Pakela Jehova ’me u se Khathale

“Nahanang ka hloko ka ea mamelletseng puo e hanyetsang joalo ea baetsalibe . . . hore le se ke la khathala ’me la tepella meeeng ea lōna.”—BA-HEBERU 12:3, “NW.”

 1, 2. Jesu o ile a fa barutuoa ba hae bopaki bofe bo kholisang ba hore o tsositsoe?

“KE BONE Morena!” Ka mantsoe ao a sa lebelloang, Maria Magdalena o ile a phunya litaba tsa tsoho ea Jesu. (Johanne 20:18, TLP) Sena se ile sa tšoaea ho qaleha ha matsatsi a 40 a neng a tletse liketsahalo tse hlasimollang bakeng sa barutuoa ba Kreste, bao pele ba neng ba saretsoe ka baka la lefu la hae.

² Jesu o ne a sa batle ho siea khoao ea hore kannete oa phela likelellong tsa barutuoa ba hae. Ka hona, joalokaha Luka a tlaleha: “E leng bao eneng ere hobane [Jesu] a utloisoe bohloko, a ileng a ipontša bona, a se a phela, ka lipontšo tse ngata tse kholisang, ba ’mona ka matsatsi a mashome a mane.” (Liketso 1:3) Ha e le hantle, ka lekhetlo le leng o ile “a bonoa ka nako e le ’ngoe ke baena ba fetisang makholo a mahlano.” (1 Ba-Korinthe 15:6) Ka sebele, joale ho ne ho se ho se lebaka le leng la ho ba le khoao. Jesu o ne a phela!

 3. Ke potso efe e mabapi le ’Muso eo barutuoa ba Jesu ba ileng ba ’motsa eona, ’me ke hobane’ng ha karabelo ea hae e ile ea ba makatsa?

³ Ka nako eno barutuoa ba Jesu ba ne ba nahana feela ka “’muso oa Molimo” oa lefatšeng, o tsosolositsoeng bakeng sa Iseraele. (Luka 19:11; 24:21) Kahoo ba ile ba botsa Jesu: “Morena, na u re, e se e le joale u tla tsosa ’muso oa Iseraele na?” Ha ho pelaelo hore karabelo ea hae e ile ea ba makatsa, hobane o ile a re: “Ha hoa le lokela ho tseba mehla, leha e le linako tseo Ntate a itaoletseng tsona a ’notši. Empa le tla fuoa matla mohla Moea o Halalelang o tlang ho lōna, ’me le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.” (Liketso 1:6-8) Ke phephetso e kaakang eo joale e neng e behiloe ka pel’a barutuoa! ’Me e ne e le boikarabelo bo bokaakang! Ba ne ba ka phetha mosebetsi o joalo joang? Karabelo e ile ea phakisa ea tla ka mokhoa o sa lebelloang.

Ho Amohela Phephetso

 4. Hlalosa se ileng sa etsahala letsatsing la Pentekonta.

⁴ Luka oa tlaleha: “Letsatsi la Pentekonta ha le se le fihlile, ba ne ba lutse bohle nģalong e le ’ngoe, ba le khopolo e le ’ngoe. Joale hang, ha utluoa molumo o tsoang leholimong, o kang oa moea o fokang ka sefefo; ntlo eohle eo ba lutseng ho eona ea tlala oona; maleme a arohaneng, a kang malakabe a mollo, a ba hlahela, a lula holim’a e mong le e mong oa bona. ’Me bohle ba tlala Moea o Halalelang, ’me ba qala ho bua ka lipuo lisele, kamoo Moea o ba buisang kateng.” Lerata leo le ile la e-ba leholo hoo le ileng la mema tlhokomelo ea letšoele la Bajode ba neng ba lutse Jerusalema bakeng sa mokete. Ba ile ba makala ha ba utloa ‘limakatso tsa Molimo ka puo tsa bona.’—Liketso 2:1-11.

 5. Boprofeta ba Jesu bo ho Liketso 1:8 bo ile ba phakisa ba phethahatsoa ho fihlela tekanyong efe?

⁵ Ntle le ho senya nako, Petrose o ile a fana ka puo e matla, a paka ka ntle ho tika-tiko hore “Jesu oa Nazaretha,” eo ba neng ba ile ba mo khokhothela, e ne e le “Morena” ea boletsoeng ke Davida esale pele ka mantsoe ana: “Morena o itse ho Morena oa ka: Lula ka letsohong la ka le letona, ke be ke bee bao e leng lira ho uena bonamelo ba maoto a hao.” Ba hlabehile lipelo, bamameli ba Petrose ba botsa: “Banna ba heso, re tla etsa joang?” Ha a arabela, Petrose a ba phehella: “Bakang, ’me e mong le e mong oa lōna a kolobeletsoe ka lebitso la Jesu Kreste tšoarelong ea libe.” Phello? Ba likete tse tharo ba ile ba kolobetsoa! (Liketso 2:14-41) Bopaki bo ne bo se bo ntse bo fanoa Jerusalema. Hamorao, bo ile ba hasana ho kena Judea eohle, ha latela Samaria, ’me qetellong “ho isa pheletsong ea lefatše.” Katoloso ea mosebetsi oa ho bolela ka ’Muso e ile ea e-ba e potlakileng hoo ka bo-60 C.E. moapostola Pauluse a neng a ka re litaba tse molemo “li bolelletsoe pōpo eohle e tlas’a leholimo.”—Ba-Kolosse 1:23, NW.

Katoloso ea ’Muso le Mahloriso

6, 7. (a) Ke joang katoloso ea ’Muso le mahloriso a Bakreste li neng li tsamaea ’moho lekholong la pele la lilemo? (b) Ke tlhoko efe e potlakileng e ileng ea hlaha har’a Bakreste Jerusalema, ’me tlhoko ee e ile ea khotsofatsoa joang?

⁶ Nakoana ka mor’a Pentekonta ea 33 C.E., barutuoa ba Jesu ba ne ba e-na le lebaka la ho hopola mantsoe a hae: “Mohlanka ha a moholo ho morena oa hae. Ha ba ntlhorisitse, ba tla le hlorisa le lōna.” (Johanne 15:20) Baeta-pele ba Bajode ba ile ba halefa ha ‘lentsoe la Molimo le ntse le tsoela pele; ’me barutuoa ba ne ba anafala haholo Jerusalema.’ Ka liqoso tsa bohata, morutuoa Setefane o ile a tlepetsoa ka majoe ho fihlela a e-shoa. Hoo ho ile ha bonahala eka ke pontšo eo ba bangata ba neng ba ntse ba e emetse, hobane “mehleng eo, kereke [e ile] ea hlaheloa ke hloriso e kholo; ba qhalanyetsoa bohle mafatšeng a Judea le a Samaria, ha sala baapostola ba ’notši.”—Liketso 6:7; 7:58-60; 8:1.

⁷ Mahloriso a ile a kokobela ka nakoana. Empa nakoana hamorao, Heroda Agrippa I o ile a bolaea moapostola Jakobo. Petrose o ile a kenngoa teronkong empa a lokolloa ke lengeloi. Hamorao baena ba Jerusalema ba ile ba oeloa ke bofuma linthong tse bonahalang, ’me ba ile ba lokela ho romelloa thuso ke balumeli ’moho le bona ba libaka tse ling. (Liketso 9:31; 12:1-11; 1 Ba-Korinthe 16:1-3) Nakong ea ketelo ea moapostola Pauluse Jerusalema, ho feteletsa litaba ha bolumeli ho ile ha bonahala ha letšoele le hoeletsa: “Motho ea joalo a tlosoe lefatšeng; hobane ha a tšoanela ho phela.” (Liketso 22:22) Ka sebele, Bakreste bao ba neng ba phela Jerusalema le Judea ba ne ba hloka khothatso e khōlō hore ba tsoele pele ka botšepehi ho paka ka ’Muso. Jesu o ne a tšepisitse barutuoa ba hae hore “moea o halalelang, oo Ntate a tla o romela ka lebitso la ka,” o ne o tla sebetsa e le “mothusi.” (Johanne 14:26, NW) Empa joale ke joang Ntate a neng a ka fana ka thuso kapa matšeliso a hlokahalang joalo? Ka lehlakoreng le leng, karabelo e ile ea fanoa ke moapostola Pauluse.

Lengolo la Pauluse le Eang ho Baheberu

 8. (a) Ke eng e ileng ea susumelletsa Pauluse ho ngola lengolo la hae le eang ho Baheberu? (b) Ke tšobotsi efe ea lengolo la hae eo re tla shebana le eona, hona hobane’ng?

⁸ Hoo e ka bang ka 61 C.E., Pauluse o ile a kenngoa teronkong Roma, empa o ile a hlokomela se etsahalang ka baena ba hae Jerusalema. Ka hona, tlas’a tsamaiso ea moea oa Jehova, o ile a ngolla Baheberu lengolo la hae le neng le le nakong. Le tletse kameho e lerato bakeng sa baena le bo-khaitseli ba hae ba Baheberu. Pauluse o ne a tseba seo ba se hlokang hore tumelo le kholiseho ea bona e hahuoe ho Jehova joaloka Mothusi oa bona. Joale ba ne ba ka ‘titima ka sebete peisong eo ba e beetsoeng’ ’me ka kholiseho ba re: “Jehova ke mothusi oa ka; nke ke ka tšaba. Motho a ka nketsa’ng?” (Ba-Heberu 12:1; 13:6, NW) Joale re lakatsa ho shebana le tšobotsi ena ea lengolo la Pauluse le eang ho Baheberu (likhaolo 11-13). Hobane’ng? Hobane boemo boo Bakreste bao ba pele ba neng ba talimane le bona bo tšoana le boo Lipaki tsa Jehova li talimaneng le bona kajeno.

 9. Ke tseko efe eo Bakreste ba lekholong la pele la lilemo ba neng ba talimane le eona eo Bakreste ba talimaneng le eona kajeno, ’me ke joang feela e ka hlōloang?

⁹ Molokong oa rōna, matšoele a arabetse hamolemo molaetseng oa ’Muso ka ho inehela ho Jehova le ho kolobetsoa ho ba Lipaki tsa hae. Leha ho le joalo, mahloriso a mabifi a ’nile a tsamaea le katoloso ena ea borapeli ba ’nete, Bakreste ba bangata ba ba ba tela bophelo ba bona joalokaha ho entse Setefane, Jakobo, le lipaki tse ling tse tšepahalang tsa lekholong la pele la lilemo. Kahoo, hona joale tseko e sa ntsane e tšoana le e neng e le teng ka nako eo: Ke bo-mang ba tla khona ho mamella teko ea botšepehi ba bona ha ba talimane le khanyetso e ntseng e phaellana khahlanong le molaetsa oa ’Muso? Ho feta moo, ke bo-mang ba tla khona ho talimana le liketsahalo tse hlollang tse kang ‘mahlomola a maholo’ ao ho seng a ka bapisoang le oona ao haufinyane a tla oela moloko oo o teng? (Mattheu 24:21) Karabelo ke hore, ke ba itokiselitseng ho “loana ntoa e ntle ea tumelo,” ba ‘tiileng tumelong.’ Bana ke bona bao qetellong ba tla khona ho re: “Hlōlo e hlōtseng lefatše ke tumelo ea rōna.”—1 Timothea 6:12; 1 Petrose 5:9; 1 Johanne 5:4.

Ho Rua Molemo Mehlaleng ea ba Tšepahalang

10. (a) Tumelo ke eng? (b) Molimo o ile oa ikutloa joang ka banna le basali ba tumelo ba mehleng ea boholo-holo?

¹⁰ Tumelo ke eng? Pauluse oa arabela: “Tumelo ke ho tšepa lintho tse ntseng li lebeletsoe, ke ho kholiseha ka tse e-song ho bonoe. Ke ka baka la eona baholo-holo ba rōna ba ileng ba pakoa.” (Ba-Heberu 11:1, 2, TLP) Joale Pauluse o tšehetsa tlhaloso ea hae ea tumelo ka ho bontša ha tumelo e sebetsa. O totobatsa lintho tse hlahelletseng bophelong ba ba bang ba “baholo-holo,” hammoho le basali ba kang Sara le Rahaba. Ke ho khothatsang hakaakang ho fumana hore ‘Molimo ha o lihlong ho ipitsa Molimo oa bona’! (Ba-Heberu 11:16) Na Molimo o ka bolela se tšoanang ka rōna ka baka la tumelo ea rōna? E se eka re ke ke ra o fa lebaka la ho hlajoa ke lihlong ka rōna ha letsatsi ka leng le fela.

11. Ke joang rōna kajeno re ka ruang molemo ho ‘leru la Lipaki le re teetseng hare’?

¹¹ Ka mor’a tlaleho ea banna le basali bana ba tšepahalang, Pauluse o re: “Joale he, le rōna ha re teetsoe hare ke leru le lekalo la lipaki, a re ke re lahleng hohle ho re imelang, le sebe se tšoasang feela, ’me re ke re titime ka sebete peisong eo re e beetsoeng.” (Ba-Heberu 12:1) Le hoja hona joale li robetse mabitleng, na lipaki tsee tse tšepahalang tse behileng mohlala lia phela likelellong tsa rōna? Na ua li tseba ’me u tseba liphihlelo tsa tsona hantle ho lekana hore u ka arabela ka e? Ona ke o mong oa meputso e mengata ea thuto ea ka mehla ea Bibele, ho sebelisa mecha eohle eo re elelloang lintho ka eona ho ikhopotsa liphihlelo tse hlasimollang tsa ‘leru lena la lipaki.’ Ruri ho tebisa mohlala oa tsona oa botšepehi pelong ho tla re thusa haholo ho hlōla khaello leha e le efe ea tumelo. Joale, sena se tla re thusa ho pakela ’nete ka sebete re bile re sa tšabe letho tlas’a maemo ’ohle.—Ba-Roma 15:4.

Ho se Khathale

12. (a) Mohlala oa Jesu o ka re thusa joang hore re se ‘khathale ’me ra tepella meeeng ea rōna’? (b) Mehlala e meng ea mehleng ea kajeno ea ba sa khathaleng ke efe?

¹² Mohlala oa rōna o moholo ka ho fetisisa oa tumelo ke Jesu. Pauluse oa phehella: “A re matheng ka mamello peisong e behiloeng ka pel’a rōna, ha re ntse re talimile ka tieo Lenģosa le Leholo le Mophethahatsi oa tumelo ea rōna, Jesu. . . . Ka sebele, nahanang ka hloko ka ea mamelletseng puo e hanyetsang joalo ea baetsalibe khahlanong le lithahasello tsa bona, hore le se ke la khathala ’me la tepella meeeng ea lōna.” (Ba-Heberu 12:1-3, NW) U nahanne ka mohlala oa Jesu “ka hloko” hakae? U ’nile ua talima ho eena “ka tieo” hakae? (1 Petrose 2:21) Satane o batla hore re ‘khathale ’me re tepelle meeeng ea rōna.’ O batla hore re khaotse ho etsa mosebetsi oa ho paka. O etsa see joang? Ka linako tse ling ke ka mahloriso a tobileng a tsoang ho ba boholong bolumeling le lefatšeng, joaloka lekholong la pele la lilemo. Selemong se fetileng, mosebetsi oa ho bolela ka ’Muso o ile oa thibeloa linaheng tse ka bang 40. Empa na seo se ile sa etsa hore baena ba rōna ba khathale? Che! Mosebetsi oa bona o tšepahalang o ile oa fella ka hore ho kolobetsoe ba 17 000 le ho feta linaheng tseo ka 1988. See e lokela ho ba tšusumetso e kaakang ho bohle ba phelang linaheng tseo ho tsona ho nang le bolokolohi ha ho bapisoa! Le ka mohla a re se keng ra khathala ho bolela litaba tse molemo tsa ’Muso!

13. (a) Tse ling tsa lintho tse ipatileng tse neng li ka etsa hore re tepelle mosebetsing oa rōna oa ho bolela ke life? (b) ‘Thabo eo Jesu a neng a e beetsoe’ e ne e le efe, ’me ke joang re ka bang le boikutlo bo tšoanang ba thabo?

¹³ Leha ho le joalo, ho na le lintho tse ling tse batlang li ipatile tse ka etsang hore re tepelle. Tsena li akarelletsa khanyetso lelapeng le arohaneng bolumeling, khatello ea kelello, mathata a bophelo, khatello ea lithaka, ho nyahamisoa ke ho hloka litholoana tse ntle mosebetsing oa rōna oa ho bolela, kapa mohlomong boikutlo ba ho hloka mamello ka baka la hore bofelo ba tsamaiso ena ea lintho ha bo e-s’o fihle. Koana, ke eng e ileng ea thusa Jesu ho mamella ho utloisoa bohloko kelellong le ’meleng? E ne e le “thabo eo a e beetsoeng.” (Ba-Heberu 12:2) Jesu o ile a matlafatsoa ke thabo ea ho thabisa pelo ea Ntat’ae ka ho Mo tlotlisa hammoho le tebello ea thabo eo a neng a tla e latsoa hamorao ha a fana ka mahlohonolo a tsotehang a ’Muso oa Bomessia. (Pesaleme ea 2:6-8; 40:9, 10; Liproverbia 27:11) Na re ka latela ka tieo haholoanyane boikutlo boo ba thabo ba Jesu? ’Me re hopole tiiso eo Petrose a faneng ka eona ho 1 Petrose 5:9: “Lihloreho li le ling le tsena li ntse li hlahela banab’abo lōna ba lefatšeng.” Ho tseba hore Jehova oa utloisisa, ho utloa mofuthu oa mokhatlo oa baena oa lefatše ka bophara, le ho boloka mahlo a rōna thabong e larileng ka pel’a rōna tlas’a puso ea ’Muso—sena sohle se tla re thusa hore re se khathale ho sebeletsa Jehova ka tumelo le ho bolela ha bofelo bo se bo le haufi hakana.

Lebaka Leo ka Lona Jehova a Fanang ka Taeo

14. Ke melemo efe e ka ’nang ea tlisoa ke liteko le lintho tse bohloko tseo re ka ’nang ra lokela ho li mamella?

¹⁴ Pauluse joale o chabisa leseli holim’a lebaka leo ka lona re ka ’nang ra lokela ho mamella liteko le ho utloa bohloko. O hlahisa hore re talime lintho tse joalo e le mofuta o mong oa taeo. Pauluse o re: “Mora oa ka, se nyatse taeo ea Morena [“Jehova,” NW], ’me u se ke ua tepella ha u khalemeloa ke eena; hobane Morena o ee a laee eo a mo ratang.” (Ba-Heberu 12:5, 6) Esita le Jesu “o ithutile kutlo ka tse bohloko tse mo hlahetseng.” (Ba-Heberu 5:8) Ka sebele ho hlokahala hore le rōna re ithute kutlo. Hlokomela liphello tse molemo tsa ho lumella taeo ho re fetola. Pauluse o itse: “Ba rutoang ka eona e ba kotulisa khotsong litholoana tsa ho loka.” Hoo ke ho khothatsang hakaakang!—Ba-Heberu 12:11.

15. Ke joang re ka sebelisang keletso ea Pauluse ea ho ‘etsa litsela tse lokileng bakeng sa maoto a rōna’?

¹⁵ Haeba re amohela ‘taeo e tsoang ho Jehova’ ka kutloisiso ena, re tla tebisa keletso ena e molemo ea Pauluse pelong: “A le ke le tiiseng ke hona matsoho a tepeletseng le mangole a tetemang; ’me le etsetse maoto a lōna litsela tse lokileng.” (Ba-Heberu 12:12, 13) Ka linako tse ling ho bobebe haholo ho fapoha ‘tsela e patisaneng e lebisang bophelong.’ (Mattheu 7:14, NW) Moapostola Petrose le ba bang Antioke ba kile ba ba molato oa ho etsa sena. Hobane’ng? Hobane ba ne ba sa “hate ka ho loka ’neteng ea Evangeli.” (Ba-Galata 2:14) Kajeno, re tlameha ho lula re ntse re mamela Morupeli oa rōna e Moholo, Jehova Molimo. Ho hlokahala hore re sebelise ka botlalo lithuso tse fanoang ka “mohlanka ea khabane, ea bohlale.” Sena se tla tiisa hore ho ba le ‘tsela e lokileng’ bakeng sa maoto a rōna.—Mattheu 24:45-47; Esaia 30:20, 21, NW.

16. (a) “Mothapo o chefu” o ka ’na oa mela joang ka phuthehong? (b) Ke hobane’ng ha Pauluse a hokahanya boitšoaro bo bobe le ho haelloa ke kananelo bakeng sa lintho tse halalelang, ’me ke joang re ka itebelang likotsing tse joalo?

¹⁶ Ka mor’a moo Pauluse o re lemosa hore re lokela ho “talima ka hloko hore ho se be ea hlokisoang mosa o sa tšoanelang oa Molimo; hore ho se be mothapo o chefu o ka hlahang ’me oa hlahisa khathatso le hore ho se be ba bangata ba ka silafatsoang ke oona.” (Ba-Heberu 12:15, NW) Ho belaela, ho se khotsofale, ho fumana phoso tseleng eo lintho li etsoang ka eona ka phuthehong ho ka tšoana le “mothapo o chefu” oo ka potlako o ka hasang le ho kenya chefu mehopolong e metle ea ba bang ka phuthehong. Re ka loantša mehopolo e mebe joalo ka ho nahanisisa ka mahlohonolo a se nang palo ao ’nete e a tlisitseng bophelong ba rōna. (Pesaleme ea 40:5) Kotsi e ’ngoe ke ea ho ba le litšekamelo tsa boitšoaro bo bobe kapa ‘ho haelloa ke kananelo bakeng sa lintho tse halalelang, joaloka Esau.’ (Ba-Heberu 12:16, NW) Pauluse o hokahanya likotsi tsena tse peli hammoho, kaha e ’ngoe e ka lebisa ho e ’ngoe habonolo. Ha ho hlokahale hore Mokreste ofe kapa ofe a inehele litakatsong tse joalo tsa boithati haeba a sebelisa mantsoe a Petrose: “Hanang ho [Diabolose] ka ho tiea tumelong.”—1 Petrose 5:9.

“Ho Kholiseha ka Tse E-song ho Bonoe”

17. Bapisa liketsahalo tse hlollang tse bileng teng Thabeng ea Sinai le tseo Bakreste ba thulanang le tsona kajeno.

¹⁷ Tumelo ea rōna e itšetlehile haholo ka “ho kholiseha ka tse e-song ho bonoe.” (Ba-Heberu 11:1, TLP) Ho Ba-Heberu 12:18-27, Pauluse o tsoela pele ho bua ka tse ling tsa lintho tsena tseo re kholisehileng ka tsona tse sa bonoeng. O hlalosa liketsahalo tse hlollang tse etsahetseng Thabeng ea Sinai ha Molimo o ne o buisana le Iseraele ka ho toba le ha Moshe a re: “Ke tšohile hampe, kea thothomela.” Joale moapostola Pauluse oa phaella: “Empa le tlile thabeng ea Sione, motseng oa Molimo o phelang, Jerusalema oa leholimo, liketeng tsa likete tsa mangeloi, phuthehong.” Mabapi le ha Baiseraele ba boholo-holo ba le Thabeng ea Sinai, Pauluse o itse lentsoe la Molimo le ile la sisinya lefatše, empa joale O tšepisitse, o itse: “Ke sa tla be ke sisinye hang hape, e seng lefatše feela, empa e leng le lona leholimo.” Le hoja mantsoe ana a lebisitsoe haholo-holo ho Bakreste ba tlotsitsoeng, “bongata bo boholo ba batho” ba seka linku le bona bo ka a tebisa lipelong. (Tšenolo 7:9) Na u ananela ka botlalo seo Pauluse a se bolelang? Re eme ka pel’a phutheho ea mangeloi a mashome a likete. Ho hlakile hore re boetse re eme ka pel’a Jehova. Ka letsohong la hae le letona ho eme Jesu Kreste. Ka sebele, re boemong bo hlollang ’me re tlas’a boikarabelo bo boholo ho feta Baheberu bao ba boholo-holo ha ba le Thabeng ea Sinai! Hape hopola, tšisinyeho e tla ba teng ntoeng e tlang ea Harmagedone e tla etsa hore leholimo le lefatše tse khopo tse teng li nyamele. Ka sebele kajeno hase nako ea ho “ikhula” ho mameleng Lentsoe la Molimo le ho le utloa!

18. Ke joang feela re ka tsoelang pele ho pakela Jehova re sa khathale?

¹⁸ Joale, ruri re phela nakong e hlollang ka ho fetisisa historing ea batho. Re le Lipaki tsa Jehova, re rometsoe karolong e hōle ka ho fetisisa ea lefatše ho bolela litaba tse molemo tsa ’Muso oa Molimo o hlomiloeng. Ho etsa joalo, re tlameha ho ba le tumelo e ke keng ea sisinngoa, tumelo e sa khathaleng, tumelo e etsang hore re khone ho amohela taeo ea Jehova. Haeba re e-na le tumelo e joalo, re tla fumanoa har’a ba tla “tsoela pele ho fumana mosa o sa tšoanelang, oo ka oona re ka nehelanang ka tšebeletso e halalelang ho Molimo ka tšabo ea bomolimo le ka thothomelo ka mokhoa o amohelehang.” (Ba-Heberu 12:28, NW) E, re tla tsoela pele ho pakela Jehova ’me re ke ke ra khathala.

U ne u Tla Arabela Joang?

◻ Ke hobane’ng ha lengolo la Pauluse le eang ho Baheberu le le molemo ho rōna?

◻ Ke tseko efe eo Bakreste ba tlamehang ho talimana le eona kajeno?

◻ Re ka rua molemo joang ho lipaki tse tšepahalang tsa mehleng ea boholo-holo?

◻ Ke hobane’ng ha Jehova a laea bao a ba ratang?

◻ Senotlolo sa ho paka re sa khathale ke sefe?