Kidung Agung
1 Lagu karya Sulaéman nu pangéndahna:*
2 ”Cium abdi ku biwir Engkang,
Sabab kanyaah Engkang téh langkung nyukakeun tibatan cianggur.
3 Minyak seungit Engkang téh meni seungit kaambeuna.
Nami Engkang lir minyak seungit nu dikucurkeun.
Éta sababna para mojang barogoheun ka Engkang.
4 Engkang, candak abdi atuh. Hayu urang angkat.
Abdi téh tos dicandak lebet ka rohangan raja!
Hayu urang cumarita ngeunaan kanyaah Engkang, nu leuwih nyukakeun tibatan cianggur.
Teu héran maranéhna* téh barogoheun ka Engkang.
5 Mojang-mojang Yérusalém, hideung ogé abdi téh geulis.
Hideung lir kémah urang Kédar, tapi éndah lir kémahna Sulaéman.
6 Tong ningalikeun waé pédah abdi hideung.
Abdi hideung téh da kapoé.
Abdi dicarékan ku lanceuk-lanceuk lalaki abdi,
Seug dititah ngurus kebon anggur maranéhna.
Ari kebon anggur abdi sorangan teu kaurus.
7 Duh, Engkang nu dipikacinta pisan,
Engkang téh ngangon domba di mana?
Domba-domba téh dicandak ka mana pas keur panas poé?
Wartosan, ngarah abdi teu aprak-aprakan ka tengah kumpulan dombana réréncangan Engkang
Kawas awéwé nu keur sungkawa.”*
8 ”Hé mojang nu panggeulisna, mun teu terang mah
Sok wéh tuturkeun tapakna domba-domba,
Seug anak-anak embé anjeun téh angon di caket kémahna para pangangon.”
9 ”Enéng anu dipuja-puja ku abdi, Enéng téh geulis ibarat kuda bikang* nu narik karéta Firaun.
10 Pipi Enéng manis ku ayana perhiasan,*
Beuheung éndah ku ranggeuyan manik-manik.
11 Engké Enéng rék dipangdamelkeun perhiasan emas
Nu dihias ku pérak.”
12 ”Waktu raja nyarandé kana méja,
Minyak seungit abdi* kaambeu ka mana-mana.
13 Keur abdi mah kakasih abdi téh lir sakantong emur* anu seungit
Nu aya dina dada abdi sawewengi.
14 Anjeunna téh lir kembang pacar saranggeuy
Nu jaradi di kebon anggur di Én-gédi.”
15 ”Enéng kadeudeuh Engkang, Enéng téh meni geulis.
Enéng meni geulis. Soca Enéng lir mata japati.”
16 ”Engkang kakasih ati abdi, Engkang téh meni kasép, meni pikaresepeun.
Jujukutan nu héjo téh amparan urang duaan.
17 Bumi urang duaan téh hateupna tina kai aras,
Tihang-tihangna tina kai juniper.