Sobat-sobat Allah Ngalampahkeun Kahadéan

Upami Sadérék gaduh sobat anu dipikaresep sarta dipikahormat ku Sadérék, tangtu Sadérék bakal nyonto anjeunna. Alkitab nyebutkeun yén Yéhuwa téh bageur tur bener. (Jabur 25:8) Sangkan jadi sobat Allah, urang ogé kedah bageur tur bener. Alkitab nyebutkeun, ”Aranjeun . . . kudu nulad ka Mantenna. Hirup kudu dijiwaan ku kanyaah.” (Epesus 5:1, 2) Ieu sababaraha cara pikeun ngalampahkeunana:

Resep mantuan batur. ”Sing getol migawe kahadean ka sing saha bae.”​—Galata 6:10.

Getol digawé. ”Anu geus biasa maling ulah maling deui, anggur singkil [sumanget] digawe nyiar napkah anu jujur.”​—Epesus 4:28.

Ngajaga kaberesihan jasmani ogé moral. ”Urang kudu miceun sagala rereged lahir batin, hirup kudu beresih jeung kudu ajrih ka Allah.”​—2 Korinta 7:1.

Nyaah sarta hormat ka anggota kulawarga Sadérék. ”Aranjeun oge . . . kudu nyaah ka pamajikan saperti ka awak sorangan, unggal pamajikan kudu hormat ka salaki. Barudak! . . . kudu nurut ka kolot.”​—Epesus 5:33–6:1.

Némbongkeun asih ka batur. ”Hayu dulur-dulur urang silih pikaasih, sabab sipat asih teh asal ti Allah.”​—1 Yohanes 4:7.

Taat kana hukum pamaréntah. ”Unggal jelema kudu nurut ka pamarentah . . . Jadi, bayar sakur anu kudu dibayar ka pamarentah, boh pajeg lamun kudu mayar pajeg.”​—Rum 13:1, 7.