Jabur
Lagu sedih nu dinyanyikeun ku Daud ka Yéhuwa ngeunaan ucapan Kus urang Bényamin.
7 Nun Yéhuwa Allah abdi, ka Gusti abdi nyalindung.
Luputkeun abdi, salametkeun abdi ti kabéh nu nganiaya abdi.
2 Lamun henteu, maranéhna bakal kawas singa nu nyasaak jeung ngagusur abdi.
Engké teu aya nu nyalametkeun abdi.
3 Nun Yéhuwa Allah abdi, lamun abdi salah,
Lamun abdi teu adil,
4 Lamun abdi jahat ka jalma nu bageur ka abdi,
Atawa lamun abdi teu pupuguh ngajarah musuh abdi,*
5 Keun baé abdi diudag-udag jeung ditéwak ku musuh.
Keun baé abdi ditincakan nepi ka maot
Tuluy diantep ngagolépak dina taneuh jadi hina. (Sela)
6 Tulungan abdi, nun Yéhuwa. Gedurkeun amarah Gusti.
Lawan musuh-musuh nu ngamuk ka abdi.
Béla abdi, pasihan kaadilan ka abdi.
7 Keun wéh bangsa-bangsa sina ngepung Gusti,
Da Gusti bakal nyerang maranéhna ti tempat nu luhur.
8 Yéhuwa bakal ngahakiman bangsa-bangsa.
Nun Yéhuwa, waktu abdi diadilan ku Gusti, sing émut kana lalampahan abdi nu bener
Sarta hirup abdi nu bersih.
9 Eureunkeun kagoréngan jalma jahat,
Tapi béla jalma nu bener,
Lantaran Gusti téh Allah nu adil, nu nilik-nilik haté jeung batin.
10 Allah téh taméng abdi, Jurusalamet keur jalma nu haténa bener.
11 Allah téh Hakim nu adil,
Nu ngumumkeun putusan hukum-Na unggal poé.
12 Lamun aya nu embung tobat, Anjeunna ngasah pedang-Na.
Anjeunna ngabengkungkeun busur panah-Na, siap dipesatkeun.
13 Anjeunna nyiapkeun senjata-senjata nu matih.
Panah-panah seuneu diarahkeun ku Anjeunna.
14 Ténjo jalma nu ngararancang kajahatan.
Manéhna rék nyieun masalah sarta ngucapkeun bohong.
15 Manéhna ngagali lombang nu jero,
Tapi nu tigebrus kana lombang éta nya manéhna sorangan.
16 Masalah nu dijieun ku manéhna bakal malik ka dirina sorangan,
Kakejeman nu dilampahkeunana bakal malik ka manéhna.
17 Abdi bakal ngamulyakeun Yéhuwa lantaran Anjeunna adil.
Abdi bakal ngawihkeun pupujian* kanggo nami Yéhuwa Nu Maha Agung.