Tšobotsi ea Tumelo ea Hao—ea Lekoa Hona Joale
“Ho nkeng e le thabo feela, barab’eso, ha le thulana le liteko tse sa tšoaneng, joalokaha le hlile le tseba hore tšobotsi ena e lekiloeng ea tumelo ea lōna e hlahisa mamello.”—JAKOBO 1:2, 3.
1. Ke hobane’ng ha Bakreste ba lokela ho lebella hore tumelo ea bona e lekoe?
BAKRESTE ba ’nete ha ba lakatse ho utloa bohloko, ’me ha ba thabele ho hlomoha kapa ho tlotloloha. Empa ba hopola mantsoe a ka holimo a ngotsoeng ke Jakobo, mor’abo Jesu ka ’m’a bona. Kreste o ile a hlakisetsa barutuoa ba hae hore ba lebelle mahloriso le mathata a mang ka lebaka la ho khomarela ha bona litekanyetso tsa Molimo. (Matheu 10:34; 24:9-13; Johanne 16:33) Empa liteko tse joalo li ka fella ka thabo. Joang?
2. (a) Liteko tsa tumelo ea rōna li ka fella ka thabo joang? (b) Mosebetsi oa mamello e ka ba o feletseng joang tabeng ea rōna?
2 Lebaka le ka sehloohong leo ka lona re thabang ha re le litekong tsa tumelo ke hore li ka hlahisa litholoana tse molemo. Joalokaha Jakobo a bolela, ho tiisetsa ha re talimane le liteko kapa mathata ho “hlahisa mamello.” Re ka rua molemo ka ho hlaolela tšoaneleho eo ea bohlokoa ea Bokreste. Jakobo o ile a ngola: “Mamello mosebetsi oa eona a e be o feletseng, e le hore le ka ba ba feletseng le ba phethahetseng ka litsela tsohle, le sa haelloe ke ntho leha e le efe.” (Jakobo 1:4) Mamello e na le “mosebetsi” oo e lokelang ho o etsa. Mosebetsi oa eona ke ho re etsa ba phethahetseng linthong tsohle, ho re thusa ho ba Bakreste ba leka-lekaneng le ba hōlileng tsebong. Kahoo, ka ho tlohella liteko ho tsoela pele ho fihlela qetellong, re sa leke ho sebelisa mekhoa eo e seng ea Mangolo ho li felisa kapele, tumelo ea rōna ea lekoa le ho hloekisoa. Haeba re ne re haelloa ke mamello, qenehelo, mosa kapa lerato ha re sebetsana le maemo kapa le batho ba bang, mamello e ka etsa hore re phethehe haholoanyane. E, li latellana tjena: Liteko li hlahisa mamello; mamello e eketsa litšoaneleho tsa Bokreste; tsona ke mohloli oa thabo.—1 Petrose 4:14; 2 Petrose 1:5-8.
3. Ke hobane’ng ha re sa lokela ho balehisoa ke ho tšaba liteko kapa ho lekoa ha tumelo ea rōna?
3 Moapostola Petrose le eena o ile a totobatsa lebaka leo ka lona re sa lokelang ho tšaba kapa ho baleha liteko tsa tumelo ea rōna. O ile a ngola: “Le thabisoa haholo ke ’nete ena, le hoja ka nakoana hona joale, haeba ho lokela ho ba joalo, le baketsoe mesarelo ke liteko tse sa tšoaneng, e le hore tšobotsi e lekiloeng ea tumelo ea lōna, ea bohlokoa bo boholo ho feta khauta e timelang ho sa tsotellehe ho pakoa ha eona ka mollo, e ka fumanoa e le lebaka la thoriso le khanya le tlhompho tšenolong ea Jesu Kreste.” (1 Petrose 1:6, 7) Mantsoe ana a khothatsa ka ho khethehileng hona joale hobane “matšoenyeho a maholo”—nako ea thoriso, tlotliso, tlhompho le ho pholoha—e haufinyane ho feta kamoo ba bang ba ka nahanang kateng le ho feta ha re ne re e-ba balumeli.—Matheu 24:21; Baroma 13:11, 12.
4. Mor’abo rōna e mong o ile a ikutloa joang ka liteko tseo eena le Bakreste ba bang ba tlotsitsoeng ba ileng ba feta ho tsona?
4 Sehloohong se etellang sena pele, re ile ra hlahloba liteko tseo masala a batlotsuoa a ileng a talimana le tsona ho tloha ka 1914 ho ea pele. Na tsee e ne e le mohloli oa thabo? A. H. Macmillan o ile a fana ka pono ena mabapi le nako e fetileng: “Ke bone liteko tse ngata tse matla ka ho fetisisa li hlahela mokhatlo o hlophisitsoeng le ha tumelo ea ba ka hare ho oona e lekoa. Ka thuso ea moea oa Molimo, o ile oa pholoha ’me oa tsoela pele ho atleha. Ho e-na le hore re khopisoe ke khopolo e ncha, ke bone bohlale ba ho letela Jehova ka mamello hore a hlakise kutloisiso ea rōna ea litaba tsa Mangolo. . . . Ho sa tsotellehe hore na nako le nako re ne re tlameha ho lokisa pono ea rōna hakae, seo se ne se ke ke sa fetola tokisetso e mosa ea thekollo le tšepiso ea Molimo ea bophelo bo sa feleng. Ka hona, ho ne ho sa hlokahale hore re lumelle tumelo ea rōna ho fokolisoa ke litebello tse sa phethahalang kapa ho fetoloa ha pono.”—Molula-Qhooa (oa Senyesemane), August 15, 1966, leqepheng la 504.
5. (a) Ke melemo efe e ileng ea hlahisoa ke ho feta litekong ha masala? (b) Ke hobane’ng ha re lokela ho thahasella taba ee ea ho lekoa hona joale?
5 Bakreste ba tlotsitsoeng ba ileng ba pholoha nako ea teko ea 1914-19 ba ile ba lokolloa tšusumetsong e hatellang ea lefatše le mekhoeng e mengata ea bolumeli ea Babylona. Masala a ile a tsoela pele e le batho ba hloekisitsoeng le ba se nang litšila, bao ka ho rata ba nyehelang mahlabelo a thoriso ho Molimo le ba nang le tiisetso ea hore bona joaloka batho ba ne ba amoheleha ho eena. (Esaia 52:11; 2 Bakorinthe 6:14-18) Kahlolo e ne e qalile ka ntlo ea Molimo, empa e ne e ke ke ea phethoa ka nako e le ’ngoe e tsitsitseng. Ho lekoa le ho sefshoa ha batho ba Molimo ho tsoela pele. Ba nang le tšepo ea ho pholoha “matšoenyehong a maholo” a atamelang e le karolo ea “bongata bo boholo” le bona tumelo ea bona ea lekoa. (Tšenolo 7:9, 14) Sena se etsoa ka mekhoa e tšoanang le seo masala a batlotsuoa a neng a talimana le sona esita le ka litsela tse ling.
Ke Joang U ka ’Nang Ua Lekoa?
6. Mofuta o mong oa teko e matla eo ba bangata ba fetileng ho eona ke ofe?
6 Bakreste ba bangata ba ’nile ba nahana ka phephetso ea ho hlōla liteko tse tlang e le litlhaselo tse tobileng. Ba hopola tlaleho ena: “[Baeta-pele ba Bajuda] ba bitsa baapostola, ba ba shapa, ’me ba ba laela hore ba khaotse ho bua motheong oa lebitso la Jesu, eaba baa ba tlohela hore ba tsamaee. Ka hona, bana ba tloha ka pel’a Sanhedrine, ba thabile hobane ba ne ba nkiloe e le ba tšoaneloang ke ho hlompholloa ka lebaka la lebitso la hae.” (Liketso 5:40, 41) ’Me histori ea kajeno ea batho ba Molimo, haholo-holo lintoeng tsa lefatše, e totobatsa hore Lipaki tsa Jehova tse ngata li ile tsa hla tsa shapuoa le ho etsoa lintho tse mpe le ho feta moo ke bahlorisi.
7. Bakreste ba bang ba kajeno ba bontšitse tumelo ho ea bohōleng bofe?
7 Mabapi le ho hlorisoa ha Bakreste, lefatše ha le khetholle masala a batlotsuoa ho bongata bo boholo ba “linku tse ling.” (Johanne 10:16) Ho theosa le lilemo, litho tsa lihlopha tsena ka bobeli li ’nile tsa lekoa ka matla ka ho kenngoa teronkong esita le ho bolaeloa tumelo ka lebaka la lerato la tsona ho Molimo le la tumelo ea tsona ho eena. Lihlopha tsena ka bobeli li ’nile tsa hloka moea oa Molimo, ho sa tsotellehe tšepo ea tsona. (Bapisa le Molula-Qhooa oa June 15, 1996, leqepheng la 31.) Ka bo-1930 le bo-1940 Jeremane ea Bonazi, bongata ba bahlanka ba Jehova, ho akarelletsa le bana, bo ile ba bontša tumelo e ikhethang, ’me ba bangata ba ile ba lekoa ka hohle-hohle. Mehleng ea morao-rao, batho ba Jehova ba ’nile ba talimana le mahloriso linaheng tse kang Burundi, Eritrea, Ethiopia, Malawi, Mozambique, Rwanda, Singapore le Zaire. ’Me liteko tsa mofuta ona li tsoela pele.
8. Litlhaloso tsa mor’abo rōna e mong oa Afrika li bontša joang hore ho ameha ho eketsehileng ha tumelo ea rōna e lekoa ho feta ha re mamella mahloriso a tlang ka ho shapuoa?
8 Leha ho le joalo, joalokaha ho se ho bontšitsoe, tumelo ea rōna le eona e lekoa ka litsela tse poteletseng haholoanyane. Liteko tse ling hase tse tobileng hakaalo le tse bonahalang habonolo. Nahana kamoo u neng u tla itšoara kateng tlas’a maemo a latelang. Mor’abo rōna oa Angola ea neng a e-na le bana ba leshome o ne a le phuthehong eo ka nako e itseng e neng e sa khone ho buisana le barab’abo rōna ba ikarabellang. Hamorao ba bang ba ile ba khona ho etela phutheho eo. O ile a botsoa hore na o khona joang ho fepa lelapa la hae. Ho ne ho se bonolo hore a arabe, ’me sohle seo a neng a ka se bua e ne e le hore boemo bo ne bo le boima. Na o ne a khona ho fepa bana ba hae bonyane hang ka letsatsi? O ile a araba: “Ha e le hantle, ka thata. Re ithutile ho phela ka seo re nang le sona.” Joale ka lentsoe le tletseng kholiseho, o ile a re: “Empa na hase sona seo re se lebeletseng matsatsing aa a ho qetela?” Tumelo e joalo ea ikhetha lefatšeng, empa e tloaelehile har’a Bakreste ba tšepahalang, ba nang le kholiseho e feletseng ea hore litšepiso tsa ’Muso li tla phethahala.
9. Re lekoa joang mabapi le 1 Bakorinthe 11:3?
9 Bongata bo boholo le bona bo ntse bo lekoa mabapi le tsamaiso ea puso ea Molimo. Phutheho ea Bokreste ea lefatše ka bophara e tsamaisoa ho latela melao-motheo ea bomolimo le litekanyetso tsa puso ea Molimo. Tabeng ea pele, sena se bolela ho hlokomela Jesu e le Moeta-pele ea khethiloeng e le Hlooho ea phutheho. (1 Bakorinthe 11:3) Ho ikokobelletsa eena le Ntate oa hae ka ho rata ho bonahala ka tumelo ea rōna khethong e etsoang ka tsela ea puso ea Molimo le liqetong tse amanang le ho etsa ha rōna thato ea Jehova re kopane. Ho feta moo, phuthehong ea sebaka ka seng, ho na le banna ba khethiloeng hore ba etelle pele. Ke banna ba sa phethahalang bao ho ka ’nang ha etsahala hore ebe re bona liphoso tsa bona habonolo; empa re phehelloa ho hlompha balebeli ba joalo ’me re ikokobetse. (Baheberu 13:7, 17) Na ka linako tse ling u fumana hoo ho le thata? Na see ehlile ke teko ho uena? Haeba ho joalo, na u rua molemo tekong ee ea tumelo ea hao?
10. Re talimana le teko efe mabapi le tšebeletso ea tšimo?
10 Re boetse re lekoa mabapi le tokelo le tlhokahalo ea ho kopanela kamehla tšebeletsong ea tšimo. Hore re hlōle teko ena, re tlameha ho hlokomela hore ho ba le karolo e feletseng tšebeletsong ho akarelletsa ho fetang ho bolela hanyenyane kapa ka tloaelo feela tjee. Hopola tlhaloso ea Jesu e ananelang ka mohlolohali ea futsanehileng ea ileng a fana ka sohle seo a neng a e-na le sona. (Mareka 12:41-44) Re ka ’na ra ipotsa, ‘Na ka ho tšoanang kea itela tšebeletsong ea ka ea tšimo?’ Kaofela ha rōna re lokela ho ba Lipaki tsa Jehova ka linako tsohle, re lokele ho khantša leseli la rōna monyetleng o mong le o mong o hlahang.—Matheu 5:16.
11. Ho fetoha ha kutloisiso kapa keletso e mabapi le boitšoaro e ka ba teko joang?
11 Teko e ’ngoe eo re ka ’nang ra talimana le eona e amana le tekanyo ea kananelo ea rōna ea leseli le ntseng le eketseha le khantšoang ’neteng ea Bibele le ea keletso e fanoang ke sehlopha sa lekhoba le tšepahalang. (Matheu 24:45) Ka linako tse ling sena se hloka hore motho a fetole boitšoaro ba hae, joaloka tabeng ea ha ho ne ho hlaka hore ba sebelisang koae ba tlameha ho e tlohela haeba ba batla ho lula ka phuthehong.a (2 Bakorinthe 7:1) Kapa teko e ka ’na ea e-ba mabapi le ho amohela hore ho hlokahala hore re fetole khetho ea rōna ea ’mino kapa mefuta e meng e itseng ea boithabiso.b Na re tla belaella bohlale ba keletso e fanoeng? Kapa na re tla lumella moea oa Molimo hore o fetole monahano oa rōna ’me o re thuse ho apara botho ba Bokreste?—Baefese 4:20-24; 5:3-5.
12. Ho hlokahala eng bakeng sa ho matlafatsa tumelo ka mor’a hore motho a kolobetsoe?
12 Ka lilemo tse mashome, palo ea bongata bo boholo e ’nile ea eketseha, ’me ka mor’a hore bo kolobetsoe bo tsoela pele ho matlafatsa kamano ea bona le Jehova. Sena se akarelletsa se fetang ho ba teng likopanong tsa Bokreste, ho ea libokeng tse ling Holong ea ’Muso, kapa ho kopanela tšebeletsong ea tšimo ka linako tse ling. Ka mohlala: Ka ’mele motho a ka ’na a ba ka ntle ho Babylona e Moholo, ’muso oa lefatše oa bolumeli ba bohata, empa na ka sebele o e furaletse? Na o ntse a khomaretse lintho tse bontšang moea oa Babylona e Moholo—moea o nyelisang litekanyetso tsa Molimo tse lokileng? Na o nka boitšoaro le ho tšepahala lenyalong habobebe? Na o hatisa lithahasello tsa botho le tsa lintho tse bonahalang ho feta lithahasello tsa moea? E, na o lutse a sa silafatsoa ke lefatše?—Jakobo 1:27.
Rua Molemo Tumelong e Lekiloeng
13, 14. Ba bang ba entse eng ka mor’a ho qalisa tseleng ea borapeli ba ’nete?
13 Haeba ka sebele re balehile Babylona e Moholo ’me re boetse re tsoile lefatšeng, a re se keng ra talima lintho tse ka morao. Tumellanong le molao-motheo o fumanoang ho Luka 9:62, ha mang kapa mang ho rōna a ne a ka hetla morao ho ne ho ka fella ka hore e se hlole e e-ba mofo oa ’Muso oa Molimo. Jesu o itse: “Ha ho motho ea behileng letsoho la hae mohomeng ’me a talima lintho tse ka morao ea loketseng hantle ’muso oa Molimo.”
14 Empa ba bang ba ileng ba fetoha Bakreste nakong e fetileng, ho tloha ka nako eo ba ’nile ba itumella ho ba ka sebōpeho sa tsamaiso ena ea lintho. Ha baa ka ba hanela moea oa lefatše. (2 Petrose 2:20-22) Litšitiso tsa lefatše li hapile thahasello ea bona ’me li qetile nako ea bona, kahoo li ba thibela ho tsoela pele. Ho e-na le ho boloka likelello tsa bona le lipelo li tsepame ’Musong oa Molimo le ho loka ha hae, ba etelletsa pele lintho tse joalo bophelong, ba khelohile ’me ba phehella lipakane tsa lintho tse bonahalang. Ntle le hore ba susumelletsehe ho lumela hore tumelo ea bona ea fokola ’me ba fofo le ho fetola tsela ea bona ka ho batla keletso ea bomolimo, ba kotsing ea ho lahleheloa ke kamano ea bona ea bohlokoa le Jehova le mokhatlo oa hae o hlophisitsoeng.—Tšenolo 3:15-19.
15. Ho hlokahala eng hore re lule re amoheleha ho Molimo?
15 Ho fumanoa ha rōna re amoheleha re bile re le mocheng oa ho pholoha matšoenyeho a maholo a atamelang ka potlako ho itšetlehile ka ho ipoloka re hloekile, re ‘hlatsoitse liaparo tse telele tsa rōna maling a Konyana.’ (Tšenolo 7:9-14; 1 Bakorinthe 6:11) Haeba re sa boloke boemo bo hloekileng, ba ho loka ka pel’a Molimo, tšebeletso ea rōna e halalelang e ke ke ea amoheleha. Ka sebele, e mong le e mong oa rōna o lokela ho hlokomela hore tšobotsi e lekiloeng ea tumelo ea rōna e tla re thusa ho mamella le ho qoba ho halefisa Molimo.
16. Mashano a ka ipaka ho ba teko ea tumelo ea rōna ka litsela life?
16 Ka linako tse ling, mecha ea litaba le ba boholong lefatšeng ba bua lipolelo tse nyelisang batho ba Molimo, ba bua litumelo tsa rōna tsa Bokreste le tsela ea rōna ea bophelo hampe. Sena ha sea lokela ho re makatsa, hobane Jesu o bontša ka ho hlaka hore ‘lefatše le ne le tla re hloea, hobane ha re karolo ea lona.’ (Johanne 17:14) Na re tla lumella ba foufalitsoeng ke Satane ho re tšosa le ho re nyahamisa le ho etsa hore litaba tse molemo li re hlabise lihlong? Na re tla lumella mashano a qaloang ka ’nete hore a ame ho kopanela ha rōna kamehla libokeng le mosebetsing oa rōna oa ho bolela? Kapa na re tla ema re tiile ’me re be sebete ’me re ikemisetse ho feta leha e le neng ho tsoela pele re bolela ’nete ka Jehova le ’Muso oa hae?
17. Ke tiisetso efe e ka re susumelletsang ho tsoela pele ho bontša tumelo?
17 Ho latela boprofeta ba Bibele bo phethahalitsoeng, hona joale re phela hare-hare nakong ea bofelo. Litebello tsa rōna tse thehiloeng Bibeleng bakeng sa lefatše le lecha la ho loka, ka sebele li tla fetoha ntho ea sebele e thabisang. Ho fihlela letsatsi leo le fihla, e se eka bohle re ka sebelisa tumelo e sa sisinyeheng Lentsoeng la Molimo ’me ra paka tumelo ea rōna ka ho se khaotse ho bolela litaba tse molemo tsa ’Muso lefatšeng ka bophara. Nahana ka barutuoa ba bacha ba likete ba kolobetsoang beke e ’ngoe le e ’ngoe. Na leo hase lebaka le utloahalang la hore re utloisise hore mamello ea Jehova mabapi le ho liha kahlolo ea hae e ka fella ka poloko ea batho ba bang ba bangata? Na ha re thabele hore ebe Molimo o lumeletse mosebetsi oa ho bolela ka ’Muso o pholosang bophelo hore o tsoele pele? Hona na ha rea thabela hore ebe ba limilione ba amohetse ’nete ’me ba bontša tumelo ea bona?
18. Boikemisetso ba hao ke bofe mabapi le ho sebeletsa Jehova?
18 Re ke ke ra bolela hore na ho lekoa ha tumelo ea rōna hona joale ho tla tsoela pele ho fihlela neng. Empa ’nete ke hore: Jehova o behile letsatsi le tobileng la hore maholimo le lefatše tsa joale tse khopo li tle li ahloloe. Ka nako e tšoanang, a re ikemisetseng ho etsisa tšobotsi e ikhethang ea tumelo e lekiloeng e bonahalitsoeng ke Mophethahatsi oa tumelo ea rōna, Jesu. ’Me a re lateleng mohlala oa masala a tlotsitsoeng a ntseng a tsofala le oa ba bang bao ka sebete ba sebeletsang har’a rōna.
19. Ke’ng seo u ka tiisang hore se tla hlōla lefatše lee?
19 Re lokela ho ikemisetsa ho bolela litaba tse molemo tse sa feleng re sa phetse bathong ba lichaba tsohle, ba merabe eohle, ba maleme ’ohle, re sebelisana le lengeloi le fofang sebakeng. A ba ke ba utloe phatlalatso ea lengeloi: “Tšabang Molimo ’me le mo tlotlise, hobane hora ea ho ahlola ha hae e fihlile.” (Tšenolo 14:6, 7) Ha kahlolo eo ea bomolimo e lihuoe, phello e tla ba efe mabapi le tšobotsi e lekiloeng ea tumelo ea rōna? Na ha e na ho ba tlhōlo e khanyang—ho lopolloa tsamaisong ea hona joale ea lintho hore re kene lefatšeng le lecha la Molimo la ho loka? Ka ho mamella liteko tsa tumelo ea rōna, re tla tseba ho bua joaloka moapostola Johanne re re: “Ena ke tlhōlo e hlōtseng lefatše, tumelo ea rōna.”—1 Johanne 5:4.
[Mongolo o botlaaseng ba leqephe]
a Bona Molula-Qhooa oa December 1, 1973, leqepheng la 542-8, le oa January 1, 1974, leqepheng la 3-5.
b Bona Molula-Qhooa oa January 1, 1984, leqepheng la 25-9
Na U sa Hopola?
◻ Ho tla joang hore liteko tsa tumelo ea rōna e ka ba mohloli oa thabo?
◻ Liteko tse ling tsa tumelo ea rōna tse ke keng tsa hlokomeleha habonolo ke life?
◻ Re ka rua molemo o sa feleng joang ka ho mamella liteko tsa tumelo ea rōna ka katleho?
[Setšoantšo se leqepheng la 17]
A. H. Macmillan (ka ho le letšehali, ka pele) hoo e ka bang nakong eo ka eona eena le batsamaisi ba Mokhatlo oa Watch Tower ka leeme ba ileng ba kenngoa teronkong
[Setšoantšo se leqepheng la 17]
E ne e le moemeli kopanong ea Detroit, Michigan, 1928
[Setšoantšo se leqepheng la 17]
Lilemong tsa hae tsa ho qetela, Mor’abo rōna Macmillan o ne a ntse a bontša tumelo
[Setšoantšo se leqepheng la 18]
Joaloka lelapa lena, Bakreste ba bangata Afrika ba bontšitse tšobotsi e lekiloeng ea tumelo