Nako ea ho Falimeha

“E ka khona Evangeli e bolelloe lichaba tsohle pele. . . . Empa ea tiisetsang ho fihlela qetellong, ke [e]ena ea tla bolokeha.”—MAREKA 13:10, 13.

 1. Ke hobane’ng ha re lokela ho mamella le ho ba sebete?

RE TLAMEHA ho mamella ka har’a moloko o se nang tumelo o sothehileng! Ho tloha ka 1914 moloko oa batho o fetohile o senyehileng, hantle feela joaloka mehleng ea Jesu. ’Me kajeno tšenyeho e lefatšeng lohle. ‘Mehleng ena ea qetello, linako tse bohloko tseo ho leng thata ho sebetsana le tsona’ tse ileng tsa hlalosoa ke moapostola Pauluse li hlokofatsa moloko oa batho. ‘Batho ba khopo le bathetsi ba ntse ba tsoela pele ho tloha bobeng ho ea bobeng bo eketsehileng.’ Ho hlakile hore, “lefatše lohle le rapaletse ka tlase ho e mobe,” Satane Diabolose, eo hona joale a etsang boiteko ba hae ba ho qetela ba ho senya lefatše. Empa khothalang! Ho na le ‘mahlomola a maholo’ a tlang a tla tlisetsa bohle ba ratang ho loka phomolo ea kamehla.—2 Timothea 3:1-5, 13, NW; 1 Johanne 5:19; Tšenolo 7:14.

 2. Boprofeta bo ile ba phethahala joang ka 1914?

² Hoa thabisa hore ebe joale Jehova o behile Morena Jesu Kreste teroneng maholimong, a lokisetsa ho tlosa lira tsa moloko oa batho tse hatellang. (Tšenolo 11:15) Joaloka ho tleng ha Messia ka lekhetlo la pele, le lekholong lena la lilemo boprofeta bo babatsehang bo ileng ba ngoloa ke Daniele bo phethahetse. Ho Daniele 4:16, 17, 32 (NW), re bolelloa ka ho khaotsa ha borena bo loketseng holim’a lefatše ka sebaka sa “linako tse supileng.” Phethahatsong ea tsona e khōlō, linako tsena tse supileng li lekana le lilemo tse supileng tsa Bibele tsa ‘matsatsi’ a 360 se le seng, kapa lilemo tse 2 520 kaofela.a Li qalile ka 607 B.C.E., ha Babylona e qala ho hatakela ’muso oa Iseraele, tsa fela ka 1914 C.E., e leng selemo sa ho behoa teroneng ha Jesu leholimong e le Morena ea loketseng oa moloko oa batho. Eaba “mehla ea lichaba” e-ea fela ka nako eo. (Luka 21:24) Empa lichaba li hanne ho inehela ’Musong oa Bomessia o tlang.—Pesaleme ea 2:1-6, 10-12; 110:1, 2.

 3, 4. (a) Liketsahalo tsa lekholong la pele la lilemo li ka bapisoa joang le tsa mehla ea rōna? (b) Ho ka botsoa lipotso life tse loketseng?

³ Ha veke ea bo70 ea lilemo (29-36 C.E.) e ne e atamela, hape leha ho ne ho atamela selemo sa 1914, batho ba tšabang Molimo ba ne ba lebeletse ho fihla ha Messia. ’Me o ile a fela a fihla! Leha ho le joalo, boemong ka bong, mokhoa oo a ileng a hlaha ka oona o ne o fapane le se neng se lebeletsoe. Hape boemong ka bong, ka mor’a nako eo ha ho bapisoa e leng khutšoanyane, qetellong “moloko” o khopo o bolaoa ka taelo ea bomolimo.—Mattheu 24:34.

⁴ Sehloohong sa rōna se etellang sena pele, re ile ra hlokomela kamoo moloko o khopo oa Bajode, o neng o batla hore Jesu a bolaoe o ileng oa fela. Joale, ho thoe’ng ka moloko oa batho o senyang oo le hona joale o mo hanyetsang kapa o mo hlokomolohang? Moloko oo o se nang tumelo o tla ahloloa neng?

“Lebelang!”

 5. (a) Ha ho hlokahale hore re tsebe nako ea “letsatsi leo le hora eo” ea Jehova ka lebaka lefe le utloahalang? (b) Ho latela Mareka, Jesu o ile a phetha boprofeta ba hae ka keletso efe e utloahalang?

⁵ Ka mor’a ho profeta liketsahalo tse lebisang ‘mahlomoleng a maholo,’ Jesu o ile a phaella: “Ha e le letsatsi leo le hora eo, ha ho ea tsebang; esita le mangeloi a leholimo ha a tsebe, leha e le Mora; empa ho tseba Ntate a ’notši.” (Mattheu 24:3-36; Mareka 13:3-32) Ha ho hlokahale hore re tsebe nako e tobileng ea liketsahalo. Ho e-na le hoo, re lokela ho lebisa tlhokomelo ea rōna tabeng ea ho lebela, re hlaolela tumelo e matla, le ho ipoloka re tšoarehile tšebeletsong ea Jehova—e seng tabeng ea ho lekanyetsa nako. Jesu o ile a phetha boprofeta ba hae bo boholo ka ho re: “Iponeleng, le falimehe, ’me le rapele, hobane ha le tsebe mohla e tla ba nako. . . . Lebelang . . . Seo ke le bolellang sona, ke se bolella bohle: Lebelang!” (Mareka 13:33-37) Kotsi e lalla lefifing la lefatše la kajeno. Re lokela ho falimeha!—Ba-Roma 13:11-13.

 6. (a) Re lokela ho beha tumelo ea rōna ho eng? (b) Re ka “bala matsatsi a rōna” joang? (c) Ha e le hantle Jesu o bolela’ng ka “moloko”?

⁶ Ha rea lokela ho ela hloko feela boprofeta bo bululetsoeng bo malebana le mehla ena ea qetello ea tsamaiso e khopo empa re tlameha le ho beha tumelo ea rōna haholo-holo sehlabelong sa bohlokoa sa Kreste Jesu le litšepisong tsa Molimo tse hlollang tse thehiloeng ho sona. (Ba-Heberu 6:17-19; 9:14; 1 Petrose 1:18, 19; 2 Petrose 1:16-19) Ka lebaka la ho laba-labela ho bona bofelo ba tsamaiso ena e khopo, batho ba Jehova ka linako tse ling ba ile ba ba bohele-hele tabeng ea nako eo ‘mahlomola a maholo’ a neng a tla qhoma ka eona, ba bile ba hokahanya sena le ho lekanyetsa hore na ho tloha ka 1914 nako ea bophelo ea moloko e telele hakae. Leha ho le joalo, re ‘fihlela pelo e hlalefileng,’ e seng ka bohele-hele mabapi le hore na moloko o etsoa ke lilemo kapa matsatsi a makae, empa ka ho nahana ka kamoo re ‘balang matsatsi a rōna’ mabapi le ho rorisa Jehova ka thabo. (Pesaleme ea 90:12) Ho e-na le ho fana ka molao oa ho lekanyetsa nako, lentsoe “moloko” joalokaha le sebelisitsoe ke Jesu le bolela haholo-holo batho ba mehleng ea hae ba nako e itseng historing, ka litšobotsi tsa bona tse ba khethollang.b

 7. Moprofesa oa histori o ngola eng ka ‘moloko oa 1914,’ hona see se amana joang le boprofeta ba Jesu?

⁷ Tumellanong le se kaholimo, moprofesa oa histori Robert Wohl o ile a ngola tjena bukeng ea hae The Generation of 1914: “Moloko oa bohlokoa historing ha o khetholloe ka nako le tatellano ea liketsahalo . . . Ha o khetholloe ka linako.” Empa o ile a bontša hore Ntoa ea I ea Lefatše e ile ea baka “boikutlo bo matla ba karohano le nako e fetileng,” ’me o ile a phaella: “Ba ileng ba phonyoha ntoa le ka mohla ba ne ba ke ke ba tlosa likelellong tsa bona tumelo ea hore lefatše le leng le ne le felile ’me le leng le qalile ka August 1914.” Seo ke ’nete hakaakang! Se lebisa tlhokomelo tšobotsing ea bohlokoa ea taba ena. Ho tloha ka 1914 “moloko ona” oa batho o fetile liphetohong tse tšosang. O bone ha lefatše le qoela maling a ba limilione. Ntoa, ho timetsa morabe, botšosi, tlōlo ea molao le ho hloka molao li qhomme lefatšeng lohle. Tlala, mafu le boitšoaro bo bobe li jele setsi lefatšeng la rōna. Jesu o ile a profeta: “Le lōna, etlare ha le [barutuoa ba hae] bona tseo li hlaha, le tsebe hoba ’muso oa Molimo o haufi. Ka ’nete ke re ho lōna: Moloko ona o ke ke oa feta, tseo li e-so ho hlahe.”—Luka 21:31, 32.

 8. Baprofeta ba Jehova ba hatisa tlhokahalo ea ho lula re falimehile joang?

⁸ E, haufinyane ’Muso oa Messia o tla hlōla ka ho feletseng! Joale, na ho na le molemo o ka fumanoang ka ho lekanyetsa linako kapa ka ho ba bohele-hele tabeng ea nako ea sebele ea bophelo ba “moloko”? Le hanyenyane! Habakuke 2:3 e bua ka ho hlaka ha e re: “Tšenolo eo e sa luletse nako ea teng, empa e tla itlhahanela qetellong, e ke ke ea thetsa. Ha e ka lieha, u e lebelle, hobane e tla etsahal[a] ruri, e ke ke ea fela.” Letsatsi la Jehova la ho ikarabella le atamela ka potlako e khōlō.—Jeremia 25:31-33; Malakia 4:1.

 9. Ho tloha ka 1914 ke liketsahalo life tse bontšang hore nako e khutšoanyane?

⁹ Ha puso ea ’Muso oa Kreste e ne e qala ka 1914, Satane o ile a liheloa lefatšeng. Sena se boletse ‘bomalimabe lefatšeng, hobane Diabolose o theohetse ho lona a halefile hampe, ka ho tseba hobane nako ea hae ha e sa le e kae.’ (Tšenolo 12:12, mongolo o tšekaletseng ke oa rōna.) Ruri nako eo e khutšoanyane ha e bapisoa le lilemo tse likete tsa puso ea Satane. ’Muso o atametse, ka ho tšoanang letsatsi le hora ea Jehova ea ho ahlola moloko ona o khopo le tsona li atametse!—Liproverbia 3:25; 10:24, 25.

“Moloko” o Felang

10. “Moloko ona” o tšoana le oa mehleng ea Noe joang?

¹⁰ A re hlahlobisiseng polelo ea Jesu e ho Mattheu 24:34, 35: “Ka ’nete ke re ho lōna: Moloko ona o ke ke oa feta, tseo tsohle li eso ho etsahale. Leholimo le lefatše li tla feta, empa lipolelo tsa ka li ke ke tsa feta.” (Mongolo o tšekaletseng ke oa rōna.) Mantsoe a Jesu a latelang a bontša hore ‘ha ho ea tsebang letsatsi leo le hora eo.’ Habohlokoa le ho feta, o bontša hore re tlameha ho qoba maraba a re potolohileng molokong ona. Kahoo Jesu o-oa phaella: “Hobane joalo ka mehleng e bileng teng pele ho moroallo oa metsi, ha batho ba ne ba e-ja, ba e-noa, ba nyala, ba nyalisa, ha ba ha fihla tsatsi leo Nooe a keneng arekeng ka lona; ha ba ka ba lemoha, ha ba ha fihla moroallo, ’me ba nkoa bohle ke oona: ho tla ba joalo le ho tleng ha Mor’a motho.” (Mattheu 24:36-39) Mona Jesu o ile a bapisa moloko oa mehleng ea hae le oa mehleng ea Noe.—Genese 6:5, 9.

11. Jesu o ile a bapisa ‘meloko’ joang, joalokaha ho tlalehile Mattheu le Luka?

¹¹ Lena e ne e se lekhetlo la pele leo ka lona baapostola ba ileng ba utloa ha Jesu a bapisa ‘meloko’ ka tsela ena, hobane matsatsi a itseng pejana o ne a ile a re mabapi le eena ka boeena: “Mor’a motho . . . e ka khona a utloisoe bohloko bo boholo pele, a lahloe ke moloko ona. Joalo ka ha ho no ho etsahale mehleng ea Nooe, ho tla ba joalo mehleng ea Mor’a motho.” (Luka 17:24-26, mongolo o tšekaletseng ke oa rōna.) Kahoo, Mattheu khaolo ea 24 le Luka khaolo ea 17 li etsa papiso e tšoanang. Mehleng ea Noe “nama eohle e [neng e] sentse mokhoa oa eona lefatšeng” le e ileng ea timetsoa Moroallong e ne e le “moloko ona.” Mehleng ea Jesu sechaba sa Bajode sa bakoenehi se neng se hana Jesu e ne e le “moloko ona.” (Mongolo o tšekaletseng ke oa rōna.)—Genese 6:11, 12; 7:1.

12, 13. (a) Kajeno “moloko ona” o tlamehang ho fela ke ofe? (b) Batho ba Jehova hona joale ba sebetsana ka katleho joang le “moloko o senyehileng o sothehileng”?

¹² Ka hona, phethahatsong ea ho qetela ea boprofeta ba Jesu kajeno, “moloko ona” ho bonahala hore ke batho ba lefatšeng ba bonang pontšo ea ho ba teng ha Kreste empa ba hlōleha ho fetola litsela tsa bona. Ho fapana le seo, rōna joaloka barutuoa ba Jesu re hana ho susumetsoa ke mokhoa oa bophelo oa “moloko ona.” Le hoja re le lefatšeng, re tlameha hore re se be karolo ea lona, “hobane nako e behiloeng e haufi.” (Tšenolo 1:3, NW; Johanne 17:16) Moapostola Pauluse o-oa re eletsa: “Etsang tsohle le sa ngongorehe, le sa likalike; le tle le hloke sekoli le letheba, le be bana ba Molimo, ba sa nyatseheng har’a moloko o senyehileng [o sothehileng, NW], oo le khanyang har’a oona joalo ka maseli lefatšeng.”—Ba-Filippi 2:14, 15; Ba-Kolosse 3:5-10; 1 Johanne 2:15-17.

¹³ ‘Ho khanya ha rōna joaloka maseli’ ha ho akarelletse feela ho bonahatsa botho bo hloekileng ba Bokreste empa, ka holimo ho tsohle, ho akarelletsa ho phetha thōmo ea Jesu ea boprofeta: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” (Mattheu 24:14) Ha ho motho ea ka bolelang hore na bofelo boo bo tla tla neng, empa rea tseba hore bofelo ba “moloko ona” oa batho ba khopo bo tla tla hang ha Molimo a khotsofetse hore bopaki bo fanoe “ho isa pheletsong ea lefatše.”—Liketso 1:8.

“Letsatsi Leo le Hora Eo”

14. Jesu le Pauluse ba ile ba fana ka keletso efe mabapi le ‘mehla le linako,’ ’me re lokela ho itšoara joang?

¹⁴ Ha bopaki ba lefatše lohle bo finyeletsoe ho fihlela tekanyong eo Jehova a e rerileng, ho tla be ho fihlile ‘letsatsi la hae le hora’ ea ho felisa tsamaiso ena ea lefatše. Ha ho hlokahale hore re tsebe nako eo esale pele. Kahoo, moapostola Pauluse o ile a eletsa, a latela mohlala oa Jesu: “Ha e le tsa mehla le tsa linako, banab’eso, ha le tšoanele ho li ngolloa. Le tsoe le tseba hantle-ntle le lona hoba letsatsi la Morena le tla hlaha joalo ka lesholu la bosiu. Hobane mohla ba tla re: Ho khotso, [le tšireletseho, NW]! ke moo tšenyeho e tla ba oela holimo ka sehlōhō, joalo ka pelehi ha e hlahela moimana, ’me ba ke ke ba phonyoha.” Hlokomela moo Pauluse a lebisitseng tlhokomelo ea hae teng: “Mohla ba tla re.” E, mohla ho buuoang ka “khotso le tšireletseho,” mohla ho sa lebelloang ho hang, Molimo o tla liha kahlolo ea hae ka tšohanyetso. Keletso ea Pauluse ke e loketseng hakaakang: “Ka baka leo, a re se keng ra robala joalo ka ba bang, re mpe re falimehe”!—1 Ba-Thessalonika 5:1-3, 6; bona le litemana tsa 7-11; Liketso 1:7.

15, 16. (a) Ke hobane’ng ha re sa lokela ho nahana hore Armageddone e hōle haholo ho feta kamoo e ka ’nang eaba re ne re nahana? (b) Bobusi ba Jehova bo lokela ho phahamisoa joang bokamosong bo haufi?

¹⁵ Na pono ee e nepahetseng haholoanyane mabapi le “moloko ona” e bolela hore Armageddone e hōle haholo ho feta kamoo re neng re nahana kateng? Le hanyenyane! Le hoja le ka mohla re sa ka ra tseba “letsatsi leo le hora eo,” Jehova Molimo kamehla o ’nile a li tseba, ’me ha a fetohe. (Malakia 3:6) Ho totobetse hore lefatše le tetebela tlaase-tlaase tšenyehong ea lona ea ho qetela. Tlhokahalo ea ho lula re falimehile e boemong bo kotsi ho feta neng kapa neng. Jehova o re senoletse “litaba tse tšoanetseng ho hlaha kapele,” ’me re lokela ho arabela ka ho lebisa tlhokomelo e feletseng boikutlong ba ho potlaka.—Tšenolo 1:1; 11:18; 16:14, 16.

¹⁶ Ha nako e ntse e atamela, lula u falimehile, hobane Jehova o tla tloha a tlisa tlokotsi tsamaisong eohle ea Satane! (Jeremia 25:29-31) Jehova o re: “Ke tla itlotlisa, ke be ke ikhalaletse, ke itsebahatse mahlong a lichaba tse ngata; ’me ba tla tseba hoba ke ’na Jehova.” (Ezekiele 38:23) ‘Letsatsi leo la Jehova’ la makhaola-khang lea atamela!—Joele 1:15; 2:1, 2; Amose 5:18-20; Sofonia 2:2, 3.

“Maholimo a Macha le Lefatše le Lecha” Tsa ho Loka

17, 18. (a) Ho latela Jesu le Petrose, “moloko ona” o feta joang? (b) Ke hobane’ng ha re lokela ho lula re lebetse tabeng ea boitšoaro le liketso tsa boinehelo ba bomolimo?

¹⁷ Mabapi le ‘tseo tsohle tse tlamehang ho etsahala’ Jesu o itse: “Leholimo le lefatše li tla feta, empa lipolelo tsa ka li ke ke tsa feta.” (Mattheu 24:34, 35) Mohlomong Jesu o ne a nahanne ka “leholimo le lefatše”—babusi le ba busoang—tsa “moloko ona.” Moapostola Petrose o ile a sebelisa mantsoe a tšoanang ha a bua ka “maholimo a joale le lefatše la joale,” tse ‘boloketsoeng mollo le letsatsi la kahlolo, le la tšenyeho ea batho ba nyefolang.’ Ka mor’a moo o hlalosa kamoo “Letsatsi la Morena lona le tla tla ka mokhoa oa lesholu la bosiu, ’me ka lona maholimo [a mebuso] a tla feta” hammoho le mokhatlo oa batho o senyehileng, kapa “lefatše,” le mesebetsi ea oona ea boetsalibe. Joale moapostola enoa o re khothalletsa ho ameha “liketsong tse halalelang tsa borapeli; [ha re ntse re lebeletse, ’me re] akofisa ho tla ha letsatsi la Molimo, leo maholimo a tla felisoa ke ho cha ka lona, ’me metheo e tla qhibiliha ke ho cha!” Ho latela eng? Petrose o lebisa tlhokomelo ea rōna ‘maholimong a macha le lefatšeng le lecha moo ho loka ho tla ikahela teng.’—2 Petrose 3:7, 10-13.c

¹⁸ “Maholimo a macha” ao, e leng puso ea ’Muso oa Kreste Jesu le marena-’moho le eena, a tla tšollela mahlohonolo mokhatlong oa “lefatše le lecha” oa batho ba lokileng. Na u lebeletse ho ba setho sa mokhatlo oo? Haeba ho joalo, u na le lebaka la ho thabela bokamoso bo hlollang bo larileng ka pele!—Esaia 65:17-19; Tšenolo 21:1-5.

19. Re ka thabela tokelo efe e khōlō hona joale?

¹⁹ E, esita le hona joale ho bokelloa “moloko” oa batho ba lokileng. Kajeno “mohlanka ea khabane, ea bohlale” ea tlotsitsoeng o fana ka thuto ea bomolimo tumellanong le mantsoe a Pesaleme ea 78:1, 4: ‘Oho sechaba sa ka, mamela thuto ea ka. Sekehela mantsoe a molomo oa ka litsebe. U phetele litloholo tsa hao lithoko tsa Jehova, le matla a hae, le mehlolo e entsoeng ke eena.’ (Mattheu 24:45-47) Ka la 14 April selemong sena, liphuthehong tse fetang 75 500, linaheng tse ka bang 230, batho ba fetang 12 000 000 ho pota lefatše ba ile ba ba teng Sehopotsong sa lefu la Kreste. Na u ne u le har’a bona? E se eka u ka beha tumelo ea hao ho Kreste Jesu ’me u ‘bitse lebitso la Jehova e le hore u bolokehe.’—Ba-Roma 10:10-13.

20. Kaha ‘nako e setseng e khutšoanyane,’ ke joang re tlamehang ho lula re falimehile, hona e le ha re lebelletse eng?

²⁰ Moapostola Pauluse o itse: ‘Nako e setseng e khutšoanyane.’ Ka hona, ke nako ea hore kamehla re lule re falimehile ’me re tšoarehile mosebetsing oa Jehova, ha re ntse re mamella liteko le mahloeo a tlisoang ke moloko oa batho o khopo. (1 Ba-Korinthe 7:29; Mattheu 10:22; 24:13, 14) A re luleng re lebetse, re hlokometse lintho tsohle tse boletsoeng esale pele ka Bibeleng tse tla tlela “moloko ona.” (Luka 21:31-33) Ka ho pholoha linthong tsena tsohle le ka ho ba boemong ba ho fumana kamohelo ea bomolimo ka pel’a Mor’a motho, qetellong re ka ’na ra fumana moputso oa bophelo bo sa feleng.

[Mongolo o botlaaseng ba leqephe]

Lipotso Tsa Tlhahlobo:

◻ Ha re se re hlokometse phethahatso ea Daniele 4:32, hona joale ke joang re lokelang ho ‘lula re lebetse’?

◻ Likosepele tsa Mattheu le Luka li tsebahatsa “moloko ona” joang?

◻ Ha re ntse re letetse “letsatsi leo le hora eo,” re hlokomela eng, ’me re lokela ho arabela joang?

◻ Ho lebella “maholimo a macha le lefatše le lecha” ho lokela ho re khothalletsa ho etsa eng?

[Litšoantšo tse leqepheng la 17]

Moloko oa batho o tšoenyehang o tla fumana phomolo ha moloko ona o mabifi, o khopo o fela

[Litlhaloso Tsa Moo Litšoantšo li Nkiloeng Teng]

Alexandra Boulat/Sipa Press

[Litlhaloso Tsa Moo Litšoantšo li Nkiloeng Teng]

Left and below: Luc Delahaye/Sipa Press

[Setšoantšo se leqepheng la 18]

“Maholimo a macha le lefatše le lecha” tse khanyang li larile hantle feela ka pele bakeng sa merabe eohle ea moloko oa batho