Titus
3 Terus ingetan dulur-dulur pikeun tunduk jeung taat ka pamaréntah sarta pangawasa, siap ngalampahkeun sagala nu hadé, 2 ulah ngagogoréng batur, jeung ulah nyiar pipaséaeun, sabalikna kudu daék ngéléhan jeung bener-bener lemah lembut ka kabéh jalma. 3 Tadina urang kabéh gé teu boga pangarti, teu taat, disasabkeun, diperbudak ku rupa-rupa kahayang jeung kasenangan, terus ngalampahkeun nu goréng, sirikan, pikageuleuheun, sarta silih pikangéwa.
4 Tapi Jurusalamet urang, Allah, bageur jeung nyaah ka umat manusa, 5 lain lantaran urang geus ngalakukeun nu bener, tapi lantaran Anjeunna welas asih. Anjeunna nyalametkeun urang ku cara ngabersihkeun urang supaya urang hirup, jeung ku cara ngagunakeun kawasa suci-Na supaya urang dianyarkeun. 6 Anjeunna ngalimpahkeun* kawasa éta ka urang ku jalan Isa Al-Masih, Jurusalamet urang, 7 supaya sanggeus urang disebut jalma bener ku lantaran welas asih-Na nu taya bandingna,* urang jadi ahli waris nu boga harepan hirup langgeng.
8 Kekecapan ieu bisa dipercaya, ku kituna kuring hayang manéh terus nandeskeun hal-hal ieu, supaya jalma-jalma nu percaya ka Allah bisa terus mikirkeun carana ngalakukeun kahadéan. Hal-hal ieu téh alus jeung méré mangpaat ka manusa.
9 Ulah pipilueun ngaributkeun hal-hal nu euweuh gunana jeung silsilah, atawa cékcok jeung paséa ngeunaan Torét, sabab éta kabéh téh euweuh mangpaatna jeung percumah. 10 Lamun aya nu nyebarkeun pangajaran séjén jeung geus dibéré naséhat* dua kali tapi teu ngagugu, jauhan manéhna, 11 lantaran jalma nu siga kitu téh geus nyimpang tina jalan nu bener, geus nyieun dosa, jeung kabukti salah ku kalakuanana sorangan.
12 Waktu kuring ngutus Artémas atawa Tikhikus datang ka manéh, usahakeun supaya manéh datang ka kuring di Nikopolis, lantaran kuring geus mutuskeun rék cicing di dinya salila usum tiris. 13 Urus sagala kaperluanana Zénas, nu apal pisan kana Torét, ogé kaperluanana Apolos, supaya maranéhna teu kakurangan nanaon dina perjalanan. 14 Dulur-dulur urang kudu diajar pikeun terus ngalakukeun kahadéan, supaya bisa nulungan lamun aya nu bener-bener butuh bantuan, ku kituna maranéhna bisa terus ngahasilkeun kahadéan.*
15 Kabéh nu aya di dieu ngirim salam keur manéh. Pangnepikeun ogé salam kuring ka dulur-dulur saiman nu nyaah ka urang-urang.
Mugia welas asih Allah nu taya bandingna* nyarengan aranjeun kabéh.