Bacha Baa Botsa . . . 

Nka Qoba ho Tloaelana le Batho ba Fosahetseng Joang?

“Ke ile ka qala ho tloaelana le ngoanana e mong sekolong. . . . E ne e se motho oa lithethefatsi, oa liphathi kapa oa boitšoaro bo litšila. O ne a bile a sa rohakane ’me o ne a ipabola lithutong tsa hae. Empa eena e ne e le motsoalle ea fosahetseng.”—Beverly.a

KE HOBANE’NG ha Beverly a ile a fihlela qeto e boletsoeng ka holimo? Hona joale oa hlokomela hore ngoanana enoa o ile a mo susumelletsa hore a kenelle mekhoeng e fosahetseng. Beverly oa hlalosa: “Ha ke ntse ke tloaelana le eena ho ea pele, le ’na ke ile ka qala ho bala libuka tse sebelisanang le meea, esita le ho ngola lipale tse amanang le meea.”

Mocha ea bitsoang Melanie le eena o ile a susumelletsoa hore a kenelle boitšoarong bo fosahetseng—empa eena o susumelitsoe ke motho ea neng a ipolela hore ke Mokreste-’moho le eena! U ka tseba joang hore na motho e ka ba motsoalle ea molemo kapa che? Na kamehla ho kotsi ho tloaelana haufi-ufi le bao e seng balumeli? Na ha ho na likotsi hafeela motho a theha setsoalle le Bakreste-’moho le eena?

Ka ho khetheha, ho thoe’ng ka ho tloaelana le motho oa bong bo fapaneng? Haeba u shebile motho e mong ka morero oa hore ka moso e be molekane oa hao oa lenyalo, u ka tseba joang haeba setsoalle sa lōna e tla ba se u tsoelang molemo? A re ke re hlahlobeng hore na melao-motheo ea Bibele e ka re thusa joang ho araba lipotso tse joalo.

Metsoalle e Nepahetseng ke e Joang?

Na taba ea hore ngoanana ea neng a kena sekolo le Beverly o ne a sa rapele Molimo oa ’nete e ne e lokela ebe e entse hore a be leqe ho etsa setsoalle le eena? Ke ’nete hore Bakreste ba ’nete ha ba etse qeto ea hore motho o litšila kapa o boitšoaro bo bobe hobane feela e se molumeli-’moho le bona. Empa ha ho tluoa tabeng ea ho etsa setsoalle se haufi-ufi, ho na le lebaka la hore motho a be hlokolosi. Moapostola Pauluse o ile a lemosa ba neng ba le phuthehong ea Korinthe ea lekholong la pele la lilemo: “Litloaelano tse mpe li senya motho.” (1 Bakorinthe 15:33, The Bible—An American Translation) O ne a bolela’ng?

Ho ka etsahala hore ba bang ba Bakreste bao ba Korinthe ba ne ba tloaelane le Baepikure, balateli ba rafilosofi oa Mogerike, Epicurus. Epicurus o ne a ruta balateli ba hae hore ba be le kelello e hlaphohetsoeng, ba be le sebete, boitšoaro le toka. O bile a ba khothalletsa hore ba se ke ba etsa lintho tse fosahetseng sephiring. Joale ke hobane’ng ha Pauluse a ne a ka nka Baepikure, esita le ba neng ba le ka phuthehong ba neng ba e-na le maikutlo a tšoanang, e le “litloaelano tse mpe”?

Baepikure e ne e se barapeli ba Molimo oa ’nete. Kaha ba ne ba sa lumele tsohong ea bafu, ba ne ba lebisitse tlhokomelo ho ikhotsofatseng ka hohle ha ba sa ntse ba phela. (Liketso 17:18, 19, 32) Ka lebaka la ho tloaelana le batho ba joalo, ha ho makatse hore ba bang ka phuthehong ea Korinthe ba ile ba qala ho felloa ke tumelo tsohong ea bafu. Ke lona lebaka le entseng hore khaolong ea 15 ea Bakorinthe ba Pele—moo re fumanang keletso ea Pauluse ka litloaelano tse mpe—ebe ho behiloe mabaka a mangata a reretsoeng ho kholisa Bakreste bao ba pele hape hore tšepo ea tsoho ea bafu ke ea sebele.

Re ithuta’ng? Hore le batho ba sa rapeleng Molimo ba ka ba le litšoaneleho tse ntle. Empa haeba u khetha ho ba le setsoalle se haufi-ufi le bona, monahano oa hao, tumelo ea hao le boitšoaro ba hao li tla ameha. Ka hona, lengolong la hae la bobeli ho Bakorinthe, Pauluse o ile a re: “Le se ke la kena jokong e sa lekaneng hammoho le ba sa lumelang.”—2 Bakorinthe 6:14-18.

Fred, ea lilemo li 16, o ile a lemoha bohlale ba mantsoe ao a Pauluse. Pele o ile a lumela ho kenella mosebetsing o etsoang ka thōko ho nako ea sekolo o neng o akarelletsa ho ea linaheng tse tsoelang pele moruong ho thusa ho ruta bana ba teng. Leha ho le joalo, ha eena le barutoana-’moho le eena ba ntse ba lokisetsa sena, Fred o ile a fetola maikutlo a hae. O ile a re: “Ke ile ka lemoha hore ho qeta nako e ngata joalo le bona ho ne ho ke ke ha ntsoela molemo moeeng.” Ka lebaka lena, Fred o ile a khetha ho ikhula morerong ona ’me a khetha ho thusa ba hlokang ka litsela tse ling.

Botsoalle le Bakreste-’moho

Empa ho thoe’ng ka setsoalle le ba ka har’a phutheho ea Bokreste? Ha Pauluse a ne a ngolla mohlankana Timothea, o ile a mo lemosa: “Ka tlung e khōlō ha ho na lijana tsa khauta le silevera feela empa hape ho na le lijana tsa lehong le letsopa, le tse ling bakeng sa morero o hlomphehang empa tse ling bakeng sa morero o haelloang ke tlhompho. Ka hona, haeba leha e le mang a lulella hōle le tse haelloang ke tlhompho, e tla ba sejana bakeng sa morero o hlomphehang, se halalelitsoeng, se nang le thuso ho mong’a sona, se lokiselitsoeng mosebetsi o mong le o mong o molemo.” (2 Timothea 2:20, 21) Kahoo, Pauluse ha aa ka a okola ka holimo ’nete ea hore le har’a Bakreste, ho ka ’na ha e-ba le ba sa itšoareng ka tsela e hlomphehang. ’Me o ile a toba taba ha a hlokomelisa Timothea hore a lulelle hōle le ba joalo.

Na see se bolela hore u lokela ho belaella Bakreste-’moho le uena? Che. Le teng ha se bolele hore u lebelle hore metsoalle ea hao e be e se nang sekoli. (Moeklesia 7:16-18) Leha ho le joalo, taba ea hore mocha o tla libokeng tsa Bokreste kapa hore batsoali ba hae baa cheseha ka phuthehong ha ho bolele hore e ka ba khetho e ntle bakeng sa ho mo etsa motsoalle ea haufi-ufi.

Liproverbia 20:11 e re: “Esita le ka liketso tsa hae moshanyana [kapa ngoanana] o iketsa hore a hlokomeloe mabapi le hore na mosebetsi oa hae o hloekile ’me o lokile.” Ka hona, ke bohlale hore u nahane ka sena: Na kamano ea motho eo le Jehova ke eona ntho ea bohlokoa bophelong ba hae? Kapa ho e-na le hoo, na ho na le bopaki ba hore monahano oa hae le boikutlo ba hae li bonahatsa “moea oa lefatše”? (1 Bakorinthe 2:12; Baefese 2:2) Na ho ba le eena ho u khothalletsa hore u rapele Jehova?

Haeba u khetha metsoalle e ratang Jehova haholo le lintho tsa moea, u ke ke ua qoba mathata feela, empa u tla boela u fumane matla a eketsehileng a ho sebeletsa Molimo. Pauluse o ile a re ho Timothea: “U phehelle ho loka, tumelo, lerato, khotso, hammoho le ba ipiletsang ho Morena ho tsoa pelong e hloekileng.”—2 Timothea 2:22.

Botsoalle le ba Bong bo Fapaneng

Haeba u se u le lilemong ’me u batla ho kena lenyalong, na u se u kile ua nahana hore na melao-motheo ee e ka ama khetho ea hao ea molekane joang? Ho na le lintho tse ngata tse ka u khahlang ka motho eo u batlang hore e be molekane oa hao, empa ea bohlokoa ka ho fetisisa ke boemo ba motho moeeng.

Ka hona, Bibele e lemosa hangata ka ho nyalana le motho ea seng “Moreneng.” (1 Bakorinthe 7:39; Deuteronoma 7:3, 4; Nehemia 13:25) Ke ’nete hore batho bao e seng balumeli-’moho e ntse e ka ba ba nang le boikarabelo, ba hlomphehang le ba mosa. Empa ha ho na se ba susumetsang joaloka uena hore ba hōlise litšoaneleho tseo le ho mamella lenyalong ha lilemo li ntse li feta.

Ka lehlakoreng le leng, motho ea inehetseng ho Jehova ’me a tšepahala o ikemisetsa ho hlaolela litšoaneleho tsa Bokreste le ho lula a e-na le tsona, ho sa tsotellehe hore na ho hlaha eng. O oa tseba hore Bibele e matahanya ho rata molekane oa hae le ho ba le kamano e ntle le Jehova. (Baefese 5:28, 33; 1 Petrose 3:7) Ka hona, ha balekane ka bobeli ba rata Jehova, ba na le tšusumetso e matla ea ho lula ba tšepahala e mong ho e mong.

Na see se bolela hore ha Bakreste-’moho ba nyalana joang kapa joang lenyalo la bona le tla atleha? Che. Ka mohlala, haeba u ne u nyalana le motho ea se nang thahasello e kaalo linthong tsa moea, ho ne ho tla etsahala eng? Kaha ha aa itlhomella ka ho lekaneng ho hlōla khatello ea tsamaiso ena, motho ea fokolang moeeng a ka tsoa habonolo phuthehong ea Bokreste. (Bafilipi 3:18; 1 Johanne 2:19) Nahana ka masisa-pelo le ho hula ka thata lenyalong tseo u ka tobanang le tsona haeba molekane oa hao a ka tšoaseha “litšilafatsong tsa lefatše.”—2 Petrose 2:20.

Pele u qala setsoalle se ka lebisang lenyalong, ipotse: Na motho eo o fana ka bopaki ba hore ke motho oa moea? Na o beha mohlala o motle oa ho phela joaloka Mokreste? Na motho eo o tsitsitse ’neteng ea Bibele, kapa o sa hloka nako e eketsehileng hore a hōle moeeng? Na u kholisehile hore ntho ea bohlokoa e mo susumetsang bophelong ke ho rata ha hae Jehova? Ho tseba hore motho o na le botumo bo botle ho molemo. Leha ho le joalo, ka holim’a tsohle u lokela ho kholiseha hore motho eo u mo thahasellang o inehetse ho Jehova ’me e ka ba molekane oa lenyalo ea hantle.

Hape hopola hore ba bang ba khahliloeng ke “batho ba fosahetseng” ba qalile ka ho khahloa ke lintho tse fosahetseng—tse kang mokhoa o itseng o fosahetseng oa boithabiso. Bacha ba behang mohlala o motle ka phuthehong ea Bokreste ba ke ke ba kopanela le uena linthong tse joalo. Ka hona, itlhahlobe.

Haeba u fumana hore pelo ea hao e hloka taeo, u se ke ua felloa ke tšepo. Pelo e ka lauoa. (Liproverbia 23:12) Ntho ea bohlokoa ke ena: Ha e le hantle u batla eng? Na u batla ho khahloa ke se nepahetseng hammoho le batho ba etsang se nepahetseng? Ka thuso ea Jehova, u ka hlaolela pelo e joalo. (Pesaleme ea 97:10) ’Me ka ho koetlisa matla a hao a ho lemoha se nepahetseng ho se fosahetseng, u tla fumana ho le bonolo ho etsa qeto ea hore na ke bo-mang bao e ka bang metsoalle e hahang le e matlafatsang.—Baheberu 5:14.

[Mongolo o botlaaseng ba leqephe]

[Setšoantšo se leqepheng la 14]

Metsoalle e nepahetseng e ba le tšusumetso e ntle moeeng