Ho Mamella ka Thabo Har’a Mahloriso
“Re ithorisetsa le matšoenyehong, re tsoe re tseba hobane tšoenyeho e hlahisa mamello, mamello e hlahisa temoho, temoho e hlahisa tšepo; ’me tšepo ha e hlahisetse motho lihlong.”—Ba-Roma 5:3-5.
1. Ho totobala eng ka baka la ho hlorisoa ha Bakreste ‘mehleng ee ea qetello’?
LIPHIHLELO tsa batho ba Jehova ‘mehleng ena ea qetello’ li pakile ka sebele mantsoe a Jesu: “Le tla ba lehlohonolo mohla batho ba le hloeang, ba le khethang, ba le hlapaolang, ’me ba lahla lebitso la lōna joale ka eka le lebe, ka baka la Mor’a motho. Mohlang oo, le thabe, le nyakalle, hobane moputso oa lōna o tla ba moholo leholimong; le bo-ntat’a bona ba ne ba etsa baprofeta joalo.” (Luka 6:22, 23; 2 Timothea 3:1) E, bahlanka ba Molimo ba ka mamella mahloriso a mefuta eohle ka botšepehi ’me ba ho etsa ba thabile.
2. (a) Na ba hlorisoang haholo ba fumana moputso o moholoanyane? (b) Liphello tse ling tse molemo tsa ho mamella mahloriso ka katleho ke life?
2 Hase hore re thabela ho hlorisoa hobane ho hlorisoa ha ho monate ebile ho bohloko. Hase ho hlorisoa ka bohona ho thabisang, empa ho thabisa phello ea hona. (Jakobo 1:2, 3) Bakreste ha ba rate ho hlorisoa. Ha ba leke ho iketsa bo-moshoela-tumelo, ba nahana hore ha ba mamella hloriso haholo le mahlong a Ntate oa bona oa leholimo ba tla tšoaneleha haholoanyane. Ba hlorisoang haholo moputso oo ba o fumanang ha o moholoanyane, leha e le hore ba hlile ba tšepahala ho feta ba hlorisoang hanyenyane. Empa hlokomela letoto la liketsahalo tse etsahalang ha Mokreste a atleha ho mamella matšoenyeho: “Tšoenyeho e hlahisa mamello, mamello e hlahisa temoho, temoho e hlahisa tšepo; ’me tšepo ha e hlahisetse motho lihlong.”—Ba-Roma 5:3-5.
3. (a) Joalokaha ho bontšitsoe ho Ba-Roma 5:3, matšoenyeho a hlahisa mamello joang? (b) Hona ho fella ka ho tiisoa ha tumelo ea rōna joang? (Ba-Heberu 10:38, 39)
3 Ha re bala ka mahloriso ao Bakreste bahabo rōna ba fetang ho oona libakeng tse ling, rea ipotsa, “Na ke ne ke tla mamella hoo?” Empa ha khanyetso kapa liteko li re oela holimo ka tšohanyetso ’me, ho e-na le ho inehela kapa ho checha mosebetsing oa Molimo, re retelehela ho oona hore o re thuse, o arabela lithapelo tsa rōna, ’me re utloa kamoo matšoenyeho a hlahisang mamello. Hape ha re sa ipotsa hore na re ka a mamella; rea tseba hore ka matla a Jehova re ka ho etsa. Mohlomong teko ea pele e ne e se matla hakaalo, empa leha ho le joalo tumelo ea rōna e lekiloe e bile e feta teko ka matla. Mohlomong teko e latelang e ka ba boimanyana, empa tumelo ea rōna le eona e matla haholoanyane ho eona hobane ha rea ka ra checha ho ea pele. Kahoo re ka thulana le teko efe kapa efe ea tumelo ea rōna ka matla a Jehova, re tseba hore a ke ke a lumela hore re lekoe ho feta seo re ka se mamellang; leha e le hore o-oa ‘re lahla.’—1 Ba-Korinthe 10:13; 2 Ba-Korinthe 4:8-10.
4. Kamor’a ho mamella moleko kapa hloriso ka katleho, re na le mabaka afe a sebele a ho thaba?
4 Ho mamella matšoenyeho ruri hoa thabisa. Re ka nyakallela hore ha rea ka ra ineela molekong empa ra tiea ho se nepahetseng. Rea tseba hore ke se amohelehang ho Molimo, kahoo ho mamella ha rōna ka katleho ho re atamelitse haufi le oona, e leng lebaka le leng la thabo Joalokaha le boletsoe ka ho hlaka ho Jakobo 1:12.
Mahloriso a Mefuta e sa Tšoaneng
5. Boemo ke bofe linaheng tse ngata kajeno mabapi le mahloriso le ho sohlokoa ha baena ba rōna? Ho joalo hobane’ng? (Amose 7:10-17)
5 Kajeno mosebetsi oa Lipaki tsa Jehova o thibetsoe linaheng tse fetang 40, ’me libakeng tse ngata har’a tsena batho ba Molimo ba ile ba tlameha ho mamella liteko le mahloriso ka ho fetisisa feela hobane ba ikemiselitse ho sebeletsa Jehova, Molimo oa bona ka botšepehi. Mabakeng a mangata lithibelo li hlohlelletsoa ke baruti ba bolumeli, ba qalang leshano ka ho se kene ha rōna lipolotiking e le hore ba ka thibela mosebetsi oa rōna oa ho bolela. Babusi ba tsebang litaba ba tseba hore Lipaki tsa Jehova hase balotsana kapa ba kotsi ’Musong ka tsela efe kapa efe. Babusi ba leseling la litaba baa tseba hore Lipaki ke baahi ba seli le ba mamelang molao ba etsang se molemo haholo ho phahamisa le ho utloa melao ea naha. Leha ho le joalo, tabeng ea Lipaki tsa Jehova, ho tšepahala ha tsona ho Molimo ho tla pele. Ke kahoo li sa kopaneleng lipolotiking tsa naha efe kapa efe. Kahoo ha ho hlaha ho hananang le melao ea Molimo oa tsona, joaloka baapostola, li ‘utloa Molimo ho e-na le batho.’—Liketso 5:29.
6. (a) A mang a mahloriso ao Lipaki tsa Jehova li ileng tsa tlameha ho a mamella ke afe? (b) Na u ka bolela ka maemo a joalo hona joale?
6 Mahoo-hoo a sa mameleng molao ao ka linako tse ling a etelloang pele ke baruti ba bolumeli kapa ba chesehellang lipolotiki ho tlōla, a ’nile a tlatlapa batho ba Jehova libakeng tse ngata. Bana babo rōna ba bangata ba moea ba ’nile ba qobelloa ho sia matlo a bona le thepa ’me ba balehise bophelo ba bona joalokaha ho etsahetse lilemong tsa morao tjena Malawi le Ethiopia. Ba bang ba lelekoa mesebetsing kapa ba ntšoa libakeng tseo ba sebetsang ho tsona, ha ba bang ho ile ha koaloa mesebetsi ea bona ea khoebo feela hobane e le Lipaki tsa Jehova. (Tšenolo 13:16, 17) Liboka tsa bona tsa ho ithuta Bibele li ’nile tsa tšoenngoa le ho qhaloa; matlo a bona a fuputsoa ’me Libibele le libuka tse buang ka Bibele tsa nkuoa. Ho sebelisoa litšoso le litšokelo ho leka ho ba tšosa, ’me ba bangata ba kenngoa litlamong, ba bang ba bile ba bolaoa. Mahloriso a ne a jele setsi haholo nakong ea lintoa tsa lefatše, empa a ntse a tsoela pele le hona joale linaheng tse ngata.
7. Le linaheng tseo ho hlorisoa ho sa etsoeng ke baholo, ho tlameha ho mamelloa maemo afe ke batho ba bangata ba Molimo?
7 Le lefatšeng lohle, baena ba rōna le likhaitseli ba likete ba tlameha ho shebana le khanyetso le mahloriso ho litho tsa malapa le beng ka bona kaha ba batla ho sebeletsa Jehova e le barutuoa ba Jesu Kreste. Joalokaha Jesu a hlile a bolela hore: “Ba ntlo ea motho e tla ba lira tsa hae.”—Mattheu 10:35, 36, phet. e ncha.
Sepheo sa Mahloriso
8. Na Lipaki tsa Jehova li hlorisoa hobane ke lisinyi kapa batlōli ba molao?
8 Bahlorisi ba batho ba Molimo ba na le tšepo ea ho finyella eng? Na ba hlorisa lipaki tsa oona hobane e le lisinyi kapa linokoane? Che. Lefatšeng lohle Lipaki tsa Jehova li hlokomeleha e le batho ba mamelang molao le ba phelang ka boitšoaro bo botle. Li sebetsa hantle, li thabile, li botsoalle, li mosa li bile lia utloisisa ’me boitšoaro ba tsona ha bo tšoane le ba batho ba tlōlisang bolumeli meeli. Ha e le hantle, ho hotle ha li ahisane le uena. (Tite 2:6-10; Ba-Galata 6:9, 10) Molaetsa oa tsona ke oa khotso, o tšelisang ba hlomohileng le ba llang. Li bolela ‘litaba tse molemo’ hore ’muso oa Molimo o tla tlosa khatello le ho kenya taolo e ncha ea ho loka kaufinyane.—Mattheu 6:10; Pesaleme ea 37:10, 11.
9. Bahanyetsi ba batla ho emisa mosebetsi ofe oa rōna, hona hobane’ng?
9 Leha ho le joalo, ho boleloa ha “litaba tsena tse molemo” ho bontša hore baeta-pele ba bolumeli ba Bojakane ha ba na molaetsa oa tšepo bakeng sa batho. Kahoo ba leka ho khutsisa ba o bolelang! Le babusi ba bang le hoja ba utloisisa ho lumella batho ba Jehova ho lumela kamoo ba ratang, ba hanana le hore ba bolelle ba bang. Joaloka baetapele ba Bajode ba bolumeli ba neng ba talimane le tšebetso e sehlahlo ea Bakreste ba pele, ha e le hantle, ba re: “A re ba laeleng ka ho ba sokela hore ba se ke ba boela ba ruta motho, leha a le mong, ka lebitso leo [la Jesu].” (Liketso 4:17, 18) E, hoo ba batlang ho ho emisa ke ho bolela ha rōna.—Bona hape Liketso 5:28, 40.
10. (a) Ntle ho ho leka ho emisa mosebetsi oa rōna oa ho bolela, Satane o boetse o batla ho finyella eng? (b) Hona ho bontšoa joang ka thibelo e atisang ho beeloa mosebetsi oa rōna?
10 Hape u hopole hore ea hlileng a hlohlelletsang mahloriso ke Satane Diabolose. (1 Petrose 5:8) Ha a batle ho re thibela ho bolela feela, empa hape o batla ho fokolisa tumelo ea rōna le hore re se ke ra tšepahala ho Molimo, kahoo a etsa hore re lahleheloe ke bophelo bo sa feleng. Kahoo sepheo se seng sa mahloriso ke ho re arohanya le lijo tsa moea le ho kopana botsoalleng le banab’abo rōna. Re atisa ho bolelloa hore “le ka ba betsi oa rōna o thibeloa ka kakaretso ho thibeloa boboleli ba rōna le libōka tsa rōna. Re atise ho bolelloa hore “le ka ba Lipaki tsa Jehova, empa le se ke la bolela kapa la tšoara libōka life kapa life.” Empa ha re sa bolele kapa re sa tšoare liboka, re tla be re se lipaki tsa Jehova Molimo kapa Jesu Kreste, kaha paki e thotseng hase paki ea sebele ho hang. (Esaia 43:10, 12; Liketso 1:8) Hona ho tla etsahala joang ka tumelo ea rōna haeba re se re sa mamele taelo ea Molimo ea ho kopana hammoho?—Ba-Heberu 10:24, 25.
Ho Mamella Mahlorisong
11. Bakreste ba tšepahalang ba ’nile ba itšoara joang ha ba hlorisoa?
11 Bahlanka ba Molimo ba kajeno ba itšoara joang ha ba hlorisoa? Joaloka Bakreste ba pele ha ba tšabe empa ba tsoetse pele ka sebete ka mosebetsi oa ho bolela har’a lithibelo le litšokelo. Joaloka Pauluse ba na le lebaka ‘ho thaba le ho nyakalla.’ Ho ema ba tiile ka lehlakoreng la Jehova la tseko ho pakahatsa Diabolose a le leshano. Ke tokelo e kaakang ea ho khona ho kopanela ho phahamiseng lebitso la Jehova!—Ba-Filippi 2:17, 18; 2 Ba-Thessalonika 1:4.
12. Na ho na le lebaka la ho tšoha seo bahlorisi ba sokelang hore ba ka re etsa sona?
12 Ruri ha ho lebaka la ho tšoha ba re hlorisang. Paulse a ngolla Ba-Filippi hore: “Feela, le itsamaeleng ka mokhoa o tšoanelang Evangeli . . . le hona le sa tšohe leha e le tabeng e le ’ngoe ka baka la bahanyetsi. . . . Bora boo [ba hore ha le ba tšabe] ho bona ke pontšo ea tšenyeho, empa ho lōna ke ea poloko, ’me hoo ho tsoa ho Molimo.”—Ba-Filippi 1:27, 28.
13, 14. (a) Babusi ba hanyetsang ba naha e ’ngoe ba sa tsoa etsa joang ka boiteko ba ho tšosa Lipaki tsa Jehova? (b) Liphihlelo tsee li hlile li bontša eng?
13 Haufinyane naheng e ’ngoe ea Europe moo mosebetsi oa Lipaki tsa Jehova o seng molaong, ho ile ha tšoaroa moena ka hore a bee puo ea Bibele e khutšoanyane le e tšelisang phupung. Le moena ea ileng a rapela a tšoaroa. Babusi ba sebaka seo ba bolela hore batho feela ba ka fanang ka puo liphupung ke ba lumelletsoeng ke ’Muso, le hore thapelo e haneloa hobane “thapelo e ka sebelisoa ho ruta.” Moena e mong hona sebakeng seo a tšoaroa hobane o ne a bala Bibele le lelapa la hae. Baena bana ha baa ka ba qosoa. Ba tšoaroa ka nakoana eaba baa lokolloa. Ho ne ho totobetse hore sepheo ke ho ba tšosa e be baa tlohela.
14 Empa hantle-ntle ba boi ke bomang? Haeba babusi ba sebaka ba tšosoa ke monna ea ballang lelapa la hae Bibele kapa moena ea fanang ka puo kapa ea etsang thapelo phupung, ruri ba tšohile molaetsa oa Bibele le ba o bolelang! E be re ka ba tšoha hobane’ng? Joalokaha Pauluse a bontšitse, ho kopana ha rōna le sebete sa rōna “ho bona ke pontšo ea tšenyeho, empa ho lōna ke ea poloko.”—Ba-Filippi 1:28.
15. Ke joang boitšoaro ba rōna ha re tšosoa bo ka hlang ba e-ba le phello ho tsoeleng pele ha mahloriso?
15 Libakeng tse ling bahoeletsi ba ‘litaba tse molemo’ ba biletsoa sepoleseng hang kamorao ho libeke tse itseng ho ea sosotheloa ’me ba tšosoa ka hore ba tla fumana kotlo e kholoanyane ha ba sa khaotse ho bua ka ’muso oa Molimo. Empa hangata ha baena le likhaitseli ba hlokomoloha litšokelo ’me ba tsoela pele ka mosebetsi ba sa tšabe, babusi baa tela ’me ba ba lese. Leha ho le joalo, ha ba bona bopaki leha e le bofe ba bofokoli ho bahoeletsi ba ’Muso, ba tsoela pele ka boiteko ba bona ba ho ba tšosa.
Ho Tsoela Pele Tlas’a Thibelo
16, 17. (a) Ho entsoe boiteko bofe hore lijo tsa moea li fihle ho baena libakeng tseo mosebetsi o thibetsoeng, le ho ba literonkong? (b) Ke hobane’ng ha hona e le habohlokoa?
16 Lipaki tse linaheng tseo mosebetsi o thibetsoeng ho tsona le tseo ho haneloang hore libuka tsa tsona li tsamaisoe ho tsona li ananela bohlokoa ba ho fumana lijo tsa moea kamehla. Kaha Molula-Qhooa kapa libuka tse ling tsa Lipaki tsa Jehova li ke ke tsa hatisoa ka molao le ho romeloa ntle linaheng tse ling, ho etsoa litokisetso tse ling ho bona hore lijo tsa moea li fihla ho e mong le e mong. Jeremane, mahlorisong a neng a etsoa tlas’a Hitler ho ne ho ngoloa lihlooho tse ithutoang ka mechine ea li-“typewriter,” e be ho etsoa tse ngata ka mochine o etsang likopi tse ngata ’me mabakeng a mang ho ne ho ngoloa ka letsoho. Hona ho tlameha ho etsoa hape libakeng tse ngata kajeno. Haeba ho ke ke ha etsetsoa e mong le e mong kopi ea hae, lia neheletsanoa e le hore e mong le e mong a ka fumana monyetla oa ho bala taba. Ntho ea bohlokoa ke ho ja lijo tsa moea ka mehla.—Mattheu 4:4.
17 Ho bonahala hore ka mehla Jehova o tsamaisa litaba hore lijo tsa moea li fete le har’a maemo a thata haholo. Ho ’nile ha sebelisoa mekhoa e sa tšoaneng ho li kenya ka lenyele ka literonkong le likampong tsa mahloriso. ’Me tsa ipaka e le tse tiisang ba koalletsoeng moo hakaakang!
18. Ke hobane’ng ha e le habohlokoa ho nahana ka lijo tsa moea hammoho le ba bang kamehla, ’me hona ho ka etsoa joang le tlas’a maemo a thata?
18 Haeba ho ka etsahala, bahlanka ba tšepahalang ba Molimo ba kopanela lijo tsa moea hammoho kamehla—leha liboka li thibetsoe, leha ba kentsoe litlamong. Haeba ho ka etsahala ho buisanoa hammoho ka temana ea letsatsi tsatsi le leng le le leng ’me ho sebeletsa ho lokisa kelello litabeng tsa moea. Le puisano e khutšoanyane tsatsi le leng le le leng e fana ka matla a maholo a moea.—Pesaleme ea 1:2; Liketso 17:11.
Bohlokoa ba Liboka
19. (a) Baena ba rōna ba bangata ba bile le phihlelo efe Liberia? (b) Ho ea ka tlaleho ea 1977 Yearbook, ba tšepahalang ba thusitsoe ke eng ho mamella?
19 Ka Tlhakubele 1963, Gbarnga, Liberia, batho ba ka bang 400 ba neng ba le teng kopanong ea setereke ea Lipaki tsa Jehova ba feresoa ’me ba tšoaroa ka matsatsi a mane ho se lijo kampong ea sesole. Ka boiteko ba ho ba qobella ho sekisetsa seo ba se lumelang le hore ba lumelise folaga ea Liberia. Lipaki tsa tšoaroa hampe ’me tsa tlatlapuoa thepa ea tsona. Le hoja ba ’maloa ba ile ba sekisetsa ka baka la tšabo, bongata ba tšepahala. hlokomela tlhaloso e entsoeng ho 1977 Yearbook of Jehovah’s Witnesses, leqepheng la 176: “E ne e le ba lihlopha tsohle, ba sa rutehang le ba rutehileng haholo. Ba bileng sehlopheng sa ba tšepahetseng e ne e le ba bang teng libōkeng ka botšepehi.”
20. Ba bangata ba iteka ka matla joang ‘hore ba se ke ba ngala ho phutheha hammoho,’ le teng e le har’a likotsi life?
20 Lentsoe le bululetsoeng la Molimo le re eletsa hore re se ke ra ngala ho phutheha hammoho. (Ba-Heberu 10:24, 25) Bohlokoa ba sena ha bo theohe linakong tsa mahloriso. Ho ka ’na ha tšoaroa liboka ka lihlotšoana malapeng a batho; ho ka ’na ha fetoloa libaka le nako ’me mohlomong li ke ke tsa e-ba mocheng o motle kamehla, liboka tse ling li tšoaroa bosiu haholo. Empa, ho sa tsotellehe likotsi, baena ba rōna le likhaitseli ba tšepahalang ba iteka kahohle hore ba be teng sebokeng se seng le se seng. ’Me baena ba lumela hore matlo a bona a sebelisetsoe liboka tse Joalo le hoja ha ba fumanoa ba ka lahleheloa ke bolokolohi.
21. (a) Ke menyetla efe e teng ea ho fumana molemo o feletseng ka lijo tsa moea tlas’a maemo a joalo? (b) Ke mangolo afe a bontšang bohlokoa ba ho ba teng libokeng kamehla le ho nka karolo libokeng tse joalo?
21 Ho bōkana ka lihlotšoana mohlomong ho ke ke ha lumella hore bohle ba fumane molemo oa baruti ba batle haholo ba phutheho, empa monyetla o moholo haholoanyane hore e mong le e mong a nke karolo ’me kahoo a fumane ho hongata libokeng. Ka linako tse ling, lihlopha tse kholoanyane li ka ba hammoho mabapi le lipikniki, ho hahloa ke moea, kapa ka nako e ’ngoe ka ho mengoa ke e mong. Ho ba teng kamehla libokeng tsohle ke habohlokoa hore ba ‘tiisetse ho fihlela la bofelo ho seo e leng motheo oa tšepo ea bona,’ e le hore ba ka ’na ba tšepahala le ho bona ho phethahala ha litšepiso ka ho ‘se khathale.’—Ba-Heberu 3:14; 10:36; Ba-Galata 6:9.
Ho Bolela Har’a Thibelo
22. (a) Ke hobane’ng ha batho ba Molimo kajeno ba ke ke ba lesa ho bua ka lintho tseo ba li boneng le ho li utloa? (b) Hona ho phethahatsoa joang libakeng tse ling?
22 Joaloka baapostola, kajeno batho ba Jehova ‘ba ke ke ba lesa ho bua ka lintho tseo ba li boneng le tseo ba li utloileng.’ (Liketso 4:20) Jesu o boletse hore “e ka khona Evangeli e bolelloe lichaba tsohle,” ’me ha ho boemeli bofe kapa bofe ba motho kapa ba bademona bo ka thibelang sena. (Mareka 13:10) Libakeng tse ling, le hoja mosebetsi oa lipaki tsa Jehova o thibetsoe, ho bonolo ho ea ka ntlo le ntlo u le motho feela ea sebelisang Bibele feela.
23, 24 (a) Mosebetsi oa ho bolela o etsoa joang libakeng tseo mosebetsi oa ntlo le ntlo e seng bohlale ho o etsa? (b) Na u ka pheta liphihlelo tse bontšang hore litholoana tse molemo li fumanoe ka tsela ee?
23 Moo ho seng bohlale ho ea ka ntlo le ntlo, ‘litaba tse molemo’ li ka boleloa ka litsela tse ling. Ho ka etoa libakeng tse qalikaneng tsa tšimo, e le hore ho se ke ha koaheloa mehaho ka ho latellana. Empa ha ho hlokahale hore re eme ho fihlela ha batho ba le ka matlung. Baena ba rōna linaheng tse ngata ba atleha haholo ka ho buisana le batho kae le kae moo ba ba fumanang—literateng, litšeng tsa mabitla le libakeng tsa boikhathollo, kapa ha ba le maetong. Ba bang ba bile ba eta e le mehahlaula ho ea libakeng tseo Lipaki li leng sieo, ’me ha ba le moo ba qala meqoqo le batho kae kapa kae moo ho khonehang. Ho hang ha ho tsela eo ka eona sera se ka re thibelang ho bua le batho ka litsela tsena tse sa tšoaneng, ha feela re sa phefumoloha le batho ba le teng bao re ka buang le bona.
24 Ka ho itloaetsa, batho ba Jehova ba hlalefetse ho qala meqoqo ea botsoalle ka litaba tse ngata, ka ho loketseng ba lebisa puisano Bibeleng. Paki ea naha e ’ngoe ea atamela banyalani serapeng sa boikhathollo ha ba ntse ba e-noa metsi phorohloaneng. Paki ea ba botsa hore na ha ba rate ho tseba moo ho nang le metsi a molemo. Ka ho rialo, ea qala ho ba bolella ka metsi a phelisang Paradeiseng e tlang, ’me ba buisana ka lihora tse tharo. Hona ha tsoala thuto ea Bibele, ’me kamorao ho likhoeli tse tharo banyalani ba qala ho kopanela tšebeletsong ea tšimo. Selemo hamorao, ba kolobetsoa ka bobeli ’me hamorao monna a sebeletsa e le mohlanka ea sebeletsang ka phuthehong.—Bapisa Johanne 4:7-15.
25. Re lokela ho leka ho qoba eng, haholo moo ho bolela ha rōna ho haneloang?
25 Tšebetsong ena eohle ke bohlale ho qoba ho thulana ka ho toba le bahanyetsi. Hape, ho hlokahala re be masene hore re se ke ra nea sera litaba tsa bohlokoa ha se leka ho re hapa ka puo ea botsoalle le e thetsang. Re rata ho hopola keletso ea Jesu: “Bonang, ke le roma le le joale ka linku har’a liphiri; ka baka leo, le be bohlale joale ka linoha, ’me le be ba se nang mano joale ka maebana-khoroana.” (Mattheu 10:16) Pauluse o sa eletsa: “Ha ho ka etsoa, ’me ha e le ka lōna, le lule ka khotso le batho bohle.”—Ba-Roma 12:18.
Litholoana tse Ntle tsa ho Tšepahala
26. Litholoana tse ling tse ntle tsa ho tšepahala har’a mahloriso a matla ke life?
26 Bohle ba ’nileng ba tšepahala har’a mahloriso a tšabehang ba fane ka bopaki bo tsotehang hakaakang ka lilemo-lemo! Boiteko bohle ba Diabolose le baemeli ba hae ba ho thibela ho paka bo felletse ka bopaki bo boholoanyane tlotlisong ea lebitso la Jehova. ’Me ke karolelano e babatsehang hakaakang eo bohle ba likete, e, ba limillione, ba tšepahetseng (’me ba ntse ba tsoela pele) ho tšepahala ba bileng le eona ho sa tsotellehe mahloriso a mabe, joale ba bontša Diabolose hore o leshano ’me ba bontša tumelo ea bona e tiileng ho Jehova le hore baa mo rata!
27. Re utloa melemo efe ea botho ka ho mamella liteko le mahloriso ka botšepehi?
27 Ha re mamella ka botšepehi, letsoalo la rōna lea khutsa, re tseba hore re entse se nepahetseng le hore re amoheloa ke Jehova. Hona ho tiisa tšepo ea rōna, ’me eona e eketsa thabo ea rōna. Tumelo ea rōna e ne e beiloe tekong, ’me kaha ha rea ka ra checha kapa ra baleha mahloriso, Jehova a re thusa ho mamella. Ka baka leo, tumelo ea rōna joale e matla haholoanyane ho feta pele. ‘Tumelo e lekiloeng’ ea rōna e re etsa ba molemo ho thulana le liteko kamoso.—1 Petrose 1:6, 7.
28. (a) Ke mabaka afe a thabo ao khaitseli ea boletsoeng nakong e fetileng oa Lefinne a nang le oona hona joale? (b) A ka tšepa eng ho ea pele?
28 Khaitseli ea boletsoeng sehloohong se etellang sena pele o fumane bonnete ba sena. O boetse o phela motseng oa habo moo a ’nileng a sebeletsa e le pulamaliboho oa kamehla (’moleli oa nako e tletseng oa ’Muso) ka nakoana joale. Le hoja a sa abeloa bana ba hae ba banyenyane ba bararo, o lumelloa ho ba bona hararo ka khoeli, ’me o na le hona ho ba abela ‘litaba tse molemo,’ ka karabelo e khothatsang. Hona ke mang ea tsebang hore na ho tla hlaha eng? Ho na le litaba tse ngata haholo tseo ho tsona bahanyetsi ba mabifi le bahlorisi ba ileng ba khahloa ke boemo bo tšepahalang ba baena ba rōna le likhaitseli hoo ba ileng ba susumeletseha ho ichebela ka Bibeleng, ’me ba bang ba qetella e le barapeli ba Jehova.
29. Bohle re khothatsoa ke eng ho ea pele hore re tšepahale le ho nyakalla har’a mahloriso?
29 Jakobo o ngolile: “Nkang mohlala oa mahlomola le oa sebete ho baprofeta ba buileng ka lebitso la Morena. Bonang, re rorisa lehlohonolo la ba mameletseng.” (Jakobo 5:10, 11) Ka mehlala e meng e metle ea Bakreste ba lekholong la pele la lilemo le ba mehleng ea joale, kaofela re khothatsoa haholo ho tšepahala har’a mahloriso.
[Setšoantšo se leqepheng la 16]
Jesu o itse: “Ba ntlo ea motho e tla lira tsa hae”
[Setšoantšo se leqepheng la 18]
Lipaki tsa Jehova ha li emise ho bolela leha li thibetsoe