Surat nu Kahiji keur Sidang Jamaah di Korintus

1 Ti Paulus, nu dipilih jadi rasulna+ Isa Al-Masih* ku kahoyong Allah, jeung ti Sosténés dulur urang kabéh, 2 ka sidang jamaah Allah di Korintus,+ nu geus disucikeun pikeun ngahiji jeung Isa Al-Masih+ sarta geus dipilih jadi jalma-jalma suci.* Ieu surat gé ditujukeun ka sakabéh jalma di mana-mana nu nguarkeun nami Isa Al-Masih, Juragan urang+ jeung Juragan maranéhna.

3 Mugia aranjeun narima welas asih nu taya bandingna* jeung katengtreman ti Allah, Bapa urang, kitu deui ti Juragan Isa Al-Masih.

4 Kuring teu eureun-eureun muji sukur ka Allah lantaran aranjeun geus narima welas asih-Na nu taya bandingna ku jalan Isa Al-Masih. 5 Lantaran geus ngahiji jeung Al-Masih, aranjeun narima sagala hal, matakna aranjeun bisa tarampil dina nguarkeun firman Allah sarta paham pisan kana firman Allah.+ 6 Éta tandana warta hal Al-Masih+ téh geus nanceb pageuh dina diri aranjeun. 7 Ku kituna, aranjeun teu kakurangan kurnia naon-naon salila aranjeun ngarep-ngarep waktuna Isa Al-Masih Juragan urang nunjukkeun kawasana.+ 8 Allah gé bakal nguatkeun aranjeun nepi ka ahir, supaya waktu datang poéna Isa Al-Masih Juragan urang,+ moal aya nu bisa nuduh aranjeun. 9 Allah téh satia,+ sarta Anjeunna nu milih aranjeun pikeun babarengan jeung Putra-Na, Isa Al-Masih Juragan urang.

10 Dulur-dulur, ku nami Isa Al-Masih Juragan urang, kuring ngajurung supaya omongan aranjeun sajalan, ulah béda-béda.+ Aranjeun gé ulah papecah, tapi kudu bener-bener sapaham sapikiran.+ 11 Dulur-dulur, kuring dibéjaan ku kulawarga Khloé yén aranjeun téh osok pagétréng. 12 Maksudna kieu, aya nu ngomong, ”Urang muridna Paulus.” Nu séjénna ngomong, ”Urang mah muridna Apolos.”+ Nu séjén deui ngomong, ”Urang muridna Kéfas.”* Aya ogé nu ngomong, ”Urang muridna Al-Masih.” 13 Sidang jamaah Al-Masih téh kabagi-bagi, kitu? Lain Paulus pan nu dipaéhan dina tihang demi aranjeun? Aranjeun dibaptis téh ku ngaran Paulus, kitu? 14 Sukur ka Allah, kuring teu ngabaptis aranjeun saurang-urang acan kajaba Krispus+ jeung Gayus,+ 15 jadi euweuh nu bisa ngaku-ngaku dibaptis ku ngaran kuring. 16 Salian ti éta, kuring gé ngabaptis kulawargana Stéfanas.+ Sainget kuring mah ngan maranéhna nu dibaptis ku kuring téh. 17 Kuring diutus ku Al-Masih lain keur ngabaptis, tapi keur nguarkeun warta hadé.+ Sanajan kitu, kuring teu maké kekecapan jalma nu palinter, ngarah maotna Al-Masih dina tihang siksaan* téh teu percumah.

18 Keur jalma-jalma nu bakal binasa, warta ngeunaan tihang siksaan* téh omong kosong,+ tapi keur urang nu bakal salamet mah éta téh bukti kawasa Allah.+ 19 Aya ayat nu nyebutkeun, ”Kabijaksanaan ti jalma bijaksana ku Kuring rék dileungitkeun, sarta kapinteran ti jalma palinter ku Kuring rék ditolak.”*+ 20 Cik, mana jalma bijaksana téh? Mana ahli Torét* téh? Mana nu jago débat di ieu dunya?* Pan geus dibuktikeun ku Allah yén kabijaksanaan dunya téh kabodoan. 21 Lantaran ngandelkeun kabijaksanaan sorangan,+ jalma-jalma di ieu dunya teu kenal ka Allah.+ Tapi warta nu ku dunya dianggap euweuh gunana,+ ku Allah dipaké pikeun nyalametkeun jalma-jalma nu percaya kana éta warta. Ku cara kitu, kabukti yén Allah téh bijaksana.

22 Urang Yahudi marénta tanda,+ urang Yunani naréangan kabijaksanaan, 23 ari urang kabéh mah nguarkeun warta ngeunaan Al-Masih nu dipaéhan dina tihang. Éta warta hésé ditarima ku urang Yahudi, jeung dianggap euweuh gunana ku bangsa-bangsa séjén.+ 24 Tapi, keur urang Yahudi jeung urang Yunani nu dipilih mah Al-Masih téh bukti kawasa jeung kabijaksanaan Allah.+ 25 Hal-hal ti Allah téh dianggap bodo jeung lemah ku manusa, padahal éta téh leuwih bijaksana jeung leuwih kuat tibatan maranéhna.+

26 Dulur-dulur, aranjeun bisa ningali yén di antara aranjeun nu dipilih, teu loba nu bijaksana dina pandangan manusa,+ teu loba nu boga kawasa, jeung teu loba nu asalna ti kulawarga bangsawan.+ 27 Tapi, naon nu ku dunya dianggap bodo téh ku Allah dipilih pikeun ngéra-ngéra nu bijaksana. Nu ku dunya dianggap lemah, ku Allah dipilih pikeun ngéra-ngéra nu kuat.+ 28 Nu ku dunya dianggap teu penting, disapirakeun, jeung teu dihargaan, ku Allah dipilih pikeun ngancurkeun nu dihargaan ku ieu dunya,+ 29 supaya euweuh nu bisa ngagulkeun diri hareupeun Allah. 30 Nya ku lantaran Allah, ayeuna aranjeun ngahiji jeung Isa Al-Masih téh. Al-Masih némbongkeun kabijaksanaan Allah ka urang. Nya ku jalan anjeunna, urang dianggap bener,+ disucikeun,+ jeung dibébaskeun ku tebusan.+ 31 Ku kituna, ieu ayat laksana, ”Mun rék agul, kudu agul ku karana Yéhuwa.”*+