Naha Mariam téh Indungna Allah?

Jawaban Alkitab

Lain, Alkitab teu ngajarkeun yén Mariam téh indungna Allah, ogé teu ngajarkeun yén urang Kristen kudu nyembah atawa mumuja Mariam.a Pék pikirkeun:

• Mariam teu pernah ngaku jadi indungna Allah. Alkitab ngajelaskeun yén manéhna ngababarkeun ”Putra Allah”, lainna Allah.​—Markus 1:1; Lukas 1:32.

• Yésus Kristus teu pernah ngomong yén Mariam téh indungna Allah atawa Mariam kudu disembah. Basa aya saurang awéwé nu muji-muji Mariam lantaran geus jadi indungna Yésus, Yésus kalah ka ngomong, ”Leuwih bagja deui jelema anu ngadenge jeung nurut kana timbalan Allah!”​—Lukas 11:27, 28.

• Istilah ”Indungna Allah” jeung ”Theotokos” (Nu ngababarkeun Allah) euweuh dina Alkitab.

• Sebutan ”Ratu Sawarga” dina Alkitab lain pikeun Mariam, tapi pikeun déwi nu disembah ku urang Israil nu murtad. (Yermia 44:15-19) Bisa jadi, ”Ratu Sawarga” téh déwina urang Babul nyaéta Istar (Astarté).

• Urang Kristen nu mimiti teu nyembah Mariam atawa méré kahormatan husus ka manéhna. Saurang ahli sajarah nyebutkeun yén urang Kristen nu mimiti ”embung mumuja manusa jeung bisa jadi sieun disangka nyembah ka saurang déwi lamun Mariam dibéré perhatian nu kaleuleuwihi”.​—In Quest of the Jewish Mary.

• Alkitab nyebutkeun yén Allah téh aya salalanggengna. (Jabur 90:1, 2; Yesaya 40:28) Allah téh teu aya awalna, jadi moal mungkin boga indung. Salian ti éta, Mariam teu bisa ngandung Allah sabab Alkitab ngajelaskeun yén sawarga ogé moal bisa nampung Mantenna.​—1 Raja 8:27.

Mariam téh Indungna Yésus Lain ”Indungna Allah”

Mariam dilahirkeun sabagé urang Yahudi sarta turunan Raja Daud. (Lukas 3:23-31) Manéhna kamanah pisan ku Allah lantaran ngabdi jeung boga iman ka Mantenna. (Lukas 1:28) Allah milih manéhna jadi indung Yésus. (Lukas 1:31, 35) Mariam jeung Yusup, salakina, boga anak-anak séjén.​—Markus 6:3.

Sanajan Alkitab nyebutkeun yén Mariam jadi muridna Yésus, Alkitab teu méré loba katerangan ngeunaan manéhna.​—Rasul 1:14.