2 Samuél

8 Teu lila ti harita, Daud ngéléhkeun jeung nalukkeun urang Filistin.+ Manéhna ngarebut Métég-ama ti urang Filistin.

2 Geus kitu, manéhna ngéléhkeun urang Moab.+ Maranéhna dititah ngagolér bari ngajajar dina taneuh, tuluy panjang jajaran éta diukur maké tali. Dua pertilu ti maranéhna dipaéhan, ari nu sapertiluna mah teu dipaéhan.+ Tuluy, urang Moab dijadikeun palayanna sarta diwajibkeun mayar upeti.+

3 Daud gé ngéléhkeun raja Zoba,+ nyaéta Hadadézér anak Réhob, nu harita téh keur di jalan rék ngarebut deui kakawasaanana di Walungan Éfrat.+ 4 Daud néwak 1.700 prajurit kuda jeung 20.000 prajurit nu leumpang. Tuluy, Daud neukteukan urat suku sakabéh kuda nu narik karéta, tapi aya 100 kuda nu disésakeun.+

5 Urang Siria ti Damaskus+ datang rék mantuan Hadadézér raja Zoba, tapi maranéhna gé diéléhkeun ku Daud. Aya 22.000 urang Siria nu dipaéhan.+ 6 Geus kitu, Daud nempatkeun pasukanna di Siria, nyaéta di kota Damaskus. Urang Siria dijadikeun palayanna Daud sarta diwajibkeun mayar upeti. Ka mana waé Daud indit, manéhna terus dibéré kaunggulan* ku Yéhuwa.+ 7 Salian ti éta, Daud ngarampas taméng-taméng* emas ti para bawahanana Hadadézér, tuluy dibawa ka Yérusalém.+ 8 Raja Daud gé ngakut loba pisan tambaga ti Bétah jeung Bérotai, dua kota milik Hadadézér.

9 Toi raja Hamat+ ngadéngé yén Daud geus ngéléhkeun sakabéh pasukanna Hadadézér.+ 10 Jadi, Toi ngutus Yoram anakna pikeun nanyakeun kabarna Raja Daud sarta ngawilujengkeun ka manéhna nu geus merangan jeung ngéléhkeun Hadadézér (lantaran Hadadézér téh sering merangan Toi). Yoram mawa rupa-rupa barang tina pérak, emas, jeung tambaga. 11 Raja Daud nyucikeun éta barang-barang keur Yéhuwa, sakumaha manéhna geus nyucikeun pérak sarta emas nu dijarah ti bangsa-bangsa nu ditalukkeun ku manéhna,+ 12 nyaéta ti Siria jeung Moab,+ ti urang Ammon, urang Filistin,+ urang Amalék,+ jeung ti raja Zoba, nyaéta Hadadézér+ anak Réhob. 13 Ngaran Daud gé jadi kasohor sanggeus manéhna maéhan 18.000 urang Édom di Lebak Uyah.+ 14 Manéhna nempatkeun pasukanna di sakuliah daérah Édom. Urang Édom dijadikeun palayanna Daud.+ Ka mana waé Daud indit, manéhna terus dibéré kaunggulan* ku Yéhuwa.+

15 Daud ngawasaan sakabéh Israél.+ Manéhna maréntah rahayatna+ ku cara nu adil jeung bener.+ 16 Yoab+ anak Zéruya jadi panglima tentarana, ari Yéhosyafat+ anak Ahilud jadi tukang nyatet. 17 Zadok+ anak Ahitub sarta Ahimélékh anak Abiatar jadi imam, ari Séraya jadi sékertaris. 18 Bénaya+ anak Yéhoyada jadi kapala para pangawal pribadina Daud,*+ ari anak-anak Daud nu lalaki jadi pajabat luhur.*