Qobang Borapeli ba Bohata!
“‘Tsoang har’a bona, ’me le ikarole,’ ho bolela Jehova, ‘le khaotse ho ama ntho e sa hloekang.’”—2 BAKORINTHE 6:17.
1. Batho ba bangata ba tšepahalang ba batla ho tseba eng ka tieo?
BATHO ba bangata ba tšepahalang ha ba tsebe ’nete ka Molimo le ka bokamoso ba moloko oa batho. Kaha ha baa fumana likarabo tseo ba hlileng ba li batlang tsa lipotso tsa ’nete e buang ka Molimo le ka bokamoso ba moloko oa batho, ba ferekane ka ho feletseng ebile ha ba tsebe hore na ba etse joang. Ba limilione ke makhoba a tumela-khoela, meetlo le mekete e khopisang ’Mōpi oa rōna. Ho ka etsahala hore ebe baahelani ba hao le beng ka uena ba lumela thuto ea lihele tsa mollo, ea Molimo ea likarolo li tharo, ea hore moea ha o shoe, kapa thuto e ’ngoe feela ea bohata.
2. Baeta-pele ba bolumeli ba entse’ng, ’me liphello ke life?
2 Ke hobane’ng ha batho ba bangata hakaale ba sa tsebe letho ka Molimo? Ntho e makatsang ke hore bolumeli, haholo-holo mekhatlo ea bolumeli le baeta-pele ba eona, ke bona ba ’nileng ba ruta likhopolo tse hanyetsang mehopolo ea Molimo. (Mareka 7:7, 8) Ka lebaka leo, batho ba bangata ba thetsitsoe hore ba lumele hore ba rapela Molimo oa ’nete, empa bonneteng e le hore baa mo khopisa. Bolumeli ba bohata bo ikarabella ka ho toba boemong bona bo soabisang.
3. Mohlohlelletsi e moholo oa bolumeli ba bohata ke mang, ’me Bibele e mo hlalosa joang?
3 Ho na le sebōpuoa se sa bonahaleng se susumetsang bolumeli ba bohata. Moapostola Pauluse o ile a bua tjena ka sona: ‘Molimo oa tsamaiso ena ea lintho o foufalitse likelello tsa ba sa lumelang, e le hore khanya ea litaba tse molemo tse khanyang tse mabapi le Kreste, eo e leng setšoantšo sa Molimo, e se ke ea khanya.’ (2 Bakorinthe 4:4) Ha e le hantle, Satane Diabolose ke eena “molimo oa tsamaiso ena ea lintho.” Ke eena mohlohlelletsi ea ka sehloohong oa borapeli ba bohata. Pauluse o ile a ngola a re: “Satane o ntse a iphetola lengeloi la leseli. Ka hona hase letho le leholo haeba basebeletsi ba hae le bona ba ntse ba iphetola basebeletsi ba ho loka.” (2 Bakorinthe 11:14, 15) Satane o etsa hore lintho tse mpe li bonahale li le ntle ’me o thetsa batho hore ba lumele mashano.
4. Molao oo Molimo a neng a o file Baiseraele ba boholo-holo o ne o re’ng ka baprofeta ba bohata?
4 Ke kahoo Bibele e nyatsang bolumeli ba bohata ka matla hakana! Ka mohlala, Molao oa Moshe o ne o lemosa sechaba se khethiloeng sa Molimo ka ho toba hore se se ke sa latela baprofeta ba bohata. Mang kapa mang ea neng a buella lithuto tsa bohata le borapeli ba melimo ea bohata o ne a lokela ho ‘bolaoa hobane a buile ka ho fetohela Jehova.’ Baiseraele ba ne ba laetsoe hore ba ‘tlose bobe har’a bona.’ (Deuteronoma 13:1-5) Ha e le hantle, bolumeli ba bohata bo bobe ponong ea Jehova.—Ezekiele 13:3.
5. Kajeno re lokela ho ela hloko litemoso life?
5 Jesu Kreste le baapostola ba hae ba ile ba bontša hore ba hloile bolumeli ba bohata ka matla joaloka Jehova. Jesu o ile a lemosa barutuoa ba hae, a re: “Itebeleng ho baprofeta ba bohata ba tlang ho lōna ba apere seaparo sa nku, empa ka hare e le liphiri tse harolang.” (Matheu 7:15; Mareka 13:22, 23) Pauluse o ile a ngola a re: “Khalefo ea Molimo e ntse e senoloa ho tsoa leholimong khahlanong le ho hloka bomolimo hohle le ho se loke hohle ha batho ba hatellang ’nete.” (Baroma 1:18) Ho bohlokoa hakaakang hore Bakreste ba ’nete ba ele hloko litemoso tsena ’me ba qobe mang kapa mang ea patelang batho ’nete ea Lentsoe la Molimo kapa ea jalang lithuto tsa bohata!—1 Johanne 4:1.
Tsoang “Babylona e Moholo”
6. “Babylona e Moholo” o hlahisoa e le eng ka Bibeleng?
6 Nahana hore na buka ea Bibele ea Tšenolo e hlalosa bolumeli ba bohata joang. E bo hlahisa e le seotsoa se tahiloeng se susumetsang mebuso e mengata le batho ba eona. Mosali enoa oa tšoantšetso o etsa bohlola le marena a mangata ’me o tahiloe ke mali a barapeli ba ’nete ba Molimo. (Tšenolo 17:1, 2, 6, 18) O na le lebitso le ngotsoeng phatleng ea hae le tšoanelang boitšoaro ba hae bo bobe le bo nyonyehang. Lebitso leo ke “Babylona e Moholo, ’mè oa liotsoa le oa lintho tse nyonyehang tsa lefatše.”—Tšenolo 17:5.
7, 8. Bolumeli ba bohata bo ikentse seotsoa joang, ’me liphello tsa seo ke life?
7 Tsela eo Mangolo a hlalosang Babylona e Moholo ka eona, e tšoanela bolumeli bohle ba bohata. Le hoja malumeli a likete e se mokhatlo o le mong oa lefatše, a momahane ka morero le ka liketso. Joalokaha bo tšoantšelitsoe ka mosali ea boitšoaro bo bobe oa Tšenolo, bolumeli ba bohata bo susumetsa mebuso ka matla. Kaha bolumeli ba bohata bo tšoana le mosali ea sa tšepahalleng likano tsa hae tsa lenyalo, bo ikentse seotsoa ka ho etsa lilekane le mebuso e mengata ea lipolotiki. Morutuoa Jakobo o ile a ngola a re: “Basali ba bafebi, na ha le tsebe hore setsoalle le lefatše ke bora ho Molimo? Ka hona, mang kapa mang ea batlang ho ba motsoalle oa lefatše o iketsa sera sa Molimo.”—Jakobo 4:4.
8 Ho tsoakana ha bolumeli ba bohata le mebuso ho baketse batho mahlomola a mangata. Setsebi se seng sa lipolotiki sa Moafrika, e leng Dr. Xolela Mangcu se ile sa re: “Histori ea lefatše e tletse mehlala ea batho ba bangata ba bolailoeng ka lebaka la ho kopanngoa ha bolumeli le lipolotiki.” Koranta e ’ngoe e sa tsoa re: “Liqhoebeshano tseo ho tšolotsoeng mali a mangata haholo ho tsona le tse kotsi ka ho fetisisa . . . li ba teng ka lebaka la bolumeli.” Batho ba limilione ba bolailoe likhohlanong tse tšehelitsoeng ke bolumeli. Babylona e Moholo e hlorisitse bahlanka ba ’nete ba Molimo ebile e ba bolaile, ’me ka puo ea tšoantšetso re ka re e tahoa ke mali a bona.—Tšenolo 18:24.
9. Buka ea Tšenolo e bontša joang hore Jehova o hloile bolumeli ba bohata?
9 Bopaki ba hore Jehova o hloile bolumeli ba bohata bo bonahala hantle linthong tse etsahallang Babylona e Moholo. Tšenolo 17:16 e re: “Linaka tse leshome tseo u li boneng, le sebata, li tla hloea seotsoa ’me li tla se ripitla le ho se hlobolisa, li tla ja linama tsa sona ’me li tla se chesa ka ho feletseng ka mollo.” Sebata se seholo se qala ka ho khakhatha seotsoa le ho ja linama tsa sona. Ka mor’a moo, mesaletsa ea sona e chesoa ka ho feletseng. Tumellanong le seo, haufinyane mebuso ea lefatše e tla nka bohato boo khahlanong le bolumeli ba bohata. Molimo o tla e susumelletsa hore e nke bohato boo. (Tšenolo 17:17) Babylona e Moholo, e leng ’muso oa lefatše oa bolumeli ba bohata, e tla timela. ‘Le ka mohla e ke ke ea fumanoa hape.’—Tšenolo 18:21.
10. Re lokela ho etsa’ng mabapi le bolumeli ba bohata?
10 Barapeli ba ’nete ba lokela ho etsa’ng mabapi le Babylona e Moholo? Bibele e fana ka taelo ka mantsoe ana a hlakileng: “Tsoang ho eena, sechaba sa ka, haeba le sa batle ho kopanela le eena libeng tsa hae, le haeba le sa batle ho amohela karolo ea likotlo tsa hae.” (Tšenolo 18:4) Ba batlang ho bolokoa ba lokela ho tsoa bolumeling ba bohata pele metsotso e ja babeli. Ha Jesu Kreste a ne a le lefatšeng mona, o ile a bolela esale pele hore matsatsing a qetello, batho ba bangata ba ne ba tla bua ka molomo feela hore baa mo mamela. (Matheu 24:3-5) O re ho batho bana: “Ha kea ka ka le tseba le ka mohla! Tlohang ho ’na, lōna ba etsang tlōlo ea molao.” (Matheu 7:23) Morena ea behiloeng teroneng, e leng Jesu Kreste, ha a amane ho hang le bolumeli ba bohata.
U ka bo Qoba ka ho Etsa’ng?
11. Re lokela ho etsa’ng e le hore re qobe borapeli ba bohata?
11 Bakreste ba ’nete ba qoba borapeli ba bohata, ba hana lithuto tsa bona. Sena se bolela hore re qoba mananeo a bolumeli ba bohata seea-le-moeeng le thelevisheneng hape re qoba le lingoliloeng tsa bolumeli tse jalang mashano ka Molimo le Lentsoe la hae. (Pesaleme ea 119:37) Hape, ho loketse hore re tlohele ho kopanela libokeng tsa sechaba le linthong tsa boithabiso tse tšehetsoang ke mokhatlo ofe kapa ofe o amanang le bolumeli ba bohata. Ho phaella moo, ha re tšehetse borapeli ba bohata ka tsela efe kapa efe. (1 Bakorinthe 10:21) Ho qoba lintho tsena ho re sireletsa hore ho se be le motho ea re ‘nkang joaloka phofu ea hae ka filosofi le thetso ea lefeela ho ea ka neano ea batho, ho ea ka lintho tsa motheo tsa lefatše eseng ho ea ka Kreste.’—Bakolose 2:8.
12. Motho a ka khaola maqhama le mekhatlo ea bolumeli ba bohata joang?
12 Motho o etsa’ng haeba a rata ho ba e mong oa Lipaki Tsa Jehova empa e ntse e le setho se ngolisitsoeng bolumeling bo itseng ba bohata? Hangata, lengolo la ho itokolla kerekeng e ba bopaki ba hore motho eo ha a sa rata ho nkoa e le setho sa bolumeli ba bohata. Ke habohlokoa haholo hore motho a etse qeto e le hore a qobe ka ho feletseng ho silafatsoa ke borapeli bohle ba bohata. Liketso tsa motho ea ratang ho ba Paki li lokela ho hlakisetsa mokhatlo oo oa bolumeli le batho ka kakaretso hore ha e sa le setho sa bolumeli boo.
13. Bibele e fana ka keletso efe mabapi le hore re qobe borapeli ba bohata?
13 Moapostola Pauluse o ile a ngola a re: “Le se ke la kena jokong e sa lekaneng hammoho le ba sa lumelang. Etsoe ho loka le tlōlo ea molao li na le setsoalle sefe? Kapa leseli le na le karolo efe le lefifi? Ho ekelletsa moo, ho na le tumellano efe pakeng tsa Kreste le Beliale? Kapa motho ea tšepahalang o na le kabelo efe le ea sa lumelang? ’Me tempele ea Molimo e na le tumellano efe le litšoantšo tse rapeloang? . . . ‘Ka hona tsoang har’a bona, ’me le ikarole,’ ho bolela Jehova, ‘le khaotse ho ama ntho e sa hloekang.’” (2 Bakorinthe 6:14-17) Re ela hloko mantsoe ana ka hore re qobe borapeli ba bohata. Na keletso ea Pauluse e bolela hore re qobe le barapeli ba bohata?
“Tsoelang Pele le Tsamaea ka Bohlale”
14. Na re lokela ho qhelela thōko ba kopanelang borapeling ba bohata? Hlalosa.
14 Na Barapeli ba ’nete ba lokela ho nena batho ba borapeli ba bohata? Na re lokela ho khesa batho ba litumelo tse ling? Che. Taelo ea bobeli litaelong tse peli tse khōlō e re: “U rate moahelani oa hao joalokaha u ithata.” (Matheu 22:39) Ka sebele re bontša hore re rata baahelani ba rōna ha re ba bolella litaba tse molemo tsa ’Muso. Hape re bontša hore rea ba rata ka ho ithuta Bibele le bona le ka ho ba hlokomelisa hore hoa hlokahala hore ba qobe borapeli ba bohata.
15. Ho se be “karolo ea lefatše” ho bolela’ng?
15 Le hoja re bolella baahisani ba rōna litaba tse molemo, ha re “karolo ea lefatše” hobane re balateli ba Jesu. (Johanne 15:19) “Lefatše” leo ho buuoang ka lona mona ke batho ba ikarohantseng le Molimo. (Baefese 4:17-19; 1 Johanne 5:19) Re arohane le lefatše ka hore re qoba maikutlo, lipuo le boitšoaro bo khopisang Jehova. (1 Johanne 2:15-17) Ho feta moo, tumellanong le molao-motheo o reng “litloaelano tse mpe li senya mekhoa e metle,” re qoba setsoalle sa ba sa pheleng ka melao-motheo ea Bokreste. (1 Bakorinthe 15:33) Ho se be karolo ea lefatše ke ho ipoloka u “se na letheba lefatšeng.” (Jakobo 1:27) Kahoo, ho arohana le lefatše ha ho bolele hore re koekoetla batho ba bang.—Johanne 17:15, 16; 1 Bakorinthe 5:9, 10.
16, 17. Bakreste ba lokela ho tšoara ba sa tsebeng ’nete ea Bibele joang?
16 Ebe joale batho ba sa tsebeng linnete tsa Bibele re lokela ho ba tšoara joang? Pauluse o ile a ngolla phutheho ea Kolose, a re: “Tsoelang pele le tsamaea ka bohlale mabapi le ba ka ntle, le ithekele nako e loketseng. Seo le se buang kamehla e ke e be se nang le mosa, se nōkiloeng ka letsoai, e le hore le tsebe kamoo le tšoanelang ho fana ka karabo ho e mong le e mong.” (Bakolose 4:5, 6) Moapostola Petrose o ile a ngola a re: “Halaletsang Kreste e le Morena ka lipelong tsa lōna, kamehla le loketse ho ikarabella ka pel’a e mong le e mong ea le batlang lebaka bakeng sa tšepo e ho lōna, empa le etsa joalo le ka maikutlo a bonolo le tlhompho e tebileng.” (1 Petrose 3:15) Pauluse o ile a eletsa Bakreste hore ‘ho se be eo ba mo buang hampe, ba se rate ntoa, ba be le kahlolo e molemo, ba bontše bonolo bohle ho batho bohle.’—Tite 3:2.
17 Joaloka Lipaki Tsa Jehova, re qoba ho tšoara batho hampe kapa ho ba halefela. Ho hang ha re sebelise mantsoe a nyefolang ha re bua ka batho ba malumeli a mang. Ho e-na le hoo, re seli, esita le ha mong’a ntlo, moahelani, kapa mosebetsi-’moho a se mosa kapa a bua mantsoe a mabe.—Bakolose 4:6; 2 Timothea 2:24.
“U ’Ne U Tšoare Mohlala oa Mantsoe a Phelisang Hantle”
18. Ba khutlelang borapeling ba bohata ba ba boemong bofe bo soabisang ba moea?
18 E ne e tla ba ntho e mpe hakaakang hore ka mor’a ho ithuta linnete tsa Bibele motho a khutlele borapeling ba bohata! Bibele e hlalosa liphello tse kotsi tsa ho etsa joalo ha e re: “Ka sebele haeba, ka mor’a ho phonyoha litšilafatsong tsa lefatše ka tsebo e nepahetseng ea Morena le Mopholosi Jesu Kreste, ba kena hape linthong tsona tsena ’me ba hlōleha, maemo a ho qetela a bile mabe bakeng sa bona ho feta a pele. . . . Polelo ea maele a ’nete e ba etsahaletse: ‘Ntja e khutletse mahlatseng a eona, le kolobe e tšehali e ileng ea hlatsuoa e khutletse ho ipitikeng seretseng.’”—2 Petrose 2:20-22.
19. Ke hobane’ng ha ho hlokahala hore re falimehele eng kapa eng e ka behang bomoea ba rōna kotsing?
19 Re lokela ho falimehela eng kapa eng e ka behang bomoea ba rōna kotsing. Lintho tse re behang kotsing ha li fele! Moapostola Pauluse oa re lemosa: “Polelo e bululetsoeng e bolela ka tieo hore linakong tsa morao ba bang ba tla oa tumelong, ba ela hloko lipolelo tse bululetsoeng tse khelosang le lithuto tsa bademona.” (1 Timothea 4:1) Re phela “linakong tsa morao.” Ba sa qobeng borapeli ba bohata ba ka ‘akhotsoa joalokaha eka ba akhotsoa ke maqhubu ’me ba isoa koana le koana ke moea o mong le o mong oa thuto ka ho qhekella ha batho, ka mano a ho qapa phoso.’—Baefese 4:13, 14.
20. Re ka itšireletsa joang tšusumetsong e kotsi ea bolumeli ba bohata?
20 Re ka itšireletsa joang tšusumetsong e kotsi ea bolumeli ba bohata? Nahana ka litokisetso tsohle tsa Jehova. Re na le Lentsoe la Molimo, e leng Bibele. (2 Timothea 3:16, 17) Jehova o boetse o lokiselitse lijo tse ngata tsa moea ka “lekhoba le tšepahalang le le masene.” (Matheu 24:45) Ha re ntse re tsoela pele ’neteng, re lokela ho hlaolela tatso ea “lijo tse tiileng . . . tsa batho ba hōlileng ka ho feletseng” le takatso ea ho bokana hammoho moo re ithutang linnete tsa moea, na ha ho joalo? (Baheberu 5:13, 14; Pesaleme ea 26:8) A re ikemisetseng ho sebelisa ka botlalo litokisetso tseo Jehova a li entseng e le hore re ‘’ne re tšoare mohlala oa mantsoe a phelisang hantle’ ao re a utloileng. (2 Timothea 1:13) Ha re etsa joalo, re ka qoba borapeli ba bohata.
U Ithutile Eng?
• “Babylona e Moholo” ke eng?
• Re lokela ho etsa’ng hore re qobe borapeli ba bohata?
• Ke lintho life tse kotsi bomoeeng ba rōna tseo re lokelang ho li qoba?
[Setšoantšo se leqepheng la 28]
Na u tseba lebaka la hore “Babylona e Moholo” e hlahisoe e le mosali ea boitšoaro bo bobe?
[Setšoantšo se leqepheng la 29]
“Babylona e Moholo” e tla timetsoa
[Setšoantšo se leqepheng la 31]
Re bontša “maikutlo a bonolo le tlhompho e tebileng” ho batho ba litumelo tse ling