheng la 18]
Hangata ba lelekisang leruo ba itlisetsa “mahlomola a mangata”