Pono Ea Bibele
Na re Lokela ho Jarisa Satane Molato ka Libe Tsa Rōna?
SATANE o ile a jarisoa molato ka sebe sa motho oa pele. Eva o ile a re: “Noha e nthetsitse, ’me ke jele.” (Genese 3:13) Ho tloha nakong eo, “noha ea pele, e bitsoang Diabolose le Satane” e tsoetse pele ho hlasela moloko oa batho, e ‘foufatsa likelello’ tsa batho le ho ‘khelosa lefatše kaofela leo ho ahiloeng ho lona.’ (Tšenolo 12:9; 2 Bakorinthe 4:4) Ha ho motho ea ka phemang tšusumetso ea hae, empa na see se bolela hore re ke ke ra hanela tšusumetso ea hae? ’Me ha re etsa sebe, na kamehla ke molato oa hae?
Ha e le hantle, Bibele e hlalosa hore Satane o ile a thetsa Eva. (1 Timothea 2:14) O ile a thetseha ho nahana hore ka ho tlōla taelo ea Molimo, o ne a ka fumana temohisiso e kang ea Molimo le bolokolohi. (Genese 3:4, 5) Ka lebaka la monahano oo, o ile a etsa sebe. Ho ntse ho le joalo, Molimo o ile a mo nka a ikarabella ’me a mo ahlolela lefu. Hobane’ng? Hobane le hoja Satane a buile leshano, o ne a ntse a tseba ka ho feletseng ka taelo ea Molimo. Ha aa ka a qobelloa hore a se ke a mamela; ho e-na le hoo, ke eena ea neng a laola liketso tsa hae, a e-na le matla a feletseng a ho hanela tšusumetso ea Satane.
Hanela Diabolose
Rōna batho re ka khona ho hanela Diabolose. Ho Baefese 6:12, re bolelloa hore “re na le ntoa” khahlanong le “makhotla a moea a khopo a leng libakeng tsa leholimo.” Kahoo, ho totobetse hore Molimo o lebeletse hore re loantše tšusumetso ea Satane. Empa ke joang motho a ka loantšang Satane le bademona ba hae ba matla ho feta motho? Na re lebeletsoe ho loana ntoeng e sa lekaneng matla a rōna, eo re tsebang hantle hore re tla hlōloa ho eona? Che, hobane Molimo ha a re re loantše Diabolose ka matla a rōna. Jehova o re fa litsela tse sa tšoaneng tseo re ka hanelang maqheka a Diabolose ka tsona le ho qetella re a hlōtse. Bibele e re bolella hore na Diabolose ke mang, litsela tseo a sebetsang ka tsona le kamoo re ka itšireletsang kateng.—Johanne 8:44; 2 Bakorinthe 2:11; 11:14.
Kamoo U ka ‘Hanyetsang Diabolose’ Kateng
Mangolo a buella mohato o habeli oa ho hanela Diabolose. Rea eletsoa: “Ka hona, ipeheng tlas’a Molimo; empa le hanyetse Diabolose, ’me o tla le balehela.” (Jakobo 4:7) Mohato oa pele oa ho ipeha tlas’a Molimo o akarelletsa ho utloa litaelo tsa hae. Ho lula kamehla re hlokomela boteng ba Molimo, molemo oa hae, matla a hae a hlollang le taolo ea hae e hlollang le melao-motheo ea hae e phahameng li tla re fa matla a ho hanyetsa Satane. Thapelo e phehellang ho Molimo le eona ke ea bohlokoa.—Baefese 6:18.
Nahana ka ketsahalo ea ha Jesu a ne a lekoa ke Diabolose. Ho hopola le ho qotsa litaelo tse sa tšoaneng tsa Molimo ka sebele ho ile ha thusa Jesu ho mo hanyetsa. Ha Satane a hlōleha ho tšoasa Jesu hore a etse sebe, o ile a mo tlohela. Ka mor’a ketsahalo eo e bohloko, Jehova, a sebelisa mangeloi a hae, o ile a tsoela pele ho matlafatsa Jesu. (Matheu 4:1-11) Kahoo, ka sebete Jesu o ne a ka khothalletsa barutuoa ba hae ho kōpa Molimo hore a ba “lopolle ho ea khopo.”—Matheu 6:13.
Hore Molimo a re lopolle ha ho bolele hore o re koahela ka thebe ho re sireletsa. Ho e-na le hoo, o re bolella hore re phehelle litšoaneleho tsa bomolimo, tse kang ’nete, ho loka, khotso le tumelo. Litšoaneleho tsena li sebeletsa e le “lihlomo tse feletseng,” tse re nolofaletsang ho ‘ema re tiile khahlanong le maqiti a Diabolose.’ (Baefese 6:11, 13-18) Kahoo, ka thuso ea Molimo ho ka khoneha ho hlōla liteko tsa Diabolose.
Mohato oa bobeli o buelloang ho Jakobo 4:7 ke ho ‘hanyetsa Diabolose.’ Hona ho akarelletsa ho nka khato e tiileng, ho baleha tšusumetsong ea hae e kotsi. Motho o tlameha ho qoba ho pepesehela matla a hae a thetsang le ho hana lifilosofi tse khothalletsang lerato la lintho tse bonahalang le boitšoaro bo litšila tse atileng haholo lefatšeng kajeno. Ho hanyetsa Diabolose joalo hammoho le ho phela bophelo bo nehetsoeng ho khahlisa Molimo ke habohlokoa haholo ntoeng ea rōna khahlanong le Satane. Empa na libe tsohle tse etsoang ke ka lebaka la tšusumetso ea Diabolose ka ho toba?
Ntoa ea Rōna ea ka Hare
Mongoli oa Bibele Jakobo oa hlalosa: “E mong le e mong o lekoa ke ho huloa le ho ekoa ke takatso ea hae. Joale takatso, ha e emere, e tsoala sebe.” (Jakobo 1:14, 15) Ka bomalimabe, re ke ke ra hlōla ka ho feletseng mefokolo le ho se phethahale hoo re ho futsitseng. Bibele e re: “Ha ho motho ea lokileng lefatšeng ea ntseng a etsa hantle, a sa tšohe a etsa sebe.”—Moeklesia 7:20.
Sena hase bolele hore re ke ke ra laola libe tsohle ka ho feletseng. Maemong a mang, ka lebaka la ho etsa khetho e fosahetseng, re itlisetsa liteko. Kahoo, le hoja mohlomong takatso e fosahetseng e ka ’na ea e-ba teng ka lebaka la ho se phethahale ha rōna kapa ka lebaka la tšusumetso ea Satane, ho ho rōna ka ho feletseng hore na rea e hōlisa kapa re e qhelela thōko. Ka ho loketseng, moapostola Pauluse o ile a ngola: “Leha e le sefe seo motho a se jalang, sena ka ho tšoanang o tla se kotula.”—Bagalata 6:7.
Amohela Boikarabelo
Hangata batho ba thatafalloa ke ho amohela mefokolo ea bona, lintho tseo ba hlōlehang ho tsona le tseo ba haelloang ho tsona—e, libe. (Pesaleme ea 36:2) Ntho e ’ngoe e ka re thusang ho amohela boikarabelo ba libe tsa rōna ke ho tseba hore Molimo ha a hloke hore ebe re phethahetse hona joale. Mopesaleme Davida o ile a re: “Ha a ka a re etsa kamoo libe tsa rōna li leng kateng, ha a ka a re putsa ka moputso oa makhopo a rōna.” (Pesaleme ea 103:10) Le hoja Molimo a tšoarela, o ntse a lebeletse hore re loane ka thata, re itaee, khahlanong le maqiti a Diabolose le tšekamelo ea rōna ea boetsalibe.—1 Bakorinthe 9:27.
Re tlameha ho utloisisa hore le hoja Molimo a elelloa hore Diabolose a ka laola liketso tsa rōna le hore ke eena ea jarang boikarabelo bo boholo ka boemo ba boetsalibe ba moloko oa batho, sena ha se re lokolle boikarabelong ba rōna ba botho. Kahoo, Baroma 14:12 e re: “E mong le e mong oa rōna o tla fana ka tlaleho bakeng sa hae ka boeena ho Molimo.”
Leha ho le joalo, haeba re ‘nyonya se khopo’ ’me re ‘khomarela se molemo,’ re ka hlōla bobe. (Baroma 12:9, 21) Mosali oa pele, Eva, o ile a hlōleha ho etsa seo ’me o ile a fuoa kotlo ka lebaka la ho se mamele ha hae; a ka be a ile a hana ’me a mamela Molimo. (Genese 3:16) Leha ho le joalo, Molimo ha aa ka a hlokomoloha karolo eo Diabolose a e phethileng ho mo thetsa. Diabolose o ile a rohakoa le ho ahloleloa hore qetellong o tla timetsoa ka ho feletseng. (Genese 3:14, 15; Baroma 16:20; Baheberu 2:14) Haufinyane ha re sa tla hlola re tlameha ho loana le tšusumetso ea hae e khopo.—Tšenolo 20:1-3, 10.
[Tlhaloso ea Moo Setšoantšo se Nkiloeng Teng e leqepheng la 30]
Erich Lessing/Art Resource, NY