2 Samuél

6 Daud ngumpulkeun deui pasukan nu panghébatna di Israél, nu jumlahna 30.000 urang. 2 Geus kitu, maranéhna indit ka Baalé-yéhuda rék mawa peti perjangjian Allah nu sajati.+ Di tempat ayana éta peti, jalma-jalma nyebut nami Yéhuwa, pangawasa pasukan sorga,+ nu diuk dina tahta luhureun* kérub-kérub.+ 3 Ku maranéhna peti perjangjian Allah nu sajati téh dimuatkeun kana padati anyar+ pikeun dipindahkeun ti imahna Abinadab+ nu aya di pasir.* Nu ngarahkeun padati téh Uzza jeung Ahio, anak-anakna Abinadab.

4 Jadi, maranéhna mindahkeun peti perjangjian Allah nu sajati ti imahna Abinadab nu aya di pasir. Ahio leumpang hareupeun peti. 5 Daud jeung sakabéh urang Israél ngarayakeun éta kajadian hareupeun Yéhuwa bari maénkeun rupa-rupa alat musik tina kai juniper, harpa, alat musik séjénna nu maké senar,+ rabana,+ kecrék, jeung simbal.+ 6 Tapi barang maranéhna nepi ka tempat ngirik* Nakon, Uzza nyekel jeung nahan peti perjangjian Allah nu sajati,+ da peti téh ampir tiguling gara-gara éta sapi-sapi. 7 Ku kituna, Yéhuwa ambek pisan ka Uzza. Uzza dipaéhan+ ku Allah nu sajati lantaran tindakanana kurang ajar.+ Manéhna maot di dinya kénéh, gigireun peti perjangjian Allah nu sajati. 8 Tapi, Daud jadi ambek lantaran Yéhuwa ngabudalkeun amarah-Na ka Uzza. Ku kituna, éta tempat disebut Péréz-uzza* nepi ka ayeuna. 9 Poé éta, Daud jadi sieuneun ka Yéhuwa.+ Ceuk manéhna, ”Ari kieu mah kumaha kuring rék mawa peti perjangjian Yéhuwa ka tempat kuring?”+ 10 Daud embungeun mawa peti perjangjian Yéhuwa ka tempatna di Kota Daud.+ Tapi, Daud nitah supaya éta peti dibawa ka imahna Obéd-édom+ urang Gat.

11 Peti perjangjian Yéhuwa tetep aya di imahna Obéd-édom urang Gat salila tilu bulan. Yéhuwa terus ngaberkahan Obéd-édom jeung saeusi imahna.+ 12 Aya nu ngalapor kieu ka Raja Daud, ”Yéhuwa geus ngaberkahan saeusi imahna Obéd-édom jeung sagala pangabogana lantaran peti perjangjian Allah nu sajati aya di imahna.” Jadi, manéhna indit tuluy mindahkeun peti perjangjian Allah nu sajati ti imahna Obéd-édom ka Kota Daud bari suka bungah.+ 13 Sanggeus nu ngagotong+ peti perjangjian Yéhuwa leumpang genep léngkah, Daud ngurbankeun sapi hiji jeung anak sapi nu lintuh hiji.

14 Daud ngigel kacida sumangetna hareupeun Yéhuwa bari maké* éfod* tina linén.+ 15 Daud jeung sakabéh urang Israél mawa peti perjangjian+ Yéhuwa bari sarurak gumbira+ sarta diiring ku sora tarompét tanduk.+ 16 Tapi barang peti perjangjian Yéhuwa nepi ka Kota Daud, Mikhal+ anak Saul nu awéwé nempo ka handap tina jandéla, rét ningali Raja Daud igel-igelan jeung ajrug-ajrugan hareupeun Yéhuwa. Di jero haténa, Mikhal jadi ngarendahkeun Daud.+ 17 Peti perjangjian Yéhuwa dibawa tuluy diteundeun di jero kémah nu geus dipasang ku Daud.+ Sanggeusna, Daud ngabaktikeun kurban beuleuman+ jeung kurban karukunan+ ka Yéhuwa.+ 18 Bérés ngabaktikeun kurban beuleuman jeung kurban karukunan, Daud ngaberkahan jalma-jalma bari nyebut nami Yéhuwa, pangawasa pasukan sorga. 19 Salian ti éta, manéhna gé ngabagikeun roti nu bentukna siga geulang, kuéh korma, jeung kuéh kismis ka sakabéh rahayat, nyaéta sakabéh bangsa Israél, boh lalaki boh awéwé. Geus kitu, jalma-jalma téh baralik ka imahna masing-masing.

20 Waktu Daud balik rék ngaberkahan kulawargana sorangan, Mikhal+ anak Saul manggihan manéhna. Ceuk Mikhal, ”Raja Israél téh mani mulya pisan nya poé ieu. Raja taranjang* hareupeun palayan-palayan awéwé milik bawahan Raja, kawas jelema nu bodo waé!”+ 21 Ngadéngé kitu, Daud némbalan Mikhal, ”Akang ngarayakeun ieu téh hareupeun Yéhuwa, nu geus milih Akang, lain bapa Nyai atawa turunanana. Anjeunna gé geus ngalantik Akang jadi pamingpin Israél, umat Yéhuwa.+ Jadi, Akang rék ngarayakeun ieu hareupeun Yéhuwa 22 bari ngarendahkeun diri. Jadi leuwih rendah ti kieu gé Akang mah daék. Tapi, Akang bakal dimulyakeun ku palayan-palayan awéwé nu disebutkeun ku Nyai.” 23 Ku kituna, Mikhal+ anak Saul teu boga budak nepi ka maotna.