Lipotso Tse Tsoang ho Babali

Ke hobane’ng ha Pauluse a ile a ngola tjee ka mosali oa Bakreste: “O tla sireletsoa ka ho tsoala bana”?—1 Timothea 2:15.

Litemana tse potolohileng temana ee li bontša eng ka seo Pauluse a neng a se bolela? O ne a bululetsoe ke moea o halalelang ha a ne a tla fana ka keletso mabapi le boikarabelo ba mosali oa Mokreste ka phuthehong. O ile a ngola tjena: “Ke lakatsa ha basali ba ikhabisa ka moaparo o hlophehileng hantle, ka boitlhompho le ho hlaphoheloa kelellong, eseng ka mekhoa ea ho loha moriri le khauta kapa liperela kapa liaparo tsa theko e boima haholo, empa ka tsela e tšoanelang basali ba ipolelang hore ba fa Molimo tlhompho ea borapeli, e leng, ka mesebetsi e molemo.” (1 Timothea 2:9, 10) Pauluse o ne a khothalletsa baralib’abo ba Bakreste hore ba itlhomphe, ebe ba leka-lekaneng ha ba khetha ho ikhabisa, ba be ba ‘ikhabise’ ka mesebetsi e molemo.

Ho feta moo, Pauluse o ile a hlalosa tokisetso ea bohlooho ka phuthehong tjena: “Ha ke lumelle mosali ho ruta, kapa ho sebelisa matla holim’a monna, empa hore a khutse.” (1 Timothea 2:12; 1 Bakorinthe 11:3) O ile a hlalosa lebaka la tokisetso ena ka ho bontša hore le hoja Adama a sa ka a thetsoa ke Satane, Eva “o ile a thetsoa ka ho phethahetseng ’me a ba tlōlong.” Mosali oa Mokreste o ne a ka sireletsoa joang hore a se ke a etsa sebe se entsoeng ke Eva? Pauluse oa araba: “Leha ho le joalo, o tla sireletsoa ka ho tsoala bana, hafeela ba tsoela pele tumelong le leratong le khalaletsong hammoho le ho hlaphoheloa kelellong.” (1 Timothea 2:14, 15) Pauluse o ne a bolela’ng ka mantsoe aa?

Ho bonahala bafetoleli ba bang ba fana ka maikutlo a hore ho hlokahala hore mosali a be le bana e le hore a bolokehe. Ka mohlala, Bibele—Phetolelo e Ncha e re: “Basali ba tla pholosoa ka ho beleha bana.” Leha ho le joalo, tlhaloso ena ea mantsoe a Pauluse ha ea nepahala. Mangolo a mangata a bontša hore motho o tlameha ho tseba Jehova, a lumele ho Jesu, a be a bontše tumelo ka mesebetsi e le hore a pholohe. (Johanne 17:3; Liketso 16:30, 31; Baroma 10:10; Jakobo 2:26) Ho feta moo, Pauluse o ne a sa bolele hore ho hang basali ba lumelang ba ne ba ke ke ba e-ba le mathata ha ba beleha. Basali ba ’nile ba phela ka mor’a ho beleha ho sa tsotellehe hore na ke balumeli kapa che. Empa ka bomalimabe, ba bang ba ’nile ba shoa ha ba beleha, ho sa tsotellehe hore na e ne e le balumeli kapa che.—Genese 35:16-18.

Keletso e ’ngoe ea Pauluse e amang basali e fumanehang hamorao lengolong lena e re thusa ho utloisisa seo a neng a se bolela. O lemosa ka basali ba bang ba bacha ba neng ba sa ‘tšoareha ka letho, ba chalakela matlong; e, eseng feela ho se tšoarehe ka letho, empa hape e e-ba basebi le ba kena-kenanang le litaba tsa batho ba bang, ba bua ka lintho tseo ba sa tšoanelang ho bua ka tsona.’ Keletso ea Pauluse e ne e le efe? O ile a tsoela pele tjena: “Ka hona ke lakatsa ha bahlolohali ba banyenyane ba nyaloa, ba tsoala bana, ba hlokomela matlo, ba sa fe mohanyetsi tlhohlelletso ea ho hlapaola.”—1 Timothea 5:13, 14.

Pauluse o totobatsa mosebetsi oa bohlokoa oa basali tokisetsong ea lelapa. Mosali ea neng a phathahane ka mesebetsi e kang ‘ho tsoala bana le ho hlokomela lelapa,’ ’me a tsoela pele “tumelong le leratong le khalaletsong hammoho le ho hlaphoheloa kelellong,” o ne a se na ho hoheloa ke boitšoaro bo sa lokelang. Bomoea ba hae bo ne bo tla bolokeha, kapa bo ne bo “tla sireletsoa.” (1 Timothea 2:15) Ho etsa joalo ho ne ho tla thusa basali ba bangata ba bacha ho qoba maraba a Satane.

Mantsoe a Pauluse ho Timothea a re hopotsa hore kaofela ha rōna, re le banna le basali, re lokela ho sebelisa nako ea rōna hamolemo. Lentsoe la Molimo le eletsa Bakreste bohle tjena: “Le lule le lebetse ka tieo hore kamoo le tsamaeang kateng hase joaloka batho ba seng bohlale empa ke joaloka ba bohlale.”—Baefese 5:15.