Khaolo 7

Tsosolosang Lerato Leo le Neng le E-na le Lona Pele!

EFESE

 1. Molaetsa oa pele oa Jesu o tobisitsoe phuthehong efe, hona o hopotsa balebeli eng?

MOLAETSA oa pele oa Jesu o ea phuthehong ea Efese, eo ka nako eo e neng e le motse o atlehileng o lebōpong la leoatle oa Asia Minor haufi le sehlekehleke se senyenyane sa Patmose. O laela Johanne ka ho re: “Ngolla lengeloi la phutheho e Efese u re: Tsena ke lintho tse boleloang ke ea tšoereng linaleli tse supileng ka letsohong la hae le letona, ea tsamaeang har’a liluloana tsa mabone tsa khauta tse supileng.” (Tšenolo 2:1) Joaloka melaetseng e meng e tšeletseng, mona Jesu o hlokomelisa ka tšobotsi e bontšang boemo ba hae ba bolaoli. O hopotsa balebeli ba Efese hore baholo bohle ba tlhokomelong ea hae e sireletsehileng le hore o hlahloba liphutheho tsohle. Ho tla fihlela mehleng ena ea rōna, o ’nile a tsoela pele ho sebelisa bohlooho bona bo lerato, a lebetse baholo ’me ka mosa a lisa bohle ba kopanelang le phutheho. Nako le nako, o etsa litokiso tlhophisong ea phutheho e le hore leseli le ka khanya haholoanyane. E, Jesu ke eena Molisa ea ka Sehloohong oa mohlape oa Molimo.—Matheu 11:28-30; 1 Petrose 5:2-4.

 2. (a) Jesu o ile a babatsa phutheho ea Efese ka lintho life tse ntle? (b) Ke keletso efe ea moapostola Pauluse eo ho bonahalang hore baholo ba Efese ba ile ba e mamela?

² Joale Jesu o rala motheo bakeng sa melaetsa eohle ea hae e supileng, ka ntle ho e ’meli feela, ka ho qala ka mantsoe a mofuthu a pabatso. O fa Baefese molaetsa ona: “Ke tseba liketso tsa hao, le mosebetsi le mamello ea hao, le hore ha u mamelle batho ba babe, le hore u leka ba reng ke baapostola, empa e se bona, ’me u ile ua ba fumana e le ba leshano. Hape u bontša mamello, ’me u jere boima ka lebaka la lebitso la ka ’me ha ua khathala.” (Tšenolo 2:2, 3) Lilemo pejana, moapostola Pauluse o ne a ile a lemosa baholo ba Efese ka “liphiri tse hatellang,” e leng bakoenehi ba neng ba tšoenya mohlape, ’me o ne a boleletse baholo bao hore ‘ba lule ba falimehile,’ ba latele mohlala oa hae oa ho se khathale. (Liketso 20:29, 31) Kaha joale Jesu oa ba babatsa ka lebaka la mosebetsi oa bona le mamello le ho se khathale, e tlameha ebe ba ile ba sebelisa keletso eo.

 3. (a) “Baapostola ba bohata” ba ’nile ba batla ho thetsa ba tšepahalang joang mehleng ea rōna? (b) Petrose o ile a fana ka temoso efe ka bakoenehi?

³ Le letsatsing la Morena, ho ’nile ha hlaha “baapostola ba bohata” ba ‘buang lintho tse sothehileng hore ba ikhulele barutuoa ka mor’a bona.’ (2 Bakorinthe 11:13; Liketso 20:30; Tšenolo 1:10) Ba bona malumeli ’ohle a lihlotšoana tsa bokhelohi a loantšanang a lokile, ba bolela hore Molimo ha a na mokhatlo o hlophisitsoeng, hape ba latola hore Jesu o amohetse matla a ’Muso ka 1914. Ba phethahatsa boprofeta bo ho 2 Petrose 3:3, 4 bo reng: “Matsatsing a ho qetela ho tla tla basomi ka ho soma ha bona, ba tsoela pele ho ea ka litakatso tsa bona ba re: ‘Ho kae ho ba teng hoo ho tšepisitsoeng ha hae? Ka sebele, ho tloha letsatsing la ha baholo-holo ba rōna ba robala lefung, lintho tsohle li tsoela pele hantle feela joaloka ho tloha tšimolohong ea pōpo.’”

 4. (a) Boikhohomoso le bofetoheli ba basomi li bonahala joang? (b) Kajeno Bakreste ba bontša hore ba tšoana le Baefese ka ho nka bohato bofe khahlanong le bahanyetsi ba leshano?

⁴ Basomi bana ha ba batle ho bolela tumelo ea bona phatlalatsa. (Baroma 10:10) Ba batlile tšehetso ea baruti ba Bokreste-’mōtoana le thuso ea likoranta le thelevishene ho jala litlaleho tse leshano ka metsoalle ea bona ea pele. Ka potlako ba tšepahalang ba fumana hore lipuo tsa bathetsi bana le boitšoaro ba bona ha li na ’nete. Joaloka Baefese, kajeno Bakreste ‘ha ba mamelle batho ba babe,’ kahoo baa ba khaola liphuthehong tsa habo bona.a

 5. (a) Jesu o ile a re Baefese ba ne ba e-na le bofokoli bofe? (b) Ke mantsoe afe ao Baefese ba neng ba lokela ho a hopola?

⁵ Leha ho le joalo, joalokaha Jesu a etsa se tšoanang liphuthehong tse hlano ho tse supileng, joale o qolla bothata bo tebileng. O re ho Baefese: “Leha ho le joalo, ke na le hona khahlanong le uena, hore u tlohetse lerato leo u neng u e-na le lona pele.” (Tšenolo 2:4) Ba ne ba sa lokela ho hlōleha ntlheng ena, hobane Pauluse o ne a ile a ba ngolla lilemo tse 35 pejana, a bua ka “lerato [la Molimo] le leholo leo a ileng a re rata ka lona,” ’me o ne a ile a ba phehella ka ho re: “Le be baetsisi ba Molimo, joaloka bana ba ratoang, ’me le tsoele pele ho tsamaea leratong, feela joalokaha Kreste le eena a ile a le rata.” (Baefese 2:4; 5:1, 2) Ho feta moo, mantsoe a Jesu a ne a lokela hore ebe a ngotsoe ka mokhoa o ke keng oa hlakoloa lipelong tsa bona, a reng: “Jehova Molimo oa rōna ke Jehova a le mong, ’me u rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle le ka matla a hao ’ohle.” (Mareka 12:29-31) Baefese ba ne ba feletsoe ke lerato lena leo ba neng ba e-na le lona pele.

 6. (a) Ho sa tsotellehe hore na ke khale re le ka phuthehong kapa re sa le bacha, re tlameha ho itebela kotsing efe le mekhoeng efe? (b) Lerato la rōna ho Molimo le lokela ho re susumelletsa hore re etse eng?

⁶ Ho sa tsotellehe hore na ke khale re le ka phuthehong kapa re sa le bacha, re tlameha ho itebela hore re se ke ra felloa ke lerato leo re neng re e-na le lona ho Jehova pele. Le ka fela joang? Re ka lumella ho tšoareha haholo ka mosebetsi oa boipheliso, takatso ea ho etsa chelete e ngata, kapa ho lelekisa menyaka hore e be lintho tse khōlō bophelong ba rōna. Kahoo re ka beha likelello tsa rōna linthong tsa nama ho e-na le ho li beha linthong tsa moea. (Baroma 8:5-8; 1 Timothea 4:8; 6:9, 10) Lerato la rōna ho Jehova le lokela ho re susumelletsa hore re lokise mekhoa leha e le efe e joalo le hore re ‘’ne re batle ’muso pele le ho loka ha hae’ e le hore re ka ‘ipolokela matlotlo leholimong.’—Matheu 6:19-21, 31-33.

 7. (a) Tšebeletso ea rōna ho Jehova e lokela ho susumetsoa ke eng? (b) Johanne o ile a re’ng mabapi le lerato?

⁷ E se eka kamehla tšebeletso ea rōna ho Jehova e ka susumetsoa ke ho mo rata ho tloha botebong ba pelo. E se eka re ka ananela ka tieo sohle seo Jehova le Kreste ba re etselitseng sona. Joalokaha Johanne ka boeena a ile a ngola hamorao: “Lerato le ka tsela ena, eseng hore re ratile Molimo, empa hore o ile a re rata ’me a romela Mora oa hae e le sehlabelo sa poelano bakeng sa libe tsa rōna.” Johanne o tsoela pele ho re bolella hore: “Molimo ke lerato, ’me ea lulang leratong o lula bonngoeng le Molimo ’me Molimo o lula bonngoeng le eena.” E se eka le ka mohla lerato la rōna ho Jehova, ho Morena Jesu Kreste le Lentsoeng la Molimo le phelang, le ke ke la qepha! Re ke ke ra bontša lerato lena ka ho sebeletsa Molimo ka cheseho feela empa hape re ka le bontša ka ho mamela “taelo ena e tsoang ho eena, hore ea ratang Molimo o lokela ho rata le mor’abo.”—1 Johanne 4:10, 16, 21; Baheberu 4:12; bona le 1 Petrose 4:8; Bakolose 3:10-14; Baefese 4:15.

“U Etse Liketso Tsa Pele”

 8. Jesu o ile a re Baefese ba lokela ho etsa joang?

⁸ Baefese bao ba tlameha ho tsosolosa lerato leo ba kileng ba e-ba le lona haeba ba sa batle ho lahleheloa. Jesu o re ho bona: “Ka hona hopola hore na u oele ho eng, u bake ’me u etse liketso tsa pele. Haeba u sa etse joalo, ke tla ho uena, ’me ke tla tlosa seluloana sa hao sa lebone sebakeng sa sona, ntle leha u baka.” (Tšenolo 2:5) Bakreste ba phuthehong ea Efese ba ile ba amohela mantsoe ao joang? Ha re tsebe. Re tšepa hore ba ile ba baka ’me ba atleha ho tsosolosa lerato la bona ho Jehova. Haeba ba ne ba ke ke ba etsa joalo, joale lebone la bona le ne le tla tingoa ’me seluloana sa bona sa lebone se tlosoe. Ba ne ba tla lahleheloa ke tlotla ea ho khantša ’nete.

 9. (a) Jesu o ile a khothatsa Baefese ka mantsoe afe? (b) Liphutheho tse ileng tsa e-ba teng ka mor’a mehla ea Johanne li ile tsa hlōleha ho ela hloko keletso ea Jesu ho Baefese joang?

⁹ Leha ho le joalo, Jesu o khothatsa Baefese ka mantsoe ana: “Ho ntse ho le joalo, u hlile u na le sena, hore u hloile liketso tsa sehlopha sa bokhelohi sa Nikolase, tseo le ’na ke li hloileng.” (Tšenolo 2:6) Bonyane ba ne ba hloile karohano ea sehlotšoana sa bokhelohi, feela joalokaha Morena Jesu Kreste a e hloile. Leha ho le joalo, ha lilemo li ntse li feta, liphutheho tse ngata ha lia ka tsa ela mantsoe ao a Jesu hloko. Ho haelloa ke ho rata Jehova, ho se rate ’nete, le ho se ratane ho ile ha fella ka hore ba hoholehele lefifing la moea. Ba ile ba arohana ea e-ba litsekana tse ngata tsa bokhelohi tse loantšanang. Bakopitsi ba ipitsang “Bakreste” ba neng ba sa rate Jehova ba ile ba hlakola lebitso la Molimo libukeng tse ngotsoeng ka letsoho tsa Segerike tsa Bibele. Ho haelloa ke lerato ho ile ha boela ha etsa hore ba rute lithuto tsa Babylona le tsa Bagerike, tse kang mollo oa lihele, pelekatori le Boraro-bo-bong, ka lebitso la Bokreste. Ka lebaka la ho se rate Molimo le ’nete, ba bangata ba neng ba ipolela hore ke Bakreste ba ile ba khaotsa ho bolela litaba tse molemo tsa ’Muso oa Molimo. Ba ile ba busoa ke sehlopha sa baruti ba baithati se iketselitseng ’muso oa sona mona lefatšeng.—Bapisa le 1 Bakorinthe 4:8.

10. Boemo ba bolumeli e ne e le bofe Bokreste-’mōtoaneng ka 1918?

¹⁰ Ha kahlolo e qala ka ntlo ea Molimo ka 1918, baruti ba lihlotšoana tsa bokhelohi ba Bokreste-’mōtoana ba ne ba tšehetsa Ntoa ea I ea Lefatše phatlalatsa, ba khothalletsa Mak’hatholike le Maprostanta ka mahlakoreng ka bobeli hore a bolaeane. (1 Petrose 4:17) Ho fapana le phutheho ea Efese e neng e hloile seo sehlotšoana se khelohileng sa Nikolase se neng se se etsa, ka nako e telele malumeling a Bokreste-’mōtoana ho ne ho tletse lithuto tse loantšanang le tse khahlanong le Molimo, ’me baruti ba ’ona ba ne ba ikakhetse ka setotsoana lefatšeng, leo Jesu a neng a boleletse barutuoa ba hae hore ha baa lokela ho ba karolo ea lona. (Johanne 15:17-19) Kaha liphutheho tsa ’ona li ne li sa tsebe sehlooho sa Bibele, e leng ’Muso oa Molimo, e ne e se liluloana tsa mabone tse khantšang ’nete ea Mangolo, hape litho tsa tsona e ne e se karolo ea tempele ea moea ea Jehova. Banna (le basali) ba etellang pele ho ’ona e ne e se linaleli empa ba ile ba senoloa hore ke litho tsa “motho ea sa eeng ka molao.”—2 Bathesalonika 2:3; Malakia 3:1-3.

11. (a) Ka 1918, ke sehlopha sefe sa Bakreste lefatšeng se ileng sa sebelisa mantsoe a Jesu a eang ho Baefese? (b) Sehlopha sa Johanne se ile sa etsa’ng ho tloha ka 1919 ho ea pele?

¹¹ Leha ho le joalo, sehlopha sa Johanne se ile sa hlaha matsatsing a mabifi a ntoa ea pele ea lefatše se rata Jehova le ’nete e ileng ea se susumelletsa hore se mo sebeletse ka cheseho e khōlō. Se ile sa thibela ba neng ba leka ho hlahisa lihlotšoana tsa bokhelohi ka hore ba etse mookameli oa pele oa Mokhatlo oa Watch Tower, Charles T. Russell, molingoana, ka mor’a lefu la hae ka 1916. Ka lebaka la hore sehlopha sena sa Bakreste se ne se khalemetsoe ka mahloriso le ka ho utloa bohloko, ho hlakile hore Mong’a sona o ile a re se “entse hantle” a ba a se memela hore se kene thabong ea hae. (Matheu 25:21, 23) Ha se sheba liketsahalo tsa lefatše, le lintho tseo se fetileng ho tsona, se ile sa hlokomela hore ho ne ho phethahala pontšo eo Jesu a neng a fane ka eona e tšoaeang ho ba teng ha hae ho sa bonahaleng matleng a ’Muso. Ho tloha ka 1919 ho ea pele, se ile sa tsoela pele ho kopanela phethahatsong e tsoelang pele ea boprofeta bo boholo ba Jesu bo reng: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Matheu 6:9, 10; 24:3-14) Haeba lerato la sona ho Jehova le ne le kile la fokola ka tsela e itseng, joale le ile la butsoeloa hore e be khabo e khōlō ho tloha ka nako eo ho ea pele.

12. (a) Kopanong e ’ngoe e tsebahalang haholo e ileng ea tšoaroa ka 1922, ho ile ha hlaha mohoo ofe? (b) Bakreste ba ’nete ba ile ba amohela lebitso lefe ka 1931, ’me ba ile ba bakela eng?

¹² Kopanong e ’ngoe e tsebahalang haholo, eo ba 18 000 ba Bakreste bana ba ileng ba e-ba teng ho eona, e neng e tšoaretsoe Cedar Point, Ohio, U.S.A., ka la 5-13 September, 1922, ho ile ha tsoa mohoo ona o reng: “Khutlelang tšimong, lōna bara ba Molimo ea holimo-limo! . . . Lefatše le tlameha ho tseba hore Jehova ke Molimo le hore Jesu Kreste ke Morena oa marena le Khosi ea likhosi. . . . Kahoo phatlalatsang, phatlalatsang, phatlalatsang Morena le ’muso oa hae.” Lebitso la bohlokoa la Jehova le ne le ntse le phahamisoa haholoanyane. Ka 1931 Bakreste bana, ba neng ba bokane kopanong Columbus, Ohio, U.S.A., ba ile ba thabela ho amohela le ho sebelisa lebitso le bontšitsoeng ke Molimo boprofeteng ba Esaia—e leng lebitso la Lipaki Tsa Jehova. (Esaia 43:10, 12) Khatisong ea oona ea March 1, 1939, (ea Senyesemane) lebitso la koranta e ka sehloohong ea mokhatlo o hlophisitsoeng le ile la fetoloa hore e be Molula-Qhooa o Tsebahatsa ’Muso oa Jehova, ka tsela eo ho ile ha isoa tlhompho e khōlō ho ’Mōpi oa rōna le pusong ea hae ea borena. Lipaki Tsa Jehova, tse neng li tsosolositse lerato la tsona ho Jehova, li baketse ho hlōleha leha e le hofe hoo e ka ’nang eaba ho bile teng mabapi le ho hlompha le ho hōlisa lebitso la hae le leholo le ’Muso oa hae.—Pesaleme ea 106:6, 47, 48.

“Ea Hlōlang”

13. (a) Ke tlhohonolofatso efe e neng e letetse Baefese haeba ba ne ba ka ‘hlōla’? (b) Bakreste ba Efese ba ne ba ka ‘hlōla’ joang?

¹³ Qetellong, joalokaha Jesu a etsa se tšoanang le melaetseng ea hae e meng, o hlokomelisa hore moea oa Molimo ke oona o sebelisang Jesu ho tsebahatsa meputso ea ho tšepahala. O re ho Baefese: “Ea nang le tsebe a ke a utloe seo moea o se bolellang liphutheho: Ea hlōlang ke tla mo neha ho ja sefate sa bophelo, se paradeiseng ea Molimo.” (Tšenolo 2:7) Ba nang le litsebe tse utloang ba ne ba tla chesehela ho mamela molaetsa oo oa bohlokoa, ba tseba hore o ne o sa tsoe ho Jesu empa o ne o tsoa ho ’Musi Morena Jehova ka boeena ka moea oa Hae o halalelang, kapa matla a sebetsang. Ba ne ba tla ‘hlōla’ joang? Ka ho latela mehato ea Jesu haufi-ufi, ea ileng a lula a tšepahala ho isa lefung hoo a neng a ka re: “Le be sebete! Ke hlōtse lefatše.”—Johanne 8:28; 16:33; bona le 1 Johanne 5:4.

14. E tlameha ebe ‘paradeise ea Molimo’ e boletsoeng ke Jesu e bolela’ng?

¹⁴ Kaha Bakreste ba tlotsitsoeng, ba kang Baefese bao, ha ba na tšepo ea ho phela paradeiseng lefatšeng, ke joang ba ka putsoang ka ho ja “sefate sa bophelo, se paradeiseng ea Molimo”? Ena e ne e ke ke ea e-ba Paradeise e tsosolositsoeng lefatšeng, kaha Bakreste ba tlotsitsoeng ba 144 000, ho akarelletsa le ba phutheho ea Efese, ba rekiloe har’a batho hore ba e’o busa le Konyana, Kreste Jesu, Thabeng ea Sione e leholimong e le bara ba moea. (Baefese 1:5-12; Tšenolo 14:1, 4) Kahoo, e tlameha ebe mona ho buuoa ka sebaka sa leholimo se kang serapa seo bana ba hlōlang ba se jang lefa. Moo, “paradeiseng ea Molimo,” e, moo Jehova ka boeena a leng teng, bahlōli bana ba filoeng ho se shoe ba tla tsoela pele ba phela ka ho sa feleng, e leng seo mona se tšoantšetsoang ke ho ja sefate sa bophelo.

15. Ke hobane’ng ha mantsoe a Jesu a khothalletsang ho hlōla e le a bohlokoa ho bongata bo boholo kajeno?

¹⁵ Joale, ho thoe’ng ka batho ba tšepahalang ba lefatšeng ba tšehelitseng batlotsuoa ba 144 000? Bongata bo boholo ba Lipaki tsena tseo e leng metsoalle ea bona le bona boa hlōla. Empa bo tšepile ho kena paradeiseng e lefatšeng, moo bo tla noa ‘nōkeng ea metsi a bophelo’ ’me bo folisoe ke “makhasi a lifate” tse lemiloeng pel’a nōka eo. (Tšenolo 7:4, 9, 17; 22:1, 2) Haeba u e mong oa sehlopha sena, e se eka le uena u ka bontša lerato le mofuthu ho Jehova ’me ua hlōla ntoeng ea tumelo. Ka tsela eo, u ka thabela bophelo bo sa feleng lefatšeng la Paradeise.—Bapisa le 1 Johanne 2:13, 14.

[Mongolo o botlaaseng ba leqephe]

[Lebokose le leqepheng la 36]

Thoriso e Lerato e Eang ho Jehova le ho Mora oa Hae

Bukeng ea lipina e hlahisitsoeng ke batho ba Jehova ka 1905, lipina tse neng li rorisa Jesu li ne li mena habeli lipina tse neng li rorisa Jehova Molimo. Bukeng ea bona ea lipina ea 1928, palo ea lipina tse rorisang Jesu e ne e batla e lekana le palo ea tse rorisang Jehova. Empa bukeng ea lipina ea morao-rao ea 1987, lipina tse hlomphang Jehova li mena tse hlomphang Jesu ka makhetlo a mane. Sena se lumellana le mantsoe a Jesu ka boeena, ha a ne a re: “Ntate o moholo ho ’na.” (Johanne 14:28) Ho rata Jehova ho tlameha ho ba ka sehloohong, ho lateloe ke ho rata Jesu ka ho tebileng le ho ananela sehlabelo sa hae sa bohlokoa le mosebetsi oa hae e le Moprista ea Phahameng eo e bileng e leng Morena ea behiloeng ke Molimo.

[Chate e leqepheng la 34]

Mohlala oa Jesu oa Keletso

(ho qotsa likhaolo le litemana tsa Tšenolo)

Efese 2:1 2:2, 3 2:4 2:5, 6 2:7

Smyrna 2:8 2:9 — 2:10 2:11

Pergame 2:12 2:13 2:14, 15 2:16 2:17

Thyatire 2:18 2:19 2:20, 21 2:24, 25 2:26-28

Sarda 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodisia 3:14 — 3:15-17 3:18-20 3:21