Pamindo

34 Geus kitu, Musa indit ti Gurun Keusik Moab ka Gunung Nébo, nyaéta ka puncak Pisga, nu nyanghareup ka Yérikho. Di dinya, Yéhuwa némbongkeun sakuliah tanah ti Giléad nepi ka Dan, 2 sakuliah tanah Naftali, tanah Éfraim jeung Manasyé, sarta sakuliah tanah Yéhuda nepi ka laut beulah kulon,* 3 Négéb, Wilayah Yordan, lebak Yérikho, nyaéta kota nu loba tangkal palemna, nepi ka Zoar.

4 Geus kitu, Yéhuwa nyarios ka manéhna, ”Ieu tanah nu ku Kuring dijangjikeun ka Ibrahim, Ishak, jeung Yakub. Kuring geus sumpah rék mikeun ieu tanah ka turunan maranéhna. Manéh ku Kuring diidinan nempo ieu tanah, tapi manéh moal bisa meuntas ka ditu.”

5 Tuluy, Musa hamba Yéhuwa maot di dinya di tanah Moab, sakumaha nu diucapkeun ku Yéhuwa. 6 Musa ku Anjeunna dikuburkeun di lebak di tanah Moab, nu nyanghareup ka Bét-péor. Nepi ka ayeuna, euweuh nu nyaho di mana kuburanana. 7 Musa maot umur 120 taun. Panonna cékas kénéh, awakna gé kuat kénéh. 8 Salila 30 poé, urang Israél sungkawa sarta nyeungceurikan Musa di Gurun Keusik Moab. Sanggeus 30 poé, maranéhna teu nyeungceurikan Musa deui.

9 Yosua anak Nun téh bijaksana pisan, lantaran Musa geus numpangkeun leungeunna ka manéhna. Urang Israél narurut ka manéhna sarta ngalampahkeun naon nu diparéntahkeun ku Yéhuwa ka Musa. 10 Di Israél, teu pernah aya deui nabi saperti Musa, nu sakitu raketna jeung* Yéhuwa. 11 Ku paréntah Yéhuwa, Musa némbongkeun tanda-tanda jeung mujijat-mujijat di tanah Mesir, nyaéta ka Firaun, sakabéh bawahanana, jeung ka sakuliah nagrina. 12 Ku kakuatan nu hébat jeung kawasa nu gedé, Musa némbongkeun éta kabéh di hareupeun sakabéh urang Israél.