Yoél
3 ”Dina mangsa éta,
Waktu Kuring mawa balik urang Yéhuda jeung urang Yérusalém nu ditawan,
2 Kuring gé rék ngumpulkeun sakabéh bangsa,
Rék digiring ka Lebak Yéhosyafat.*
Di dinya, maranéhna ku Kuring rék diadilan
Demi umat Kuring jeung milik Kuring, nyaéta Israél,
Sabab umat Kuring ku maranéhna dipaburencaykeun ka antara bangsa-bangsa.
Nagri Kuring ku maranéhna dibagi-bagi keur maranéhna sorangan.
3 Umat Kuring diundi ku maranéhna.
Budak lalaki dijual, duitna dipaké lacur.
Budak awéwé dijual, duitna dipaké jang meuli cianggur.
4 Éh Tirus, Sidon, jeung sakuliah wilayah Filistia,
Wawanianan maranéh ka Kuring!
Maranéh téh rék ngabales Kuring?
Lamun enya kitu, Kuring gé rék gancang ngabales maranéh satimpal jeung lalampahan maranéh.
5 Maranéh geus ngarampasan pérak jeung emas milik Kuring
Sarta ngakut harta banda Kuring nu aralus ka kuil-kuil maranéh.
6 Maranéh geus ngajual urang Yéhuda jeung urang Yérusalém ka urang Yunani,
Supaya maranéhna jauh ti lemburna.
7 Ayeuna maranéhna ku Kuring rék dibawa balik ti ditu, ti tempat maranéhna dijual.
Kuring rék ngabales maranéh satimpal jeung lalampahan maranéh.
8 Anak-anak maranéh nu lalaki jeung nu awéwé ku Kuring bakal dijual ka urang Yéhuda.
Engké ku maranéhna bakal dijual deui ka urang Syéba, bangsa nu jauh,
Sabab Kuring, Yéhuwa, geus nyebutkeun kitu.
9 Umumkeun kieu ka bangsa-bangsa,
’Siap-siap perang! Gedurkeun sumanget para prajurit!
Para serdadu sina maju jeung ngagempur!
10 Mata-mata wuluku jieunan pedang, péso-péso pangkas jieunan tumbak.
Nu lalemah sina ngaromong, ”Aing kuat.”
11 Éh bangsa-bangsa ti unggal juru, geura karumpul, sok silih bantu.’”
Nun Yéhuwa, utus para prajurit Gusti nu kuat ka dinya.
12 ”Keun éta bangsa-bangsa sina carengkat tuluy daratang ka Lebak Yéhosyafat,
Sabab Kuring bakal diuk ngaadilan bangsa-bangsa ti unggal juru.
13 Sabetkeun arit, sabab panéneun geus siap diala.
Tincakan anggur, sabab pameresan anggur geus pinuh.
Wadah cianggur geus mudal, sabab kajahatan maranéhna geus numpuk.
14 Jalma-jalma di lebak pangadilan meni ngagimbung,
Lantaran di dinya, poé Yéhuwa geus deukeut.
15 Panonpoé jeung bulan bakal jadi poék,
Béntang-béntang bakal pareum cahayana.
16 Yéhuwa bakal ngagaur ti Zion,
Sora Anjeunna ngageleger ti Yérusalém.
Langit jeung bumi bakal aleundeur,
Tapi Yéhuwa bakal jadi panyalindungan keur umat-Na,
Jadi bénténg keur urang Israél.
17 Maranéh bakal nyaho yén Kuring téh Yéhuwa Allah maranéh, nu matuh di Zion, gunung Kuring nu suci.
Yérusalém bakal jadi tempat nu suci.
Urang asing moal asup deui ka dinya.
18 Dina poé éta, cianggur amis bakal nyakclakan ti gunung-gunung,
Susu bakal ngocor ti pasir-pasir,*
Kabéh walungan di Yéhuda bakal loba caina.
Cinyusu bakal ngocor ti bumina Yéhuwa,
Tuluy nyaian Lebak* Akasia.
19 Ari Mesir bakal kalantar,
Édom bakal jadi tanah gurun nu diculkeun,
Sabab maranéhna geus kejem ka urang Yéhuda
Sarta geus maéhan jalma-jalma nu teu salah di nagri Yéhuda.
20 Ari Yéhuda mah bakal terus dicicingan,
Kitu deui Yérusalém, ti génerasi ka génerasi.
21 Maranéhna* moal dianggap salah deui ku Kuring.
Yéhuwa bakal matuh di Zion.”